Archive for Februar 2012

Serbske terminy nalětnik

29. Februar 2012

02-29 terminy merc

Serbske spěwanje – kusk njebjes na zemi

29. Februar 2012

2012 je přestupne lěto, tohodla protyka nam dźensa 29. mały róžk popřeje. Na tutym wusahowacym dnju chcu wam pokiw na wurjadnu serbsku spěwarku sposrědkować, kiž změje njedźelu popołdnju w Smochćicach wustup wosebiteho razu.

Sam sprawnje prajene fan spěwow mecosopranistkow njejsym, přetož rady wobsahowje zapřijimuju, štož słyšu. Nimo toho mojej wuši cyle wysoke zynki tak rady nimatej.

Ale spěwanje je rjap serbskeje kultury a identity. A runja šlagram w rańšim wusyłanju Serbskeho rozhłosa njetrjeba so mi resp. druhim wšo lubić, štož so spěwa. Cyle wothladajo wot toho: Tanja Donatec je sej wysokeho wuměłskeho niwowa dla připóznawanje zasłužiła.

Stanisław Tilich je jónu zjawnje prajił, zo wón sam njespěwa. Ja poprawom tež nic. Ale chóry rady słyšu, dokelž w jich zhromadnych spěwach towaršnostna harmonija tči, kotruž w normalnym žiwjenju tak njedožiwjamy – wone su kusk njebjes na zemi.

Dokumentacija nowinskeje zdźělenki Serbskeho ludoweho ansambla (SLA)

Serbsko-słowjanski spěwny wječork z Tanju Donatec 4.měrca, 17.00 hodź. w Smochćicach

Budyska mecosopranistka Tanja Donatec skutkuje hižo wjele lět wuspěšnje w mjezynarodnej hudźbnej scenje. Wona wustupi w mnohich operowych předstajenjach a koncertach, mjez druhim w Meranje, Salzburgu, Mnichowje a Lipsku. Za jeje wusahowace interpretacije serbskeje wokalneje hudźby kaž tež za jeje angažement při hudźbnowědomostnym nadźěłanju serbskich twórbow a temow spožčichu jej w l. 2005 Spěchowanske myto Ćišinskeho.

Wona wobknježi šěroki repertoire literatury – wot komorneje hudźby, spěwa a oratorija ze 16. lětstotka hač k dźensnišej hudźbje, operje a opereće. Spěwarka interpretuje twórby stajnje w originalnej rěči.
Kedźbyhódne bě jeje nadźěłanje a interpretacija koncerta ze zhudźbnjenjom ludowych spěwow Ludvíka Kuby do wšěch słowjanskich rěčow (2003), kotrež bě mdr nahrawał.

Na klawěrje přewodźa Tanju Donatec mjezynarodnje znata pianistka a komponistka Oksana Weingardt-Schönowa.

„Nowa Amerika“ – republika swobody a kulturneje kreatiwity w našim regionje

28. Februar 2012

Moja mać je wědoma wobydlerka noweje kulturneje republiki „Nowa Amerika“ w nahraničnych kónčinach Němskeje a Pólskeje na woběmaj bokomaj Nysy a Wódry. Tež Serbja maja w tutym wot Europskeje unije spěchowanym projekće swoje městno. „Nowa Amerika“ wotpowěduje nowemu myslenju „Europy regionow“, hdźež nacionalne mjezy dale a mjeńšu rólu hraja.

„Narodny swjaty dźeń“ republiki „Noweje Ameriki“ je 20. nalětnik. Jeje teritorij njeje kruće definowany, ale wot wědomja ludnosće wotwisny. W Frakfurće nad Wódru je ideja „Noweje Ameriki“ hižo k lěpšemu poměrej ludźi susodneju městow přinošowała – model zu naš cyły region? Město nowych administratiwnych regulow a konstruktow trjebamy wjac kulturneje kreatiwity – „nowu Ameriku“ we Łužicy!

Linki:

http://www.nowa-amerika.net/

http://www.radio.slubfurt.net/tag/nowa-amerika/

http://pomlit.wordpress.com/2012/01/10/nowa-amerika/

http://www.nowa-amerika.net/index.php/en/gb-akteure-lebuser-ziemia/208-klinger-runde

Serbske jutrowne jejka

28. Februar 2012

So wě, zo jenož jejka molacy lud być nochcemy, ale bjez jejkow njeńdźe, wšako žona swojemu lubcej spěwa: „Daj mi jedno jajko, daj mi ljubej dwě …“ 🙂 http://www.youtube.com/watch?v=Km_-Rl44Z6s. Nimo toho ma kóždy lud swoje specifiske tradicije pěstować, čim bóle, ćim bytostniša je tema, wo čo dźe: A jejko, symbol płódnosće, lubosće a harmonije, je kulturneho wobdźěłanja hódne.

Serbske jutrowne wiki su přeco dobra składnosć, sej najrjeńše wuměłske twory lěta na tutym polu wohladować, tohodla tule pokiw na lětak k lětušemu zarjadowanju „Serbske jutrowne wiki“. Takrjec ludowe wuměłstwo na profesionelnym niwowje, a to tola podpěrać chcemy – w kóždej domjacnosći je hišće městna za dalše rjane jejka. Jeli nic, je dosć přećelow a znatych, kotřiž je hišće nimaja …

flyer_ostermarkt_2012

Prjedawši Róžeńčanski mnich Irenäus Krause chce so z ewangelskim fararjom stać

27. Februar 2012

„Wuměna“ mjez konfesijomaj duchownych w Serbach póńdźe dale:

http://www.bild.de/regional/dresden/dresden-regional/zisterzienserpater-wird-evangelischer-pfarrer-22862018.bild.html

Na zhromadźiznje přećelow Serbow w Praze

26. Februar 2012

Sobotu dopołdnja w Serbskim seminarje w Praze: Towarstwo přećelow Serbow (Společnost přátel Lužice, SPL/TPS) zahaji swoju hłownu a wólbnu zhromadźiznu. Dotalny předsyda Petr Kaleta dale na čole organizacije steji, městopředsydaj staj Klára Poláčková a Miloš Malec. Dalši sobustawojo předsydstwa su: Petr Kalina, Petr Kadlec, Roman Baron a Josef Bartoň. K wólbnej komisiji słušeše z Piotrom Pałysom (Opole) pólski čłon SPL, kiž je znaty jako předsyda towarstwa „Pro Lusatia“.

Mjez přitomnymi běchu tež serbski čłon Jurij Łušćanski, Horstyměr Njebjo (Horst Himmel, tež spěchowacy čłon Domowiny) z Offenbacha, kiž je w Čěskej jako syn serbskeje maćerje a němskeho nana wotrostł a 1968 do zapada šoł, a Serbowka, rodźena w Zemicach (hlej link na stronu Zemic-Tumic). Wona w Praze bydli a bě kónc štyrcetych lět wobydlerka Serbskeho seminara.

W čiłej, přeco wěcownej a přijomnej diskusiji njewěnowachu so čłonojo jenož prašenju klětušeho financowanja rumnosćow w přizemju domu, ale tež temje, hač měł měsačnik towarstwa „Česko-lužický věstnik“ z wozwjewjenjom romana Bohumile Šretroveje „Chcu domoj“ pokročować. Čěski original romana wo Ćišinskim je so zhubił, a nětk jón młodźi Češa ze serbšćiny do čěšćiny přełožuja.

SPL ma 141 čłonow a chce k 100. róčnicy Domowiny na wšelakore wašnje přinošować. Prěni projekt je wustajeńca z fotami Clemensa Škody wo Wotrowskej młodźinje, kiž wisa w sydarni SPL.

Zemicy-Tumicy: http://de.wikipedia.org/wiki/Demitz-Thumitz

Bankrot so bliži

24. Februar 2012

Němske hrónčko rěka: „Štóž njewě, kak dale póńdźe, dźěłowy kruh załoži.“ Pod wliwom hybridneho myslenja 🙂 je jenički efekt wotpowědneho serbskeho gremija załožby a Domowiny wospjetne přestorčenje rozsuda wo přichodnych strukturach serbskich institucijow.

Status-quo-lobbyisća su so zaso jónu přesadźili, byrnjež najwjetši čas tworjenja rozsudow był, přetož cyłk institucijow dołhodobnje financujomny njeje a swój hłowny nadawk – zdźerženje serbskeje rěče – njespjelnja (hlej mjez druhim na Vogtowe analyzy a poručenja).

Tak so system krok po kroku pjenježnemu a wobsahowemu bankrotej bliži – lěta dołho, a kaž w druhich systemach zwonka serbskeho swěta budźe kónc nahły a njejapki. Škoda, zo njeje wjac zmužitosće – sčasom!

Wuprawa do přichoda a zańdźenosće njeje iluzija – nabožna wěra do duše so k přirodospytej hodźi

23. Februar 2012

By-li kosmonawt ze spěšnosću swětła (300.000 km/s) w swětnišću k najblišim hwězdam po puću był, by wón tamle po mało mjeńšinach dóšoł, mjeztym zo su ludźo na zemi štyri lěta starši bywali. Tak by so wón takrjec do přichoda podać móhł. To teoriji relatiwnosće z pjera Einsteina wotpowěduje: Čim spěšniši předmjet, ćim pomałši čas – štož při našich dotal technisce móžnych spěšnosćach lědma rólu hraje.

Ruski kosmonawt, kiž je 800 dnjow wokoło zemje lećał (z 28.000 km/h), bě na kóncu 0,02 sekundaj „młódši” hač čłowjek, kiž je na zemi wostał. Za na spočatku mjenoway efekt by wón 1.000.000.000 km/h přelećeć dyrbjał.

Po najnowšich wědomostnych pospytach w Šwicarskej je tež nawopačny puć přez čas móžny: Woni su neutriy, dźělčki nimale bjez masy, tak na 730 km dołhej čarje pod zemju pospěšili, zo su spěšniše hač swětło byli. To so drje k Einsteinskej teoriji njehodźi, ale wony wulki duch je sam přeco prajił, zo bychu jeho naslědnicy k nowym dopóznaćam přińć móhli. Fakt je: Štóž runja neutrinam swětło a kóždužkuli maćiznu přesćahuje, móhł sej woprawdźe do zańdźenosće wulećeć. Čas by wróćo bežał.

Časopis „P.M. Perspektive” so paradokskej wěnuje: Što by było, jeli něchtó do zańdźenosće pućuje, tamle swojeho pradźěda mori a z tym wuměnjenje swójskeho narodźenja zniči? Wotmołwa je z mojeho wida cyle jednora: To wězo njeńdźe, dokelž jenož zańdźenosć docpěješ, hdyž sy materiju někak wotbył („přesćahnył”) – potom pak hižo materielnje jednać njemóžeš.

Načasny čłowjek – tež wěriwy – ma porno prjedownikam dale a wjetše ćeže, sej tajke něšto kaž dušu předstajić móc. Bohosłowcy našeho časa sej w zjawnosći lědma zwěrja, nadźiju na wěčne žiwjenje na wobstaće njematerielneje čłowječeje duše podeprěwać. Fyzikarjo a matematikarjo pak dawno z modelemi eksperimentuja, kotrež su z plawsibelnym přirodowědnym ramikom za nabožny kosmos duše čłowjeka, njematerielneho koncentrata informacijow, kiž nas ze wšěmi před nami zemrětymi zwjazuje.

Tilich wo wonječesćenju swjatych křižow w Serbach

23. Februar 2012

http://www.welt.de/print/die_welt/politik/article13882461/Unsere-Kreuze-werden-zerstoert.html

Mój interview z Joachimom Gauckom (1998)

21. Februar 2012

300_ND_1998-12-28_006