Archive for Mai 2013

Dokal z EU a euro? Serbski lud cyłemu kontinentej puć do přichoda pokazuje

31. Mai 2013

Jedni chcedźa zaso kontrole při hranicy zawjesć, druzy bychu radšo dźensa hač jutře zhromadnu měnu euro wotbyli. Samo dosć ludźi namakaš, nic jenož při rańšim piwku za stajnym blidom, kotřiž wo EU ničo nimaja, wšako so „běrokratija w Brüsselu“ pječa přećiwo narodnym zajimam přeńdźe.

Pjeć lět po rozpušćenju Juhosłowjanskeje bě wójna na Balkanskej połkupje. Při tym smy Europjenjo w našim dobje na našim kontinenće dotal njepředstajomnu surowosć dožiwili. Měr w Europje njeje samozrozumliwy. EU a euro stej politiskej (!) srědkaj za přewinjenje hospodarskich a kulturnych konfliktow. Štóž tule bazu europskich narodow rózno bjerje, kaž to na přikład nowa strona AfD proklamuje, staji měr na hrački.

Komisija EU che klětu roaming-popłatki za telefonaty z handyjom we wukraju wotstronić. To je nowy rjany přikład za doprědkarski charakter Europskeje unije: krok po kroku wšě mjezy zrumować. Serbja, swobodny lud bjez swójskeho nacionalneho stata, kiž su swoju rěč a kulturu njewotwisnje wot hranicow žiwi, su awantgarda EU bjez mjezow – ani mjez krajemi ani mjez ludźimi.    

Smy hižo dźensa tamle, dokal dyrbja so wulke ludy hakle z prócu pohibować: Wjacerěčnosć a wědomje, zo mamy swoju domiznu z „cuzymi“ dźělić, stej z wuměnjenjom za spomóžnu měrliwu zhromadnosć ludow w 21. lětstotku. W tutym zmysle njech je Łužica z modelowym regionom za wuwiće EU bjez hranicow.

Serb je mjenje „škitany“ hač mórski worjoł – demontaža z ličbami a kubłanjom

30. Mai 2013

Nowelěrowanje serbskeho zakonja w Braniborskej čini wulke wušparanja, dokelž chcedźa politikarjo wědźeč, kelko Serbow woprawdźe tamle je, hdźež ma so dodatnje serbski sydlenski rum deklarować. Tež w kubłanskopolitiskich naležnosćach smy přeco – we Sakskej a Braniborskej – z prašenjom za ličbami konfrontowani: Kelko Witaj-dźěći je, dosaha ličba na dwurěčnym kubłanju zajimowanych staršich?

Mórski worjoł ma porno Serbam wyši škitny status. Tule knježi princip: Čim mjenje porikow je, ćim wjac škita a ruma za njemylenu reprodukciju trjebaja a dóstawaja. Serbja pak su podhladni, hdyž chcedźa serbsce bjesadować; woni njesmědźa serbske wosady měć, ale prošu jara dwurěčne, a tež serbske šule hižo njejsu, ale 2plus-kubłanišća. Wšě žiwe generacije, kotrež su hišće do klasiskich serbskich šulow chodźili, su připódla lěpje němsce nawuknyli hač ći, kotřiž steja hižo dźesać a wjac lět pod dogmu „dwurěčnosće“.

Tohodla je „dwurěčnosć“ jenož etiket zo wotsuwanje serbšćiny do folkloristiskeho a pobožneho kućika – ale při wšěch wulkich wažnych temach načasneho techniskeho, kulturneho a towaršnostneho žiwjenja njech prošu wšitcy němcuja. Po tym zo dźakowano 2plus lědma štó hišće serbsku gramatiku wobknježi a so słowoskład zaměrnje Daj-mi-butru-rěči přibližuje, je to rěčnoekonomisce zmysłapołnišo :-(. Abo nic?

Mórski worjoł rěka w spisownej rěči „kosćełamak“. Tajke stworjenje dyrbiš respektować. Nic pak ludźi, kotřiž so na swojej demontaži pilnje a dušnje wobdźěleja.

Wustawowe sudnistwo jedna wo wuswojenju za wudobywanje brunicy – sćěhi za Łužicu su móžne

29. Mai 2013

Runja „Łužiskej aliancy“ wojuje tež w Porynskej wobsedźer ležownosće přećiwo wuswojenju wudobywanja brunicy dla. Zwjazkowe wustawowe sudnistwo chce 4. smažnika – potajkim hižo přichodnu wutoru – wo skóržbje jednać. Potrjecheny je měnjenja, zo so hórnistwowe prawo přećiwo zakładnym prawam přeńdźe:

http://nachrichten.rp-online.de/regional/gericht-verhandelt-garzweiler-klagen-1.3430302

Pad je tež za brunicowe wuběrki Sakskeje a Braniborskeje, wobydlerjow mjez druhim w Slepjanskich kónčinach, krajnu politiku a Domowinu wažny: By-li so skóržbnik přesadźił, by to wuchadźišćo za dalše rozestajenja wo pokročowanje wuhlowych jamow we Łužicy zasadnje změniło. Sprawnje prajene nimam to za prawdźepodobne, ale pola najwyšich sudnikow Němskeje su přeco překwapjenki móžne. Snadź budźe wuslědk tež postajenje nowych kriterijow za wotwažowanje mjez zajimom na wudobywanju surowiznow a prawom jednotliwca resp. přirody.  

Samsne wobrazy kaž we łužiskich brunicowych jamach:

http://www.zeit.de/wirtschaft/2013-04/fs-garzweiler-2

 

Tři minuty k reformje Domowiny

29. Mai 2013

Prěni pospyt … Snadź je to k wutraću 🙂 (z techniskich přičin hakle dźensa w syći přistupny pask, kiž pak je wčera produkowany):

Žiwjenje je rjane

29. Mai 2013

IMG_0113

Nowinski rěčnik frakcije Lěwicy w Sakskim krajnym sejmje z předsydu regionalneho zwjazka Hornjeje Łužicy / Delnjeje Šleskeje Komunalnopolitiskeho zjednoćenstwa CDU wječor njedźiwajcy jenož jědnaće stopnjow pod hołym njebjom na dworje Societetneho dźiwadła w Drježdźanach – składnostnje nalětnjeho přijeća frakcije a abrahamin mojeho šefa.  

Foto: Carola Müller

Łuhowska jězorina :-)

28. Mai 2013

Přeprošenje na posedźenje Zwjazkoweho předsydstwa a na Dźeń za wotbagrowane wsy

28. Mai 2013

05-28 Preprosenje na ZP 08-06-2013 w CB

05-28 ZP 08-06-2013 w CB

05-28 Groß Lieskow -Einladung

05-28 Groß Lieskow – Anfahrt _2_

Serbske terminy w smažniku 2013

27. Mai 2013

05-27 terminy junij

Koncert dorosta młodeje serbskeje hudźby

27. Mai 2013

Na iniciatiwu Serbskeje hudźbneje akademije při SLA kaž tež w kooperaciji z wokrjesnej hudźbnej šulu Budyšin poskići so 1. junija w 17.00 hodź. na žurli Serbskeho ludoweho ansambla wubranym wobdźělnikam wubědźowanja “Młoda serbska hudźba” a hudźbnym šulerjam našeho regiona šansa, jako solisća pod přewodom komorneho orchestra SLA wustupić.

Wosebity koncert z čerstwym wupruženjom doporučuje so předewšěm tym, kotřiž  chcedźa so wo stawje zamóžnosćow a kmanosćow  našich młodych dorostowych wuměłcow informować. Jako solisća zahudźa mjez druhim Jan Brězan (klawěr), Christiane Bukec (fleta),  Lukas Čórlich (trompeta), Josephina Krječmjerjec a Milena Hrjehorjec (wobě husle), Vincent Nerad (violoncello)kaž tež Lucija Smolic a Katarina Prochazkova (spěw).

01.06.2013, 17.00 hodź. na žurli SLA Budyšin

Nowinska zdźělenka Serbskeho ludoweho ansambla

Pytaj wšitke zmylki! :-)

27. Mai 2013