Štó koho integruje? PEGIDA, Serbja a sebjerozpušćenje nawječora

Hdyž je rěč wo integraciji, dźe wo zbrašenych abo wukrajnikow. Tón najwjetši problem našeje towaršnosće pak je, zo je dale a wjac "normalnych" domoródnych, kotřiž so hižo do žanoho zawjazowaceho socialneho cyłka integrować njedadźa, dokelž znaja jenož hišće narunansku metafyziku absolutneho indiwiduelneho sebjezwoprawdźenja.

Při tym so zmysł žiwjenja na noweho zemskeho trojjeničkeho "boha" redukuje: zabawa + strowota + derjeměće. Kaž je Nietzsche "poslednich čłowjekow" nawječora připowědźił: bjez rizika, zaměra a wulkeho zapala. Trjebaja swoje wšědne "jědy" (drogi) za dobru naladu. Metafyziske ambicije, njebjeske naležnosće zwonka potrjebow wšědneho dnja hižo njeznaja.

A nětkole dale a wjac tych ludźi pochoduja pod chorhoju PEGIDA pozdatnje za nawječorne hódnoty. Wědomostnicy su zwěsćili, štó to je: Přerěznje 48-lětny bjezkonfesionelny muž z nadpřerěznej mzdu. Póndźelu je jedyn z přewodźerjow jich wjednika Bachmanna nawodnicy politiskeje redakcije sakskeho MDR, Uta Deckow, z pukami hrozył…

Čakam na wuznawanski list Serbow, kotřiž tame sobu činja, zo bychmy zhonili, što su sej woni při tym myslili. Kaž bě w Serbskim rozhłosu słyšeć, skoči PEGIDA bórze do Wojerec. Najebać to namjetuju, zo w Serbach křesćenjo resp. humanisća wostanjemy a swoje nabožno-kulturne hódnoty kaž njewidźomnu twjerdźiznu swěru pěstujemy – přeprošenje wšěm ludźom dobreje wole.

4 Antworten to “Štó koho integruje? PEGIDA, Serbja a sebjerozpušćenje nawječora”

  1. TaBeja Says:

    „Čakam na wuznawanski list Serbow, kotřiž tame sobu činja, zo bychmy zhonili, što su sej woni při tym myslili.“
    Wšo je někak zrudźace, najlěpje je, zo mjelča. Wosebje wobličo morjeneho ćěkanca z Erithreje w Drježdźanach, Khaleda, je zrudne. Jenož 20 lět stary! Wón sej jenož žiwjenje w měrnym kraju přeješe a w tym měrnym kraju jeho „zamordowachu“. Wboha jeho maćerka w tym dalokim kraju, kiž nětko sylzy roni. R.I.P. Khaled

  2. njewotpisaj wšo Says:

    „Wědomostnicy su zwěsćili, štó to je: Přerěznje 48-lětny bjezkonfesionelny muž z nadpřerěznej mzdu“

    Skerje su zwěsćeli zo přerězny pegidist njecha so na študije wobdźělić (65%). Ja tukam zo w tych 65% wosebje wjele huligenow, npd-nikow a bjezdźěwnych je a skerje ći, kotřiž móža dale hač do 3 ličić a štyri zwisowace sady prajić so wobdźělachu.

  3. nyča Says:

    Nó haj, wědomostnicy su zwěsćili, zo žane zdaće nimaja, kak bychu w tajkim hibanju reprezentatiwne naprašowanje činić móhli.

  4. marko Says:

    Mam bjezdwěla nawječor tamne zajimy, hač z p ludźimi sobu teptać, kiba jim so napřećo stupić. Prosće, faluje čas a lóšt. Wobdźělnicy jón maja. Je to wjelym zabawa – špejtšopn. Njech je. Nalada, strach přećiwo cuzemu – dawnoznaty čłowjeski fenom, přeco zaso so w towaršnostnych worštach wujewi. Dźiwnuške to, zo wosebje tež potom, hdyž ma wobydler zemje pře wjele časa a pře wjele derjeměća, je tutón fenomen wobkedźbowanju.

    Bjezdwěla, medijam je to přiležnosć, wobšěrnje wo tym rozprawjeć. Njech so pjelna łopjena a wusywanja. Ale, njech so wěsta měra zajima wobchowa! Tak zajimałe, tak wažne to po mojim měnjenju pak njeje.

    Lětstotki hižo pěstuja so w Serbach katólske nałožki, wjerškuja w putnikowanju, křižerstwje a božim čěłje. Wone přewjedu so na drohach, haj, su cyle jednorje demonstracije. Móhli so snadź raz wo fundamentalizmje tuteju wuznaćow rozestajeć, wo połnosći/prózdnosći wobsaha. To zawěšće runje tak zajimałe, kaž zmysł Peggy, haj, jich zajimy hodźeli so zawěšće bjezsposrědnje do wobchowanja serbskeje tradicije integrować 🙂

    Přeprošuju tuž piwarca a medijam dobreje woly, so rozprawnistwa horstki stracharjow wzdać ; -)

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: