Miłe podwolenje z pseudotemami

Hdyž smy zalońšim w Domowinje trójce w krótkim času zjawnje horco a smjerćkontrowersnje wo tak mjenowanym modelu 2plus na šulach diskutowali, njejsu Serbske Nowiny ani dimsensiju ani hłubokosć cyłeje debaty na wědomje brali. Cyle wothladajo wot toho, zo njejsu wuznam wobsahowych wuslědkow tehdomnišeho rozestajenja zrozumili, byrnjež ludźo po cyłych Serbach wo praktiskich deficitach při kubłanju maćernorěčnych dźěći rěčeli. Město toho nerwuja SN lěta dołho ze sejmikarskej debatu, kotraž zwonka redakciskich rumnosćow lědma rólu hraje.

Wo dale a wjetšim wotstawku medijalneje a towaršnostneje reality so dale a husćišo – w Serbach a druhdźe – pisa a powěda. Z politiku je to te samsne: Štyrceći abo wjac lět njeje nichtó před sudnistwom w Budyšinje serbsce rěčeć chcył, ale w krajnej politice bě zakitowanje tutoho prawa lěta dołho tema, hač by serbska duša na hrački stajena była. A nětko běži hižo cyłe lěto imaginarna medijalna debata "změna sakskeho serbskeho zakonja – haj abo ně?", hačrunjež ani jenički konkretny praktikujomny namjet za to na blidźe njeleži. Sebjerozpušćenje sorabistiki w Lipsku pak najebać kritiku studentow tema njeje.

W Francoskej lěta 2022 namaka pozdatnje wěčne tam a sem mjez prawym a lěwym politiskim lěhwom njejapcy swój konc z moderatnym muslimskim prezidentom – w ironiskej fikciji sławneho načasneho spisowaćela Michela Houellebecqa. Kniha nawjazuje na realnu stronskopolitisku konstelaciju, eksistencielnu zrudobu, socialnu wosamoćenosć a metafyzisku zadwělowanosć rowjenka, kotryž so skónčnje do rukow nowych knjezow poda, kotřiž do kruteho porjada swěta a zmysła žiwjenja wěrja. Muslimska strona je so porno druhim na kubłanje a swójby koncentrowała – a tohodla wuspěch měła.

Kaž prajene ironiska kniha to je, jara přećelnje napřećo muslimam a katolikam, z hórkej kritice na ateizmje spisana, hačrunjež awtor so k wěriwym ludźom njeliči. W Serbach njeby jeho fikcija wězo w tutej formje fungowała. Poddanosć politiskemu islamej njeje ani jako bajka předstajomna. Ale hdyž su bytostne debaty haćene a dominuja pseudotemy, njeje suwerene dalewuwiwanje swójskeje tradicije móžno. Stara Francoska je po měnjenju Houellebecqa tež na žurnalizmje zwrěšćiła, kiž je zwonka woprawdźitych problemow…

13 Antworten to “Miłe podwolenje z pseudotemami”

  1. stary měšk Says:

    Lochko je na SN swarjeć a hustodosć tež woprawnjene.

    Ale što je Domowina na Lipsćanskej situacije abo na wulkich 2plus špakach změniła? Abo je znajmjnša wobšěrna a kritiska w swojim centralnym mediju „Naša Domowina“ rozprawjała?

    Widźiš třěsku we wóčku swojeho bratra ale hrjady w swojim wóčku njepytnješ?

  2. @stary měšk Says:

    Trjechi. Ćeže a wopačnosće pola druheho lochko namakaš. Pola sebje dźe to ćešo.
    Domowina njeje ničo na wulkich špakach 2plus změniła. To je z jedneje strony zrozumliwe. Domowina njemóže 2plus kritizować, dokelž je RCW dźěl Domowiny. Potajkim kak móže Domowina něšto, štož wona sama čini, kritizować? Z druheje strony ma Domowina wjele čłonow. Njewěm, hač jich hłós do wuchow předsydstwa dochadźa.
    To samsnje płaći za nowinarku SN, kotraž je z kubłarkami a pěstowarkami spřećelena. Kak móže jedna „přećelka“ 2plusprotagonistow wo 2plus rozprawjeć? To je zmylk redakcije SN, ale nic nowinarki.
    W Lipsku so Domowina w Instituće za sorabistiku na zahajenju studijneho lěta wobdźěla a z profesorom E.W. ze škleńcu sekta juska. Wupada, zo je E.W. Dawida Statnika ze šklencu sekta dobył. Dawid Statnik je so wopokazał jako politikar, kiž jeno zasudźa abo kiž rjane słowa wupraja. Wón je rěčnik, ale jako předsyda, kiž skutkuje, wón njeskutkuje. Problemy wón njewidźi. Pak je přemłody, pak je přewobwliwowany wot B.C. po mojim měnjenju.

    • piwarc Says:

      K stawiznam: Domowina je wo wšě stejnišća serbskich šulow wojowała (hlej wjeršk Chróšćan zběžk 2001, hdźež běše RCW w koordinowanju zběžka nutřka a předsyda Domowiny kóždy dźeń na čole protesta na šulskim dworje). Nochcu nětkole wróćo hladacy wotkrywać, kotři dalši akterojo su mjenje abo bóle na barikadach stali – a štó nic … Fakt je: 2 plus bě po tutej poražce pospyt, model tworić, z wotpowědnej ličbu němskich šulerjow serbske šule zdźeržeć, štož je w realiće na kóšty maćernorěčnych serbskich dźěći šło, wšako móžeš přidružnikow jenož integrować, hdyž tworja maćernorěčni wulku wjetšinu cyłka, do kotrehož chceš druhich zapřijeć. Zwjazkowe předsydstwo je tohodla měritka stajiło, a dotal njeje ničo wopačne zakonsce zakótwjene. Z tym njeje tuchwilna praksa na wšěch šulach spokojaca, ale hdyž so w nowinje stajnje wobraz rysuje, štož z realitu ničo činić nima, je hišće ćešo, zwjazkarjow dobyć, kotřiž sej zwěrja, trěbnosć zasadneje změny zastupować. – Apropos sorabistiku: Na wšěm wina – Domowina? 😉 Hdźe je zjawny zběžk serbskich wědomostnikow přećiwo demontaži sorabistiki? – Projekt instituta mjeńšinowych rěčow njeje ideja třěšneho zwjazka… A zo so předsydźe jónu wumjetuje, zo njeje akademikar a potom zaso, zo njeje njezmysłej jednoho akademikarja sčasom zadźěwał, je wosebita pointa 🙂

      • @stary měšk Says:

        Jedna so wo jara kompleksne naležnosće (2plus a Lipsk). Njemóže so jeno Domowinje wumjetować, maš na kóždy pad prawje. Medijam so tež direktnje wumjetować njemóže, byrnjež měli swój podźěl w cyłej stawizničce. Domowina so jara prócuje, ale nima w nastupanju kubłanja Serbow tu rólu, kotruž dyrbi měć. Domowina dyrbi serbske zajimy zakitować. W Lipsku je wona kaž tež SŠT atd. cyle zwrěsćiła. To nima ničo z akademikarjemi abo njeakademikarjemi činić. Hač je D. S. akademikar nikoho njezajimuje. To je mudry čłowjek, ale wón měł kusk přemyslić, kak wón Serbow zastupuje. Słowa a narěče njedosahaja. Wón w Serbskim domje syda, zo by Serbow prawje reagował, hdyž widźi, zo něšto njetrjechi. Jeho róla ma potajkim z POLITIKU činić. Serbja su swój jenički SATELIT zhubili. SERBJA nimaja swójski stat a Domowina měła funkcije stata narunować. Irska zastupuje swoju rěč we wukraju. Tohodla maš w tym Instituće za sorabistiku iršćinu. Woni su so jara rjenje wo to starali. A štó so wo serbšćinu stara?
        Z wukraja njepřińdźe (hižo) žana politiska podpěra za Serbow. Serbja su prosće sami a hdyž njepomha ani Domowina, nichtó Serbam dale njepomha..Tohodla je ideja Sejmika nastała.

      • piwarc Says:

        So wě, zo je wšojedne, hač je něchtó akademikar abo nic, wšako maš mjez njeakademikarjemi dosć intelektualcow a zdobom dosć fachowych wědomostnikow, kotřiž su dawno před kompleksnosću našeho načasneho swěta kapitulowali ;-), ale SN su tajke wumjetowanja bjez komentara wozjewili, na přikład z erta serbskeho dźiwadźelnika, zo faluje TOHODLA Domowinje na čole intelektualny potencial, štož je wězo hotowy kał. – Móžu nimale wšo podpisać, štož sy pisał, Twoje poslednje TOHODLA pak nic: Njech je, zo je ta „ideja“ tak nastała, jeje forma, kotraž bu mi na prašenja přepodata, bě regionalny łužiski parlament, kiž njeby žadyn tych horjeka mjenowanych problemow rozrisać móhł

      • daaaaaaaaaalokowid Says:

        Chrósćan zběžk? To bě před 14 lětami! Hišće raz telko lět do zajndźenosće a smy w času hdyž su Serbja za stat na škodu bratrow a Serbstwa čušlili. A hdźe woni nětko dźěłaja? Tež w Domowi….

    • Dalši palenc prošu Says:

      Domowinu zakitować je twój nadawk a tež twoja misija, to wěmy. A jako wušikny PR-nik spytaš debaty na tamnych (hdźe su wědomostnicy) abo tamne temy přesuhać (róla Statnikoweho wukubłanja).

      To snano tu a tam wuspěšny sy. Ja pak chcu prašenja stareho měcha rady wospětować a přeju sej konkretnu wotmołwu:

      Što Domowina k změnje 2plus na dobro maćernorěčnych dźěći planuje? Najjednorišo by wězo było swójskemu wotrjadej „Witaj“ wotpowědny přikaz dać. Abo spjećuje so potom jednaćel?

      A: Kak so „naša“ Domowina za zasozawodźenje SORABISTIKI zasadźi.

      Wo wobojich temach ničo njezonju: SN, Piwarc, Rozhłós, Rozhlad, Domowina mjelča tak zo sej ja myslu, zo Domowina pak spi, pak so jej to wšo tak lubi.

      • piwarc Says:

        (Jenož) moja wosobinska wotmołwa:

        K prěnjemu: „Witaj“ njeje nošer serbskich šulow, ale stat. Tohodla njeby přikaz Domowiny „Witaj“ na eksistency eksperimenta 2plus na šulach ničo změnił. Zo bychmoj so prawje zrozumiłoj: Ja so dale za wotwiwanje 2plus zasadźuju, ale to njeběži po puću někajkeho wukaza. Dokelž sy jednaćela naspomnił: Wón je hižo zalońšim na zjawnym słyšenju w Serbskim domje praksu 2plus jara kritisce do prašenja stajił. W nětčišim wjednistwje Domowiny njeje nichtó, kiž je 2plus wunamakał… – Domowina jedna z druhimi we wodźacej skupinje z kultusowym ministerstwom a so zaběra na přikład praktisce z prašenjom přewzaća kóštow šulerskich transportow na dobro serbskich swójbow, kotrež chcedźa swoje dźěći radšo na kusk zdalenišej šuli z lěpšimi wuměnjenjemi za maćernorěčne dźěći wuwučować dać. – Wyše toho je Piwarc wospjet za serbske šulstwo w swobodnym nošerstwje wabił, zo bychmy runja Danam w Šleswigsko-Holšteinskej a w ramiku prawow sakskeje wustawy za swobodne šule serbske narodne kubłanje suwerenje postajeć móhli. Snadź tola jónu SŠT jako přisłušne fachowe nadregionalne towarstwo přeswědčimy, tajkile puć sobu rubać :-).

        K druhemu: Hač naš towarstwowy organ „Naša Domowina“ přećiwo połoženju na sorabistice škara abo nic, je hladajo na krajnopolitiski efekt chětro wšojedne. Zjawny list serbskich wědomostnikow knježerstwu abo sejmej pak by jara dobry zakład za dalše aktiwity był – nic jenož, ale tež ludźi z Domowiny. Hewak bychu so z wěstosću pismawučeni namakali, kotřiž třěšnemu zwjazkej wumjetuja, so přećiwo swobodźe wědomosće přeńć. 🙂

      • @stary měšk Says:

        Tu bych prajił, zo měšeš dwě wšelakej wěcy: SN, Piwarc, Rozhłós, Rozhlad, Naša domowina, Nowy Casnik su medije a
        medije wozjewjeja to, štož jako info dóstawaja abo namakaja.
        K tomu přińdźe kompleks małeho luda. Wšitcy so znaja, wšitcy bledźa a wšo wědźa, ale njechaja so w medijach z woprawdźitosćemi rozestajeć. Kak su wšitcy reagowali, hdyž je knjez prof. dr. Šołta woprawdźitosć w interviewje prajił? Nastupajo tutón interview su wšitcy reagowali a wuprajenje prof. Šołty bě tajka móličkosć. Ale w padźe rozpadowaceho serbskeho šulstwa nichtó njereaguje.

        Piwarc je wjele wo 2plus a Lipšćanskim instituće wozjewjał. Piwarc je w jednym wokomiku samo w Lipsku zazwonił. Problem je, zo wón žane informacije njedóstanje. To je wšo njetransparentne a na to je Piwarc jara derje skedźbnył. 2plus tematiku je Piwarc tež jara derje wobjednawał.

        K tomu přińdźe prašenje, hač maja medije zajim, něšto (nowe informacije) namakać. A tu maš prawje, zo w medijach přemało zhoniš. Žadyn mjenowany medium tute problemy njewobjednawa.

        Kaž prajene: Nowinarka za kubłanje je spřećelena z kubłarkami z 2plus programa a tohodla njemóže objektiwna być, ale to njeje jeje problem.

        W SN so wjele wo 2plus powěda. Njetrjechi, zo so njepowěda, ale faluja kritiske rozestajenja z problemami. Jedna so potajkim wo redakcisku wěc.

        Najzajimawšo je, zo dawa časopis SERBSKA ŠULA, kotraž dyrbi so wo KUBŁANJE starać, ale tón časopis so wo to njestara! Serbska šula je kaž Naša domowina jedyn medijny ORGAN dateje institucije (w tutym padźe RCW abo Domowina).

        W SN su měli interview z E.W. z Lipska, kiž so w interviewje blaměrwe. Na spočatku jónu tak a jonu hinak na kóncu interviewa praji.

        Hinaše prašenje je, što Domowina a SŠT činitej. Domowina kaž SŠT stej zastupnikaj Serbow, potajkim instituciji, kotrejž měłoj Serbow zakitować. Kak móža medije rozprawjeć, hdyž Domowina a SŠT njereaguje? Domowina abo SŠT měło naprašowanja w Ministerstwje a w tym instituće přewjesć a widźeć, što njetrjechi. SN su rozprawjeli, zo so studenća eksmatrikuluja. Wona dyrbi so prašeć čehodla a spytać ćišć wukonjeć. Po tym zo Domowina reaguje, přińdu reakcije medijow.

      • bob Says:

        „SN su rozprawjeli, zo so studenća eksmatrikuluja.“
        Po mojim zdacu placi na uniwersitach druhdy hisce princip dobrych wukonow. Wezo moza so tute tez prez wysnosc wobliwowac. Ale mi je kwalita lubsa hac kwantita.

      • @bob Says:

        Bobo, zo by kwalita była, by dyrbjała tež kwantita dawać. Njebudźe-li žadyn student, njebudźe so za žanej kwalitu pytać.

      • bob Says:

        slusa 0 do mnostwa kwantity? za mnje je kwantita nesto, stoz njeje nico 😉

      • piwarc Says:

        Najlěpša kwalita ničo njepomha, jeli so wona hdys a hdys kwantitatiwnje njezwoprawdźa… 🙂

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: