Matej je so z wulkoměsta w cuzbje do swojeje domizny w Slepom wróćił a chce so serbskej holcy – Lizy – zbližić. Bjez serbskeho lubosćinskeho spěwa to njeńdźe, a kak wón to čini, hačrunjež sam serbsce njemóže, bě na wulkotnym předstajenju zapustoweho programa w Slepjanskim kulturnym centrumje dožiwić. Serbski folklorny ansambl Slepe pod nawodu Wolfgangom Kotisekom ma wjetšej chór a orchester hač Serbski ludowy ansambl a je dźens wječor přihladowarjow na kopaće połnej žurli wobkuzłał.
K programej klasiska folklora runja předstajenju zymskich nałožkow – w srjedźišću běchu holcy na přazy – słušeše, a publikum tež sobu spěwać smědźeše, tři štučki z refrenom: „Camperdi, camperdu, camprować ja z wami cu! Heja, gólcy, comy camprować, camper, camper, camper, camprować.“ 45 sobuskutkowacych lajkow je w rjedźe zarjadowanjow „Nałožki – drasty – tradicije“ znowa pokazało, „što je pola nas z wašnjom“, doniž njeje dujerska kapała „Horjany“ k rejam zahudźiła. A jara dobru kuchnju z přihódnymi płaćiznami za wuběrne jědźe dyrbimy wězo tež chwalić.
Přikładne bě wobchadźenje ze serbskej rěču w regionje, hdźež serbšćina we wšědnym žiwjenju hižo lědma rólu hraje: Nimo serbskich spěwow su woni přeco serbske prajidma a rěčne wobroty do powědanja zapletli. Wuměłske poselstwo bě: Serbšćina je starodostojna drohoćinka, kotruž znajmjeńša za bytostne wěcki a wosebje za wulke začuća trjebaš. Zo su serbske lubosćinske spěwy bóle jimace hač němske, tež hólcy a holcy 21. lětstotka w Slepjanskich kónčinach wědźa. Tak ma Serbstwo tule přichod.
