Nutřkowny minister Sakskeje, křesćanski demokrat Markus Ulbig z Pirny, je spóznał, zo zjwanosć tajke postupowanje zarjadow, sudnistwow a policije kaž wokoło wčerawšeho dnja w Drježdźanach w zwisku ze zarjadowanjemi nacijow hižo njerozumi. Tohodla je wón nětk wulku fachowu a towaršnostnu debatu wo němskim prawje zhromadźowanja nastorčił (hlej tule).
Dźěłarnistwu je zakazane było – najskerje prěni raz po lěće 1945 –, před swójskim domom napominansku stražu hrožacych pochodow nacijow dla přewjesć, mjeztym zo je so měšćanski zarjad a zarjadniske sudnistwo intentenswinje prócowałoj, nacijam wustupowanje w sakskej stolicy zmóžnić. Wjerškaj staj byłoj, zo su sudnicy samo na tym wobstali, zo maja nacije prawo na tři manifestacije samsny dźeń w Drježdźanach. A policija měješe so z kóždym nasadźować, kiž je nacijam na puću stał, wšako je sudnistwo rozsudźiło, zo nimaja nacije jenož prawo na schadźowanje, ale tež na pochodowanje.
Štóž je wčera zdźěla namócny chaos w Drježdźanach dožiwił – sčasami su wšě mosty přez Łobjo zašlahane byli – a wšelake pódlanske wěcki, na přikład zo su antifašistiscy rentnarjo a ćežkozbrašeni z Durinskeje wot policije nuzowani byli, na awtodróze z busa wulězć a hač do centruma běhać, móže knjezej Ulbigej při tutej temje jenož přihłosować.
Piwarc's Weblog 
20. Februar 2011 um 21:41 |
Prawje, tak z nacijemi dale njepóńdźe. Měnju pak, zo tež z Drježdźanskimi zarjadnistwami a sudnistwami tak dale njedźe. Sarkastiske prajidmo, zo so w našim kraju prawicarske mocy přeco na SWOJE sudnistwa spušćeć móžeja, je so zaso jónu wopodstatniło. Tute skandalozne wěcy, no kotrež Ty skedźnił sy, Marcelo, dyrbjeli so w přichodnych dnjach z wotmachom tematizować.
A potom by so tež wo tym přemyslować dyrbjało, kak by so tym njepočinkam tych „awtonomnych“ lěpje zadźěwać hodźało. A prašam so, hač so pod maskami čornych zapalerjow a kamjenje-mjetarjow woprawdźe „lěwicarsce“ zmysleni chowaja, abo skerje cyle hinaši ludźo.
21. Februar 2011 um 22:05 |
Statne rěčnistwo Drježdźany je mjeztym přećiwo sydomdźesat měrniwym (!) blokowarjam, mjez druhim načolnym politikarjam SPD, jednanje zahajiło, přećiwo znajmjeńša dalšim 200 chcedźa tohorunja škóřzbu pruwować. Naša ukrainska přećelka pak, kiž w štwórći Strehlen bydli, bě sobotu ze swojimaj dźěsćomaj njejapcy na bitwišću wosrjedź palacych barikadow, a žana policija ju škitała njeje.
Dosć policije, samo SEK-jednotka, pak je nawječor na Großenhainskej dróze mjez druhim priwatne bydlenčko, w kotrymž sym sam połdra lěta žiwy był, scomter młodej žonu nadběhowało a jej laptop preč wzało, dokelž je na ležownosći z dwěmaj domomaj pozdatnje jedyn dotal njeznaty z w měsće na wukročenjach wobdźělenym namócnu akciju přez handy telefonisce dorěčał. Mjez 20 ludźimi z cyłeje ležownosće, kotřiž dyrbjachu cyłu nóc na policajskim prezidiju Schießgasse pobyć, bě rentnar, něhdyši dźěłaćer železnicy. Wón bu runja wšěm druhim přepytowany – w spódnich cholowach.
To jenož jako por fragmentow wěstotneho chaosa w sobotnišej sakskej stolicy – wutrobny dźak juristam zarjadniskeho sudnistwa, kotrychž wusud je wuchadźišćo tutych absurdnych scenarijow …
22. Februar 2011 um 08:04 |
Tez hdyz je cesko zhrozumic a akseptowac: Zakonje skitaja wsech w samsnej merje – tez hdyz maja hlupikojte politiske menenja kaz bruni (abo cerwjeni). Stat (abo tu judikatiwa a exekutiwa) ma neutralny wostac a tohodla tez brunym demonstraciju zmoznic. To njeje lochko wutrac. Wazniso hac namocne (aktiwny abo pasiwny) wobaranje, je tola wecownje wobaranje. Tak so chudoba extremistow skoku wotkryje…
22. Februar 2011 um 15:32 |
To njetrjechi, štož pisaš. Zwjazkowe wustawowe sudnistwo je w nazymje lěta 2009 we „Wunsiedel-wusudźe“ rozsudźiło, zo steja nacije zwonka spektruma tolerabelnych stejišćow demokratije. Tohodla njesmě stat jim napřećo neutralny wostać – porno hinašim snadź zdźěla kołwrótnym měnjenjam. Mjez nacijemi a wšěmi (!!) druhimi politiskimi směrami je w Němskej fundamentalny rozdźěl – tak najwyše sudnistwo praji. A to njech tež w Drježdźanach płaći. Tohodla je statny sekretar knjeza Ulbiga, knjez Wilhelm, hižo njedźelu wo trěbnym „Fortschreibung des Wundiedel-Urteils“ rěčał.