Archive for November 2014

Jězus je tež Serb – a nic jenož katolski

30. November 2014

Předstaj sej, zo njejsu Serbja ženje w stawiznach pod rozdźělnym politiskim režimom (Sakskeje, Braniborskeje atd.) byli, zo njeje w 19. lětstotku k přećiwkej mjez dźěłaćerskim hibanjom a duchownstwom a zo njeje w 16. lětstotku k reformaciji dóšło: Njebychmy Horni a Delni, katolscy, ewangelscy a njewěriwi Serbja byli, ale jeničce křesćanski serbski lud.

Abo pohanski, dokelž hdyž njebychu namócni křesćenjo ze zapada přišli, bychmy dźensa hišće z duchami přirody w přezjednosći žiwi byli. Znaju słowjanskeho přećela, kiž tajkule teoriju zastupuje. So wě, zo wšědny dźeń jenož realna mnohota płaći a nic fiktiwna jednota. Ale wona na to pokazuje, zo su w serbskim třěšnym zwjazku ludźo zjednoćeni, kotrychž rozdźěle njejsu wupłód złeje wole, ale historiskeho dóńta.

Bóh je sej wočiwidnje něšto při tym myslił, zo njejsu jenož wšelake mjeńše abo wjetše ludy nastali, ale tež rozdźěle w ludźe samym. Abo powšitkowne prajene: Jenakowanje njeje ani strategija swjateho ducha ani ewolucije. Serbski swět trjeba wšěch w jich regionalnej a swětonahladnej wšelakorosći. My samo tych integrujemy, kotřiž našu rěč (hižo / hišće) njemóža – lěpje hač na přikład Němcy cuzorěčnych připućowarjow. 🙂

Stari Grjekojo w antice su samo do toho wěrili, zo bě na spočatku čłowjestwa jednota splaha. A potom bu wona tak džělena, zo pyta kóždy druhu połojcu, kotraž je pak pola jednych samsneho, pola druhich druheho splaha. Detaile dyrbiće googlewać, to je mi nětk jowle překomplikowane. 🙂 Fakt pak je: Wobsah načasnych seksualnopolitiskich debatow bě hižo před 2500 lětami napołoženy.

Dźensa swěći wosrjedź ruskeje zymy z kraja Putina prěnja swěčka na adwentnym wěncu. Přihotujemy so na poselstwo Boha, kiž je so w času a z wěčnym efektom z čłowjekom stał. Jězus je potajkim tež Serb a nic jenož katolski. 🙂 Pěstujmy swójski podźěl – tež serbskokatolski – na cyłku, a njech Bóh nam dawa přeco dowěru druhim ludźom, zo so woni wo to swoje runje tak porjadnje staraja.

Młodźina so z Domowinu zetkała

29. November 2014

Dnja 28.11.2014 zetkachu so młodostni z předsydu Domowiny Dawidom Statnikom a čłonom Zwjazkoweho předsydstwa Domowiny Marcelom Braumanom w Serbskim domje w Budyšinje.

Wuchadźišćo zetkanja běše próstwa młodźinskeje skupiny, kotraž wustupowaše z mjenom „čłonojo serbskich młodźinskich klubow”. W tutej prošachu Domowinu wo wobdźělenje na zarjadowanju 20.11.2014 w Chrósćicach. Tomu zwjazkowe předsydstwo z wjacorych přičin slědować njemóžeše. Na zakładźe toho dorozumichu so młodostni a předsyda Domowiny na zetkanje, zo bychu wo dalšim postupowanju wuradźowali.

We wotewrjenej rozmołwje spytachu wšitcy přitomni trěbne prašenja wuslědźić a kmanu formu postupowanja namakać. Na njej wobdźelichu so ze stron młodźiny Sofija Cyžec, Charlotte Čornakec (wobaj z Njebjelčic) a Jan Wjesela (Radwor). We wuslědku dorozumichu so wšitcy, zo je trjeba, rjad forumow přewjesć a tak młodźinje a zajimowanym kruham wšitke aspekty němskeje a serbskeje politiki wobswětlić.

(Nowinska zdźělenka Domowiny a skupiny młodostnych)

Přispomnjenje Piwarca: Bě woprawdźe jara přijomna atmosfera – rjane pjatkowne popołdnjo!

Serbske podawki do hód – prěni dźěl

28. November 2014

11-27 TERMINY za december – preni dzel

Prawicarske nadběhi na serbskich młodostnych tež tema na konferency w Berlinje

28. November 2014

Foto-Gespräch-Minderheitenrat-de-Maiziere-1

Konferenca wo charće rěčow w Němskej:
http://www.minderheitensekretariat.de/aktuelles/a/artikel/detail/sorgen-wir-gemeinsam-dafuer-dass-die-hier-formulierten-zielsetzungen-nicht-nur-auf-dem-papier-st/

Do toho rozmołwa z ministrom de Maizièrom:
http://www.bmi.bund.de/SharedDocs/Kurzmeldungen/DE/2014/11/minderheitenrat.html

Na foće: Zwjazkowe minister za nutřkowne, Thomas de Maizière, ze społnomócnjenym zwjazkoweho knježerstwa za wusydlencow a narodne mjeńšiny, Hartmutom Koschykom, předsydu mjeńšinoweje rady Němskeje, Dawidom Statnikom, a zastupjerjemi štyrjoch awtochtonych ludow resp. ludowych skupin na teritoriju Zwjazkoweje republiki Němskeje

Wućah z nowinskeje zdźělenki:
„Wenn heute z.B. junge Sorben von radikalen Vertretern der rechten Szene angegriffen und verprügelt werden, dann ist das eine höchst bedenkliche Entwicklung. Hier sind wir alle gefragt, solchen Exzessen gemeinsam entgegenzutreten. Dabei ist Aufklärung der Mehr-heitsbevölkerung oberstes Gebot. Es muss verstärkt für die Einsicht geworben werden, dass die Charta-Sprachen ein Mehrwert auch für die Mehrheitsbevölkerung sind“, so der Beauftragte der Bundesregierung für Aussiedlerfragen und nationale Minderheiten Koschyk (MdB) in seiner Begrüßung.

Namołwa přećiwo prawicarskej namocy w Budyskich kónčinach – podpisajće prošu!

25. November 2014

http://www.bautzen.de/buergerservice.asp?iid=909&mid=374&uid=462&page=9&dir=V&changestuch=T#frmprtst

Wodopad a Domowina: Wjac hač sto spěchowanych serbskich projektow w běhu lěta

24. November 2014

141124_PM_Jahrestreffen_Domowina_Vattenfall

Rěč jenož jako znamjo identity abo tež srědk kompletneje komunikacije?

23. November 2014

Dobra ideja, tónle delnjoserbski dialog z "normalnymi ludźimi" wo přichodźe tuteje rěče we wšědnym žiwjenju (hlej wabjenski plakat za zarjadowanje). Snadź tež w druhej formje na hornjoserbšćinu nałožujomne, pola nas skerje do tutoho směra: Kak móžemy rěčnu kulturu wuwiwać, zo njeby serbšćina jenož najwažniši wuraz narodneje identity była, ale runohódny komunikaciski srědk na samsnym niwowje aktiwneho słowoskłada a intaktneje gramatiki kaž němčina atd.?

Dokelž jeli bytostne znamjo ludu w praksy niwow susodneho ludu njedocpěwa, je kompleks mjenjehódnoty programowany. Njewěm, hač to trjechi – to je najprjedy jenož moja teza. 🙂

Sorabistika Lipsk: Wuwučowanje hornjoserbšćiny bjeze znajomosćow hornjoserbšćiny?

23. November 2014

Piwarc je sćěhowace linki dóstał, kotrež informacijow dla tule zjawnosći k dispoziji staji:

Sorabistiski institut Uniwersity Lipsk je njedawno dwě połměstnje k wobsadźenju wupisał:

http://www.zv.uni-leipzig.de/universitaet/stellen-und-ausbildung/stellenausschreibungen/wissenschaftliches-personal.html

Po wotchadźe dr. Rychtarja měło so tola městno za hornjoserbsku rěčnu praksu znowa wobsadźić. A dokelž so ja wosobinsce za tajke dźěło zajimuju, wobhladach sej wupisanje cyle dokładnje. A so njemało dźiwach. We wupisanjomaj so ničo wo tym njepraji, zo měło to městno / połměstnje za hornjoserbšćinu być (dwě połměstnje za delnjoserbšćinu wšak w instituće maja – jednu wot Sakskeje a jednu wot Braniborskeje płaćenu połojcu; a wonej stej tež wobsadźenej).

We wupisanju pak žada so znajomosć hornjo- a / abodelnjoserbšćiny! Kak da móhł něchtó ze znajomosćemi delnjoserbšćiny hornjoserbšćinu podawać? Njeje da wuběrna znajomosć hornjoserbšćiny a samo wěste wuwučowanske nazhonjenja za tajke městno z wuměnjenjom?

A dale wočakuja po wupisanju za jedne połměstno dobru znajomosć jendźelšćiny a za druhe połměstno znajomosć dalšich mjeńšinowych rěčow !!! Je da za wuwuwčowanje hornjoserbskeje rěče znajomosć jendźelšćiny abo dalšich mjeńšinowych rěčow trěbna? Nic pak znajomosć hornjoserbšćiny? Zwonjo wjele razow do sekretariata instituta tutych prašenjow dla tam pak nikoho njedocpěch. Chcych so woprašeć, kak so z tym ma a za čo stej tutej wupisanej połojcy dokładnje předwidźanej a wosebje – za koho? Móžemy tola wćipni być, štó so na njej powabi a štó jej na kóncu dóstanje. Ale wulke prašenje wostanje: štó budźe hornjoserbšćinu podawać, hdyž su tola wjetšina studentow na Lipsčanskej sorabistice Hornjoserbja? To dyrbjało serbsku zjawnosć zajimować.

Tak je lětuši „Šeršeń“ situaciju na „Sorabistice“ komentował:

sorabistica

140. schadźowanka

23. November 2014

Ze šwedskim kralom po puću w Budyšinje, hdźež wón "Bautzen – Budyšin" wudospołni: "A šwedsce?" – to słušeše k scenam kabareta studentskeho towarstwa "Sorabija" w Lipsku. W lětušim programje schadźowanki ničo njepobrachowaše: Brunica, radioaktiwne wotpadki – tak Drježdźanscy studenća spěwachu "dźěćo z třomi rukami so lěpje wobara" – a wšě dalše łoskoćiwe temy přińdźechu na jewišćo.

So wě, zo ćehnješe so wotmołwa na njerealistisku prognozu prof. Šołty, direktora Serbskeho instituta, wo so bližacym kóncu Serbstwa přez dwuhodźinski wotměnjacy a kóždy čas zabawny program. Ale tež jeho kolega na Lipšćanskim instituće za sorabistiku, prof. Edward Wornar, dyrbješe sej zaso něšto naposkać a w zajimawym magacinje "Šeršeń" čitać: "Walizišćina je nětko nowa serbšćina" w jeho instituće.

Nutřkownoserbskim rozdźělam a rozestajenjam wěnowaštej so Franzi a Rejzka w swojich pantomimiskich skečach. Prěnja serbska kulturna brigada (kedźbu: nowu CD kupić!) z Friedemannom Böhmu a studentski chór z nawodomaj Matejom Kowarjom a Symanom Hejdušku stej publikum na žurli Budyskeje "Króny" zahoriłoj. Lóštny politiski kabaret poskićeše serbske studentske towarstwo Bjarnat Krawc Drježdźany z diskusiju třoch serbskich politikarjow po zesamostatnjenju serbskeho kraja.

Sorbian solution development centre "škit Budyšin" prezentowaše serbski online-spěwnik. A připódla dawaše dohlady do stawiznow schadźowanki: 1875, 1956. Potajkim: Na přichodnych 140 lět, a sym sej wěsty, zo budu 2156 nic jenož mała horstka swójbow a slawisća přitomni. 🙂

Nowi čłonojo załožboweje rady / nominowani za serbsku radu Sakskeje

22. November 2014

11-22 Z posed enja ZP Domowiny-2

(Link: Nowinska zdźělenka Domowiny wo wšěch temach posedźenja zwjazkoweho předsydstwa)

Dźensa wot zwjazkoweho předsydstwa Domowiny do załožboweje rady woleni: Bjarnat Cyž Jan Budar (wobaj 17 hłosow), Bogna Korjeńkowa (13), Susann Šenkec (12). Zastupowacy radźićeljo Marko Kowar (18), Julian Nyča (14), Marian Bulank (13), Beno Brězan (11). Njewoleni: Marlis Młynkowa, Hajko Kozel, Bosćij Benada. Prof. dr. Dietrich Šołta je swoju kandidaturu cofnył.

Jako kandidaća Serbow krajnemu sejmej za Radu za serbske naležnosće Sakskeje su nominowani: Marja Michałkowa (17), Dawid Statnik, Leńka Thomasowa (wobaj 16) a Manfred Hermaš (12). Njewolenaj: Ludmila Budarjowa (9), Hajko Kozel (3). Kóždy rozsud je gremij w jednym wólbnym kole tworił.