Serbska Łužica trjeba podjansku lěwicu

Tule so njewozjewi ani manifest ani rezolucija, wšako sym aforistiski typ internetneje postmoderneje doby: Te bytostne dyrbi na jednej wobrazowce dosć městna namakać. Nowy zakoń je dokument Jězusoweho socializma, nic w zmysle borněrowanych NDRskich načolnych funkcionarow a jich złóstniskeho statneho ateizma, ale jako wuraz přirodneho, njekonwencionelneho, přećelneho a zawjazowaceho žiwjenja w zhromadnosći. Jeho zaměr njebě naša skostnjena towaršnosć, w kotrejž je smjerćwažne, „što sej ludźo (wo mni) mysla“, abo zo njeje porik do kwasa oficielnje hromadźe žiwy abo kak poddany sy cyrkwinskej a statnej wyšnosći a jeju kaznjam. Tajke wěcki njejsu priority našeje wěry. To nas rozeznawa wot kraloswěrnych Serbow. My chcemy na swoje wašnje žiwi być, na „statoku zboža“. Zo Serbstwo hač do kónca časow traje, je Boža wola. Duch serbskeje rěče je škrička Swjateho ducha, kotryž sej radostnych swědkow wěry přeje, nic wobydlerjow doła sylzow. A wěmy, zo je wjele dobrych humanistow, kotřiž su faktisce lěpši křesćenjo hač my. Filozofija podjanskeje lěwicy, kotraž njeje stronskopolitiska, ale žiwjenskopraktiska ideja, je, takrjec wot deleka – wot serbskeje zemje – na swět hladać, z hladanišća jednotliwca a jeho swójby, kaž je to we Łaćonskej Americe katolska teologija wuswobodźenja w zajimje chudych Indianow činiła. Štóž ma lóšt, sobu dale myslić wo „podjanskej lěwicy“, je kóždy čas witany: marcel@piwarc-hamburgski.de. Njeoficielna centrala podjanskeje lěwicy (z małym spočatnym l, zo njeby nichtón nas zaměnił z bazowymi skupinkami Lěwicy) sedźi tuchwilu we Łuze pod nowej serbskej lipu, mjez centrumami mocy w katolskich Serbach J.

7 Antworten to “Serbska Łužica trjeba podjansku lěwicu”

  1. Pětr Hejduška Says:

    Luby Marcelo, prošu wodaj mi moju njezdźěłanosć, ale što prošu je „podjanska“ lěwica? Pod kotrym Janom, a čehodla pod nim?

    Zo ma wšo wažne na jednej wobrazowce městno namakać, mam za typiske wašnje młodeje „generation fun“, kotraž sebi wjace časa a prócy brać nochce, tróšku do hłubokosće problemow hić. Do tuteho koncepta so tež ta nowina z tymi wulkimi pismikami hodźi, abo te spodźiwne wašnje politiskich diskusijow w telewiziji, zo so politikarjam jenož hišće 90 sekundow daja, zo bychu kompletny stronski program rozłožili. To tež žane eufemizmy kaž „aforistiski typ internetneje postmoderneje doby“ njepomhaja. Swět je w mojimaj wočomaj překomplikowany, hač zo by so wšo do krótkich hesłow komprimować dało, tež hdyž wěste medije to propagowali bychu.

    A što wašnje a formy zhromadneho žiwjenja nastupa, to njech kóždy sebi to pyta a namaka, štož so k njemu najlěpje hodźi – ja móžu „přirodne, njekonwencionelne (?), přećelne a zawjazowace žiwjenje w zhromadnosći“ tež jako njewěriwy, jako ateist wjesć, a nječuju so při tym jako złóstnik. A zo serbuju a so jako Serb čuju a so pola mje w Tübingenje wo našu serbsku skupinku staram, to činju cyle bjeze Swjateho ducha – a nječuju so při tym kaž wobydler někajkeho doła sylzow. Kaž prajene, njech sebi kóždy sam swój puć namaka.

  2. piwarc Says:

    Luby Pětrje,

    dyrbju hišće raz swojeje žony so prašeć, doniž njemóžu ći zdźělić, kajki Jan je to był. Wona je mi to jónu rozkladła, ale z tajkimi stawizničkami je to kaž z poćahami w serbskich wulkoswójbach – to moje mozy přežada :-). Mi dźe přeco prosće wo to, radšo ryzy serbske słowčko město zapřijeća łaćonskeho pochada wužiwać, a tohodla radšo „podjanski“ hač „katolski“.

    Ty maš ze wšěm prawje, to sym hižo z pokiwom na humanistow wobkrućił: Zasadnje móžeš wšitke humanistiske hódnoty „dobreho čłowjeka“ zwoprawdźeć, bjez toho zo sy wědomny křesćan. Tak je so hižo mój najlubši teologa a moderny cyrkwinski wótc Karl Rahner wupraił a w cyrkwi wjele kritiki žnjał. Konserwatiwni widźa w tym podrywanje winowatosće, kóždu njedźelu kemši chodźić …

    Wo čo mi dźe, to je přewinjenje historiskeho pačenja, jowle wěriwi konserwatiwni a tamle njewěriwi postupni ludźo. Ja sym katolski socialist a nimam tajkule kombinaciju za někak eksotisku, ale poprawom za najbóle normalnu :-).

    So wě, zo za swoju serbsku skupinu bjeze Swjateho Ducha wuńdźeš, přetož kóždy, kaž sy rjenje prajił, njech sej swój puć namaka.

  3. piwarc Says:

    Luby Pětrje,

    „podjan“, tak sym w starym słowniku prof. Pfula namakał, pokaza na swjate woprawjenje pod jednym wobličwom. Porno ewangelskim wěriwym je pola katolikow z wašnjom, jenož chlěb (woblatko) přijimać a nic k tomu hišće wino. Wuwzaće je boža mša składnostnje wěrowanja. Tohodla smy my katolikojo „podjanscy“. Dźakowano twojemu prašenju nětk skónčnje wěm, čehodla rěkam podjanski .
    A hišće dodawkaj k twojim přispomnjenjam: Wězo njemóžeš kompleksny swět na jednej wobrazowce dodnić, ale tež nic w stach knihow, cyle wothladajo wot toho, zo je doba uniwersalnych wučencow dawno nimo. Po mojim měnjenju móžemy so wěrnosći jenož w mjezsobnym diskursu přibližić, kotryž lěpje funguje, hdyž kóždy swoje argumenty tak skrótka sformuluje, zo ma rozmołwny partner po čitanju hišće dosć mocy na wotmołwu …
    Njekřesćan być wězo nima nčo činić ze złóstnistwom. Ale hdyž statna wyšnosć kaž w NDR ludźi wěry dla diskriminuje, je to přeńdźenje přećiwo čłowjeskim prawam.

    Luby wječorny postrow
    Marcel

  4. piwarc Says:

    Mjeztym je moja žona domoj přišła a dwěluje na Pfulowej teoriji. Wona je mi 15. zwjazk historisko-etymologiskeho słownika hornjo- a delnjoserbskeje rěče z pjera H. Šewca dała, w kotrymž rěka: Prawdźepodobnje su woni zapřijeće „podjan“ tworili z prepozicionalneho wuraza „pod Janom“. Měnjene je biskop Jan VII. z Mišna, kotryž bě tež přisłušny za Hornju Łužicu. Wón je so w času reformacije wosebje intensiwnje za zdźerženje katolskeje wěry zasadźował.

  5. Pětr Hejduška Says:

    Měj dźak za wobšěrnu wotmołwu! To tola docyła tak daloko preč njeběch wot Jana z mojim prašenjom. Nó haj, a tež hewak nětko tróšku lěpje rozumju, wo čo Ći dźe.

  6. piwarc Says:

    Namaj tola runja Nathanej mudremu wo wšelake duchowne přistupy k humanizmej dźe, a jedyn tajki móže wězo tež młodźinska swjećba w Tübingenje być – radšo přeswědčeny sekularny humanist hač ritualny křesćan, kotryž chce jenož swój pokoj měć …

  7. Hitparada artiklow « Piwarc’s Weblog Says:

    […] https://piwarc.wordpress.com/2008/06/12/serbska-luzica-trjeba-podjansku-lewicu/ […]

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden /  Ändern )

Google+ Foto

Du kommentierst mit Deinem Google+-Konto. Abmelden /  Ändern )

Twitter-Bild

Du kommentierst mit Deinem Twitter-Konto. Abmelden /  Ändern )

Facebook-Foto

Du kommentierst mit Deinem Facebook-Konto. Abmelden /  Ändern )

w

Verbinde mit %s


%d Bloggern gefällt das: