Archive for September 2012

Serbske šule maja zjawny rěčny rum być

29. September 2012

Po zahajenju 43. zetkanja šulskich iniciatiwow z cyłeje Sakskeje w Budyšinje, hdźež stajna moderatorka a rěčnica frakcije Lěwicy w Sakskim krajnym sejmje, Andrea Roth, w rumnnosćach dźiwadła na hrodźe hosći najprjedy serbsce witaše (hlej widejo), postrownych słowach předsydy Domowiny, Dawida Statnika, a referaće Thedeja Boysena wosebje wo situaciji danskeho šulstwa w Šleswigsko-Holsteinskej je so direktor Ralbičanskeje šule, Joachim Glücklich (hlej prěnje foto) słowa jimał. Najwažniši zaměr serbskeho kubłanišća je pěstowanje serbskeje rěče na najwyšim maćernorěčnym niwowje. Jemu je tež wažne, zo móže hač do dźensnišeho z kóždym dźěsćom na šuli wo wšěm serbsce rěčeć.

Hladajo na trěbny serbski pedagogiski dorost wón sej přeje, zo so młodźi ludźo při wuzwolenju studijneho směra  za prašane kombinacije předmjetow rozsudźa. Štóž chce na přikład etiku wuwučować, hačrunjež woni na serbskich šulach Hornjeje Łužicy wučerjow za katolsku nabožinu trjebaja, dobre wuhlady na job nima – tak Glücklich. Jeho kolega ze Slepjanskeje srjedźneje šule, Wolfgang Goldstein (hlej druhe foto), je potom přitomnym zajimawy dohlad do šulskeho žiwjenja w serbsko-ewangelskich kónčinach sposrědkował. Dr. Beata Brězanowa, nawodnica Rěčneho centruma Witaj, informowaše wo přihotowanskim kursu w poslednim lěće před zastupom do šule za dźěći bjez znajomosćow serbskeje rěče. Ze stron frakcije staj so nimo Andreje Roth kubłanskopolitiska rěčnica Cornelia Falken a serbski zapósłanc Hajko Kozel na zarjadowanju wobdźěliłoj.

Jocham Glücklich widźi cyłkowny kubłanski zaměr šule w tym, zo su šulerjo po wotchadźe sebjewědomi Serbja, kiž drje tež w němskim wobswěće bjze přemyslowanja słowa kaž „Mehrwertsteuer“ wužiwaja, ale tež w serbskej komunikaciji „nadhódnotny dawk“.

Bój wo šulu we Wodowych Hendrichecach so přiwótři – region trjeba wjac swobodnych šulow

27. September 2012

We wčerawšej debaće wo přichodźe srjedźneje šule we Wodowych Hendrichecach je so za Lěwicu, kotraž je namjet zapodała, najprjedy Kathrin Kagelmann, tohorunja předsydka frakcije Lěwicy w Zhorjelskim wokrjesnym sejmiku, słowa jimała (hlej link deleka). Kultusowa ministerka Brunhild Kurth je njedźiwajcy wšěch argumentow spjećowacym staršim, kotřiž su ze swójbnymi a dalšimi wobydlerjemi městačka debatu sćěhowali, raznje ilegalne postupowanje na kóšty dobra jich dźěći wumjetowała.

Najebać to je wjele wobdźělnikow na Chróšćan zběžku z iniciatiwu we Wodowych Hendrichecach, kotraž runja tehdomnišej staršiskej iniciatiwje w Chrósćicach přećiwo woli kultusoweho ministerstwa wučbu z čestnohamtskimi wučerjemi na wuměnku origanizuje, solidarnych. Bych knjeni Kurth popřał, zo so z podpěru srjedźnostawskich zawodow w regionje dale a wjac swobodnych šulow załožuje, kotrež dyrbi po něšto lětach stat přewažnje financowac – z mjenje šulerjemi hač w statnych šulach.

http://linksfraktionsachsen.de/media/directory/uploads/062LTS_26092012_ANLinke_MSSeifhenenrsdorf_kaka.pdf

Serbske terminy we winowcu 2012

26. September 2012

09-26 terminy oktober

Do njebjes w Němskej jenož z dawkom?!

26. September 2012

Zwjazkowe zarjadnistwowe sudnistwo w Lipsku je rozsudźiło: Štóž w Němskej cyrkwinski dawk płaćić nochce, njeje hižo čłon katolskeje cyrkwje – znaty bohosłowc je ze swojej skóržbu zwrěšćił. Wusud je teologisce grotestny, a pozicija němskich biskopow so přeńdźe přećiwo poziciji bamža, kiž je so w knize “Swětło swěta” přećiwo zwiskej mjez korporaciju zjawneho prawa a duchownym zhromadźenstwom cyrkwje wuprajił. Tež jeho narěč w Freiburgu 2011 su publicisća tak interpretowali. Tola w Němskej dale rěka: Bjez dawkow njeje žaneje hnady …A to, byrnjež bu cyrkwinski dawk wot Adolfa Hitlera zawjedźeny?

Nimam problemy z tym, kóždy měsac cyrkwi wjac přinoška płaćić hač politiskej stronje, ale po cyłym swěće jónkrótny financny system cyrkwjow w Němskej je dwělomny …

Sudnistwo: Rögner je SLA škodu nadźěłał

26. September 2012

Po rozsudźe wikowanskeje komory krajneho sudnistwa w Budyšinje je tehdomniše wurjadne wupowědźenje Serbskeho ludoweho ansambla napřećo Wolfgangej Rögnerej płaćiwe, přetož je dweju wažneju přičin za to a kóžda z njeju by hižo sama dosahała. Rejwarce stej bjez dźěłoweje dowolnosće pod Rögnerom w SLA dźěłałoj. Wón sam je zrěčenje z nimaj wobzamknył a z tym čorne dźěło bjez přebywanskeje dowolnosće dopušćił. Mnozy dźěłopřijimarjo buchu bjez přizjewjenja zaměstnjeni. To je „ćežke zranjenje elementarnych winowatosćow jednaćela“.

Woprawnjene je wupowědźenje Rögnerej pak po wusudźe sudnikow tež zrěčenjow dla, kotrež je wón ze sobu samym a z druhimi wuměłcami w zwisku z předstajenjemi wobzamknył: „Přikrótšenje prawa předstajenja za wobskorženy (SLA, přispomnjenje P.) wo sydom na jenož tři lěta towaršnosći škodźi.“ Wšo, štož je Rögner sudnistwu jako wopodstatnjenje swojeho zadźerženja předpołožił, je po měnjenju sudnikow „wurěč“ resp. němsce prajene „Schutzbehauptung“. Wupowědźenje je so sčasom stało, a jeho dalšu dźěłaowsć w SLA „móžeš lědma přicpěwać.“

Sobotu: Serbske šulstwo z temu na zarjadowanju sakskich šulskich iniciatiwow w Budyšinje

24. September 2012

Šulske iniciatiwy z cyłeje Sakskeje so na prěprošenje frakcije Lěwicy w Sakskim krajnym sejmje přichodnu sobotu, 29. požnjenca 2012, 10 – 15 hodź., w dźiwadle na hrodźe Němsko-serbskeho ludoweho dźiwadła (Hród 7/8, Budyšin) zetkaja. Tema zjawneho zarjadowanja budźe „Serbske šule w Sakskej – dźensa a přichodnje“. Zastup je darmotny. Wšitcy zajimcy su wutrobnje witani.

Wotběh:
10.00 Zahajenje: Andrea Roth, rěčnica frakcije za direktnu demokratiju
Dawid Statnik, předsyda Domowiny
Thede Boysen: „Šule mjeńšinow w Němskej“
10.45 Bosćij Handrik (Sakska kubłanska agentura, reginalna wotnožka w Budyšin): „Situacija na serbskich šulach w Sakskej”
11.00 Lucy Demers (wokrjesna rada šulerjow), René Krauß (wokrjesna rada staršich): „Kak dožiwjeja starši a šulerjo wšědny dźeń na serbskich šulach?”

11.30 – 12.15 hodź. připołdniša přestawka

12.15 Diskusija wo přichodźe serbskich šulow w Sakskej
14.15 Hajko Kozel, mjeńšinopolitiski rěčnik frakcije: Parlamentariske a zwonkaparlamentariske konkluzije z diskusijow a přednoškow

14.55 Andrea Roth: Kónčne słowo

Najebać nacijow cyrkej serbsce wuthotowali

24. September 2012

Cyrkej w Dešnje, jedna ze štyrjoch cyrkwjow w Delnjej Łužicy ze serbskimi napisami – dźakowano wusahowacej ciwilnej kuraži pod knjejstwom nacijow:
http://www.dissen-striesow.de/verzeichnis/visitenkarte.php?mandat=68188

Łužiska domizna Zgorzelec

22. September 2012

Serbske wabjenje za hosćenc

Chěža ze stołom (při Aleji lipow!)

Skrućenje Domowiny njerěka, zo wšo při starym wostanje – wjac angažementa za reformy!

22. September 2012

Skrućenje Domowiny njerěka, zo wšo při starym wostanje. Na swěće płaći ewolucionarny princip: Jenož štož so stajnje měnja, móže wobstać.

Tohodla by derje było, hdyž bychu najzasakliši kritikarjo třěšneho zwjazka Serbow swoju energiju na namjety reformy Domowiny sameje město prócowanja wo faktiske wotstronjenje resp. politiske wobeńdźenje rěčnicy serbskeho ludu koncentrowali.

Najwjetši problem je tuchwilu woteběranje serbskeje rěče. Wo tym su sej samo nimale wšitcy přezjedni. Njeje pak žanoho druheho organizatoriskeho cyłka, hdźež telko ludźi tak husto mjez sobu serbuje kaž w Domowinje a jej přisłušacych towarstwach. Štóž tónle cyłk politisce na bok tłóči, je tótka serbšćiny w zjawnym rumje.

Zo je w Serbach 25 do 30 ludźi, kotrřiž zasadnje kóždy přinošk wo Domowinje (!), nic wo sejmiku, principielnje negatiwnje pohódnoća, k wědomju bjeru.

Ale tule dźe wo rozumne argumenty we hłowje, nic wo předsudki w brjuše.

Kočišćina

21. September 2012

Rano stańši z konopeja: „Ja sym jara hłódny, daj mi něšto dobre!“ Stary kocor (17-lětny) je drje nimale hłuchi, ale jeho kočišćina je jasnje wurěkowana :-).