Model SED, nowa rewolucija abo měrliwe diskusije wšědneho dnja

Jan Nuk je w Katolskim Posole někotrych rjekow měrliweje rewolucije lěta 1989 w Serbach naličił: tehdyšeho Kulowskeho kapłana Michała Nawku, Stanija Brězana, ewangelskeho fararja Jana Malinka, Ludmilu a Bena Budarja a dalšich w přinošku nic wosobinsce mjenowanych. Tamle dźe prěnjotnje wo nastorčenje tajkeho něčeho kaž "serbski nowy forum", štož bě potom faktisce "serbska narodna zhromadźizna", po faciće Nuka "bjezdwěla najsylniše opozicionelne hibanje za čas politiskeho přewróta w Serbach."

Rewolucije su wuwzaćne časy pod wurjadnymi wuměnjenjemi. A wone su poprawom přeco naležnosć mjeńšiny, w tutym padźe bě hibanje "wobmjezowane na skupinu intelektualnych Serbow, kotraž na wsach kedźbyhódnu podpěru njedocpě" (Nuk). Z wida wjetšiny su tehdomniše zakładne rewolucionarne žadanja spjelnjene: swoboda měnjenja, swědomja a wěrywuznaća a njewotwisnosć Domowiny wot ideologiskich a swětonahladnych předpisow.

Swoboda w zmysle rewolucije je najprjedy wuswobodźenje wot njeakceptabelneho knjejstwa. Hdyž pak wo to dźe, nowu swobodu nałožować a konkretne zaměry zwoprawdźeč, je rewolucionarny konsens nimo a so započina cyle normalne politiske rozestajenje wšědneho dnja. A w nim njepłaći wosebita moralka małych skupin, ale wola wjetšiny. Hewak bychmy zaso diktaturu tych měli, kotřiž sebje samych za towaršnostnu awantgardu maja. To pak je model SED.

W sobotnišim wudaću Neues Deutschland je Benedikt Dyrlich pod hesłom Nicht alle Wünsche wurden wahr – Die Sorben und die Friedliche Revolution von 1989 swoje konkluzije sćahnył: Die Bildung eines "Serbski sejmik", einer Volksvertretung aller Sorben und Wenden, steht weiterhin aus. Legitimna pozicija to je. Porno 1989 pak 2014 njedosaha prajić: "Něšto dyrbi so stać" (citat Měrćina Kaspera wo wonym času). Dźensa knježi wubědźowanje wo best practice. Idejow je dosć a nadosć, šansu wuspěcha ma jeničce předstajomna najlěpša móžna (serbska) praksa.

Wo njej budźemy dale diskutować, a sadźu so wo to, zo je tež mjez tehdomnišimi rewolucionarjemi wo Benedikta Dyrlichowej konkluziji wšelakich měnjenjow :-). A wo legitimowanej poziciji serbskeho ludu njerozsudźa ani interviewy ani manifestacije, ale wobzamknjenja legitimowanych gremijow. Wězo móže kritikar jich legitimaciju do prašenja stajeć, ale potom směmy tohorunja so prašeć, hač ma wón alternatiwy ze sylnišej legitimaciju w ludźe.

Jeli haj, tak a tak dale diskutować njetrjebamy, přetož potom na nas nowa rewolucija přińdźe. 🙂

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: