Archive for August 2012

Přeprošenje na posedźenje zwjazkoweho předsydstwa

31. August 2012

(Nowinska zdźělenka Domowiny)

Přichodne posedźenje posedźenje Zwjazkoweho předsydstwa Domowiny wotměje so sobotu, dnja 15. septembra 2012, 9 hodź. w hosćencu „Zum Echten“, Lawske hrjebje 1, w Budyšinje. Na dnjowym porjedźe steja mjez druhim:
– spominanje na 75. róčnicu wobsadźenja stareho Serbskeho doma přez gestapo,
– přihoty 16. wólbneje hłowneje zhromadźizny dnja 23.03.2013 we Wjerbnje,
– rozprawa kubłanskeho wuběrka k aktualnym serbskim kubłanskim prašenjam,
– staw nowelěrowanja Serbskeho zakonja w Braniborskej a
– pomjenowanje zastupjerki/zastupjerja Domowiny za kuratorij Myta Ćišinskeho za dobu 2013 – 2018.

Zajimcy su na spominanje a na zjawny dźěl posedźenja wutrobnje přeprošeni.

Dnjowy porjad:

08-31 – TOP 15 09 2012-zjawne

Nic za pjatk, ale swjatk

31. August 2012

Kulinariska krajina

Bajkojty lěs dźakowanko kačiznje

31. August 2012

Redakciske zasady Serbskich Nowin

30. August 2012

Zo nowinski rěčnik iniciatiwneje skupiny pospochi wulke rozprawy wo swojej iniciatiwje piše, kotrež so kaž normalne redakciske přinoški samo na titulnej stronje SN wozjewjeja, wotpowěduje redakciskim zasadam serbskeho wječornika, ale nic rozprawa Serbskeho ludoweho ansambla wo swojej dźěławosći kołowokoło jubilejneho lěta składnostnje 60. róčnicy SLA. Telko k wosebitemu zrozumjenju SN wo nowinarskej swobodźe.

Kolesowanje jako wupuć ze wšěch problemow

30. August 2012

Dale a wyše płaćizny za diesel resp. bencin, kotrež tele dny stajnje stupaja, pohnuwaja k přemyslowanju wo žiwjenskim stilu. Na přikład, hač njeje kolesowanje tež zwonka dowola a swjatoka dobry instrument, puće wšědneho dnja zmištrować. Ale porno našim prjedownikam, kotřiz su přewažnje w bliskosći dźěłoweho městna a wjesnych klamow bydlili, je to w našej dobje hustodosć cyle hinak.

Někotři jězdźa z wokolnych wsow z kolesom na dźěło do Budyšina. Mój puć do sejma w Drjedźanach pak je tam a sem hižo z awtom 130 kilometrow, z kolesom by kusk dlěši był, přetož nochcu so w powěsćach rozhłosa zwěčnić – jako kolesowar na awtodróze :-). Z kolesowanjom njeda so jenož wjele energije zalutować, ale tež strowotu skrućić, štož nam samym a dołhodobnje při financowanju strowotnistwa njehladajo na demografiske wuwiće pomha.

Mje by wězo zajimowało, kelko ludźi w Serbach je, kotřiž su hižo dźensa kóždy dźeń dlěše tury ze swojim kolesom po puću – nic jenož sportowsce, ale dla spjelnjenja winowatosćow wšědneho dnja …

Nadźijomnje wowcy to rozumja :-)

30. August 2012

Na nasypje při Wódrje blisko Eisenhüttenstadta w dowolu namakane …

Społnomócnjeny za serbske naležnosće chce bjezmócny wostać – tragedija dźe dale

29. August 2012

Zo njemóže Benedikt Cyž w krajnoradnym zarjedźe ničo za dospołnu dwurěčnosć we wokrjesu činić, na tym zaleži, zo njeje wón woleny, ale přistajeny – tak wón sam w interviewje z SN. Jemu k informaciji: Mjeno funkcije je „społnomócnjeny“ za serbske naležnosće – tamle tři „móc“ nutřka. Je runje zmysł społnomócnjenych – wšojedne hač su woni za žony, zbrašenych, wukrajnikow abo Serbow přisłušni, zo po wašnju wěcywobdźěłarjow jenož předpisy njezwoprawdźeja.

Społnomócnjeny ma lobby za ludźi być, kotřiž su dotal přez towaršnostne předsudki abo wopačne předpisy diskriminowani. Jeho nadawk je, swoju móc jako zjawna wosoba z hamtskimi srědkami za to zasadźować, tutej diskriminaciji wotpomhać. Benedikt Cyž je mjez wšěmi społnomócnjenymi po cyłej Němskej najskerje z unikatom: Wón widźi formelnu diskriminaciju swojeho klientela jako fundament swojeho dźěła – a hdyž w serbskim zakonju „soll“ a nic „muss“ steji, čuje so wón bjezmócny.

Na tule tragediju dawa bohudźak wotmołwa: Kóždy dźeń sto nowych nalěpkow „A serbsce?“ 🙂 Žaneje wotmołwy pak njeje na jeho šamałosć, na jednym boku angažowanych Serbow akcije „A serbsce?“ skriminalizować a so na druhim boku hóršić, zo njejsu woni zjawny list ze swojimi mjenami podpisali. Što chceš k tomu prajić?

Staršiski čas w SLA – nó a?

29. August 2012

Njedawno bě w SN wulki přinošk wo wšelakich problemach přistajenych Serbskeho ludoweho ansambla ze swojim dźěłodawarjom. W tutym zwisku rěkaše, zo sej znaty sobudźěłaćer SLA jedne lěto staršiskeho časa wozmje, ale nochce so k tomu wuprajić, čehodla wón to čini. Z tym nastanje zaćišć, zo je so něšto w zawodźe nimo kuliło, jeli mužej do mysli přińdźe, połne lěto w staršiskim času wostać chcyć.

Zo muž – a nic žona – dźěsća dla lěto doma wostanje, njeje dźensniši dźeń hižo ničo wosebite. Znaju žurnalistow z powěsćernjow a telewizije w Drježdźanach, kotřiž su to činili. Za tajki rozsud je wjele dobrych priwatnych přičin: Hdyž je mać studentka abo samstatnje dźěłaca, nan pak přistajeny, móže to za njeho lochšo być, powołansce lěto wusadźeć. A pod materielnym aspektom je so zakład rozsuda, štó wostanje doma, radikalnje změnił: Prjedy je poprawom přeco tónle po porodźe dźěsća dale na dźěło chodźił, kiž wjac zasłuži, zo by swójba porjadnje zastarana była. Přez princip staršiskeho pjenjenz – měritko je dotalna mzda, dóstanješ dwě třećinje dale – wostanje dźensniši dźeń druhdy z wotpohladom tón doma, kiž ma wyšu mzdu …

Mužojo njejsu w powołanskim wobłuku mjenje parujomni hač žony, a wjele načasnych nanow widźi w staršiskim lěće doma tajke něšto kaž sabatowe lěto. Wosebje nanojo, kotřiž njejsu hižo jara młodźi, tajku přestawku rady za přemyslowanje wo dalšim wusměrjenju w žiwjenju wužiwaja a nic naposledk so runje wuměłcy w tutym lěće doma připódla rady małym projektam wěnuja, za kotrež do toho njejsu chwile měli.

Spodźiwna tafla we Wochozach

29. August 2012

Bogumił Šwjela, sobuzałožer Domowiny, kiž je mjeno třěšneho zwjazka Łužiskich Serbow „wupjekł“, je žiwy a farar był – tak je na tafli při cyrkwi we Wochozach widźeć. Ale tež, zo bě wón jako čłowjek drje Serb, jako duchowny pak pozdatnje Němc. Zwonkastejacy wobhladowar, kiž so w serbskich poměrach njewuznaje, by sej samo myslić móhł, zo dźe na tafli wo dweju mužow …

Wšědny puć z awtom na dźěło do Drježdźan: Pola Cyrila a Metoda a nic na Porchowskej horje

28. August 2012

Z dowola so do domizny wróćiwši sej mysliš, zo je šulskich prózdnin dla mjenje wušparanjow z wobchadom po puću na dźěło w Drježdźanach. Ale mjez Porchowom a Mohornom mamy na awtodróze tuchwilu twarnišćo, kiž je na tym wina, zo je tamle mjenje bóle přeco wšo z nakładnymi a wosobowymi awtami zatykane, wosobje rano. Na Porchowskej horje su tři čary, a po tym město dweju jenož hišće jedna – a nimo toho njeje přeco hišće wšěm šoferam znate, kak mjeztym w Němskej zakonsce zakótwjeny “princip zasmyka” funguje …

Je potajkim dweju móžnosćow: so kóždy dźeń mjerzać resp. fatalistisce ćerpjeć abo awtodróhu wěsty čas wobeńć. Sym so za druhu wariantu rozsudźił a dawam do wotjězda do nawigatora smartfona jako zaměr pak přijězd awtdróze po twarnišću, potajkim Mohorn abo Połčnicu – abo kaž dźensa “Drježdźany” bjez wužiwanja awtodróhi. Potom dam so překwapić, što so stanje. Dźensa je mje nawi mjez druhim direktnje pola swjateju Cyrila a Metoda nimo wodźił, doniž njejsym něhdy na B 6 přišoł. Wčera smědźach druhe kónčiny serbskeho kraja w rańšim słóncu dožiwić.

Zajimawe je, zo traje dźensniši puć přez wjeski jenož běrtlk hodźiny dlěje hač zwučene jězdźenje jenož přez zwjazkowu dróhu a awtodróhu. A při tym móžeš niskeje spěšnosće dla wjele ćěridła zalutować. Bych blisko Kamjenca bydlił, by tónle rozdźěl hišće wjetši był. Pytnješ při tajkej składnosći, kak blisko sakskeje stolicy serbska Łužica leži. Poprawom słušeja Drježdźany k našemu krajej, a tohodla dyrbi serbske mjeno metropole nad Łobjom tež na pućnikach Budyskeho wokrjesa widźeć być, kaž sej iniciatiwa “A serbsce?” žada.