Ptači kwas 2012 – měznik we wuwiću noweho SLA

Loni su w kole serbskich kwasow Slepjanske kónčiny zabyli, lětsa pak steji Slepjanski kwas w srjedźišću ptačokwasneho zarjadowanja Serbskeho ludoweho ansambla (SLA). A před lětomaj sym ptači kwas SLA w Slepom w tajkej spodźiwnej atmosferje scomter přednjesenej protestnej deklaraciju přećiwo přestrukturowanju ansambla dožwił, zo bě to kaž rozžohnowanje do pohrjeba. Ptači kwas 2012 pak je wuraz noweje epochi na profesionalnym serbskim hudźbnym jewišću – sobuskutkowacy su horliwosć wupružili, kotruž dotal jenož wot lajskich skupin znajemy.

Lětuši ptači kwas je poradźena symbioza klasiskeje temy tutoho tradicionalneho wjerška serbskeho lěta a načasnych konfliktow. Jěwa-Marja Čornakec, za libreto a dramaturgiju přisłušna, je hižo z prjedawšich sezonow jako mišterka kombinowanja starych a modernych elementow znata. A tak móžachmy so jeje nowych impulsow za SLA nadźijeć, po tym zo je so wona z wuwićowej dramaturgowku ansambla stała. Tež Hauke Tesch ze statneho dźiwadła w Choćebuzu, kiž je za režiju lětušeho předstajenja zamołwity, je swoje dźěło wočiwidnje wuběrnje zmištrował. A zo bě program tohorunja rěčnje přikładny, je Roža Šenkarjowa wobstarała. Jim a wšěm sobuskutkowacym dźak a sławu!

Dobra story bjez klišejow je so z Frycom z Choćebuza zahajiła, kiž je zdźědźił žiwnosć zemrěteje wowki a dyrbješe jako jeničke wuměnjenje znajmjeńša jónu we wonym domje přenocować. Při tym je so jemu wjele dźało, takrjec rozswětlenje, a dźakowano holcy ze wsy, kotraž je so porno njemu dlěši čas wo jeho wowku starała, sej swoje „druhe žiwjenje“, to serbske, wotkrywa. A tak wón drje na spočatku z dotalneje zwučenosće němcuje, ale potom delnjoserbsce rěči, a nimo hornjoserbšćiny móžachmy tež rjanu slepjanšćinu słuchać.

Potajkim ptači kwas z rěčnoprogramatiskim akcentom (folklora bjez rěče žadyn zmysł nima), a tomu je so problematika wotbagrowanja brunicy dla přidružiła, wšako nochcyše wowka energijowemu koncernej dom předać. Jeje wnučk drje spočatnje wotpohlad měješe, herbstwo tak chětř kaž móžno wotbyć, zo by sej wón z pjenjezami nowu powołansku eksistencu w Berlinje natwarić móhł. Ale wona holca – Lenka (Anna-Maria Bretschneiderec) – a dožiwjenje serbskosće matej sylny wliw na njeho, a tohodla Fryco (Gerald Schön) dlěje wostanje … Hladajće sami program „Ty sy tajka wikotata“, snadź potom wěsće, štož „wikotata“ rěka .