Archive for Dezember 2010

Wid z woknom won

31. Dezember 2010

wid_z_woknom

W bydlenskej stejo Piwarc z woknom won na posledni dźeń lěta 2010 hlada (štož widźi, móžeće z kliknjenčkom na „wid_z_woknom“ dožiwić). Klětuše wuhlady za Serbstwo su dobre, najnowši indic je tuta wuběrna zdźělenka ze sakskeho ministerstwa za wobswět a ratarstwo. W tutym zmysle Wam wšěm strowe a spokojne žiwjenje z dosć wjerškami zboža přeju!

Dymowe łastojčki widluja nětko tež w serbskej rěči
Wobswětowe ministerstwo wozjewi dwě přełoženej brošurce

Wobswětowe ministerstwo je dwě brošurce k škitanym družinam zwěrjatow do serbšćiny přełožić dało. Zešiwk „Łastojčka Klara“ wuńdźe w prěnim nakładźe we wysokosći 1500 eksemplarow. Serbske wudaće brošurki „Europski šěry wjelk“ namakaja zajimcy jako pdf-dokument na internetowej stronje ministerstwa pod http://www.smul.sachsen.de a móža sej ju bjezpłatnje downloadować.

„Z wozjewjenjomaj podpěruje ministerstwo hajenje serbskeje rěče a kultury“, praji statny minister Frank Kupfer. Brošurka „Łastojčka Klara“ rozdźěli so předewšěm w serbskich pěstowarnjach. „Dźěći su prawa cilowa skupina, hdyž dźe wo spěchowanje serbšćiny“, tak minister. „Při předčitanju zhonja holcy a hólcy, kak su škitane dymowe łastojčki žiwe a kak móža jim z jednorymi srědkami pomhać. A woni rěča a słyša při tym serbsku rěč. To je móžnosć, tež jeje wobstaće dale zawěsćić.“

W pdf-dokumenće k europskemu šěremu wjelkej namakaja młodostni a dorosćeni wšitke zajimawosće k škitanemu wjelkej, kotryž je so před dźesać lětami tež zaso w domiznje Serbow zadomił. We Łužicy su dźensa wjacore stadła wjelkow žiwe.

Serbski zešiwk k łastojčce Klarje móže so bjezpłatnje skazać pola Centralneje ekspedicije brošurow Sakskeho statneho knježerstwa (Zentraler Broschürenversand der Sächsischen Staatsregierung, Hammerweg 30, 01127 Dresden), telefon: +49 351 2103671 a přez e-mail na: publikationen@sachsen.de.

Wšě premjery ansambla we Łužicy

31. Dezember 2010

Čitaj wo powěsći dpa w BILD online

Žohnowane hody!

24. Dezember 2010

Patoržicu w sněze poprawom wšitcy chcedźa měć, ale hdyž přińdźe, rěka warnowanje před njewjedrom. Dźens rano w šesćich wokoło pjekarnje w Njeswačidle bě hładke kaž na zalodźanym haće – je so při zmjerzku dešćowało, doniž njebudźe so zaso sněh sypać. Mój mótk z Erfurta wjedra dla bohužel hody we Łužicy njebudźe, a nadźijomnje mojej staršej ze Zhorjelca bjez wjetšich problemow přichadźataj.

Kolega chcyše ze swojej žonu dźensa sčasom do hód přiwuznistwu wućeknyć – z Rudnych hór k Baltiskemu morju. W rozhłosu pak słyšu, zo su sewjerne awtodróhi a zwjazkowe dróhi sněha a ekstremneje hładkosće dla zašlahane, na Rujanach je najwjetša dróha přez naprěki stejace nakładne awta blokowana.

Sym před něšto dnjemi gmejnskemu zarjadej w Njeswačidle dźaknu majlku wuběrneje zymskeje słužby dla pósłał. Njedźiwajcy wšěch wějeńcow sym minjene tydźenje kóždy dźeń někak swoje dźěłowe městno w Drježdźanach docpěł a wječor so bjez toho zo bych tčacy wostał k swojej žonje we Łuze wróćił. Nětk pak je dowol, tak móžu so skónčnje cyle wotputanje nad zymskej krasnosću wjeselić.

Wšěm čitarjam bloga žohnowane hody, rjane hodźiny ze swójbu a dožiwjenje kuzła božeje nocy přeju!

Rögner přećiwo serbskemu ansamblej wojuje

22. Dezember 2010

Zo da so towarstwo Via Regia Musikevents za priwatne zajimy Wolfganga Rögnera instrumentalizować, je zrudne, ale politikum to njeje. Něhdyši šef Serbskeho ludoweho ansambla je zawod dwójce faktisce do bankrota wjedł, kiž je přistajenym a přihladowarjam jenož tohodla zalutowany wostał, dokelž je Załožba za serbski lud z pjenježnymi srědkami na kóšty třećich (Serbow) wupomhała. Hdyž wone towarstwo to ignoruje a praji: Smochčanske hudźbne dny budu bjez ansambla, dokelž njeje dojednanje mjez Rögnerom a ansamblom, potom móže serbske hudźbne žiwjenje tež bjez Smochćic wuńć.

Wot Rögnera a towarstwa žadane „normalizowanje“ by rěkało, zo Rögner přestanje, so zjawnje jako wopor inscenować, ale zo fakty, kotrež su k jeho wotwołanju wjedli, připóznawa. Njejsmy na jeho wuprajenja w zjawnosći zabyli, zo njeje wón zwólniwy, dale na swojim městnje wostać, hdyž so skrótšenja přesadźa. Po tym njeje so wón měł. Towarstwo Via Regia Musikevents nima prawo, so do naležnosćow serbskeho ansambla měšeć a nowemu wjednistwu ansambla hinaše zadźerženje napřećo zwrěšćenemu ex-šefej wudrěwać.

Hač smě Rögner do domu SLA stupić abo nic, njeje naležnosć towarstwa Via Regia Musikevents, ale ansambla. Cyle wothladajo wot toho, zo njeje tajki zakaz po wotpowědnych rozestajenjach w hospodarskim swěće ničo njezwučene, wšako ma to tež něšto z jasnymi poměrami po dźělenju činić. Serbski ludowy ansambl njeje wobsydstwo něhdyšeho intendanta-jednaćela a tež nic jednotliweho event-towarstwa. „Hudźbny bój wo regionalny publikum“, kaž so přinošk Serbskich Nowin dźensa skónči, njeje zlě, nawopak: Wubědźowanje přinošuje k wyšej kwaliće.

Pósćelće direktorej Suchemu swoje měnjenje k trěbnym reformam serbskeho institucionelneho žiwjenja!

21. Dezember 2010

Direktor Załožby za serbski lud, Marko Suchy, je dźensa w Serbskich Nowinach wobžarował, zo žane měnjenja jednotliwcow zwonka serbskich institucijow k trěbnym reformam w zajimje serbskeje rěče a kultury njepředleža. Tule je puć kontakta k jeho běrowej.

Lubi ludźo, přewažnje młodźi čitarjo bloga Piwarca, pomhajće Markej Suchemu při zběranju stejišćow – pisajće jemu swoju poziciju resp. namjety k temje. To móže jedna sada abo tež dlěši tekst być, kaž wam so chce. Ale njepřewostajće diskurs jeničce zastupjerjam dotalnych institucijow – serbski lud waše njewotwisne ideje trjeba!

Potajkim: Pósćelće załožbje přispomnjenja, nastorki, ideje, komentary: Kajke změny w institucionelnym serbskim žiwjenju chceće měć? A hdyž maće lóšt, móžeće pod tutym artiklom tež komentar wozjewić. Wjele wjesela při sobudiskutowanju!

Serbske terminy we wulkim róžku 2011

21. Dezember 2010

12-21 terminy januar 2011

Polěkuje kult hładkosće pedofilnosći?

21. Dezember 2010

Kusk konserwatiwny móžeš być: Jako muž njetrjebaš ani ke kosmetikarce chodźić ani sej włosy barbić dać. A kajka žona chce muža z truhanymaj nohomaj měć?

Njewěm, hač je sej młody minister woprawdźe swoje kosmy wotstronił, kaž je mi wojak zwjazkoweje wobory hladajo na prjedawši wobraz ministra w krótkich cholowach so hóršo powědał – a poprawom je mi to wšojedne, wšako jeho žona njejsym. Přehnata hładkosć pak je podhladna, nic jenož w politice. Přejara mazni ludźo hustodosć drje krótkodobnje wěstu fascinaciju posrědkuja, ale dołhodobnje dowěru druhich njedobudu.

Wěsta ćělna awtentiskosć scomter porjadnje wuwitymi fałdami jako wuraz woprawdźe žiweho žiwjenja je takrjec wisitka čłowjeka. Hdyž w sawnje widźiš, kelko starcow je sej samo swoje hańbowe kosmy wottruhowało, potom so prašeš, hač chcedźa sčasom do smjerće zaso w stawje ćěšenka być. W tutym zwisku mi do mysli přińdźe, zo je snadź tola sćěhowaca teorija plawsibelna, kotruž sym njedawno něhdźe čitał:

Kult hładkosće ćěła bjezwotpohladnje pedofilnosći polěkuje, přetož widźomnu hranicu mjez splažnje zrałymi a njezrałymi wotstronjuje – a z tym přirodnu distancu dorosćenych napřećo małolětnym.

Dawidowski, Andricki a wažny Katolski Posoł

18. Dezember 2010

Na prěnjej stronje najnowšeho Katolskeho Posoła so něhdyši Wotrowski farar Tomaš Dawidowski zaso do Serbow wróći – duchownje, jako awtor serbskeho medija z najwjetšim nakładom. Wón wězo k štwórtej adwentnej njedźeli piše („Knjez je blisko!“) a wo tym, kak je Jězus do našeho swěta přišoł. W přeposlednim wotrězku wón zjima: „Hdyž pisa sćenik Matej wo podjeću Jězsusa bjez muža, chcyše najskerje tež zwuraznić, zo njeje Jězus wšědny čłowjek, ale Boži Syn – tón, kotryž wot Wótca z njebjes pochadźa.“

Tohodla su mi moji česćeni jezuića na gymnaziju porno lubemu fararjej Tomašej tež rozkładli, zo je knježniskosć boharodźićelki Marije jara rjany nabožny wobraz – nic mjenje, ale tež nic wjac. Štož je tehdom konkretnje biologisce wotběžało, njetrjeba nas wulce zajimować, to je bože potajnstwo. Abo hinak prajene: Kak su eksaktnje geny čłowjeka Jězusa zestajene byli, za wuznam Božeho syna Chrystusa žanu rólu njehraje.

Aktualny Posoł pak je smjerćwažna lektura, wšako tamle mjez druhim wšě dotal znate terminy do a po zbóžnoprajenju kapłana Alojsa Andrickeho nadeńdźeš, zo by sej wšo do protyčki pisać a so po móžnosći wobdźělić móhł. To so z premjeru wuměłskeho filma „Andritzki. Bekenntnis“ štwórtk, 20. wulkeho róžka w 17 hodź. w Němsko-serbskim ludowym dźiwadle w Budyšinje započnje. Poslednje zarjadowanje na lisćinje je njedźelu, 19. smažnika lěta 2011, dźakny swjedźeń serbskich wosadow w Radworju.

„Katolski Posoł pod božodźěsćowy štom“ rěka namołwa, kotruž wězo podpěruju, přetož sym sam spokojny abonent ćišćaneho a pdf-wudaća. Tule móžeće za sebje abo druhich skazać: +49 – (0) 3591 – 550 212.

Njeje wurunanje inflaciskeje raty załožbje rozumne?

16. Dezember 2010

Srjedu wječor je serbski zapósłanc Hajko Kozel wosobinski namjet do wuradźowanjow sakskeho parlamenta wo krajnym etaće 2011/2012 zapodał, z kotrymž je sej wón – runja zapósłanči CDU w zwjazkowym sejmje Mari Michałkowej – wurunanje inflaciskeje raty Załožbje za serbski lud žadał.

Z wotpohladom njeje Kozel próstwu jako namjet swojeje frakcije zapodał, ale jako iniciatiwu jednotliweho zapósłanca, zo by druhim frakcijam přihłosowanje wolóžił. Nimo toho je wón namjet takrjec objektwinje wopodstatnił – z ličbami z Vogtowych poručenjow.

Njedźiwajcy toho su tež serbscy zapósłancy frakcije CDU namjet wotpokazali, hačrunjež je ministerski prezident Stanisław Tilich w swojej narěči na špočatku wuradźowanjow připowědźił, zo je koalicija zwólniwa, rozumnym namjetam z opozicije přihłosować. Škoda, zo so to w tutym padźe stało njeje.

Serbski gymnazij „Alojs Andricki“ – što měniće?

14. Dezember 2010

Je z wašnjom, šulam mjena wusahowacych wosobinow dawać – takrjec jako wobkrućenje naroka kubłanišća, šulerjam jenož k wědźe njedopomhać, ale humanistiske hódnoty posrědkować. Tak je na přikład šulow z mjenom „Marja Grólmusec“, spjećowarka přećiwo nacijam. Ani jara konserwatiwni ludźo so na tym postorkowali njejsu, zo je wona sčasami w komunistiskej stronje a wjele lět jasnje lěwicarsce wusměrjena była.

Nětk wo ideji słyšimy, serbskemu gymnazijej mjeno Alojs Andricki dać – a wšelake měnjenja k tomu. So wě, zo je pomjenowanje šule prěnjotnje naležnosć šulerjow, staršich a wučerjow, ale mamy jenož jedyn hornjoserbski gymnazij, tohodla je serbski lud ideelny nošer tuteje šule w stolicy Hornjeje Łužicy a smě snadź kusk sobu rěčeć.

Što měniće: Njeje Alojs Andricki jako zmužity, sportowski a sympatiski Serb cyle njewotwisnje wot wěrywuznaća jako čłowjek z atraktiwnym přikładom młodym ludźom? Zo wěnowaše dnja 27. januara 1998 załožba „Stiftung Sächsische Gedenkstätten zur Erinnerung an die Opfer politischer Gewaltherrschaft“ tež jemu pomjatny dźeń „Spomnjenja woporow nacionalsocializma“, na jeho wuznam za sakske stawizny pokaza.