Nowa perspektiwa za zastupnistwo Serbow

Nichtó drje dokładnu ličbu njeznaje, kelko młodych Serbow je zwonka serbskeho sydlenskeho ruma žiwych. Sam sym jónu trochował, zo je znajmjeńša kóždy třeći mjez młodymi, narodnje aktiwnymi, serbsce rěčacymi ludźimi teritorialnje takrjec w cuzbje, kotraž je jim hustodosć dawno domizna. Druzy praja, zo je jich w młodej serbskej generaciji hižo wjetšina (tule tezu nimo wosobinskich nazhonjenjow w kruhu swójbnych a znatych powšitkownje empiriske sociologiske dopóznaća wobkrućeja, zo su najaktiwniši młodostni statistisce najbóle mobilni, a wědomi Serbja słušeja po kóncu narodnych samozrozumliwosćow k w kóždym nastupanju najbóle aktiwnym ludźom).

Fakt na kóždy pad je: Teritorialnje zakótwjene modele polěpšenja zastupnistwa Serbstwa resp. skrućenja serbskich prawow su přećiwo zajimam młodych Serbow wusměrjene. W Drježdźanach so młode serbske swójby wuspěšnje wo – tež organizatorisce – inowatiwne puće zažnodźěćaceho serbskorěčneho kubłanja staraja. W Mnichowje je młody serbski IT-fachowc wjac za digitalny serbski słowoskład na nohi stajił hač cyłe institucije we Łužicy. W Berlinje serbske dźěći namakaš, kotrež na tak wysokim niwowje ryzy serbsce rěča, zo by je jako rěčnych posołow do jadrowych kónčin pósłać móhł. Młody předsyda Domowiny Dawid Statnik je z pobytom pola Serbow w sakskej a němskej stolicy dawno wažny signal dał.

Wuchadźišćo „serbskeje politiki“ by přichodnje bóle skrućenje młodych nošerjow serbskeje rěče być dyrbjało – wšojedne, hdźež woni bydla.

PS.: Wućah z powěsćow Serbskeho rozhłosa póndźelu 30. wulkeho róžka 2012:

Nowa komisija ma so pod hesłom „Domowina 2025“ z přichodom třěšneho zwjazka zaběrać. To je Zwjazkowe předsydstwo (…) wobzamknyło. Hač do kónca februara maja župy a nadregionalne towarstwa kandidatow namjetować. K tomu předsyda Domowiny Dawid Statnik: „Je Domowina něšto regionalne, jenož na Łužicu wobmjezowane abo smy my tež zastupnistwo Serbow zwonka Łužicy? To je časowy zjaw, kiž so dźeń a bóle stawa, zo nimale wjetšina našeje młodźiny je zwonka Łužicy, hač chcemy jim hłós dać. To su programatiske a eksistencielne prašenja našeho towarstwa, kiž steja a kiž chcemy tež wobjednane měć.“