Archive for November 2010

Diskutujmy wo knize bamža! Rozumna wěra?

30. November 2010

Wot jutřišeho chcu so krok po kroku wobsahej knihi „Swětło swěta“ wěnować, kotruž sym wčera skónčnje kupić móhł. Bych sej přał, zo so wjele čitarjow z komentarami wobdźěli.

Mjez druhim z centralnej tezu bamža Benedikta XVI. je so nětk ewangelski bohosłowc a zapósłanc prof. Besier w čitanju na uniwersiće kritisce zaběrał. Besier sam porno bamžej pleduje za relatiwizm. Jako nastork k diskusiji móžeće jeho wuwjedźenja tule čitać.

Z mojeho wida pak je relatiwizm drje ze znamjenjom ewolucionarneho procesa pluralneje moderneje towaršnosće, ale jednotliwc dyrbi njedźiwajcy toho swoju wěrnosć namakać.

Kóždy 100.000 katolik na swěće je Serb. Tola tež w najmjeńšim dźělu je cyłotna wěrnosć spóznajomna, kaž je hižo Pasolini wědźał. Teza bamža: Wěra móže a ma rozumna być.

Serbske terminy w hodowniku

30. November 2010

11-30 terminy december

Sakske knježerstwo k analyzy a poručenjam prof. Vogta

30. November 2010

Hlej aktualnu wotmołwu statneho knježerstwa małemu naprašowanju frakciskeje předsydki Zelenych, Antje Hermenau.

Wikileaks

28. November 2010

Wězo so Piwarc na rozšěrjenju nětk přistupnych aktow administracije USA wo mjezynarodnej politice wobdźěli:

Cablegate

Swětło swěta

28. November 2010

Kniha z interviewom mjez němskim žurnalistom a bamžom je wusła (24.11.) a tak požadana, zo bě dwaj dnjej pozdźišo – pjatk nawječor – w katolskej Drježdźanskej kniharni Swjateho Bena blisko dwórjskeje cyrkwje hižo wupředata. Žadyn dźiw, wšako je jónkrótna wěc w cyrkwinskich stawiznach, zo słuša rozmołwa ze žurnalistom k zjawnostnemu dźěłu Swjateho stoła. Bamž Benedikt je bjezdwěla z wotstawkom najmudriši muž swěta, tohodla móžes lekturu tuteje knihi kóždemu popřeć – idealny hodowny abo narodninski dar to je.

Sym hnydom tři eksemplary skazał a so nadźijam, zo w běhu tydźenja telefonisce pozitiwnu powěsć z kniharnje dóstanu, zo su přišli. So wě, zo móžeš tež přez internet direktnje při nakładnistwje skazać (tule klinknyć).

Něhdyši kardinal Ratzinger a nětčiši swjaty wótc Benedekt XVI. je duchowny, kiž hustodosć pohóršk dawa, sym so jeho wuprajenjow dla hižo dosć mjerzał. Čitarjo bloga naju rozdźělne stejišća we wšelakich prašenjach znaja. Ale jeho myslenje je wužadanje postmodernemu čłowjekej, přetož wón – cyle njewotwisnje wot aktualnych trendow masowych medijow abo mainstreama zjawneho měnjenja – swój projekt wěčnosće, wujednanje wěry a rozuma, bjez kompromisa pěstuje. Na druhim městnje w mojim uniwersumje steji knjez Obama.

Serbski tattoo?

27. November 2010

Najskerje ma mjeztym wjac serbskich holcow znajmjeńša mały tattoo hač je wšědny dźeń nošerkow narodneje drasty. W prjedawšich časach je tetowěrowanje na jednotliwe skupiny ludnosće – wosebje namórnikow a jatych, ale tež někotre kruhi tak mjenowaneje dźěłaćerskeje klasy – wobmjezowane było. W mojej domiznje – Hamburgu – skutkowaše před połsta lětami prěni powołanski tetowěrowar po cyłej Europje, wězo wosrjedź štwórće St. Pauli, hdźež je najwjac zajimcow na tajkich kóžnych wobrazach za čas žiwjenja.

Dawno móžeš sej samo w městach kaž w Budyšinje tetowěrowanku činić dać. Hač do dźensnišeho je tattoo ze znamjenjom mjeńšiny, ale hinak rozšěrjeny hač na spočatku 20. lětstotka: Tehdom je w Němskej kóždy sedmy muž tetowěrowany był, ale lědma žona. Njedźiwajcy wšeho techniskeho postupa při zhotowjenju tattoowa steji w srjedźišću dźěławosće tattoo-studija paleta archaiskich motiwow, wot kótwicy k zmijej, keltiske runja staroaziatiskim znamjenčkam. Indiwiduelna komponenta při tetowěrowanju je w prěnim rjedźe placěrowanje motiwa, wobraz sam pak je nimale přeco maksimalnje nowa warianta stareho mustra.

Z tym so w tetowěrowanju na klasiske wašnje spaslenje swójskeje čłowječeje identity špiheluje: Sej z fundusa kulturneho herbsta ludu a swěta přiswojeć, štož so k tebi hodźi. Jelizo jónu rjany serbski motiw namakam, bych snadź swoju mału zběrku tattoowow – zmijej a njetopyr – wo jedyn wotpowědny wobraz rozšěrił. Poprawom sym tule temu před dwaceći lětami skónčił, wšako w starobje přewjele tattoowow měć nochcu, dokelž na starej koži sexy tattowy z časa młodosće hustodosć skerje spodźiwnu zaćišć zawostajeja.

Cyle wothladajo wot toho: Štóž chce tattoo měć, njech so do toho wo rozdźělnej kwaliće studijow informuje (KEDŹBU! Porno rjemjeslnikam smě kóždy bjez pruwowanja profesionelnje tetowěrować, kiž hygieniski standard dodźerži). Radšo k připóznatemu fachowcej w Drježdźanach hić hač sej něšto skepsać dać, štož njemóžeš na kóždy pad podźišo přez laser zaso dospołnje wotstronić, hačrunjež mnozy to twjerdźa. Wot kwality tež wotwisuje, hač tattoo po lětdźesatkach hišće čerstwje wupada abo cyle blěduški.

Eskimowcy, Finojo a Serbja

26. November 2010

Eskimowcy na Zelenskej nazy spja, jich poslešćo je kožuch, a leža na bórle w domje z lodu, kiž so iglu mjenuje – tak je mi mój nan so ze słužbneje jězby w arktiskim kraju wróćiwši před lětdźesatkami powědał. Powědančka wo jednorosći awchtochtonych ludźi při polarnym morju, kiž su ryby a ćulenje łójili a bjez problemow kóžde lěto wjele tydźenjow štyrceći stopnjow pod nulu wutrali, su mje w dźěćatstwje jara fascinowali. Njedźiwajcy toho sym jako wobydler ćoplišich srjedźnoeuropskich kónčin přeco princip pěstował, poł lěta z něčim zdrasćeny spać, přetož bě a je mi prosće přezyma, štož najskerje na falowacym kožuchu leži.

Moje najsylniše dopomnjeće na stanowanje z Hamburgskej katolskej młodźinu w rjanej bayerskej krajinje blisko Eichstätta bě, zo sym rano w swojim spanskim měše najebać spódnje šaty zymu mrěł. Rozrisanje problema přez to, zo sej z towaršom jedyn měch dźěliš, nikomu do mysli přišło njeje – to bě tónle hańbićiwy čas na proze puberty, w kotrymž ma kóždy dosć ze swójskim ćěłom činić.

We wulkodomach Finskeje pak, kaž je mi mój najlubši kolega Armin powědał, kiž je w tutym sewjernym kraju do přewróta dźěłał, ma kóžde bydlenčko swoju sawnu, a tak su wšitcy kóždy dźeń derje wohrěwani. Z hoberskej potrjebu energije za masy sawnow so jara konsekwentne wusměrjenje finskeje energijoweje politiki na atomowe milinarnje wopodstatnja. To je najwažniši rozdźěl mjez inuitskim a modernym žiwjenjskim wašnjom wosrjedź kruteje zymy: Jedni sebje samych w přirodnym škiće lodu a kožucha wohrěwaja, druzy pak lěttysacy strašne radioaktiwne wotpadki nahromadźeja, zo bychu sej swój kumštny swět zdźeržeć móhli.

Hdźe na tutej skali su poprawom Serbja, posledni Indianojo Europy, kaž je Jurij Brězan swój lud mjenował?

Poselstwo rozbiteho pórclina Serbam

25. November 2010

W Mišnjanskej pórclinowni su woni – z jednohłósnym přihłosowanjom dohladowanskeje rady z Kurtom Biedenkopfom na čole – produkciju něšto lět w zadwělowanskej akciji zničili, dokelž lědma štó chce staromódne sudobja kupić. Dramatiski přikład za to, zo unikatnosć twornje resp. kulturnišća ničo njepomha, hdyž z tym, štož činiš, přemało potrjebu potencielnych cilowych skupin spjelniš.

Tohodla tež w Serbach njedosaha, so na unikatnosć institucijow powołac a z tym wo to wojować, zo njech wšo někak w samsnej abo podobnej formje tak wostanje, kaž je. Potom přińdźe jednoho dnja wulka „dumpańca“ kaž w swětosławnej pórclinowni. Runja statnemu zawodej w Mišnje dyrbimy w Serbach wot wulkich k mjeńšim formatam přeńć. Tamle mjeztym mjenje serwije z 24 šalkami a husćišo espresso-serwij za dweju produkuja.

Na wospjetnym faktiskim zbankrotowanju ansamblu w najnowšej zańdźenosći sym widźeli, zo su tež pola nas časy tak mjenowanych wulkich formatow (z masami ludźi na jewišću) nimo. To samsne płaći na hinše wašnje za serbske dźiwadło, hačrunjež nochce wjednistwo NSLDź ničo wo tym wěźeć: Radšo wjac modernišich kruchow na mjeńšej žurli hač stare měšćanske dźiwadło. „Klein, aber fein“ je wosebje Serbam přihódne hesło.

PS.: Mój intelektualny přećel ze Serbskeho domu chce město „klein, aber fein“ něšto serbske měć a namjetuje: „małe a rjane“ abo „małe a šikwane“ abo „mjeńše a rjeńše“.

Wjesna a měšćanska młodźina – analyza wólbow do załožboweje rady

24. November 2010

Axela Arltowemu komentarej we wčerawšich Serbskich Nowinach tak daloko přihłosuju, zo by rjenje było, hdyž by tež jedyn zastupjer młodeje generacije mjez rjadnymi čłonami załožboweje rady był (njedźiwajcy toho, zo njeje „wobnowjenska kwota“ 25 procentow – wšako je jenož štyrjoch městnow – přirunujo z krajnopolitiskimi poměrami tak špatna a zo słuša nowa čłonka Milena Vettraino po měritkach „wulkeje politiki“ hišće k młódšej generaciji). Ale štóž „che sobu postajować“ (citat Madlenki Šołćic), dyrbi matematiku wobknježić. Młodźi kandidaća su wšitcy hromadźe wjace hłosow dóstali hač kandidaća z wobłuka nawjednistwa resp. zarjada Domowiny, w tutym zmysle je Zwjazkowe předsydstwo za młodźinu wothłosowało.

Móžu so hišće derje na to dopomnić, kak je so w lěće 1994 na stronskim zjězdźe sakskeje PDS bjezstronski młody aktiwist hibanja za młodźinske radijo DT 64, Heiko Hilker přesadźił a při nastajenju kandidatow za wólby do krajneho sejma dobre městno na lisćinje docpěł: Je wjele młodych kandidatow było, ale w poslednim wokomiku je jedyn po druhim swoju kandidaturu cofnył a prajił: „Njech wšitcy, kiž chcychu poprawom mje wolić, swój hłós Heikej Hilkerej dadźa.“ Tak je so stało, a Heiko Hilker je potom pjatnaće lět jako zapósłanc w sakskim parlamenće skutkował. We Serbach pak so skupina młodych ludźi – přewažnje ze Zwjazka serbskich wuměłcow – přizjewi a wšitcy chcedźa woleni być, hačrunjež za wšěch njebychu městna w załožbowej radźe dosahali …

K politiskemu wuspěchej słuša, so na „hłowu“ dojednać. Wjesna młodźina je to faktisce činiła – Marian Wjenk na swoje wašnje serbskokatolsku młodźinu na wsach reprezentuje. Tohodla je wón při wólbach zastupowacych cłonow załožboweje rady tež z wotstawkom najwuspěšniši młody kandidat był. Bohužel njejsu młodźi z „měšćanskeho“ miljeja politisce mudri dosć byli, na samsne wašnje postupować resp. so w najlěpšim padźe z wjesnej młodźinu na zhromadneho kandidata dojednać. Město toho su woni do wólbow w zjawnym lisće tym, wot kotrychž chcychu so wolić dać, zdźělili, zo poprawom zajatosće dla wolić njesmědźa – ekstremnje swojorazny wólbny bój su woni wjedli. To wšo dyrbi so při analyzy wólbow do załožboweje rady wobkedźbować.

New sorbian Folk

23. November 2010

Zdźělenka z „Kunsthof Gohlis“ :

Freitag, 26.11.2010 um 21 Uhr

Conni Island

New sorbian Folk

In der Musik von Conni Island verschmelzen folkloristische Themen mit moderner Rhythmik und Harmonik unterschiedlichster Stilrichtungen.
So verbinden sie zum Beispiel sorbische Volksmusik mit Jazz.
Die Musiker zeichnen sich durch ihre Experimentierfreudigkeit aus.
Dabei werden neue musikalische Gedanken auf unkomplizierte Art umgesetzt.

Christina Leschbor: Querflöte
Jana Büttner: Saxophon
Conni Wolf: Klavier, Gesang
Paul Kanig: Trompete
Martin Jahny; Bass
Teresa Lohr: Schlagzeug

Sigrid Koerner
kunsthofgohlis
Dorfstr. 4
01156 Dresden OT Gohlis
03514388797

http://www.kunsthofgohlis.de

sigridkoerner@gmail.com