Archive for Februar 2014

Serbske terminy w nalětniku 2014

28. Februar 2014

Terminy měsaca: 02-27 Terminy m rc-akt

 

 

 

Sy Ty swjateho Metoda hišće w februaru z knihu w ruce widźał?

28. Februar 2014

Wčera připołdnju sym tute foto sčinił. Pomnik swjateju Cyrila a Metod před krasnym módrym njebjom. Hdyž njebych wědźał, zo tule něšto pobrachuje, njebych to pytnył. Metod je swoju knihu přisadźił. Najskerje su paduši metala wina, kotřiž za wšěm kowom pytajo po kraju chodźa.

Konflikt mjez materielnymi a duchownymi hódnotami je so na tutym rjanym blečku Łužicy z kriminelnymi srědkami wjedł. Štóž je widźał abo słyšał, hdy a kak bu pomnik wobškodźeny, njech swoju wědu policiji resp. TCM zdźěli.

Wažne je tež zhonić, hač je něchtó hišće po kóncu januara Metoda z knihu w ruce widźał. Dotal je mjenujcy čas njeskutka cyle njejasny. Prošu pomhajće a so prašejće druhich!

Pomnik sam bu z tym druhi raz wonječesćeny, bě pak minjene lěta dalšich škodow na informaciskich taflach atd. Policija njebě z wujasnjowanjom padow wuspěšna – a hladajo na wšě wonječesćene swjate křiže w katolskich Serbach bohužel tež nic.

Budźće přezjedni – radšo nic! Wo mudrosći njeradikalnych rozrisanjow

27. Februar 2014

Znjesće so! Budźće přezjedni! Wjac solidarity prošu! Tajkich a hinašich namołwow je dosć a nadosć, to tak běše, je a budźe. Słowa za archiwy stawiznow, ale nic za žiwych ludźi realnych skutkow w přitomnosći.

Haj wšak, tute napominanja tež lětsa w zwisku z pjenježnymi prioritami za naprawy spěchowanskeho razu na dobro serbskeju rěče a kultury na nas čakaja. Namjetuju, zo ma kóždy, kiž to praji, sto euro za skupinu młodeje serbskeje hudźby darić. Jako pokutu a nastork k nakazanju. To samsne płaći za warnowanje: Jeli to nječinimy, budu druzy pod hesłom "Dźěl a knjež" na kóšty našeho naroda jednać.

Mamy moraliske měritka; hdyž je dodźeržuješ, změješ lěpše žiwjenje. A sobučłowjekojo tohorunja. Při tworjenju strukturow a daloko sahacych rozsudow dyrbiš radšo wot hižo lěttysacy trajacych antropologiskich konstantow čłowječeho zadźerženja wuchadźeć. Potajkim wot normality a nic wot pócćiwosće.

Dokumenty wo zwrěšćenej strukturnej debaće w Serbach su połne pokiwow na mjezsobne antipatije a wojowanje wo zdźerženje swójskeje zahrodki. Nó a? Tajki čłowjek je. So wě, zo tež w Serbach. Njeje njebjes na zemi, tajkile zaměr zemskeho stworjenčka by woprawdźe bohahanjenje był.

Ničo njeje rjeńšo hač dobry kral a ničo njeje hórje hač špatny knjez. Tohodla běchu hižo prjedownicy před lětstotkom přeswědčeni, zo je demokratija dołhodobnje spomóžniša. Mjeztym mějachu generacije přiwuknyć: Tónle system wostanje jenož stabilny a měrniwy, hdyž přerěznje wuwažena a kusk wostudła srěnjotnosć knježi. Charismatikarjow trjebaš hdys a hdys za wuhibki do směra nowych wuwićow, ale božedla nic za stajne postajowanje poměrow, to by k krejpřeliwanju wjedło.

Konsens móže so přeco jenož na dojednany pragmatiski rozsud w jednotliwym padźe poćahować, kaž je w zwjazkowym předsydstwje Domowiny buhudźak z wašnjom. Nowinarjo njech potom kritizuja, zo wulki mišterski wukon njeje. Za radikalne rozrisanje by pak mječ trjebał, ale štó je zwólniwy, rólu wopora hrać?

Postrow z nimale njeznateho kućika łužiskeje „zahrody“ do serbskich „metropolow“

25. Februar 2014

Sće dotal wědźeli, zo dźěła w Kamjenjanskej kaolinowni wjac ludźi hač we Wochožanskej wotkrytej brunicowej jamje samej? Za mnje bě to překwapjaca informacija. Hdyž chcemy Łužicu jako swoju "zahrodu" wobhladować, kaž njedawno w zwisku ze škitom Róžeńčanskeje swjatnicy a cyłych wokolin rěkaše, potom dyrbimy wjac kedźbnosće cyłej Łužicy scomter wšěmi přirodnymi, kulturnymi a hospodarskimi fasetami wěnować a wjac zamołwitosće přewzać.

Zady mje na foće widźiće Šibjanski jězor blisko Wojerec. Štož njewidźiće, su posoljo wobnowjomnych energijow, wětrniki, na płoninje něhdyšich brunicowych jamow. Njedźiwajcy prózdnin a bliskeho města je lědma štó po puću. Tež za mnje, přiwisnika mjenje husto wobsydlenych kónčin, je to přemało ludźi, čuješ so někak wosamoćeny ;-).

W jadrowych kónčinach (katolskeho) Serbstwa je hižo lěta dołho přiběrajcy potrjeba so hodźacych twarskich ležownosćow za młode serbske swójby. Poprawom najwjetši čas serbskeje kulturneje "kolonizacije" prózdnych regionow nic jenož we Wojerowskim kraju. Tule je tuńšich stejnišćow, nichtó njetrjeba porno prjedownikam do Ameriki abo zapada Němskeje wupućować :-). A hdyš sej na přikład tři swójby nowe zhromadne městno wupytaja, budźe zaso nowa serbska kupa.

Porno Budyšinej namakaš při nakupowanju we Wojerecach dosć a nadosć darmotnych (!) parkowanišćow. W tamnišim wulkokupowanišću móžeš so z dźěćacymi wozyčkami woměrje bjez stresa hibać, wšako je Łužiski center hižo na dale a wjac starych ludźi z rolaterom nastajeny ;-). Swět bjez barierow – za kiprych starcow a za małe dźěći.

Přichod Serbstwa njeda so jenož ze zakitowanjom našich poslednich twjerdźiznow zaručeć. Mamy sej tež kónčiny z wulkej serbskej tradiciju zaso přiswojeć. Naslědne krajiny w brunicowym rewěrje nječakaja jenož na wuwiće noweje přirody, ale tež na wozrodźenje Serbstwa. Dwurěčne připowědźenje zastanišćow we Wojerowskim busu a serbskorěčne poskitki w tamnišim šulstwje njech su z předznamjenjom za nowe serbske perspektiwy po cyłej Łužicy.

A snadź namaka samo hospodarska swětłownja našeho regiona, kaolinownja w Kamjenej, zwonka Ralbic-Róžanta w přezjednosći z ludnosću nowe składźišćo…

Póstnicy na Radworskim kěrchowje

25. Februar 2014

Dźakowano wuměłcej dr. Achimej Nawce (98).

Nó genau :-), tak je / potom hišće wopyt pola ludźi Krabata

25. Februar 2014

Programatiskemu wabjenju wotpowěduje wustajeńca "Rausch und Ekstase" na hrodźe w Drježdźanach. Dźensa pak nic, wutoru maja stražowarjo skulpturow wólny dźeń.

Dundajo na kralowskich žurlach namakaš 2.500 lět staru antiksku škličku za napoje, kotraž na blido z wobrazom nahich so přibližacych porikow na to pokazuje, štož po wječeri přińdźe. Ale je pod nóžku šklički a scomter hižo erigowanym cymplom jednoho aktera hakle widźeć, hdyž je wino wupite :-).

We wutwarku samsneje rumnosće, hdźež z woknom won direktnje na jara blisku Dwórsku cyrkej hladaš, je ze wšěmi ćělnymi detailemi lubosćinski akt bronzoweho poriki widźeć. Mosćik mjez nimaj steji hižo poł lěttysaca.

Ze zastupnym lisćikom (2 x 6 euro na dorosćeneho) směš so mjez druhim tež do susodneje "turkowskeje komory" podać, hdźež je tež rěč wo chorwatskej jednotce za Saksku wojowacych wojakow, ke kotrejž, kaž wěmy, tež Krabat słušeše. Jemu bychu so zawěsće eksponaty Dionysosej wěnowaneje wustajeńcy lubili ;-).

Čitanje mojeho nana pjatk w Zhorjelcu

24. Februar 2014

Pokiw z lokalneho wudaća tamnišich Sakskich nowin na zarjadowanje w Zhorjelcu. Knihu wo žiwjenju mojeho nana jako wójnski reporter je po jeho powědanjach a dokumentach redaktor SZ Peter Chemnitz spisał.

Bohahanjace mjeno wjelčicy blisko Róžanta? „Marie“ w kritice

23. Februar 2014

Štóž Katolski Posoł čita, je optimalnje informowany, tež hladajo na problematiku kaolina při Róžeńće: Njezhoniš jenož zajimawe wuprajenja zastupjerjow křemjenjowych zawodow, zo woni na teritoriju gmejny Ralbicy-Róžant poprawom jenož pro-forma-točenja swojim towaršnikam kwoli přewjedu, wšako faworizuja składźišćo južnje Rakec blisko stejnišća kaolinownje w Kamjenej.

Kaž z rozprawnistwa Katolskeho Posoła wo hłownej zhromadźiznje Towarstwa Cyrila a Metoda wuchadźa, je "w samsnym zwisku" palaceho druheho problema: Pola Róžanta je wjelčica z blasfemiskim mjenom "Marie" po puću (hlej wurězk z aktualneho Posoła). So wě, zo Piwarc swojich čitarjow namołwja, za alternatiwnym pomjenowanjom tutoho zwěrjeća pytać, zo bychmy to hladarjam łužiskich wjelkow sposrědkować móhli.

Po internetnych rešeršach serbskeho bloga słuša "Marie" k tak mjenowanemu Minakałskemu stadłu wjelkow. Wona je jara płódna a měješe hižo znajmjeńša šěsć šćenjatow. Dźakowano sondźe na ćěle wjelčicy su slědźerjo wo jeje pućowanjach přeco derje informowani. – Potajkim do dźěła zdar, nowe mjeno za wjelču Marie! Wuzwolenje z namjetowanych nowych mjenow leži wězo w rukach Katolskeho Posoła.

„Morgenpost“ za Róžant

22. Februar 2014

Dobry komentar na stronje 4 a jara rjany přinošk na stronje 10 – tež wo jasnym stejišću biskopa Kocha!

Łuhowske sněhowki srjedź februara 2014

22. Februar 2014