Archive for Dezember 2014

SLA a ZRN: Rjanosć čorneje nule po dobje zadołženja

31. Dezember 2014

Wobhospodarjenje etata zjawneje institucije je porno starym časam dźensa akrobatiski akt. W tak mjenowanych złotych časach Zwjazkoweje republiki Němskeje (ZRN) bě z wašnjom, wšo nowe přez kredit financować. Porjadny mimus w bilancy bě tež na najwyšej statnej runinje štyrceći lět dołho ze znamjenjom dowěry do přichoda z hišće wjac dochodami.

Tola mjeztym je financny minister Schäuble hordy na prěnju čornu nulu němskeho budgeta po štyrjoch lětdźesatkach. To je wupłód dopóznaća, zo njeńdźe dale z politiku, kotraž trjeba samo w fazy najnišich danjow wjele wjac srědkow dawkipłaćerjow za kóšty dołha w zajimje derjeměća prjedawšich generacijow hač za dźensniše kubłanje dźěći a načasne podpěranje swójbow.

Tohorunja w zańdźenosći Serbskeho ludoweho ansambla (SLA) běchmy na wołanje tuteje institucije za přidatnymi załožbowymi srědkami za zmištrowanje ćežow zadołženja a wospjetneho minusa zwučeni. Nětko pak smě so intendantka Milena Vettrainowa nad čornej nulu w lětušej bilancy wjeselić. Runja statej knježi tež tule princip: Kusk plusa je wuraz dobreho hospodarjenja, přewulki pak pjenježny nadbytk njesmě być, hewak by rěkało: Čehodla njejsće wjac ze swojimi srědkami činili?

Hač "Kupa zabytych", "Jank a Hanka", ptači kwas, akademija dorosta, historiski spektakl pod hołym njebjom w Mortkowje, wšelake koncerty w Serbach a njeličomne dalše zarjadowanja SLA resp. hromadźe z partnerami- z čornej nulu je so wobsahowy plus zmóžniło. Tak wupada dołhodobnje skutkowace dźěło, abo kaž Němcy modisce praja: "Nachhaltigkeit".

Chór „Meja“ w nowym lěće

30. Dezember 2014

Z dohodowneho přeprošenja chóra „Meja“:

Hnydom spočatk noweho lěta předstajimy zaso dwójce swój hodowny koncert w Radworskim hosćencu „Meja“:

sobotu, 3. januara,
w 15.30 hodź. (wot 15 hodź. kofej a tykanc)
abo w 19.00 hodź. (z rejemi).

Nimo hodownych spěwow zasłyšiće tež wšelake „stare“ ze 120lětnych stawiznow našeho chóra. Dajće so překwapić!

Wjeselimy so na rjane zhromadne hodźinki. By rjenje było, bychmy-li so widźeli.

Waša Angelika Häneltowa, předsydka „Meje“

2014 im Rückblick: Lětsa 10.000 wopytowarjow wjac pola Piwarca hač loni

30. Dezember 2014

Die WordPress.com-Statistik-Elfen haben einen Jahresbericht 2014 für dieses Blog erstellt.

Hier ist ein Auszug:

Etwa 8.500.000 Menschen besuchen jedes Jahr das Louvre Museum in Paris. Dieses Blog wurde in 2014 etwa 83.000 mal besucht. Wenn dieses Blog eine Ausstellung im Louvre wäre, würde es etwa 4 Jahre brauchen um auf die gleiche Anzahl von Besuchern zu kommen.

Klicke hier um den vollständigen Bericht zu sehen.

My smy wšudźe – na přikład Gordian Kral z Chelna

29. Dezember 2014

Gordian Kral, 30-lětny Serb z Chelna, bu drje hižo dwaj dnjej do partožicy na třećej Budyskej stronje Sakskich Nowin předstajeny. Ale chcu was hišće na tónle přinošk skedźbnić, doniž njebudźe stara papjera scomter tutym wudaćom lokalneje nowiny wotwožena.

Kiel, New York, Hongkong rěkachu prěnje powołanske stacije wjesołeho serbskeho kosmopolita ze wsy sewjernje Budyšina. Wón dźěła na mjezynarodnym parkeće financnych wikow a je zdobom wšudźe za socialne naležnosće angažowany. Tež w domizinje – w karitatiwnym dźěle młodźinskeje organizacije Lions Club, Leo-Club.

W času tuchwilneho pobyta doma chodźi Gordian Kral ze swojej wowku do dźiwadła w Budyšinje, podpěruje Leo-Club a wužiwa čas w swójbje. A potom póńdźe najskerje do Ruskeje. Přejemy wjele wuspěcha a zboža při pućowanju po cyłym swěće, doniž zaso do Łužicy njepřińdźe.

Wobličo integracije :-)

29. Dezember 2014

Tutoho sněhoweho muža z mjenom znateje sakskeje marki čorneho piwa – štož Piwarca (!) hladajo na fana woneho napoja w swójbje wězo wosebje wjeseli 🙂 – je kónc tydźenja młody ćěkanc ze Syriskeje w Budyskim wokrjesu tworił. Měrliwa alternatiwa k wójnje wšědny dźeń w jeho něhdyšej domiznje.

Rjenje, zo je so w nocy znowa tak sylnje sněžiło, tak je dosć materiala za wjele dalšich sněhowych muži po cyłej zymskej Łužicy. Zmjerzk drje je, ale hižo nic tajki kruty kaž njedźelu rano. Minjenu zymu bychu arabscy azyl pytacy jenož mało rozdźěla wjedra přirunujo ze swojim pochadom pytnyli, ale tuchwilu łužiska "witanska towaršnosć" swoje najrjeńše stronki pokazuje. 🙂

Cyrkej njeje koncertownja – tohodla prošu žadyn přiklesk!

29. Dezember 2014

Po hodźoch knježi měr, nětko ma čłowjek woprawdźe chwile – na přikład za tajkele wjedźenje po Dwórskej cyrkwi w Drježdźanach. Ordinariatny rada Christoph Pötzsch, kotrehož wosobinsce znaju jako nawodu katolskeho běrowa, to rěka zastupjerja biskopa při krajnej politice, pěstuje konik nazorneho powědanja wo stawiznach sakskeje stolicy. Swoju wědu dźeń a wjac zajimcam posrědkuje.

Tak zhoniš, zo bě Dwórska cyrkej w socialistiskim času prawnisce "wobsydstwo ludu". Dźensa słuša katedrala swobodnemu statej Sakskej a je katolskej cyrkwi k časowje njewobmjezowanemu wužiwanju přewostajena. Dalšej zajimawej informaciji: Mólba nad wołtarnišcom je najwjetša po cyłej Němskej, a cyrkej je drje barokna a zdźěla wotpowědnje wupyšena, ale bě hakle po kóncu tuteje epochi dotwarjena. Tohodla je jeje wjerch prosće prózdny.

Na kóncu praješe Pötzsch, posledni hudźbny přinošk na pišćelach připowědźiwši: "Prošu njepřikleskujće, njejsmy w koncertowni, ale w cyrkwi." To móžemy snano přichodnje při zarjadowanjach w cyrkwi tež druhdźe wobkedźbować. Nic jenož při tutym duchapołnym wjedźenju w sedźenju. A snadź so tež dale a wjac Serbow za program tutoho Serbam přichileneho čłowjeka zajimuje.

Zymski dowol we Wojerecach

28. Dezember 2014

Mjez hodami a nowym lětom pyta čłowjek, kiž njeje sej ze swojimi lubymi ani do Rudnych hór ani do Turkowskeje wulećał, počasej přiměrjene zhromadne wjeselo w krajinje domizny. Druhi swjaty dźeń je nam dosć sněha wobradźił (běłe hody!), potajkim won do přirodneje krasnosće!

Lětuši tajny tip za krótki zymski dowol resp. wulěty: Wojerecy. Na kromje města namakaš Šibjanski jězor. Nimale bjez ludźi. Cyle zmužići samo kolesuja. Njedawno bě w Sakskich Nowinach rjana reportaža wo romantiskim (połlegalnym) přenocowanju w spanskim měše při Łobju wosrjedź Drježdźan. Bych zymske stanowanje mjez kerkami při Šibjanskim jězorje preferował. 🙂

So wě, zo je tež tónle jězor naslědna krajina něhdyšeje brunicoweje jamy, za kotruž bu serbska wjeska woprowana – Šiboj. Zo su najebać to pućniki jenož němskorěčne, njeje akceptabelne. Puć dokoławokoło jězora je drje nětk derje wuhotowany, samo ze starej loru, ale rěčnje je hišće dźěła dosć.

Němska železnica je Łužicu wopušćiła

27. Dezember 2014

Němska železnica je so z wuchodnej Sakskej rozžohnowała. Tak přińdźetaj mojej staršej nětk ze smjerćmodernym, přijomnym ćahom noweho priwatneho nošerja – Vogtlandbahn – wobchada na kolijach mjeze sakskej stolicu a pólskej hranicu w poł hodźinje ze Zhorjelca do Budyšina a wróćo.

Hižo žane wušparanja, hdyž zalězeš a wulězeš – durje su na samsnej runinje kaž nastupnišćo. Ćim bóle negatiwnje zawostajenstwo zjawneho zawoda napadnje: wopušćene dwórnišćo centruma Hornjeje Łužicy. Foto je připódla dopokaz za to, zo mějachmy wčera tola hišće běłe hody – a zymu.

Runje při tajkim wjedrje by fungowace dwórnišćo z halu přijomne było.

Boža nóc hižo po wječeri?

26. Dezember 2014

Boža nóc w 22 hodź. – to je z mojeha wida dobry čas. Tu a tam je drje spočatk hižo w 21 hodź., a někotři ludźo bychu rady samo we wosmich w cyrkwi być. To pak njeby "nóc" była.

Jutry dožiwjamy hižo hustodosć – nic naposledk tak mjenowaneho lětnjeho časa dla – liturgisku grotesku, zo měšnik woła "lumen Christi", ale do toho docyła ćma njeje. Wurjadne podawki trjebaja wurjadne časy.

Prošu prědowanje bjez mikrofona – tohodla tajke krasne klětki mamy

25. Dezember 2014

Minuty dołho čakachu wosadni, doniž njeje knjez farar swoje – wobsahowje jara dobre a derje strukturowane – prědowanje w lětušej božej nocy započał. Najprjedy njeje mikrofon fungował a tohodla wón na klětce stejo tak dołho ničo prajił njeje.

Naše serbske stare cyrkwje su pak – bohudźak – tak twarjene, zo móžeš na klětce bjez wotřerěčaka prědować. Tak kaž su to prjedy fararjo tule tež činili. Najskerje bychu wosebje stari ludźo bjez mikrofona wjac zrozumili, kotřiž tuchwilu hustodosć jenož šum we wušomaj maja.

So wě, zo dyrbja dušepastyrjo potom pomału a jasnje rěčeć, to pak tyje powšitkownje zrozumliwosći a ludowemu stilej prědowanja. Potajkim zwučujće prošu prědowanje bjez mikrofona! To by duchownje dobre efekty měło.