Archive for Dezember 2013

Wotmysł za 2014

31. Dezember 2013

Kusk mroza, łahodny pospyt zymy na spočatku poslednjeho dnja stareho lěta: Strózby kónc 2013. Za něšto hodźin póńdźe rjeńša ličba: 2014, dwaj króć sydom w nowym lěttysacu. Běrtlk lětstotka po přewróće, a po ličbje najsylnišemu lětnikej w Němskej budźe połsta lět.

Potomnicy "babybooma" šěsćdźesatych lět su přewažnje pragmatiscy ludźo porno (zapadnym) studentskim 68-rewoluceram, kotřiž su pozdatnje přeco wšo lěpje wědźeli a so nětk na wuměnk podali. Kotre akcenty pak sadźeja woni młodźi, kotřiž njejsu hižo ani něhdyšu NDR ani staru ZRN dožiwili? Wo tym budu za dwaceći lět pisać, do toho to porjadnje pohódnoćić njemóžemy…

Na jich słowach budźeš Serbow spóznawać – dokelž je rěč najwažniši skutk, hdyž wo byće a traće Serbstwa dźe. 68ći su "pochod přez institucije" prědowali – to rěka do wšěch strukturow nutř hić a tamle serbskorěčne rumy skrućeć a tworić.

Štóž chce, zo dale a wjac ludźi serbuje, njesmě jich dla němcować. W Serbach serbsce nawuknyć je tak a tak ćešo hač w Pólskej pólsce abo w Čěskej čěsce, přetož so serbsce wuknjacemu přehusto němsce wotmołwja. To smě nowa generacija noweje doby radlubje lěpje činić.

WAM WŠĚM STROWE A ZBOŽOWNE NOWE LĚTO – MĚR, LUBOSĆ A WJELE WJESELA!

Klětu budźe lěto rozsudow

30. Dezember 2013

Klětu wola wobydlerjo Sakskeje a Braniborskeje nowej krajnej sejmej (31. awgusta a 14. septembra), komunalne zastupnistwa a zdobom zapósłancow europskeho parlamenta (25. meje). Tež na planje dźěławosće zwjazkoweho předsydstwa Domowiny je za klětu wjele wažnych rozsudow předwidźane:

"Definowanje prioritow přichodneho wuwića serbskeho kulturneho dźěła" w zwisku z pjenježnym połoženjom załožby (na klawsurnym posedźenju 8. měrca), wočakowanje na kandidatow k wólbam krajneju sejmow a na komunalnej runinje (12.4.), schwalenje ćežišćow skutkowanja RCW (1.2.), zakótwjenje metody 2plus do systema zakonskich postajenjow serbskeho šulstwa w Sakskej (13.9.) a doskónčny naćisk noweho programa "Domowina 2025" (22.11.).

Najbóle budźe pak najskerje serbsku zjawnosć zajimować, hač twori zwjazkowe předsydstwo rozsud wo zawjedźenju prawólbow w třěšnym zwjazku a namjeće wotpowědneje změny wustawkow Domowiny (13.9., 22.11.). Dokelž to je klučowe prašenje za powyšenje akceptancy a skrućenje demokratiskeje legitimacije třěšneho zwjazka w Serbach. Po mojim měnjenju je najwjetši čas, wšěm angažowanym Serbam wjac prawow direktneho sobupostajowanja dać!

Nimo toho stejitej hišće zaručenje financowanja mjezynarodneho CIOFF-kongresa 2014 we Łužicy a koncept za dalewjedźenje festiwala "’Łužica" wot lěta 2015 na planje. A přichodna hłowna zhromadźizna budźe sobotu, dnja 28. měrca 2015, na teritoriju župy "Jan Arnošt Smoler" Budyšin.

Saksku dale myslić – Serbja móža při dialogu sobu činić

28. Dezember 2013

Pod http://www.zukunft.sachsen.de steji papjera "Saksku dale myslić" – scomter namołwu ministerskeho prezidenta k dialogej wo přichodźe našeho zwjazkoweho kraja. Komuž wotrězk k serbskej tematice w 93-stronskim dokumenće njedosaha abo druhe namjety na wutrobje leža, njech piše statnej kencliji: zukunft@sk.sachsen.de

Chór „Meja“: Silwester wječor w Baćonju a nowolětnej koncertaj w Radworju

27. Dezember 2013

Hody su nimo, nowe lěto so bliži. Najwjetši čas, zdźělenku „Meje“ wozjewić.

W Baćonju wuklinči stare lěto tež lětsa zaso po zwučenym wašnju z hudźbu, spěwom a rozpominanjom. Za nas pak budźe to premjera:
My Mejenjo wuhotujemy tutón meditaciski nyšpor zhromadnje z instrumentalistami prěni raz – silwester wječor w sedmich w Baćońskej cyrkwi.

A hnydom spočatk noweho lěta změjemy potom zaso dwójce swój nowolětny koncert w  Radworskim hosćencu „Meja“. Tež na njón Was hižo nětko wutrobnje přeprošuju:

sobotu, 4. januara
w 15.30 hodź. (wot 15 hodź. kofej a tykanc) abo
w 19.00 hodź. (z rejemi ze Symanom Donatom).

W našim programje wjerći so wšitko kołowokoło jědźe a pića. Dajće so překwapić, što smy takle přihotowali. Wjeselimy so na rjane zhromadne hodźinki. By rjenje było, bychmy-li so widźeli – w Baćonju abo w Radworju (…)

Waša Angelika Häneltowa, předsydka „Meje“

Tule dataju z plakatom:

nowoletny2014

Direktna demokratija w Serbach je nadawk serbskokatolskeho ludu

27. Dezember 2013

W Serbach so wo lěpšim wobdźělenju ludu w Domowinje a zasadnje diskutuje. Tajki demokratiski projekt pak njeje jenož naležnosć někotrych gremijow, skupinow a mjenje abo bóle doprědkarskich funkcionarow.

Šwicarska direktna demokratija je wupłód wojowanja konserwatiwneje katolskeje ludnosće – to je facit knihi "Wenn die Volkssouveränität wirklich eine Wahrheit werden soll…" centruma za demokratiju Aarau. Mój nan je mi knihu k hodam darił.

Potajkim móhli a dyrbjeli so serbscy duchowni, we wosadach angažowani lajkojo a snadź tež TCM po šwicarskim modelu za direktne sobupostajowanje ludu w serbskej politice zasadźować. Poměry su podobne.

Tež w Serbach dźe wo demokratiske zakótwjenje tajkeho "postupa", kiž sensibelnemu dalewuwiwanju tradicije tyje. To płaći wosebje za kubłansku politiku, ale tež za kulturne prašenja. Dajće so potajkim wot wurězka knihi inspirować!

Wjesołe hody!

24. Dezember 2013

Wšěm stajnym čitarjam bloga, přećelam, znatym, sotram a bratram w Domowinje a kóždemu, kiž tute linki na wědomje bjerje 🙂

Serbja na problemach patoržicu w Budyšinje wina?! Spodźiwny přinošk SZ

23. Dezember 2013

Zaso su Serbja wbohim Němcam na puću, kotřiž dyrbja so lětsa twarnišća w tachantskej cyrkwi dla patoržicu z přepjelnjenymi cyrkwjemi bědźić. Tak čitamy dźensa na Budyskej stronje Sakskich nowin.

Štó je wina na organizatorisce pozdatnje bjezwuhladnej situaciji lětuše hody w Budyšinje? Serbja, štó hewak. Čitach hižo mudriše nastawki w tutej nowinje…

20. adwentny koncert 1. serbskeje kulturneje brigady w Budyšinje

21. Dezember 2013

W přepjelnjenej Budyskej Michałskej cyrkwi dožiwjachmy dźens nawječor wulkotny 20. adwentny koncert z chórom 1. serbskeje kulturneje brigady. Na jewišću běchu pod nawodom Friedemanna Böhme solisća 12. lětnika a chór brigady, sopran-solistka Tereza Šěrakec, saxofonist Daniel Matka a dujerjo Syman Pawlik, Andreja Jakubašec (wobaj na trompeće), Tomaš Pawlik a Bjarnat Cyž (wobaj na pozawnje). Chórowy přewod: Gina Hentsch.

Koncert – wot Załožby za serbski lud spěchowany – bu nahrawany. Tohodla změjemy tónle wosebity hudźbny wjeršk krótko do hód pozdźišo hišće jako CD k dispoziciji. Witanje, meditacija a modlitwa/žohnowanje běchu na tradicionelne wašnje dwurěčne, potajkim wostudłe, dokelž dyrbi sej Serb wšo po słowje dwójce naposkać. „Duchownu móc namakać“ – to bě tema – tak lědma móžeš. Ale dźěše tak a tak prěnjotnje wo móc hudźby, kotraž je derje skutkowała.

Klětu transparencu a dialog w Serbach!

20. Dezember 2013

Za lěto 2014 sej w Serbach transparencu a dialog přejemy: Potajnostkarstwo tyje majestotnosći, kotruž w našej małej towaršnosći bratrow a sotrow njetrjebamy. So wě, zo so zda přewidźomnosć najprjedy strašna być: Hdźež su „drasty“ retoriskich flosklow preč, spóznawamy: wšo prózdne.

Naša wulka narodna organizacija njemóže hižo ani ludźi za funkciju županow namakać a ma so ćežko z tym, na wšěch runinach z tuchwilu sobu najbytostnišej tematiku brunica tak wobchadźeć, zo je mjenje abo bóle plawsibelny cyłk widźeć. A mała skupina z alternatiwnej koncepciju mjeztym sama pytnje, zo to hišće realizujomny koncept njeje.

Što je z mojeho wida konkluzija za klětuše serbske zjawne žiwjenje? Nakazanje na wšěch stronach, njeje čas pycharstwa a powučenja, ale spóznaća swójskeje njedospołnosće. Mjenje prědować, bóle poskać – to by móhła dewiza być. Přespěšne wotmołwy su strašne, z nich ničo wurostować njemóže.

Policist – dźěćatko protestuje přećiwo Tilichej

20. Dezember 2013

Dźełarnistwo policistow přińdźe při protesće přećiwo dale a hubjeńšim dźěłowym wuměnjenjam na dźeń a spodźiwniše ideje – hlej rozprawu we wčerawšich "Drježdźanskich najnowšich powěsćach". Woni chcychu na serbske korjenja ministerskeho prezidenta pokazać – ale što maja wone z tutej temu činić? Ničo!