Archive for August 2013

Cybulina a Kozel do předsydstwa sakskeje Lěwicy wolenaj

31. August 2013

Wosom žonow a sydom muži su delegaća dźensa na stronskim zjězdże sakskeje Lěwicy nimo jednaćelskeho předsydstwa do najwyšeho gremija krajneje strony wolili. Mjez nimi staj Serbaj Julijana Cybulina a Hajko Kozel.

Młoda Serbowka kandiduje za krajne předsydstwo sakskeje Lěwicy

30. August 2013

http://www.dielinke-sachsen.de/uploads/media/Kandidaturen_2013_Juliana_Zybul.pdf

Jutře su wólby na stronskim zjězdźe w Drježdźanach!

Polacy maja z němskimi wjesnymi taflemi mjenje problemow hač Němcy ze serbskimi

30. August 2013

Zebowice

Jurij Łušćanski chcyše w zwisku z debatu wo přelěpjenju „Chrósćicy / Crostwitz“ (hlej přinošk w blogu) wědźeć, kak so z wjesnymi taflemi etniskich mjeńšin w Pólskej wobchadźa. Pjotr Pałys je z fotami wotmołwił: Němcy a druhe mjeńšiny maja tamle wjac městna na taflach hač Serbja w Němskej: Jich rěč njetrjeba mjeńša być – kaž po němskich předpisach …

Kistowo

Konieczna

Sydom tezow k brunicy w serbskej politice

28. August 2013

Wo energijowej politice njech kóždy mysli, kaž jemu so che

1. Domowina njeje za energijowu politiku přisłušna, přetož wona nima ani politisku móc ani wědomostnu kompetencu, sama wěcywustojnje wotwažować, kelko wětrnikow abo wudobywanja brunicy towaršnosć w Sakskej resp. Němskej trjeba, a swójsku poziciju na wšěch runinach přesadźić. Tohodla njetrjeba so wona k stejišću w tutych prašenjach nuzować dać – kóždy Serb njech sej wo tym wosobinske měnjenje twori runja kóždemu druhemu staćanej.

Njepilic statok njeje mjenje hódny hač row němskeho filozofa

2. Domowina je prěnjotnje zastupjerka awtochtoneho ludu we Łužicy a jeho ludźi tež zwonka łužiskeje domizny. Wona ma – po móžnosći hromadźe z partnerami – wšo wotwobarać, štož je Serbam na škodu, a wšo podpěrować, štož je na dobro Serbow. Z tuteje perspektiwy ma wona rozsudy druhich na wšěch politiskich a zarjadniskich runinach posudźować a zjawnje wuhódnoćeć. To płaći tež stajnje za wšě sćěhi energijoweje politiki. Awtochtonosć ma bytostnje něšto ze zakorjenjenosću rěčy a kultury na konkretnych blakach zemje činić – w tutym zmysle dyrbi awtochtona organizacija za zdźerženje „genius loci“ (duch městna) wojować. Wědomostnicy, kiž herbstwo filozofa Nietzsche pěstuja, su so wuspěšnje přećiwo wotbagrowanju jeho rowa brunicy dla wobarali, ale Domowina nješkita Njepilic statok tamle, hdźež wón steji?!  

Dale a mjenje dźěłowych městnow w brunicowej industriji

3. Zasadnje je wězo wudobywanje brunicy w serbskim sydlenskim rumje z wida pragmatiskeho Serba móžne a akceptabelne: Tež Serbja su hórnicy (byli) a hižo generacije dołho njemóže resp. nochce cyły lud jeničce z ratarstwom žiwy być. Kóžda dróha, twornja, kóžde sydlišćo abo samo hižo nowy dom krajinu dołhodbnje přeměnja – brunicowe jamy na sebi njejsu ani hórše ani lěpše hač druhe zasahnjenje do přirodneje struktury regiona. To pak tohorunja rěka: Wone njejsu ničo sakrosanktneho kaž na přikład putniske městno w Róžeńće. A k wotwažowanju słuša fakt: Je dale a mjenje ludźi, kotřiž maja dźěłowe městno w brunicowej industriji – wuskutk techniskeje racionalizacije.

Haj a ně w samsnym regionje je kónc narodneje organizacije

4. Mamy bohudźak wjele lokalnych wosebitosćow, ale jedyn serbski lud – w Hornjej Łužicy, w Slepom a w Delnjej Łužicy. Domowina njeje třěcha towarstwow wobsedźerjow jednotliwych parcelow – dźe wo cyłotnu strategiju, wo serbske powšitkowne derjeměće. Za to maja so zaměrnje kriterje rozwiwać, kotrež su wšudźe płaćiwe a na kotrež móže so kóždy přeco spušćeć, hač we Wjelceji abo w Rownom. Zo so Domowina w Delnjej Łužicy wotbagrowanju ludźi spřećiwja a w srjedźnej Łužicy w samsnym času přesydlenje bjez protesta přewodźa, je spočatk rozpada narodneje organizacije. Tajkile njeplawsibelny přećiwk w centralnym a zjawnje horco diskutowanym prašenju njeje akceptabelny. Aktualne rozprawnistwo w Nowym Casnik na to pokazuje, zo tajke šicofrene postupowanje objektiwnje njefunguje, wšako so stejišćo Domowiny jedneje župy přećiwo druhej instrumentalizuje.  

Podpěru tež přećiwnikam přesydlenja

5. Tak kaž kóždy ratar ze zarjadom jedna, kiž chce jeho dróhotwara dla wuswojić, dyrbi wězo narodna organizacija z mjezynarodnym koncernom jednać. To njeje amoraliska wěcka, ale winowatosć. Tohodla su wšě jednanja z Vattenfallom, zrěčenje na dobro spěchowanja wjele serbskich projektow a stajny kontakt mjeze zamołwitymi Domowiny a Vattenfalla runja poćaham k wšěm knježerstwam a demokratiskim politiskim stronam w porjadku. Štož pak definitiwnje njeńdźe, je tuchwilny fakt, zo diplomatija jasne zjawne zastupowanje zadusy. Domowina dyrbji hladajo na pluralnosć wšelakich stejišćow – hlej 1. – wšěm potrjechenym poboku być, tež tym, kotřiž sej podpěru we wojowanju přećiwo přesydlenju žadaja.

Doskónčne zničenje sydlenskeho ruma wotwobarać

6. Po najnowšich dopóznaćach geologow su wotbagrowane tereny za nowozasydlenje w přichodnych generacijach zhubjene – hlej na přiběrace problemy z dźen a wjac a lěto a wjetšimi zesunjenjemi zemje na přestrjenjach něhdyšich brunicowych jamow. Tohodla njeje stara „argumentacija“ hižo płaćiwa: We wustawje škitany serbski sydlenski rum so drje přetworja, ale wostawa. To hižo njetrjechi. Tohodla je planowana jama „Wochozy II“ scomter předwidźanym přesydlenjom 1.500 ludźi z přeńdźenjom přećiwo wustawje. Při tutej zasadnej tematice njeje kompromisa …

Žane łžě hižo wo potrjechenych njerozšěrjeć

7. Zo je wjetšina potrjechenych za přesydlenje, je łža. Zo so tuta łža z koła Domowiny hač do dźensnišeho wospjetuje, ničo na tym njezměni, zo je to łža. Wědomostnica, kotraž je před wjele lětami wotpowědne přepytowanje přewjedła, je mjeztym wospjet zjawnje wobkrućiła, zo njeje so wona docyła ludźi za tym prašała. Druhe – aktualne – woprašowanje w nadawku dźěłarnistwa hórnikow (!), po kotrymž je wjetšina łužiskeje ludnosće za pokročowanje jamow, tohorunja ani njepraji ani njedopokazuje, zo chcedźa wot wotbagrowanja potrjecheni woprawdźe preč. Zo je wjele rezignacije, to trjechi, ale to ma tež z njepodpěru Domowiny činić.

Podawki michałskeho měsaca 2013

28. August 2013

08-28 Terminy september- pr ni d l

A serbsce – při wjelčim puću w Rěčicach / pójće a jěsće!

27. August 2013

Gesendet mit meinem HTC

Brunica přećiwo hospodarskej mizerje njepomha, tohodla trjebamy wjac brunicy?

27. August 2013

Nic mjenje wudobywanja brunicy, ale wjac – to je wuslêdk woprašowanja instituta Forsa:

http://www.iwr.de/news.php?id=24394

Organizacija „Greenpeace“ je metodu kritizowała, jenož ludnosć w bjezposrědnje potrjechenych kónčinach do woprašowanja zapřijeć, dokelž je dosć nadregionalnych zahubnych sćěhow brunicowych jamow kaž zanjerodźenje Sprewje:

http://www.greenpeace-magazin.de/tagesthemen/einzelansicht/artikel/2013/08/26/greenpeace-kommentar-zur-forsa-studie-im-lausitzer-braunkohlegebie/

To najwažniše w zwisku z tajkimi demoskopiskimi projektami tak a tak njeje institut, kiž naprošowanje přewjeduje, ale nadawkidawar. To je w tutym padźe dźěłarnistwo hórnikow (IG BCE).

Demoskopija je horoskop našeho časa, dokelž kóždy wě, zo su wotmołwy přeco wotwisne wot prašenjow, kaž so w braniborskich medijach tež tematizuje:

http://www.moz.de/nachrichten/brandenburg/artikel-ansicht/dg/0/1/1191106/

Ja bych wědźał, kak mam so prašeć, zo bych samo w brunicowym rewěrje wjetšinu přećiwo dołhodobnemu wudobywanju brunicy po lěće 2040 docpěł. Najebać to trjechi, zo so we wuslědkach Forsy powšitkowne nastajenje ludźi za stajnym blidom abo na dróze we Łužicy wotbłyšćuje.

Studija „Łužičenjo a brunica“

To iracionalne na wotmołwach naprašowanych je sćěhowace: Hdyž na pisane grafiske zjeće woprašowanja hladaš, widźiš:

Jenož 29 procentow ma hospodarske połoženje w brunicowym rewěrje za dobre. Njedźiwajcy pokročowacych wuhlowych jamow. W cyłym swobodnym staće Sakskej prajitej (hlej přinošk w blogu tydźenja) dwě třećinje naprašowanych, zo je dobreje hospodarskeje situacije. Město toho zo bychu ludźo w brunicowym rewěrje logisku konkluziju sćahnyli, zo njeda so z brunicu regionalnej mizerje wotpomhać, sej woni mysla: Z mjenje brunicu by hišće hórje było.

To pak njeje wuraz rozumneho myslenja, ale facit wuspěšneje propagandy. Naprašowanje je kwitowanka wo wuspěchu marketinga brunicoweje industrije.

K tomu je so tež čitar Sakskich Nowin w lisće wuprajił:

list_brunica

Serb a Němc: Dawid a Goliat, nic wopor a skućićel – a wjac humora? Prošu jara!

25. August 2013

Wjace humora – tak rěkaše žadanje w komentarje na titulnej stronje Serbskich Nowin zašły pjatk. Tomu rady přihłosuju, wšako mi w serbskim zjawnym žiwjenju ironija a sebjeironija pobrachujetej. Ale, kaž je pola Piwarca z wašnjom :-), přińdźe nětkole „ale“ …

Wočiwidnje njewobsteji deficit humora Serbow Němcam napřećo, přetož k znatej a připóznatej serbskej hospodliwosći słuša, kaž je w Berlinskim Morgenposće w zwisku z dobrej rozprawu wo rjanym Budyšinje čitać, wupruženje žiwjenskeje radosće:

http://www.morgenpost.de/reise/kleine-fluchten/article119310328/Auf-nach-Bautzen-der-maerchenhaften-Dornroeschenstadt.html

… a tale njeje bjez humora a žorćikow předstajomna. Serbja su tež zwučeni, z njedostatkami w zadźerženju němskeje politiki a němskich susodow na humorne wašnje wobchadźeć, dokelž njemóžeš tysac lět jenož wopor być. Bychu-li Serbja jeničce wopory, njeby Serbstwo hač do dźensnišeho eksistowało. W našim času je jenož hišće někotrych serbskich wědomostnikow / publicistow, kotřiž w kategoriji „němski skućicel / serbski wopor“ mysla.

„Normalny“ Serb ma skerje wobraz wo Dawidźe a Goliaće. Powjetšenje wjesneho mjena „Chrósćicy“ na tafli bě runja akciji „A serbsce?“ klasiski wuraz tajkeho wědomja. Wone njeje ani zasakłe ani depresiwne, ale šibałe a suwerene. Snadź přichodnje serbske medije z wjac humorom wo tym pisaja, wšako je nutřkownoserbski diskurs woprawdźe přechutny.

Tule njech je započatk :-): Smy minjene měsacy horco wo „Witaj“ a „2 plus“ diskutowali a wo tym, hač serbske dźeći na kóncu docyła hišće porjadnje serbsce móža. Nětk běch z bědu němskich ludźi ze susodstwa konfrontowany, kotřiž dlěši puć do zdaleneje pěstowarnje na so bjeru, dokelž maja woni strach, zo dźěćo po pobyće w pěstowarni w Njeswačidle doma hižo němsce njerěči a staršeju njerozumi. – To je prosta realita, ale jara komiska.

Kultura wobchadźenja ze Serbami je w Braniborskej porno Sakskej katastrofalna

23. August 2013

Štóž ze Sakskeje na stejišća někotrych zastupjerjow městow a gmejnow k naćiskej noweho serbskeho zakonja w Braniborskej poska, wo kotrychž su medije tele dny wobšěrnje rozprawjeli, móže přirunujo prajić: Tajke něšto, wosebje hladajo na wašnje wustupowanja a stil argumentacije, by sej w Drježdźanach lědma NPD dowoliła. Druzy tak a tak nic, wšako ma sakska krajna politika w lětdźesatkomaj rosćeny konsensualny stil rěčenja wo serbskich naležnosćach – cyle njewotwisnje wot politiskich rozdźělow w detailu.

To najskerje na tym zaleži, zo je nimale kóždy na krajnopolitiskej runinje skutkowacy politikar abo lobbyist hižo jónu serbsce rěčacych ludźi live abo w medijach abo přez powědanje druhich dožiwił. Rjane a pisane nałožki su – wšojedne hač serbske abo němske – z wida krajnopolitisce agěrowacych ludźi z wurazom regionalneho raza, ale nic narodneje wosebitosće. Češa čěsce rěča, Němcy němsce a Serbja serbsce – němcowacy „Wendojo“, kotřiž na swjedźenjach w drastach serbskeho pochada chodźa, njejsu z perspektiwy němskeho mainstreama škitanja hódna mjeńšina, ale folklorny fenomen.

Tohodla je z mojeho wida zaměrne wuwiwanje zjawnych – delnjoserbskich – rěčnych rumow z wuměnjenjom za polěpšenje politiskeho wuchadźišća. So wě, zo to na wěstych nacionalistiskich resentimentach přećiwo Serbam a zahubnych sćěhach „pruskeje“ tradicije hnydom ničo njezměni. Ale za dołhodnobnje wyši niwow politiskeho wobchadźenja z Braniborskimi Serbami by to spomóžne było. W tutym zwisku chcu znowa na namjet Měta Nowaka skedźbnić, so po cyłej Łužicy wo regionalnje diferencowanu rěčnopolitisku strategiju prócować.

A „Wendojo“? Mój Božo, njech woni wenduja, kaž jim so chce. To je kaž ze seksom. Je hetero- a homoseksualnych – a aseksualnych, kotřiž tak prawje nochcedźa. Prošu jara, komu to so lubi, ma swobodu, to tak pěstować :-). Ja myslu při „wendisch“ na „Wendenabteilung“ nacijow :-(. A skurilne přispomnjenja jednotliwych wendisce myslacych w knize wobličow k wotpokazanju noweho serbskeho zakonja na wědomje bjeru kaž druhe nakromne zjawy pisaneho postmoderneho žiwjenja, wjac nic.

Wurjadna hłowna zhromadźizna župy Běła Woda/Niska

22. August 2013

Zwołanje XVI. hłowneje zhromadźizny župy Běła Woda/Niska

Předsydstwo župy Běła Woda/Niska je na swojim wurjadnym wuradźowanju dnja 21.08.13 wobzamknyło zwołanje wurjadneje hłowneje zhromadźizny.

Wona budźe pjatk, 27. septembra 2013, w 15:00 hodź. w SKC w Slepom.

Na dnjowym porjedźe steja mjez druhim:

  • · Rozprawa župneho předsydstwa wo nadźěłanju nowych wustawkow
  • · Předstajenje naćiska wustawkow župy za dalše skutkowanje jako zapisane towarstwo
  • · Diskusija
  • · Wobzamknjenje nowych wustawkow
  • · Wobzamknjenje wurjadneje hłowneje zhromadźizny k zwołanju rjadneje wólbneje zhromadźizny 01.11.2013 do Slepoho
  • · Wólby k zastupnistwu woprawnjeneje wosoby předsydstwa w juristiskim zmysle § 26 Byrgarskeho zakonika

Župa chce dale pod třěchu Domowiny skutkować.

(Nowinska zdźělenka Domowiny)