Archive for Dezember 2014

Žohnowane hody!

24. Dezember 2014

Z chrěnom do njebjes

23. Dezember 2014

Sčasom do hód a dobrych jědźow w kruhu swójbnych so wěnuja Sakske Nowiny z pomocu Drježdźanskeho wědomostnika prašenju, čehodla čłowjek jako jeničke žiwjo wari. So wě, zo nam wotmołwu njeposkićuja, ale jenož pozitiwne efekty warjenych žiwidłow na wuwiće mozow, strowotu a słód.

Eksistencielne prašenja "zwotkel přińdźemy?", "čehodla smy tu?" a "dokal póńdźemy?" zwisuja z našim zežiwjenjom. Wšo jasne, wšako dawno wěmy, zo pŕińdźeš z chrěnom do njebjes, wosebje w kombinaciji z rjanym kwasowanjom, dobrym mandźelstwom a měrliwym swójbnym žiwjenjom.

Potajkim "Food in Context", štož je sej Techniska uniwersita w Drježdźanach jako marku (!) škitać dała. Knjez profesor powěda nowinarce wo swojim spočatnym zadźiwanju, zo "družina zwěrjatow čłowjek" jako jenička wari. Štóž ma čłowjeka za božu podobiznu, je najskerje w tutej naležnosći bjez chemiskich formulow mudriši.

Zo su mjenujcy pozdatnje po měnjenju poradźowarjow strowše žiwidła woprawdźe strowše, njeda so dopokazać, tak wony profesor za chemiju žiwidłow. A za wědu, zo w zhromadnosći lěpje słodźi, wědomosć njetrjebamy. W tutym zmysle: Dajće sej słodźeć!

#pegida , #nopegida ? #JANKAHANKA !

22. Dezember 2014

17.500 ludźi dźens wječor před Semperowej operu – zaso wjac přiwisnikow za #pegida . A 4.500 přećiwnikow pod hesłom #nopegida – zaso mjenje hač tydźenja.

Što sym ja činił, wšako je moje dźěłowe městno jenož třista metrow wot spektakla zdalene? Sčasom na wuwzaćnje popołdnju w pjećich prózdnych dróhach do směra mosta při lěsnym hrodźiku a přez Drježdźansku holu domoj smalił.

A doma we Łuhowskim dole sym so wječor na łubju podał, přetož jenož tamle je dosć sylneho zwiska k internetej, zo bych #JANKAHANKA přez prěnje widejo-livestream Radija Satkule dožiwjeć móhł.

Pjeć hólcow, jedna skupina – a serbska kulturna wotmołwa na politiske błudnosće w sakskej stolicy. Tak to dźe: zakótwjeny w domiznje A swětej wotewrjeny być!

PEGIDA a Serbja – w Serbskim rozhłosu:
http://www.mdr.de/serbski-program/rozhlos/aktualne-prinoski/audio1065600.html

Test: Hody z Domowinskim božim narodkom na pisanskim blidźe

22. Dezember 2014

Boži narodk z Mužakowskim motiwom (grafika: Měrćin Nowak-Njechorński) na pisanskim blidźe – tak testuju hodowny napohlad z hodownym postrowom předsydy Domowiny, wšako dawa lětsa něšto k samopaslenju. A tak wostanje postrow třěšneho zwjazka w hodownym času třidiamensionelnje prezentny. 🙂

Moje wutřihanje njewotpowěduje narokej pěstowarnje, dokelž mojej woči docpěwatej samo z nawočemi w najlěpšim padźe 80 procentow wótrosće. Nimo toho mam přinarodźeny nystagmus. Hladajo na to, zo rumnostnje widźeć njemóžu, njeje mój posudk žana ekspertiza. Ale mi so tuta ideja ze Serbskeho domu lubi. Tohodla smě boži narodk zaso domoj, dokelž tule patoržicu nichtó njebudźe.

Swójba bjez mjezow – serbski model za dźensnišu globalnu wjes

21. Dezember 2014

Štwórta swěčka signalizuje: Hody so bliža. Změju jutře posledni lětuši dźěłowy dźeń, prěni klětuši budźe po třoch kralach. Swoju sobuželnosć wuprajam wšěm předawarkam, kotrež maja honjenje rumpodicha hač do kónca, potajkim patoržicy, zmóžnjeć. A přeju jim, zo maja hdys a hdys wólne dny, hdyž dyrbja nimale wšitcy dźěłać.

Hladajo na hodowne dary znaju dale a wjac ludźi, kotřiž nazběranju přichodnych wotpadkow w dźěćacej stwě zadźěwać spytaja. Daruj swojemu mótkej radšo jónu wulět ze zajimawymi dožiwjenjemi město wulkeho paketa k hodam – dobra ideja! Dokelž je chwile za druhich měć tak a tak drohotniši dar hač stajna wuměna z konsumowymi tworami.

W serbskej towaršnosći, kotraž někak kaž wulkoswójba funguje, steji zhromadny čas w srjedźišću: Hač na kermuši abo klětu zaso na folklornym festiwalu, w dźiwadle, na koncertach, narodninach, wuprawach w tu- a wukraju – ludźo maja porno němskej towaršnosći nadpřerěznje wjele chwile za hajenje zhromadnosče.

Na tutym zakładźe směmy sej wězo tež při składnosći něšto materielnych darikow dawać – jako wuraz mjezsobneje kedźbnosće a wobkrućenje zhromadneho byća. Adwentny wěnc bě minjene tydźenje w internetnej Knize wobličow tež na stronach wjele "pohanow" widźeć. Tute jednore koło swěcow steji někak za dospołny cyłk – wosrjedź swěta pisanych fragmentow.

Prawobraz čłowječeho cyłka je swójba, a tohodla słušatej swójba, adwent / hody wusko hromadźe. Při wšěm njech je swójba něšto wotewrjene, štož staršeju, dźěći, dźěda a wowku daloko přesahuje. W Serbach so to přikładnje čini, přetož so tak dołho za swójbnymi stykami praša, doniž njejsmy mjenje abo bóle wšitcy přiwuzni. :-).

Model to je za globalnu wjes, wšako je teorija, zo njeje žadyn čłowjek wot žanoho druheho na swěće wjac hač poł ducenta poćahow zdaleny. A tohodla poprawom tež čłonojo syriskeje swójby, kotřiž su wobydlerskeje wójny dla do našich kónčin ćekli, cyle cuzy ludźo njejsu.

Azylanća njejsu XXL …

20. Dezember 2014

Dosć a nadosć su ludźo darili, zo móžachmy dźensa dopołdnja pod režiju Sofije Delanec z Budyskeho Kamjentneho domu azyl pytacym w motelu w Holešowje wjele dobrych drastow za zymu poskićeć. Poprawom chcych so jenož prěni raz z tamnišimi ludźimi dla planowanych zetkanjow za wuwučowanje němčiny zeznajomić. Ale najprjedy stejachu "wiki" na programje, štož rěkaše, zo smědźachu sej ćěkancy w skupinach so hodźace drasty wupytać.

My – 60 procentow Serbja 🙂 – smy dušnym, přećelnym a dźakownym (přewažnje) mužam z arabskeho a aziskeho swěta při tym kusk pomhali. Zdźěla by třoch muži do jednoho kabata tyknyć móhł, chcu z tym prajić: Štož pola nas šwižnym młodostnym přisteji, trjebamy tule za dorosćenych muži – z kulturow bjez swinjaceho mjasa, kotřiž su do přichada do Němskeje pod ćežkimi wuměnjenjemi dołho po puću byli.

Potajnstwo „serbskeje duše“ – njepisane zakonje integracije w Serbach

19. Dezember 2014

W našej čiłej diskusiji wo Pegidźe, načasnym politiskim bitwišću wojowanja wo definaciju prawych wobydlerjow nawječora, z wida patriotiskich Serbow je so chětř analogne prašenje k Serbstwu wukristalizowało: Štó so jako Serb w Serbach připóznawa?

Prawnisce je ta wěcka jasna: Serb je tón, kiž so jako Serb wuznawa. Potajkim teoretisce kóždy abo nichtó. Realnje pak wostanje wažne, koho Serbja sami jako Serba wobhladuja. W Hornjej Łužicy je bjezdwěla wuměnjenje, zo potrjecheny serbuje. Ale to njedosaha, dyrbi "serbsku dušu" měć. Tak so praji.

W zwisku z Witaj a 2plus je přeco rěč wo tym, zo njeńdźe jenož wo posrědkowanje techniskeje dwurěčnosće, ale tež wo narodne wědomje. K tomu słušeja serbske nałožki, tohodla su dźěći a ptači kwas najwoblubowaniši zjawny wobraz serbskeje pěstowarnje.

So wě, zo so tule łoskoćiwemu prašenju njewěnuju, što su znamjenja "serbskeje duše", byrnjež sej priwatnje něšto subjektiwnych kriterijow wuwił resp. wot druhich přewzał. Sće pak radlubje witani, so k tomu wuprajić. 🙂

Diskusija je hižo na zajimawu ambiwalencu pokazała: Serbska towaršnosć je bjez regulow staćanstwa wotewrjeniša hač němska. Zdobom ma Serbstwo wočiwidnje njepisane zakonje integracije "nowych" Serbow, dokelž nochcedźa sej rodźeni Serbja wot přidružnikow napowědować dać, što je to serbske.

Prěni raz přihladowar Radija Satkule być: Póndźelu, 22.12., w 20 hodź.

18. Dezember 2014

Radijo hladać: on air, on stream, Satkula on

Pjeć hudźbnikow, tři kamery, dwaj moderatoraj, jedne wusyłanje.
Ze serbskej skupinu JANKAHANKA budźetej přichodnu póndźelu (22.12.) w młodźinskim wusyłanju Serbskeho rozhłosa, w Satkuli, hnydom dwě premjerje. Młodźi hudźbnicy předstaja swoju prěničku live přez sćelak. K prěnjemu razej budźe wusyłanje přez viedostream online widźeć. To je wužadanje za wšitkich sobudźěłaćerjow MDRa w Budyšinje. Ze studija so originalnje wusyła a pohladnjemy tež do redakciskich rumnosćow. Tak móža wšitcy připosłucharjo wot 20:00 do 22:00 hodźin raz přihladowarjo Satkule być. Woni móža so wjeselić na live hudźbu skupiny, interwiwy, zabawu a někotružkuli nowostku.
Stream poběži pod:

http://www.mdr.de/serbski-program/rozhlos/artikel80040.html

Palc wotedać hodźi so po eksperimentanym wusyłanju na facebooku Satkule.

https://www.facebook.com/pages/MDR-SATKULA/170246519702547?fref=ts

(nowinska zdźělenka MDR)

Domowina namołwja k pomocy za ćěkancow w Holešowje

18. Dezember 2014

NOWINSKA INFORMACIJA

Domowina namołwja k pomocy za ćěkancow w Holešowje

Aktualnje přebywa w Holešowje pola Njeswačidła někak 25 do 30 ćěkańcow, mjez nimi dwě žonje a małe dźěćo w starobje 3 lět. Nuznje pyta so za ćěkańcow zymska drasta, wosebje za muži we wulkosćach M do XL, črije, cholowy, měcy, pulowery atd. Tež nadoba kaž pónoje, grat a rjedźenske wěcy su trěbne.
Hišće nuznišo pak pytaja so wosoby, kiž su zwólniwi z nimi němsce wuknyć. Ćěkańcy přińdu ze Syriskeje, Pakistana, Albanskeje a Palestiny.
Wěcy a wšitko, štož ćěkańcam přijomniše přebywanje zmóžnja, hodźi so tutón tydźeń hač do pjatka 17 hodź wotedać w Kamjentnym domje na Albert-Schweitzerowej 1b. Dalši kontakt k sobudźěłaćerce Sofiji Delanec je móžny pod telefoniskim čisłom 01627468779.

Přećelnje strowi Was

Borbora Felberowa

Što mysla patriotiscy Serbja wo PEGIDA?

16. Dezember 2014

Piwarc so praša:

PEGIDA – su to z twojeho wida skerje ludźo ze strašnymi předsudkami abo patrioća runja Serbam, kotřiž su přećiwo přeněmčenju?

Tule wotmołwa młodeho Serba:

"Pegida? Wo tym ničo njedźeržu. Azylowa politika a naprawy měli so polěpšić. Za to pak protestuje po mojim měnjenju wopačny klientel w DD."

A što ty měniš?