Archive for Juni 2009

Recept zu wuspěch

30. Juni 2009

Dale a tužniše wjedro – a hišće dwě njedźeli dźěła, doniž njemóžu so do dowola podać. Nó haj, budu přewažnje na zahrodźe kokać abo w jězorach domizny płuwać, wšako je doma najrjeńšo, abo nic? W kompjuteru tči wjele majlkow, kotrež sej wotmołwu žadaja, a nětk je po stresu poslednjeho tydźenja połnje dołhich posedźenjow w sejmje skónčnje dosć chwile, ludźom dosahacu kedźbnosć wěnować.

Folklorny festiwal je zaso pokazał, zo je najebać wjele nutřkownych šmjatańcow w Serbach krasnych towaršnostnych wjerškow, kotrež radosć, zabawu a wotměnu posrědkuja. Njech to tak dale póńdźe! Wuspěch ma jasny recept: Kombinacija domoródnych kulturnych potencialow z eksotiskimi poskitkami. Tak chcemy žiwi być. W tutym zmysle wšěm přijomne lěćo přeju, hač doma abo w cuzbje.

Tule w sejmje je jara mało ludźi přitomnych, a njepytnješ, zo budźe za štyri, pjeć tydźenjow horcy wólbny bój …

Dźělenje mocy

24. Juni 2009

Woprawdźita transparenca je w Serbach hišće ćešo hač druhdźe. Tohodla sy přeco zaso nuzowany, mjez linkami nowin čitać. Na přikład rěkaše njedawno, zo někotři w zwjazkowym předsydstwje Domowiny počinaja knoćić, dokelž njemóža so z wuslědkom demokratiskich wólbow do prezidiji wotnamakać.

W tym zwisku je rěč wo dźiwnych listach. Z wšelakich druhich „žórłow“ zwonka nowin da so na to tukać, zo wo prašenje dźe, hač smě šefredaktor jeničkeje serbskeje nowiny, kiž ma jako tak mjenowana „štwórta móc“ powołansce třěšny zwjazk kritisce kontrolować, zdobom priwatnje cyle na čole najwažnišeje organizacije serbskeho ludu sobu skutkować. Wón ma so tola poprawom jako njewotwisny žurnalist Domowinje bjez zajatosće wěnować.

Tajka konstelacija so wočiwnje přećiwo zakładej demokratije, dźělenju mocy, přeńdźe, a wjetšina někajkeho gremija prawo nima, demokratiski fundament swojeje dźěławosće wotstronić. Hač su woni to „derje měnili“ resp. sprawny wotpohlad měli, je wšojedne.

Wopačne srědki k dobremu zaměrej njewjedu. So wě, zo njeje so w Serbach bjeze wšeho trěbna neutralna distanca w zjawnych naležnosćach zdźeržeć, wšako je nimale kóždy kóždemu někak přiwuzny abo w towarstwowym žiwjenju zwjazany. A tak nastanje prašenje, čehodla njesmě so předsyda serbskeho towarstwa do prezidija podać, hdyž je wón powołansce šefredaktor nowin? Wotmołwa: Dokelž je princip dźélenja mocy konstituowacy element demokratije.

Rozestajenje wozjewjenja analyzy Vogta dla zakónčene

21. Juni 2009

Prawiznica Kartrin Suchec-Dzisławkowa je mi pisomnje zdźěliła, zo „wzdamy so žadanja wo Waše pisomne wuznaće, mjezyrozprawu w přichodźe hižo njerozšěrić, a wzdamy so tohorunja dalšich prawniskich krokow“. Mojeje „poměrnje spěšneje reakcije“ na jeje list z dnja 8.6.2009 a mojeje „prócy, njewoprawnjene rozšěrjenje mjezyrozprawy prof. Vogta spěšnje skónčić“, dla su so woni rozsudźili, přećiwo mni juristisce njepostupować.

Za změnu prioritow w katolskich Serbach

18. Juni 2009

Njebych ženje protestant być móhł, dokelž myslenje w kategorijach krajnych cyrkjwjow je mi něšto cyle cuze. Katolsce być rěka: wšo wopřimowace wusměrjeny być, štož prěnjotnje woznamjenja: wšě kultury, wšě rěče, kotrež na zemi dawa, wobkedźbować a zańč měć. Hdyž přirunuješ, kaž je ewangelska cyrkej w Delnjej Łužicy ze serbskej rěču wobchadźała porno katolskej cyrkwi w Hornjej Łužicy, móžeš wjele wo strukturach mentality wulkeju křesćanskeju konfesijow póznawać.

Wězo su podjanscy ze wšelakich přičin historisce porno Serbam w pruskej conje Łužicy zbožo měli – wjetšeje kulturneje tolerancy sakskich kralow dla, ale tež hladajo na situaciju diaspory. Katolskej biskopstwje matej wězo wulki zajim na tym, sej horstku wěriwych Serbow jako wažny stołp křesćanskeho ludu we wuchodnej Sakskej zdźeržeć, derje wědźo, zo by dalše přeněmčenje tež liwkosć we wěrje přinjesło …

Kaž wšudźe po cyłym swěće so tež serbskokatolska kultura z prašenjemi přichodneho wuwića zaběra. Sam mam přeco za to, wěru a rozum jako cyłk wobhladować. Mam na přikład za njerozumne, na jednym boku družce na kwasu wustupić njedać, jenož dokelž je porik hižo do kwasa hromadźe žiwy był, ale na druhim boku němske kemše z družkami wotměwać. Dodźerženje wěsteje seksualneje moralki katolske Serbstwo njezaruča, ale žiwa jednota wěry a rěče. Tohodla bych sej změnu prioritow w našim ludźe přał.

Najrjeńši dźeń tydźenja

17. Juni 2009

… su wjedrarjo za dźensnišu srjedu připowědźili: słónčne wjedro a ćopłotu. Štóž móže, njech sej přestawku pod hołym njebjom popřeje. Ja drje sej to dowolić njemóžu, ale změju swojeho šefa w zwisku z filmowanjom na Hawštynowym mosće w Drježdźanach přewodźić. Hajko Kozel budźe tež pódla, kaž je André Hahn wčera rozsudźił. Wón budźe so tam z Kozelom a Caren Lay rozmołwjeć, to budźe centralna scena we wabjenskim filmje sakskeje Lěwicy za krajny wólny bój.

Najrjeńši dźeń hladajo na lekturu je přeco pjatk, hdyž dopołdnja Katolski Posoł jako pdf-dataja přińdźe, wšako sym woteběrar papjerjaneho a digitalizowaneho wudaća. Potom dyrbju skrótka swoju dźeławosć přetorhnyć a sej jón pohladnyć. Porno mojim polemiskim spisam w blogu je Posoł žórło duchowneje harmonije, takrjec moja nutřkowna přećiwowaha: Wón ma, štož nimam. Tež dźenša je Posoł nam přistupny, mjez druhimi z jara rjanymi wobrazami w interneće: http://www.posol.de/serbsce/aktualne/njedelu_14062009/mandzelske_jubileje

Serbske hnězdo – zarodk přichoda

16. Juni 2009

Sym słyšał, zo ma horstka šulerjow delnjoserbskeho gymnazija swoju serbsku kofejownju, hdźež so zetkawaja a serbsce bjesaduja. Tajke hnězda su model za přichod.

Tamle móžemy hromadźe kofej abo wino pić, dźěćom so snadź poskićuje wot fararja Wornarja přełožena dźěćaca biblija z wobrazami, dorosćeni móža so w měrnym kućiku stawizničkam z pjera Jěwy-Marje Čornakec wěnować. Tamle nastawaja na wotputane wašnje nowe ideje a so projekty abo zhromadne wuprawy wupjeku.

Tajke małe jednotki su kaž zarodk za serbsku towaršnosć – a připódla móžeš přećelow namakać, štož čini žiwjenje rjeńše. Přikładne w tutym zmysle su tež aktiwity „literarneho konopeja“.

Serbske klankodźiwadło

16. Juni 2009

Trend je jasny: „Kaž woteběra serbska rěč, tak přiběraja drastowe towarstwa“, tak rezimej Jurja Łušćanskeho, referenta Domowiny za kulturne naležnosće a wukraj w najnowšim wudaću „Rozhlada“. Dotal rěkaše, zo je katolske Serbstwo twjerdźizna na rěčnym polu, ale po skandaloznym nabožnym „klankodźiwadle“ w Baćońskej wosadźe njedźelu po Božim ćele z němskorěčnej božej mšu a družkami je wotwidźeć, zo rozpad rěčneho ruma tež w katolskich Serbach razantnje pokročuje.

Mi je wšojedne, hač je nam we wosadźe dojednany porjad božich słužbow, po kotrymž je hłowna boža mša na druhim swjatym dnju (ale ewangelij bě z cyrkwinskeho lěta!) němsce, přez takrjec připadny sćěh – družki na němskich kemšach – njedźelu skepsał, dokelž zasadnje njedowidźu, zo zamołwići w katolskich Serbach mjenowanemu zahubnemu trendej sami přidźěłaja. Hdyž so potom w němskej rěči prěduje, za mamy herbstwo wěry zdźeržeć, ale wočiwdnje nic rěč, kotraž je zakład myslenja a wěry, potom je tež jasne: Pod tajkimi wuměnjenjemi njemóžemy kemši chodźić.

Wězo wěm, zo njeje to ludźom problem, kiž sami hižo na proze cykwje němsce rěča. A móžemy so hišće na to dopomnić, zo je čłowjek němskeho pochada tomu wuspěšnje zadźěwał, zo su rodźeni Serbja na křižerjach w Baćonju němske kěrluše zawjedli. Ja chcu so nětk jónu z dokumentami druheho Vatikanskeho koncila wo prawje na nałožowanje maćerneje rěče zaběrać.

Serbske wosady su serbske a nic „dwurěčne“. W Hamburgskej cyrkwi smy dawno wěriwych z wšelakimi rěčemi měli, a woni tworja němske, pólske atd. zhromadźenstwa, ale nichtó njeby na ideju přišoł, na přikład pólskej wosadźe němske kemše nanuzować.

Wjeršk perwersije: Němske kemše z družkami

14. Juni 2009

„Skrónowanje“ tutoho tydźenja z němskorěčnymaj spisomaj serbskeje Załožby Serbej běchu dźensa němske kemše z družkami a při tym hišće žona w narodnej drasće, kiž čitanje němsce přednjese. Mi je to wšojedne, hač je so serbska wosada wotrodźencow dla na tajkile porjad Božich słužbow dojednała, kotryž nam nabožne dožiwjenje skepsa. To je kaž zadźerženje serbskeje Załožby wuraz organizowaneho sebjemordarstwa serbskeho ludu.

To najhórše pak je, zo wobdźěleni wočiwidnje hižo žane začuće nimaja, štož sebi samym načinja. Za naju je po tutych dožiwjenjach jasne: Njechamoj w starobje w Serbach žiwaj być, dokelž radšo sej w cuzbje serbske hnězdo schować a wirtuelnje na Serbstwje podźěl brać hač sej tule w Łužicy wot kulturneje hłuposće a narodneje debilnosće drohotny wólny čas a čuwy wobškodźeć dać. Realna serbska degeneracija njeje hižo znjesliwa.

A prošu šmórńće zełhanu agitaciju za narodno-nabožnu jednotu. Hewak je to, štož činiće, bohahanjenje.

Dwurěčnosć w Njeswačidle doprědka dźe

13. Juni 2009

Mój wjesnjanosta Gerd Schuster (CDU) je přiwuknył: Sym k oficielnemu listej wot gmejny z prašenjom, hač sym zwólniwy, wuzwolenje jako narunanskeho gmejnskeho radźićela přiwzać, sćěhowacu cedlku dóstał: „Informacija za wolenych wot gmejny: Z předležacym němskorěčnym pismom informujemy Was wo wuslědkach aktualnych wólbow. Skedźbnjamy Was zdobom na móžnosć wotpokazanja čestnohamtskeho dźěła a na ewentualnje wobstejace zadźěwki a namołwjamy Was, zo byšće nam zdźělili, hač chceće wólbu wotpokazać ab so na zadźěwki powołać. Dokładniše informacije zhoniće w němskorěčnym pismje.“

Tak dwurěčnosć wupada, kaž chcemy ju měć. Wjesnjanosta je tež swój slub dodźeržił a so ze mnu na termin za rozmołwu wo polěpšenju dwurěčnosće w gmejnje dojednał. Budźemoj so spočatk julija w kofejowni zetkać.

Hajko Kozel je dobył

13. Juni 2009

Serbski zapósłanc Lěwicy Hajko Kozel je so na krajnym stronskim zjězdźe w Burgstädće w prěnim wólbnym přeběhu přećiwo dwěmaj druhimaj kandidatomaj přesadźił: Z 63,9 procentami hłosow delegatow bu wón za 22. městno lisćiny strony za wólby do krajneho sejma woleny. Před pjeć lětami je Kozel 30. městno připokazane dóstał. Rěčnicy, kotřiz su jeho podpěrali, jenož na serbski aspekt skedźbnili njejsu, ale tež na jeho hranicy přesahowacy mjezynarodny angažement.