Archive for September 2011

Swjaty wótc je mótka Baltazara a jeho mać w Erfurće žohnował

30. September 2011

Michał Cyž na Facebooku wideo „Detlef a swój žónski problem“ poruči – tule móžeće je hladać!

30. September 2011

http://www.youtube.com/watch?v=Gcmo4w5kDjI

Wuměna wody

30. September 2011

My trjebamy hdys a hdys čerstwy powětr – ryby pak čerstwu wodu. W času wuměnjenja wody wone – runja mojim diskusam – wězo ze swětom spokojom njejsu, wšako je jim přemało žiwjenskeho ruma, doniž njemóža so nad čerstwej wodu wjeselić. Symbol kóždehožkuli trěbneho wobnowjenja to je – wone njeje přijomnje, ale hdyž je wšo nimo, je žiwjenje rjeńšo, kotrež by so bjez wobnowjenja pomałku ke kóncej chilało.

Einstein, Darwin a Benedikt XVI.: Zachodna woprawdźitosć a wěčna wěrnosć

29. September 2011

Einsteinowa teorija relatiwity najskerje tola njetrjechi: Wědomostnicy su z eksperimentom zwěsćili, zo moža móličke elementarne dźělčki, tak mjenowane neutriny, spěšnišo hač swětło smalić. Dotal je to fyzikalisce zakazane było, potajkim je so Einstein mylił. Nó a? Tehdom bě přez dopóznaće Einsteina system Newtona njejapcy přežity, a kaž je časopis „Zeit“ w swojim aktualnym wudaću prawje najnowše wuwiće fyziki pohódnoćił, njeby Einstein sam z nim žadyn problem měł, wšako je wón sam princip přirodowědy prědował: Z małymi woprawdźitosćemi (druhdy w jeničkim pospyće) wulke wěrnosće spowróćeć.

Tohodla jenož wo teorijach rěčimy, a nichtó njewě, hdy budźe na přikład teorija ewolucije Darwina spowalena – přez nowu plawsibelnišu teoriju. Porno tomu ideje mamy; jedna z najwažnišich je naturske prawo, jadrowa tema narěča bamža w zwjazkowym sejmje. Protestantiscy bohosłowcy k tutej lěttysacy starej ideji druhdy hinaše stejišćo zaběraja – to pak wuwróćenje kaž w rozestajenju mjez přirodowědomostnymi teorijemi njeje, ale dalši wid na swět. Swětonahlad ma přeco něšto z wěru do idejow činić, wěrywuznaća maja wšelake duchowne tradicije, mjez nimi njeje wubědźowanje z eksperimentami …

Tohodla móže wěriwy prajić: Najmudriši wědomostnik ma sta lět prawje, ale cyrkej přeco resp. samo wěčnje. Wobaj mataj na rozdźělnych runinach prawje: Přirodospytnik praji, kak swět funguje, duchowny pak rozswětluje, čehodla čłowjek na swěće eksistuje.

Serbske terminy we winowcu 2011

29. September 2011

09-28 terminy okt

Bjezwuhladne offline-debaty wo přichodźe institucijow – po logice cyrberspaca za DSR!

29. September 2011

Sam přiwisnik cyberlibertarneho myslenja Johna Barlowa, wozjewjeneho před 15 lětami w deklaraciji wo njewotwisnosći wirtuelneho ruma datow (cyberspace), mi bjezwuhladnosć offline-debatow wo Domje serbskeje rěče (DSR) do mysli přińdźe. Tamle sedźa přewažnje sobudźěłaćerjo někotrych serbskich institucijow a mjez sobu wo sebi rěča. Na kóncu leža znajmjeńša tři modele strukturow scomter wšelakimi wariantami na blidźe, a nichtó njewě, kak nětk dale póńdźe, přetož wo tym ani alternatiwnje wothłosować njemóžeš.

Zo maja so institucije same efektiwizować, je žadanje, kotrež zaruča, zo so ničo njezměni. Inowatiwna móc cyberspaca runje tohodla tak rewolucionarnje skutkuje, zo móžeš sej kóžde lěto tuńši a lěpši laptop kupić, dokelž njeje žanych wobmjezowanych rumow. Dom serbskeje rěče by w tak mjenowanym realnym žiwjenju pod zhromadnej třěchu wubědźowansku a kooperacisku logiku wirtuelneho byća znajmjeńša kusk wotbłyšćować móhł, štož by wulki postup porno tuchwilnemu stawej był. Wosebje by sprawniši a transparentniši model był.

We wonej bjezwuhladnej offline-debaće na přikład přeco słyšiš, zo dyrbi Serbski institut přichodnje bóle w zajimje zdźerženja serbskosće dźěłać. To pak rěka, zo so tamle – nimo wažnych nadawkow mjez druhim w archiwje a bibliotece – z dawkowymi pjenjezami za njezmyslne wěcy (ideologiju hybridologije atd.) broji. Potom pak njesmě prěnjotnje wo wotwobaranje skrótšenjow hić, ale wo to, pjenjezy z efektom nałožować, hač w Serbskim instituće abo w projektach druhich wědomostnikow, zo by kóžde dźěłowe městno z potenicialom za přichod było.

„Zabyty spěw“

26. September 2011

Dokumentowana nowinska zdźělenka Serbskeho ludoweho ansambla:

Wobkuzłace zhudźbnjenja wulkich basnikow 18. a 19. lětstotka dožiwja wopytowarjo koncerta „Zabyty spěw“ 2. oktobra, 17.00 hodź., w Domje biskopa Bena w Smochćicach. Mjez druhim zaklinča tam twórby Korle Awgusta Kocora, Bjarnata Krawca a Arthura Immischa. Sopranistka Romy Petrick z Drježdźan a mezzosopranistka Tanja Donatec přednjesetej njeznate pěsnje serbskich, němskich a druhich komponistow, kotrychž manuskripty dołho w archiwach w Budyšinje, Drježdźanach a Praze wotpočowachu.
Spěwarce přewodźa na klawěrje pianistka Liana Bertók kaž tež smyčkowy orchester Serbskeho ludoweho ansambla pod nawodom Dietera Kempe. Program skulojći so z kruchami za husle. Přihladowarjo zamóža znowa dožiwić huslerja Emilia Percana, kotryž bě publikum spočatk lěta ze swojej njewšědnej interpretaciju Vivaldijowych „Počasow“ zahorił.

Rěčne zmylki na oficielnych taflach

26. September 2011

Ja so prašam, čehodla je na oficielnych taflach w zjawnosći serbskeho sydlenskeho ruma kaž tule w Budyšinje telko rěčnych zmylkow. Hdyž awtor sam njewě, zo rěka „klóšterski dom“, dyrbi to tola něchtó sčasom skorigować. A nětk wisa tež tuta tafla runja njeličomnym druhim ze skomolenymi mjenami městnow wjele lět :-(. To je wuraz pobrachowaceho respekta – pak zarjady tomu skónčnje wotpomhaja pak chcu tež němske pomjenowanja ze zmylkami měć :-).

Hoberska dołha nóžka (němsce Riesenschirmling)

25. September 2011

Při naju wčerawšim kolesowanju we Łužiskej jězorinje je moja mandźelska njejapcy někotre krasne eksemplary hoberskeje dołheje nóžki blisko puća w lěsu wuhladała. Hłójčka jednoho tajkeho hriba (hlej foto) dosaha za jednu wosobu k wječeri – derje paněrowana a fritěrowana.

Žiwjenje nana dźe dale – z dietu

24. September 2011

Město słódneje jědźe w hosćencu swojich grjekskich přećelow dóstanje mój nan nětk w Zhorjelskej chorowni „St. Carolus“ dietu k wječeri. To, štož je na foće widźeć, je hižo stopnjowanje přirunujo ze zašłymi dnjemi, wšako dawaše jenož wowsne tružki. Tak zlě to poprawom njeje, tajke něšto sej wotydźenja rady k snědani popřejemoj. Ale mój nan přwisnik tajkeje askezy njeje, dokelž praji: Derje jěsć je erotika staroby.

Wón je pjaty dźeń w chorowni, po tym zo je jeho nuzowy lěkar w nocy dowjedł. Mjeztym je so dźakowano přepytowanjam wukopało, pod čimž wón ćerpi: W nim tči dosć salmonelow … Tohodla tuchwilu jeho na wopyće ani wokošić ani dótknyć njesměm. Wutoru je so jemu tak špatnje wjedło, zo praješe: Mam zaćišć, zo so wšo ke kóncej chila. Ale sym jemu šibale wotmołwił: To njeńdźe, papa, trjebam hišće něšto lět za zrjadowanje twojeho zawostajenstwa, tak dołho dyrbiš přetrać.

Wčera pak chcyše wón zaso čitać, a smy poł hodźiny wo wopyće bamža w Němskej bjesadowali. Chorownja w nošerstwje maltezow je jara přijomna. Wězo su so ludźo w ortopediskej klinice Rózbork tež jara wěcywustojnje wo njeho starali. Ale tuchwilny katolski ramik – boža martra plus wjesele wupadace mólbe – so nam bóle lubi hač tamniše wulke pobožne hrónčka w stilu starosocialistiskich parolow w kóždej stwě.