Dobre dny – dźak dobrym ludźom!

Po dobrym tipje Sakskeje rady za ćěkancow w Drježdźanach póndźelu móžach wutoru z jara pomocliwej sobudźěłaćerku Sakskeje kubłanskeje agentury z Budyšina štyrjom (połnolětnym) syriskim hólcam w Holešowje puć do němskeho kubłanskeho systema rubać. Woni budu po zymskich prózdninach na powołansku šulu w Budyšinje chodźić – jedne lěto do noweje přihotwanskeje rjadownje, hdźež steji wuknjenje němčiny w srjedźišću plus praktika w zawodach wšelakich branžow.

Sakska rada za ćěkancow trochuje, zo je hižo tuchwilu w Sakskej tysac w zwjazkowym zarjedźe za migraciju přeco hišće njeregistrowanych azylantow, a pola tych najprjedy „zabytych“ čakanje na rozsudy dale a dlěje traje. Dwajo tych nowošulerjow staj z mojeje skupiny němsce wuknjacych – ludźo bjez tajkeje oficielneje registracije. Zo móža ći „zabyći“ nětko samo do šule chodźić, je wulke zbožo. Horcy dźak Sakskej kubłanskej agenturje! Za akadamikarjow a nad 27-lětnych dyrbimy pak hišće hinaše puće namakać – ale tež to budźe.

Srjedu mějach dwě premjeri: Jako přewodźer předsydy Domowiny rozmołwu ze za Serbow přisłušnej ministerku Stange a potom we Wojerecach prěni raz wobdźělenje na posedźenju prezidija. W srjedźišću wobeju terminow steješe rozrisanje praktiskich prašenjow, štož mam za spomóžne. Po dompuću sym hišće w Holešowje pozastał a so jako wotputane zakónčenje dołheho dźěłoweho dnja na hodźinku blidokopańcy přeprosyć dał. Napoł dwanaćich so wróćich domoj.

Blisko domu ćěkancow pak při zwjazkowej dróze policajske awto mjez kerkami steješe, doniž njejsym nimo jěł. Na kromje Łuha su mi potom „stop“ kazali a so w zwisku z tak mjenowanej „powšitkownej wobchadnej kontrolu“ najprjedy prašeli, hač ja w Holešowje dźěłam. Derje, zo policija hladajo na dale a wjac nadpadow přećiwo kwartěram azylantow (loni plus 200 procentow po cyłej Němskej) – sobu na „čole“ Sakska a tule Budyski wopkrjes – ćěkancow škita. Njedźiwajcy wšěch katastrofow na swěće je swět pola nas někak w porjadku. 🙂

Eine Antwort to “Dobre dny – dźak dobrym ludźom!”

  1. Jurij Ł Says:

    Njech je tež tole jónu naspomnjene – wulki kompliment wšitkim, kotřiž so čestnohamtsce wo azyl pytacych starosća a Jim prawidłownje pomhaja a jich na wšelakore wašnje podpěruja. Piwarc je jedyn z tych, přistajeni Kamjentneho domu w Budyšinje, kaž tam Sofija Delanec abo tež pjekar Clemens Brězan…
    Tež w tutym padźe je tak, zo medije radšo negatiwne powěsće rozšěrja hač wo dobrych dnjach a…
    Při składnosći organizowanja wukrajnym dźěćom njedawno zmóžnić wopyt Ptačokwasneho program SLA tu w Budyšinje, (na)zhonich,,zo dźěći azyl pytacych a hižo připóznatych swójbow z wukraja wosebje do Budyskeje šule J. Curieja chodźa. Wučerki kubłuja tam dźěći sydom najwšelakorišich narodnosćow a ludow. Někotrych sym zeznał a dožiwił kelko duchowneho, kulturneho potencijala w kóždym tajkim małym čłowjeku tči. 10 lětna holčka rjenje ze mnu němsce rěčeše a mi powědaše, zo doma rěči z nanaom čečensce a z mamu rusce. A na prašenje, kak rěči z přećelkami, šulerjemi – najbóle němsce, tež hdyž njejsu wot jow. Měnjo, z Němskeje. A mje so prašeše – a kelko rěčow rěčiš ty? A hdyž jej (někak) rusce wotmołwich. so wona wjeseleše… Tak lochko je, so zeznajomnić z dotal cuzym čłowjekom… A kak ćežko, wšitko prawje činić, to dožiwich na kóncu našeje akcije, jako smój – z Katju Liznarjec – Ptačo kwasne sroki a hněžka – sponsorowane wot pjekarja C. Brězana – dźěćom rozdźělili. Hólc a holca steještej při tym zboka a njejstej sej ničo wzali. To jim jich wěra njedowoli, mi wučerka praji.

    Na krótke popołdnjo sym „wukrajnych“ dźěći z najwšelkorišimi telantami, kotřiž najlěpše kmanosće ze swojich kulturow a swójbow we sebi maja, spóznał. Při rozmołwje mi wučerka wuzna, zo je problematisce kóžde dźěćo na swoje wašnje spěchować, dokelž su započatkarjo husto hišće analfabeća… a telko narodnosćow je wšak wulke wužadanje… Porno druhim šulam pak nimamy tu žane problemy z disciplinu, wona zwěsći.
    Mi běše to njewočakowane dožiwjenje z dźěćimi, z kotrymiž mamy tež my Serbja do přichoda ličić a tak smy snano tež we wěstej zamołwitosći za jich derjeměće…

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: