Archive for Oktober 2011

Dźensa je sydom miliardow ludźi na swěće – Piwarc je 3.188.254.684ty žiwy čłowjek a 76.975.117.944ty wot spočatka stawiznow

31. Oktober 2011

A Ty? Tule móžeš sej z ličakom BBC wuličić:

http://www.bbc.co.uk/news/world-15391515

Reformaciski dźeń – wot Martina Luthera hač do bamža Benedikta XVI.: Wuslědki reformacije

31. Oktober 2011

Bjez reformacije by dźensniša katolska cyrkej w hubjeńšim stawje była. Wulkoprojekt bamža, rozum a wěru přezjedne přinjesć, njeby šansu měł. Tehdomniša orgazacija, kotraž je ze spožčenjom wotpuska wikowała, za nas předstajomna njeje. Tohodla ma Luther njedźiwajcy towaršnosći 16. lětstotka wotpowědowacych wosobinskich předsudkow swoje zasłužby wo wšěch křesćanow.

Zo stej wobě cyrkwje přez lětstotki přejara z politiskej mocu kolaborowałoj, je jeju zhromadne stawizniske brěmjo. Tola mjeztym swětleško rozswětlerstwa w tutym nastupanju samo direktnje ze swjateho stoła wuńdźe:

Swjaty wótc Benedikt XVI. němski system cyrkwinskeho dawka jako zeswětnjenje cyrkwje wotpokazuje, mjeztym zo so zesłabjena protestantiska cyrkej nadal tutych přez financny zarjad politiskeje wyšnosće wěriwym wunuzowanych wotedawkow nadźija. Tak je reformacija z wokołopućom wobnowjenja cyłeho křesćanstwa z paradoksnym wuslědkom.

Kopańca a namóc, kopar a porno, bi-mužojo a lubosć – wšo je prašenje kultury, tež pola Dynama

30. Oktober 2011

Što čini profikopar po kóncu swojeje kariery? Kaž z časopisa „11 přećelow“, dobreho „magacina za koparsku kulturu“ zhonich, je so něhdyši belgiski kopar Jonathan de Falco na hrajerja w pornofilmach překubłać dał. Jeho noze stej jemu krótko do kónca dźěła na trawnišću wičnu hódnotu we wysokosći 150.000 euro wunjesłoj. Hač je so jemu pod pseudonymom „Stany Falcone“ radźiło, ze swojej šišku wyšu hódnotu docpěć, njeje přinošk přeradźił.

Jeho prjedawši fanojo w stadionje pak k zaměrowej skupinje před widejorekorderom skoro njesłušeja, přetož steji Jonathan w srjedźišću homopornofilmow. Napřećo nowinam je so wón nětk k swojej biseksualnosći wuznał: Wón je drje jónu přećelku měł, ale muži jako přićahliwišich začuwa. Wězo je tež móžno, zo sej někotry fan z pomocu „Stanyja“ dotal njeznate swójske seksualne potenciale wuwědomi.

Dokelž hižo z grjekskeje antiki wěmy, zo je zasadnje nimale kóždy mjenje abo bóle bi. Wězo z jara rozdźělnym indiwiduelnym podźělom hetero- a homokomponenty a wšelakorej kulturu, z nimaj wobchadźeć. Hladajo na ekskluziwitu woprawdźiteje erotiskeje lubosće biseksualne dwójne žiwjenje najskerje zmysłapołne njeje, město toho dawa so jedna strona požadosće sublimować. K tomu dobra koparska kultura připódla dopomha – ze swojim kultom wokoło muskeho ćěła.

Pola mnohich tak mjenowanych fanow Dynama Drježdźany pak so prašeš, hdźe je koparska kultura wostała. A w jich cholowach so wočiwidnje přewjele njehiba – wšojedne, to kotreho směra. Namócni randalěrarjo ze swojim – bohužel dawno znatym a wospjetnym – zadźerženjom dopoakazuja, zo za swój testosteron žane ciwilne nałožowanje njeznaja. Poprawny skandal pak tči w tutym spodźiwnym klubje, kiž swojich přiwisnikow w horšći nima.

Što je sublimowanje? http://de.wikipedia.org/wiki/Sublimierung_(Psychoanalyse)

Rozprawa wo krawalach w Dortmundźe: http://www.focus.de/sport/fussball/dfbpokal/dfb-pokalspiel-dresdner-fans-randalieren-in-dortmund_aid_678183.html

Pólska wuměłča chce serbske korjenje za nowu regionalnu identitu wuchodnje Nysy wužiwać

29. Oktober 2011

Na wizitce steji: „Kunstschloss Waju – Pałac Sztuki Waju, Wanda & Jürg Dück, PL 59-900 Zgorzelec, Gronów 85, t. 00 48 509 844 722, wandajuerg@gmx.de“. Tule dwanaće kilometrow wuchodnje němsko-pólskeje hranicy chce pólska wuměłča Wanda Dück, kaž je wona pjatk připołdnju w rozmołwje Piwarcec swójbje při šalce kofeja a tykancu rozkładła, tež na serbsku tradiciju regiona nawjazować.

Wona je zwěsćiła, zo słušeše wjes z knježim domom, hdźež wona ze swojim šwicarskim mandźelskim bydli a dźěła, jónu k serbskemu sydlenskemu rumej. Tohodla by wona mjez druhim rady serbske drasty, w kotrychž su tule žony chdoźili, wožiwiła – za wosebite składnosće a snadź w nowej formje. Při tym je jej jara wažne, wědu wěcywustojnych šwalčow a druhich kulturnych fachowcow ze Serbow wobkedźbować.

Hladajo na młodych potomnikow wuhnatych wobydlerjow něhdyšeje wuchodneje Pólskeje, kotřiž za nowej swójskej regionalnej identitu pytaja, chce wón jim přistup k serbskim korjenjam kónčin zmóžnjeć, kotrež k Hornjej Łužicy słušeja. Dotal pak njedźiwajcy rešeršow w interneće wona ani njewě, kak su tule serbske drasty wupadali. Štóž móže jej pomhać, njech so prošu pola Wandy a Jürga přizjewi (němsce abo pólsce).

Wanda Dück aktualnje: http://www.begegnungen2011.de/dueck.php

Jeje žiwjenjoběh: http://www.wandastokwisz.republika.pl/pliki/biografie.html

Wo jeje w Zhorjelcu wustajenym póstnym rubje loni w tutym blogu: https://piwarc.wordpress.com/2010/05/14/postny-rub-w-zhorjelcu-%e2%80%93-podzel-na-kulturnej-stolicy/

Wo spočatku pólsko-šwicarskeho projekta w Hornjej Łužicy: http://www.wandastokwisz.republika.pl/pliki/gruna.html

Kotre načasne instrumenty demokratije chce dźensniša kompleksna serbska towaršnosć měć?

28. Oktober 2011

Software za dospołnu demokratiju je program, kiž by tysacam ludźom zmóžnił, hromadźe na teksće dźěłać. Na kóncu program zjima, što je matematisce widźane demokratiski wuslědk wšěch zapodatych změnow w jednym nowym cyłkownym dokumenće. Sym před tydźenjemi swoju IT-kolegowku prosył, za tajkej software pytać, a wona je přeswědčena, zo tajke něšto dawa. Po mojim wědźenju je team Obamy do wólbow ameriskeho prezidenta při sformulowanju jeho programatiki na podobne wašnje miliony SMSy do sobupostajenja zapřijał.

Wšudźe w swobodnych wuwitych krajach so wo přiměrjenju instrumentow demokratije dale a kompleksnišej realiće diskutuje. Kompleksnosć je dwójna: Sprěnja mjez sobu zaplećene lokalne, regionalne a globalne problemy hospodarskeho, socialneho a kulturneho razu a zdruha wšelakorosć ludźi samych. Tež w Serbach podźěl na tutej dwójnej kompleksnosći mamy. Kulturnje je wot hip-hopa hač ke klasiskej hudźbje wšo zastupjene, přiwisnikow wšěch swětonahladow namakaš, a tež hladajo na žiwjenske wašnja dawa mjeztym w serbskim ludźe wšo, štož tež k realiće wulkich towaršnosćow słuša.

Iniciatiwna skupina za legitimowane zastupnistwo serbskeho ludu, kaž wona sebje samu mjenuje, je wubědźowanje pytanja za optimalnej načasnej formu serbskeje demokratije, kotraž kompleksnosći serbskeje towaršnosće wotpowěduje, zahajiła. To je chwalobne, tohorunja jeje aktualizowany a nětk předstajeny časowy plan, přetož je z tym zaručene, zo docyła k někajkemu rozsudej dóńdźe. Znamjo tuchwilneje situacije je bjezkónčne přestorkowanje rozsudow. Tónle nowy diskusijny proces je wužadanje wšěm dotal zamołwitym.

Nowy narodny koncept: Dundać a hrać

27. Oktober 2011

50 procentow mandźelstwa je wliwapołniše wuchadźišćo hač 0,000000014 procenty cyłeho čłowjestwa – a tohodla smy so hižo z matematiskich přičin za žiwjenski model „koncentrowanje na přehladne zbožo“ rozsudźili, kaž je Maja Haderlap w swojej knize „Jandźel zabyća“ tak rjenje zjimała. Najwjetši politiski wliw tak a tak jako konsumenća mamy, tohodla nakupowanje we Łužiskim centeru we Wojerecach poručam.

Nic jenož darmotnych parkowanišćow, poměrnje niskich płaćiznow a přijomneje atmosfery bjez hektiki dla, ale dźensa bě w Sakskich Nowinach wabjenska přiłoha tutoho centera – scomter wulkim serbsko (!)-němskim přinoškom wo załoženju Domowiny. Na wirtuelnym wuchodźowanju přez stolicu Łužiskeje jězoriny móžeće sej hižo center a měšćansku wokolinu wobhladować: http://www.hoyerswerdsche.de/index.php/stadttour.html

Kruty wobstatk „přehladneho zboža“ w žiwjenju wjele muži – a mjeztym tež někotrych žonow – je kopańca. Tohodla je klětuše europske mišterstwo mustwow dwaceći narodnych mjeńšin we Łužicy z wosebitym wjerškom, na kotryž mamy so hižo nětk duchownje nastajić:
http://www.europeada2012.sorben.com/. Kotre mustwa budu na kóncu w kotrym rjedźe na prěnich třoch městnach? Prošu wo tipy, zo bychu serbscy „bookmakerojo“ swoje kwoty za sadźenje postajic móhli :-).

Bohudźak su časy nanuzowaneho partizanstwa nimo, hdyž dyrbjachu přisłušnicy narodnych mjeńšich kaž Słowjency w Korutanskej swoje „přehladne zbožo“ na statokach z partizanskim bojom přećiwo knježacej mašineriji zaničowanja zakitować. Tohodla chcemy nětk narod z dundanjom po měsće, z hraćom a ze zabawu w přehladnych kruhach pěstować. To su tola rjane wuhlady za Serbstwo 21. lětstotka!

A njezabudźće na pobyt ze swojej lubku resp. swojim lubcom w kofejowni ze serbskimi hrónčkami we Wojerowskim Łuziskim centeru – tamle je rjanych kućikow za přitulnu dwajsamosć :-).

Rozžohnowanje ze starej Škodowku – posledni raz w awtomyjerni

26. Oktober 2011

To bê po šěsć zhromadnych lětach z nimale jenož dobrymi dnjemi posledni dźeń z mojej Škodowku Oktawiu, prjedy hač so na swój posledni puć do wuchoda poda …

„Serbska substanca“ njejsu institucije, ale swójby – „wužiwanska hódnota“ Domu serbskeje rěče

26. Oktober 2011

„Štó w Chrósćicach wě, što Serbski institut čini? Nimale nichtó.“ To bě wuprajenje na kermuši, kotremuž njeje za blidom nichtó znapřećiwił. Njedawno na druhim městnje při rozmołwje wo Serbskim ludowym ansamblu je stary Serb prajił, zo su hudźbnicy a rejwarjo ansambla prjedy hustodosć po předstajenjach na žurli we wsy z wjesnjanami při piwje bjesadowali. Wšitcy za blidom su wuprajenju přihłosowali, zo bychu sej woni tajkule bjezposrědnju komunikaciju tež dźensniši dźeń přeli.

Lěpše zakótwjenje Budyskich serbskich institucijow tež w serbskich jadrowych kónčinach stareho Kamjenskeho wokrjesa je wulke wužadanje. Zo njeje wjac dźělbraća ludnosće na diskusijach wo skrótšenjach abo přestrukturowanju mjenujcy najskerje na tym zaleži, zo hraje cyłk serbskeho institucionelneho žiwjenja ze wšelakich přičin z wida „normalnych“ Serbow dale a mjeńšu rólu. Horstka staršich narodowcow z dobrymi kontaktami k serbskim medijam ma za zdźerženje kóždeho wobłuka dotalneje struktury w zwisku z diskusiju wo „Domje serbskeje rěče“ mjeńšinopolitiske argumenty na składźe, ale koho politika zajimuje?

Mje nic. Dokładnišo prajene: W klasiskej formje wěčneho kokanja na bjezkónčnych posedźenjach wšelakich gremijow a patetiskeho formulowanja memorandumow a manifestow mje politika njezajimuje. Samo na runinje politiskich stronow dale a bóle wo „wužiwanskej hódnoće“ rěči: Wona je z rozsudnym kriterijom za kwalitu. Štóž zjawne srědki ze „serbskeho hornca“ dóstawa, dyrbi prajić móc, što konkretnje za swójby a ze swójbami čini, kotrež ze serbskim kubłanjom swojich dźěći „substancu“ serbskeho ludu tworja.

„Serbska substanca“ njejsu institucije, ale realni ludźo we wšědnym žiwjenju (k nim tohorunja „němska“ mać słuša, kotraž dźěćo do Witaj-pěstowarnje sćele). Serbske institucije maja posłužbowe zarjady być. Wosebje při zdźeřzenju a wuwiću dobreje serbšćiny na wšěch runinach towaršnostneho žiwjenja. Zo na přikład njeje skoro žanych popularnych knihow z mjenje hač połsta rěčnymi zmylkami, so snadź tež polěpši, hdyž budźe nakładnistwo pod třěchu Domu serbskeje rěče :-).

Narodne wědomje a wopačny porok nacionalizma

25. Oktober 2011

Najwažniši wotrězk w knize „Engel des Vergessens“ słowjenskeje spisowaćelki z Korutanskeje, Maje Haderlap, na stronje 221 steji: „In der Vergangenheit ist meine Familie eine national handelnde Familie geworden, als sie sich gezwungen sah zu reagieren, weil sie durch ihre Zugehörigkeit gefährdet war, weil es um ihr physisches Überleben ging. Entweder die Sprache und die Kultur vergessen und im Deutschen aufgehen, oder sich wehren und die verheerenden Folgen ertragen.“ Tak by wjele Serbow samsneje generacije kaž 50-lětna Maja Haderlap wo stawiznach swojeje swójby wosebje w dobje nacionalsocializma powêdać móhło.

A tohodla zapřijeće „narodne wědomje“ do němčiny přełožić njemóžeš. Němčina je rěč dohladowarjow kacetow, zamołwitych zakaza słowjenšćiny a serbšćiny, strategow ludomordarstwa była. Štóž Serbam nacionalizm abo separatizm resp. pobrachowacu tolerancu wumjetuje, dokelž na swojim prawje wobsteja, mjez sobu druhdy tež w přitomnosći druheho jazyka serbować (kaž je sej to sakska ministerka za wědomosć a wuměłstwo von Schorlemer njedawno při spožčenju Myta Ćišinskeho wuraznje přała), a jim město toho radšo hybridnu – njerozsudźenu – identitu narěčeć chce, by so sebje samoho jónu prašeć dyrbjał, hač je tuta wučba woprawdźe z prawej konkluziju ze stawiznow.

Z přitomnosće tak a tak nic, přetož je postmoderny wirtuelny rum interneta dawno z platformu swobodneje a měrniweje wuměny „ryzosćow“ ze zaměrom mjezsobneho wobohaćenja. So wě, zo w dźensnišim serbskim wjace wobsahow tči hač před sto lětami, ale so w rěčnym „škrějnym tyhelu“ rozpušćić njetrjeba, nawopak: Ženje njeje to serbske wobsahowje tajke bohate było kaž w 21. lětstotku.

(Priwatne přispomnjenje: Sym jako katolik w Hamburgu pod druhdy njepřećelnymi wuměnjenjemi wotrostł, štož ma wězo swoje wuskutki: Sym poměrnje „protestantiski“ katolik. To k mojej identiće słuša. Ale njebych ženje na ideju přišoł, wšě křesćanske wěrywuznaća jako hybridnu nabožnu kompoziciju zwoprawdźeć chcyć.)

Dźeń wotewrjenych duri w Serbskim ludowym ansamblu / Přesadźowanje wubranych rekwizitow

25. Oktober 2011

Nowinska zdźělenka SLA

Serbski ludowy ansambl wotewrje dnja 5. nowembra na něšto hodźin swoje wrota a přeprošuje wšěch zajimcow na Dźeń wotewrjenych durjow.
Pod nawodom Mije Facchinelli-Šiška pokaza balet publikumej wujimki/proby z aktualnych rejwanskich scenow a runočasnje zwučuje orchester we wulkej žurli. Nawoda orchestra při SLA Dieter Kempe wjeseli so, zo smě wopytowarjam dohlad do dźěła wuměłcow dać a praji: „Proby su dźěłarnička orchestra. Wone su městno, na kotrymž z partitury, našim hudźbnym twarskim planje, klinčace twórby nastawaju.“
Wjeršk dnja budźe přesadźowanje wubranych rekwizitow z fundusa. Šwalča-mišterka Kathleen Grunau a jeje sobudźěłaćerki wupytuja hižo kostimy a narodne drasty, kotrež je móžne na wonym dnju na přesadźowanju dobyć. Intendantka SLA Milena Vettrainowa k tomu: “Dyrbimy sej rum za nowe kostimy stworić a chcemy rekwizity ze starych produkcijow w prěnjej měrje našim serbskim lajskim skupinam dale dać. K tomu prosymy towarstwa, kotrež maja zajim na kostimach, zo bychu so na přesadźowanju wobdźělili.“
Termin k wobhladanju předwidźanych eksponatow móža zajimcy telefonisce z nami dojednać. Za najmłódšich hosći změjemy dróhu paslenja a hodźinu bajkow w bašće z awtorku Jěwu-Marju Čornakec.

Termin: 5. nowember 2011
Čas: 10.00 do 17.00 hodź.
Městnosć: Serbski ludowy ansambl
Tel.: 03591/3580