Archive for November 2013

Z lóštnej mudrosću Loriota dialog wo SLA, sejmiku, brunicy, 2plus atd. wjesć

30. November 2013

Po zdźěłanju koaliciskeho zrěčenja CDU a SPD je lědma štó zahorjeny, dokelž so wobě stronje hladajo na wšelake rozdźělne swětonahladne wuchadźišća do „normalneje“ koalicije njehodźitej. Bóle plawsibelny so zdawa zwjazk CDU a FDP, ale runje tuta konstelacija je minjene štyri lěta politisce na kóšty liberalnych zwrěšćiła. Němski humorist Loriot bě – runja wjele wědomostnikam – měnjenja, zo so muž a žona do zhromadneho žiwjenja poprawom njehodźitaj :-), njedźiwajcy toho bě wuspěšnje šěsć lětdźesatkow ženjeny. Płódnosć rozdźělneju polow je wjetša hač fuzija partnerow, kotrajž staj sej tak a tak bliskaj. To płaći za politiske, socialne, kulturne, ewolucionarne, přirodne, globalne a nabožne naležnosće.

Kóždy sam wězo najlěpje wě, kak by móhł swět optimalnje organizować. Pozdatnje bjez kompromisow ryzy „rozumny“. Ale by wón to stoprocentowsce zwoprawdźeć móhł, njeby k runowaze, ale ke katastrofje dóšło. Praktiski načasny přikład: Bychmy prosće dotalne njejenake wobličenje rentow we wuchdoźe a zapadźe Němskeje wotstronili, bychu tuchwilni wuchodni rentnarjo kusk wjac w móšni měli, ale přichodni, kotřiž tak a tak niše dochody na wuměnku wočakuja, hišće mjenje. Tohodla je za wšě generacije sprawne wobličenje z wužadanjom, kotrež móže lědma jedna strona sama zmištrować.

Wobstejnosće su z perspektiwy jednoliwca paradoksneho razu kaž w zwisku ze Serbskim ludowym ansamblom, přetož je połoženje wot wliwow wšelakich akterow wotwisne. Załožbowa rada je cyłkowny etat přikrótšiła, ale dźěłarnistwo je redukowanju ličby dźěłowych městnow zdźěla zadźěwało. Na to reaguje towaršnik ze žadanjom za domowym tarifom, ale to bjez přihłosowanja zastupjerjow přistajenych njeńdźe. Wotmołwa towaršnika je nětk hroženje ze šmórnjenjom cyłeho wobłuka zawoda. Ale hladajo na wosebity tarifowy škit hudźbnikow orchestra ma tež při tym dźěłarnistwo indirektnje w horšći, koho to potrjechi. Kak pod tajkimi wuměnjenjemi „rozumny“ rozsud wupada? Ćežko rjec.

A we wulkej serbskej politice? Domowina a iniciatiwna skupina stej sej lěta dołho na čuwy šłoj, ale wupuć njeje, druhu ignorować. Dokelž zjawnje w samsnym swěće skutkujetej. Potajkim płaći tež tule princip kaž na wšěch horjeka mjenowanych runinach, wot Loriota hač k Gabrielej/Merkel: Runje ći, kotřiž so pozdatnje do zhromadnosće njehodźa, njech dialog wjedu. Jenož tak móže dźěćo w direktnym abo přenjesenym zmysle nastać – štož tež rěka: Zhromadne projekty na dobro małeje abo wjetšeje towaršnosće.

Štóž praji, nětk pak dosaha, tomu je prajene: Tak to činimy tuchwilu tohorunja při brunicy – tamle stejimy w dialogu z přiwisnikami w přećiwnikami pokročowanja jamy Wochozy II, to je samo paradoksny třiróžk. A myslo na njespokojnosć z konkretnymi efektami modela 2plus w kubłanišćach na jednym boku a přeswědčenosću tych, kotřiž su tónle model wupjekli a jón nawjeduja, je tež tule chrobła nowa komunikaciska forma trěbna. Njejsmy hižo w časach čorno-běłych poměrow resp. zymneje wójny a wulkich blokow žiwi. Tomu dyrbimy tež z wotewrjenym wašnjom mjezsobneho wobchadźenja wotpowědować. Štó ma prawje, na kóncu nikoho njezajimuje, dokelž poslednju wěrnosć ma jeničce Bóh tón knjez.

„Přichodne zastanišćo …“ we Wojerecach

30. November 2013

Widźiš, luba SZ, to tola dźe z tymi hóčkami a smužkami! Dźensa na stronje 20 Budyskich Sakskich nowin wulku reportažu wo serbšćinje we Wojerowskich busach namakaće. Młodymaj nošerkomaj myta Domowiny wutrobny dźak za jeju přidatny angažement za tónle projekt zeserbšćenja wšědneho dnja w "stolicy" Łužiskeje jězoriny!

Adwent

29. November 2013

… přinjese rozsud wo wjednistwje SLA, swjateho Mikławša a bože dźěćatko. Mjez druhim. Wam wšěm rjany adwent!

Dźěłodawar serbski lud, kak to funguje? Tema za dialog

29. November 2013

Štó je poprawom dźěłodawar serbskich institucijow? SERBSKI LUDowy ansambl słuša runja druhim – LUDowemu nakładnistwu atd. – serbskemu ludej. Ale hižo z NDR je znate, zo wobsydstwo ludu hustodosć drje na papjerje steji, konkretne zwoprawdźenje pak je dwělomne, z wida dźěławych a konsumentow jich produktow.

Zawěsće stej sej Domowina a iniciatiwna skupina za serbski sejmik samo w pohódnoćenju deficita legitimacije wobstejaceje rady Załožby za serbski LUD přezjednej. Tamle poska drje we wobsahowych a personelnych prašenjach němska wjetšina gremija hdys a hdys na serbskich radźićelow, ale model samo- abo sobupostajowanja to runjewon njeje. Tohodla steji tuta tema tež na dźěłowym planje zwjazkoweho předsydstwa Domowiny.

Derje, zo je z oficielnym sposrědkowanjom prašenjow Domowiny iniciatiwnej skupinje dialog wo móžnych najmudrišich idejach za praktiske zastupjenje Serbow zahajeny. Snadź bórze tež skónčnje DOV a druhe dźěłarnistwa pytnu, zo tule z imaginarnym kapitalistom njejednaja, kiž ma něhdźe schowany hornc pjenjez stejo, ale ze zastupjerjemi zajimow cyłeho serbskeho ludu.

Domowy tarif w SLA – haj abo ně? To je wopačne prašenje za puć do přichoda

28. November 2013

Přispomnjenja k rozprawomaj SN „Wjednistwo SLA wukonja ćišć na sobudźěłaćerjow“ a „Žadaja sej změnu wjednistwa – dźěłarnistwa jasne wuměnjenja za domowy tarif w SLA stajili“ (22., 26.11.):  

Wěš Ty, luby @zrudny, sym jenož přwisnik domowych tarifow, hdyž dźe wo přemosćenje přechodneho deficita. Tule pak wobsteji strukturny deficit, nic dla złeje wole wjednistwa SLA, ale ramikowych wuměnjenjow postajenych wot załožboweje rady. Tohodla by to pawšalne zniženje mzdow woznamjenjało, štož ma dwójny zahubny efekt: Jedni dyrbja sej potom mzdu wo hamta na niwow Hartza IV powyšić dać, druzy su demotiwizowani.

Strukturny deficit je „pódlanski efekt“ wobzamknjenja załožboweje rady, zo nima ansambl hižo třećinu, ale štwórćinu cyłych „serbskich pjenjez“ k dispoziciji, a wuspěšneho prawniskeho wobaranja někotrych potrjechenych přećiwo wupowědźenjam, z kotrymiž měješe so personelny etat nowemu nišemu niwowej budgetej přiměrić. Njeznjaju pak w Serbach nikoho, kiž praji, zo ma SLA zaso třećinu załožboweho etata dóstać, ale wjele ludźi, kotrymž su dźensniše zjawne wudawki za ansambl hišće přewysoke.

Nimamy w Serbach časopis za młodostnych, zaměrne spěchowanje skupin młodeje hudźby pobrachuje, je přemało digitalizowanja – hladajo na woteběracu ličbu nošerjow serbskeje rěče, najwažnišeho identifikaciskeho znamjenja ludu, dyrbi wšo w srjedźišću stać, štož serbowanju we wšědnym žiwjenju tyje. Spěwanje k tomu słuša, hač orchester, je prašomne. Přesadźenje abo wotpokazanje domoweho tarifa? Wo to poprawom njeńdźe.

Serbske terminy kónc 2013 a započatk 2014

28. November 2013

11-28 terminy december a jan.doc

Suchy w SZ wo SLA / W Kamjenicy domowoy tarif, w Budyšinje dotal nic

28. November 2013

Wjac w „SNE vor neuen Entlassungen?“ na stronje 9 Sakskich Nowin. Awtorka: Miriam Schönbach.

Přinošk w Serbskim rozhłosu – porno SN smědźeše so tule tež intendantka słowa jimać, a tež zawodna rada rěči:

http://www.mdr.de/serbski-program/rozhlos/aktualne-prinoski/audio712174.html

Tež druhdźe je tajkich problemow – hlej aktualne dojednanje na dźwadle w Kamjenicy wo domowym tarifje: Minus dźesać procentow za pjeć lět:

http://www.freiepresse.de/LOKALES/CHEMNITZ/Neuer-Haustarifvertrag-fuer-Staedtische-Theater-Chemnitz-artikel8618225.php

Serbski lud w koaliciskim zrěčenju CDU a SPD

27. November 2013

„Wir stehen zu den eingegangenen Vereinbarungen europäischer Minderheitenpolitik und verpflichten uns weiterhin zur Förderung der vier nationalen Minderheiten in Deutschland – Dänen, Sorben, Friesen sowie deutsche Sinti und Roma – und der deutschen Minderheit in Dänemark sowie der deutschen Minderheiten in Mittelost- und Südosteuropa und den Nachfolgestaaten der Sowjetunion.

Die sorbische Sprache und Kultur als Ausdruck der Identität des sorbischen Volkes gilt es zu bewahren. Daher wollen wir die Arbeit der Stiftung für das sorbische Volk langfristig sicherstellen und dafür den Bundeszuschuss sichern.“

Skrótšenja kaž z trawusyčakom – je inteligentnišeje alternatiwy

27. November 2013

K "łužiskemu žiwjenju" Sakskich Nowin słuša dźensa rozprawa wo planowanych skrótšenjach, wo kotrychž je wčera załožbowa rada w Choćebuzu wuradźowała (hlej mały wurězk, wjac na stronje 7 SZ). Zwjazkowe předsydstwo Domowiny chce so na klawsurnym posedźenju w klětušim nalětniku ze zakładnymi namjetami za nowe priority spěchowanja zaběrać. Tajke něšto nuznje trjebamy, zo njeby přichodmje "trawusyčak" nad serbskimi projektami knježił, ale mudra hłójčka po jasnych wobsahowych směrnicach mjenje a bóle wažne poskitki rozeznawała.

Dźensa dźe wo klětuše serbske financy

26. November 2013

Wuradźowanje załožboweje rady:

http://www.elstermedia.de/zeitnah_regionen/druckfenster.php3?gebiet=02977&datum=20131126&ID=45961

Tónle post so dźens běžnje aktualizuje.

http://www.lr-online.de/nachrichten/brandenburg/Sorben-Stiftungsrat-beraet-in-Cottbus-ueber-Haushaltsentwurf;art25,4403192

https://www.lr-online.de/nachrichten/sachsen/Den-Sorben-fehlt-kommendes-Jahr-eine-Million-Euro;art1047,4403939