Archive for Mai 2008

Mój brodaty zwisk k Tilichej

31. Mai 2008

Wšo na swěće wostawa přeco někak w runowaze, je krajnopolitiski korespondent Leipziger Volkszeitung jónu w póndźelnišej kolumnje zwěsćił. A zo by wón swoju tezu na blaku dopokazać móhł, je Tilicha, tehdom hišće minister, a mje do jednoho hornca ćisnył – pod hesłom „broda“: Marcel Braumann je sej wusy rosć dał, a Stanisław Tilich je sej swoje wusy wottruhal. Facit žurnalista: Wšo so wurunowa. Mój dźensniši facit: To je jeničke zjawne zhromadne skutkowanje PDS a CDU w cyle funamentalnej naležnosći było, a to přez ryzy připad J.

Lubowacy wšěch wašnjow, zjednoćće so!

30. Mai 2008

Drježdźany steja na proze tydźenja Christopher Street Day šwulnych, lesbiskich, biseksualnych a transgender ludźi (hlej http://www.csd-dresden.de). Tele dny spominaja na zběžk hosći homoknajpy před třomi lětdźesatkami přećiwo namocy policije. To bě spočatk towaršnostneho hibanja emancipacije čłowjekow, kotřiž su přewažnje seksualnje na jenakosplažne partnerstwo wusměrjeni. Zasadne zaměry gay hibanja su tohorunja w zajimje muža, kotryž ze žonu łožo a chlěb dźěli (a nawopak), wsšako je klučowa tema wuswobodźenje lubosće wot kriterijow konwencijow, wšojedne, hač je to „porjadny“ pochad abo „prawy“ splah.

Sexy turboelektroawto – prošu jara!

30. Mai 2008

Dale a droše ćěriwo za naše awta, dale a mjenje kupneje mocy – potom pyta čłowjek za wupućemi. Dotal njeběchu elektroawta z wida přetrjebarjow runjewon atraktiwne, ale to by móhło so změnić. Wčera je nowy ministerksi prezident twornju baterijow za elektroawta w Kamjencu wopytał. W fabrice je sto sobudźěłaćerjow přistajenych, w přichodźe chcedźa tysac ludźom dźěłowe městna dawać.

 

To pokaza na to, zo so wužiwanje fosilnych energijow za indiwidualnu mobilitu po wjac hač sto lětach ke kóncej chila. Bórze, tak rěkaše nětk w Kamjenskej tworni, móžeš z tajkim awtom dwěsćě kilometrow jězdźić, te nabiwanje po jězbje budźe dwaceći mjeńšin trać. Z tym bych tež jako wšědny dojězdźowar móhł elektroawto wužiwać. Z hladanišća ekonomiskich přićin by to samo radźomne było.

 

Sprawnje prajenje njeje awto jenož srědk za so dale pohibowanje, ale wužiwanja pod wjacorymi aspektami. Awto ma přijomne, spušćomne a wěste być, k tomu so přidruži po móžnosći wěsta dynamika (dosć PS), a nic naposledk: Awto dyrbi sexy być. Jeli by mi pjenježnje dowolene było, bych sej poslednjeje přićiny dla Jaguar kupił, wšako sym jako młody muž jónu pola bohateho znateho-wikowarja w jeho Jaguaru sedźał a so hnydom na čas žiwjenja do tejele limuziny zalubował J.

 

Prjedy płaćachu dieselawta jako zlutniwe, ale poměrnje pomałke, to je zo dźakowano turbodieselej dawno změniło. Hdyž so sakskemu wunamakarstwu poradźi, sexy turboelektroawto koncipować, sym zwólniwy, so wot swojeho dieselawta dźělić – po tym zo budźe wone wotpłaćene, štož hišće kusk traje …

Prěnja serbska demonstracija w němskej stolicy

29. Mai 2008

Po powěsćerni ddp je popołdnju štyrista Serbow, mjez nimi někotři w narodnej drasće, w Berlinje „přećiwo skrótšenju přiražkow“ demonstrowało. Agentura informuje, zo „słowjanska mjeńšina“ w swojich stawiznach prěni raz w němskej stolicy demonstruje. Manifestacija so skónči před Braniborskimi wrotami.

Nowu saksku hymnu chcu ja měć!

29. Mai 2008

Před lětami je projekt pytanja noweje sakskeje hymny zwrěšćił, dokelž namjety njewotpowědowachu wysokim wočakowanjam. To je wězo škoda, wšako so powšitkownje we Sakskej so pěstuje sebjewědomna regionalna identita, a k njej by porjadna hymna słušała! Dźakowano Super-Stanijej J sym nětk na ideju přišoł: Wón je hižo před dlěšim časom na prašenje wulkeje nowiny za najlubšim ludowym spěwom wotmolwił: „Hdźež so módrja, zelenja … naše hory, hajnišća …“ Bohužel je tehdom komjuterski system redakcije tekst dospołnje skomolił, Tilichowe wuznaće je techniku přežadało. To je tola nětk idealna hymna našeho kraja – a techniskemu postupej we wšěch redakcijach a powěsćernjach by wona tohorunja tyła!

Serb w prawicarskej sekće

29. Mai 2008

Na prěnjej stronje Serbskich nowin smědźeše wčera – direktnje pod nastawkom wo nowym serbskim ministerskim prezidenće – Krystof Zarjeńk bjez kritiskeho redakciskeho přispomnjenja za prawicarsku politisku sektu DSU wabić, kotraž je tuchwilu z jednym zapósłancom w Sakskim krajnym sejmje zastupjena – politikarjom, kotryž je so lěta dołho w NPD angažował, na kotrejež wólbnej lisćinje bu do sejma woleny. Hižo zestawa temow jeho małych naprašowanjow pokaza na to, za čo so wón zajimuje.

 

http://www.dsu-deutschland.de/html/abgeordneter.html

 

Wjeršk absurdnosće je wot Serbskich nowin indirektnje citowane wuprajenje, zo chce Zarjeńk ze swojej kandidaturu za DSU „k rozrisanju towaršnostnych problemow přinošować. Při tym njewidźi wón swoju angažowanosć jenož na lokalnu runinu wusměrjenu, ale tež nadregionalnje.“ Kak dyrbi to fungować, wón wězo njepřeradźi, wšako DSU faktisce wonka Sakskeje žanu rólu njehraje a samo we swobodnym staće ma wona srjedźišća z widźomnej ličbu aktiwnych nimale jenož w Bohotskej a Łužicy. Po cyłej Němskej přisłušeja DSU telkow čłonow kaž NPD w Sakskej.

 

Nowiny maja jeho soboskutkowanje w prawicarskej DSU wočiwidnje za wosebje chwalobne a su artiklej wo nim nadpismo dali: „Njeskiwlić, ale angažować“. Sym napjaty, kajke móžnosé politiskeho angažementa hišće puć na prěnju stronu namakaja, na prawym boku politiskeho spektruma je hišće wjele potenciala rozprawnistwa, přetož samo najhórši škarak NPD w sejmje Gansel je jónu w zjawnej debaće Serbow jako přikładnych patriotow a w tym zwisku přikład Němcam wuchwalował. Politiku „wědomych hódnotow“ chce tež Gansel, te prašenje pak je, što za tymi „hódnotami“ poprawom tči.

 Hač do wólbow móhli so serbske medije potajkim hišće stopnjować. Njedawno smy wukli, zo njebě nowinam připołoženy lětak Zwjazka „Dźěło, swójba, wótčina – lisćina Henry Nitzsche“ žane škaranje, ale akceptabelne wabjenje, hačrunjež móžachu serbscy čitarjo na tej cedlce mjez druhim sćěhowacu sadu k wědomju wzać: „Z němskim staćanom móže so jenož tón stać, štóž chce tež Němc być!“

My smy ministerski prezident!

28. Mai 2008

To by tola so hodźace nadpismo dźensnišich Serbskich nowin było, wšako su „Bild“-nowiny składnostnje wuzwolenja Němca za najwyšeho zastuperja katolskeje cyrkwje titulowali: „My smy bamž!“ Wot nětka je Serb ministerski prezident swobodneho stata Sakska: Stanisław Tilich je 66 hłosow w tajnym wothłosowanju dóstał – tři wjac, hač by trěbne było. Přejemy jemu wjele zboža, Bože žohnowanje a wězo krutu strowutu, bjez kotrejež w tym zastojnstwje njewuńdźeš.

 

Tilich je serbsce slubił, funkciju „z Božej pomocu“ wukonjeć. Wón nima to trěbne, so přeco k Serbstwu wuznawać, wšako je wón wěryhódnje z ćěłom a dušu ryzy Serb und kóždy nowinar jemu přisłušnosć k serbskemu ludej připisa, kaž móžeš dźensa we wšěch nowinach čitać.

Komentar direktora serbskeho instituta

27. Mai 2008

k přinoškej „Direktor serbskeho instituta katolskich Serbow hanił“:

https://piwarc.wordpress.com/2008/05/16/direktor-serbskeho-instituta-katolskich-serbow-hanil/#comments

Milbradt nas tola lubuje!

27. Mai 2008

Nowiny čitać kubła J: Milbradt je „nam Serbam přichileny politikar“, zhonichmy při wčerawšej lekturje. Wočiwidnje je wón swoju přichilnosć z tym dopokazał, zo je najbóle serbsku srjedźnu šulu w Chrósćicach a Pančan šulu Ćišinskeho začinił.

Ćěr k smjerći – błudnosć na droze

26. Mai 2008

Kak daloko zdaleni smy my „normalni“ ludźo wot kołwrótnosćow kaž na přikład na awtodroze mjez Budyšinom a Drježdźanami kolesować – wčera při kofeijpiću smy so wo tym rozmołwjeli, zo smy minjene měsacy w medijach wjac króć wo tajkich padach zhonili – abo do wopačneho směra na awtodroze jěć? Freud je wuwučował wo ćěri lubosće a ćěri k smjerći. Lubosćinske požadanje rozpominamy jako wšědny chlěb ćěła a duše, ale štó chce dobrowólnje wumrěć, chiba zo je wón depresiwneje powahi?

 

A čehodla je ćěr k smjerći pola tych najsylniša, kotřiž hišće z połnej paru čerpaja z čěrje lubosće? 18- do 24-lětni awtojězdźerjo po statistice bóle swoje žiwjenje na hrački stajeja hač starši ludźo. Wužiwanje motorskich da so tak a tak poprawom jenož z ćěrju k smjerći wopodstatnić, wšako je tajke wašnje dale so pohibowanja hladajo na njesměrnje wulke riziko ćežko njezbožić objektiwnje ryzy błudnosć. Wjele so rěči wo njenazhonitosći, kotraž pozdatnje zahubnu rólu hraje. Ale to  je jenož poł wěrnosće, wšako su młodši poprawom bóle wušikni a ze strowšimi zmysłami wobdarjeni hač starši.

 

Bych na to sadźił, zo je podźěl wobchadnych smjertnych woporow mjez serbskokatolskimi młodostnymi dokaławokoło Chrósćic hišće wjetši dyžli powšitkownje w ludnosći. Snadź wóni prě jara swjatej Mariji dowěrjeja a pře mało swětnemu rozumej. Hdyž přeco zaso njedźelu na kemšach wo najnowšich katastrofach na našich dróhach słyšiš, so prašeš: Čehodla maja młodźi ludźo, kotřiž do Boha žiwjenja wěrja, tajku sylnu ćěr k smjerći we sebi ?! Bjez zaměrneho přemyslowanja njepomhaja te dopomnjenske křiže na kromje dróhow.