Komplikowane křesćanstwo – jednory islam

„Jutry budźemy křižerjow hladać“ – „jutry, što to je?“ Woprawnjene prašenje muslimskeho kurdiskeho hólca sewjernosyriskeho pochada. Myslach, zo specialisća w Drježdźanskej kniharni swjateho Bena mi pomhać móža. „Trjebam cyle jednoru wobrazowu knižku wo wuznamje jutrow, z někotrymi wulkimi wobrazami a něšto cyle jednorymi sadami wo podawkach wot zeleneho štwórtka hač do jutrownički.“

Njedawa! Tež najjednoriše dźěćace knihi k jutram su polnje wuprajenjow skerje teologiskeho razu – a mjenowany młody muž njeby teksty wobsahowje ani zrozumił, jeli by wón hižo derje němsce móhł. Za ludźi ze swěta bjez abstrakcijow, kotřiž znaja plus a minus, ale nic multiplikaciju, je to wšo překomplikowane. Te krónowanje su za mnje – w relatiwnje najjednorišej knize, kotruž sym zadwělowanje kupił – na kóncu warnowanske pokiwy staršim, na čož wšo dźiwać dyrbja, zo njebychu wbohe dźěći ničo wopak rozumili.

Hdyž je njedawno w Holešowje bydlacemu syriskemu mužej, kiž so husćišo jako hósć na hodźinkach našeje skupiny wobdźěleše, nan w Syriskej zemrěł, su mi kurdiscy hólcy kazali, k njemu sobu přińć. A njejapcy sedźach hromadźe z wosom mužemi w stwě na – prajmy tak – muslimskim pustym wječoru. Ze smartfona na blidźe spěwaše imam dobru hodźinu dołho žarowanske hrónčka z korana, a při tym mjelčo w kole sedźachmy. Do toho bu arabski kofej poskićeny, po tom škleńčka wody, kotruž je hosćićel po rjedze kóždemu oferěrował a přeco naliwał, hdyž je něchtó lunk wzał. Potom smy mjelčo wotešli, po tym zo smy hišće swójbnym zemrěteho kondolowali.

Dwě wěcy stej mi napadnyłoj. Sprěnja: Porno křesćanam, kotřiž lětstotki wo tym diskutuja, hač a kak smě so katolski na ewangelskim nabožnym zarjadowanju wobdźěleć a nawopak, je tule cyle samozrozumliwje, zo – po kategorijach profeta Mohameda – njewěriwy runoprawnje při muslimskim ritualu sobu čini. Zdruha: Tón ritual je tak jednory, zo jako zwonkastejacy problemy nimaš, so hnydom integrować.

PS.: Nawjazujo na horcu diskusiju wo tutym přinošku hišće přidawk ke komplikowanemu křesćanstwu z jutrowneho wudaća ZEIT:

ZEIT_komplikowane

 

15 Antworten to “Komplikowane křesćanstwo – jednory islam”

  1. Hync Rychtaŕ Says:

    Nětko pak sy so na jara smykły lód podał, luby Piwarco, a k tomu hišće w jara hładkich črijach. Jednu lubowólnu wěc tu a druhu lubowólnu wěc tam wupytać a potom na dobro jedneje a na škodu druheje sebi napřećo stajić, přirunać a pohódnoćić, hačkuli so takle přirunować njehodźitej – to njeje jenož njefairne, ale da skoro na wěsty wotpohlad (?) w pozadku myslić. … Na tajke wašnje móžeš kóždyžkuli „argument“ znjewužić a kóždužkuli tezu „dopokazać“. Ale – tak hłupi my nětko woprawdźe njejsmy!
    Hync Rychtaŕ

    • piwarc Says:

      Lěpšina křesćanstwa je jeho w lěttysacomaj wuwita teologija. Tajke něšto islam nima, tež nic bohosłowcow, kotřiž na uniwersitach wo wobsahach nabožiny kontrowersnje diskutuja. W Němskej je mjeztym iniciatiwow doprědkarskich islamskich wučencow, tajke něšto natwarjeć – najebać předsudki wjele muslimow a tež domoródnych křesćanow přećiwo tomu. A kóždy čitar Piwarca wě, zo sym přiwisnik jednoty wěry a rozuma a běch tohodla wulki fan bamža Benedikta XVI….

      Tež w katolskich Serbach bě hižo diskusijow na přikład w Posole wo prašenjach poměra mjez teologiju a ludowej wěru, kotrejž so w kóždym padźe njekryjetej. W tutym přinošku naspomnjeny problem ma eksaktnje z tym činić. Abo hinak prajene: Snadź so wjele křesćanow w našim kraju hižo tohodla pospyta misionowanja druhich wzdawa, dokelž je posrědkowanje wěry mjeztym tak akademizowane, zo z cyle jednorymi słowami a wobrazami hinak wěriwym tak a tak rozkłasć njemóža, wo čo pola nas poprawom dźe.

      To rěka, bjez rozuma njeńdźe, hewak dóstawamy zjawy kaž IS abo talibanow. Ale bjez jednoreje přirodneje samozrozumliwosće, hdźež njeje kóždy aspekt na wšón gwałt do wšěch směrow teologisce wufilowane, tež nic.

    • Alojs Says:

      „Jednu lubowólnu wěc tu a druhu lubowólnu wěc tam wupytać a potom na dobro jedneje a na škodu druheje sebi napřećo stajić, přirunać a pohódnoćić, hačkuli so takle přirunować njehodźitej“

      To je tola koncept tuteho bloga. Tema A (aktualna politika, nabožina, SLA) so přez pseudophilosophiske mysle po dźiwnych pućach z temje B (Domowina, Domowina, Domowina, nabožina) kombinuje a tak zezibuje zo so do swójskeho wida na swět hodźi.

  2. budyslaw Says:

    Islamizacija netko tez tu.

    • piwarc Says:

      Serbska PEGIDA?

      • budyslaw Says:

        Wliw islama a zacah jeho hodnotow do naseje towarsnosce mi wjace stracha nacini hac nekotre demonstracije w Drjezdzanach.

        Cehodla wosebje Lewi/Lewicarjo islam tak wobdziwaja a zakituja? Snadz, dokelz je njeprecel demokratije a swobody?

      • piwarc Says:

        Před štyrjomi lětami je w Sakskim krajnym sejmje Lěwicar a předsyda tehdomnišeho přepytowanskeho wuběrka, Klaus Bartl, swjaty křiž wuchował, kotryž chcyše Stefan Brangs z SPD, nětčiši statny sekretar, wotstronić dać – http://www.mdr.de/mdr-figaro/audio1132654.html wusyłanje MDR-Figaro wulki pjatk

  3. Hync Rychtaŕ Says:

    Nětko drje sy so přez swój hladki a zdobom jara ćeńki lód přepadnył. Haj, jeli takle chceš – haj: serbska pegida. Hdyž ty kritiske a wot oficialneje politiki a jeje propagandy a jeje propagandistow wotchilne měnjenje mjenuješ „pegida“ – da „HAJ! PEGIDA!“
    Hync Rychtaŕ

  4. filozof Says:

    Nabožina je cyroba za jednory lud. Nabožina je smjerć za wědomosć. Křesćanstwo je wězo jara komplikowane, dokelž je so reformowało. Islam je jednory, je samsny kaž před lětstotkami, wšo je čorno a běłe. Jednoremu čłowjekej je tute jednore wašnje widźenja swěta jara wažne. Tohodla je tak lochko, njewěriweho zatřělić, žonu doma začinić a ruce wurězać. Hlejmy prošu poslednje podawki w Africe… Woprašej so prošu twojeho sewjerosyriskeho přećela, kotre měnjenje wón wo žonach a homoseksuelnych ma. Muslimojo so w Europje jenož luboznje zadźerža, zo bychu pjenjezy dóstawali a dźěći produkowali. Njeposudźuju ludźi, jednotliwcow, posudźuju podawki a statistika nałožuje jara jasnu rěč. Hlejće, što so w Africe a Aziji stawa. Terorizm přećiwo kenyskim studentam je terorizm přećiwo wědomosći. Wšo spěchowane wot Saudiarabiskeje. Z jich fabrikami za dźěći (čitaj žony), žan přichod za doprědkarsku mysl njedawa. Nabožina je zło.

    • budyslaw Says:

      Kaz je to hizo twoj franzoski kolega Voltaire zwuraznil: “Der Koran lehrt Angst, Hass, Verachtung für Andere, Mord als legitimes Mittel zur Verbreitung und zum Erhalt dieser Satanslehre, er redet die Frauen schlecht, stuft Menschen in Klassen ein, fordert Blut und immer wieder Blut.“

    • piwarc Says:

      Daj mi (marcel@piwarc-hamburgski.de) prošu Twoje mjeno scomter adresu plus handyjowe čisło za skontaktowanje, zo by wón ći wo žonach a homoseksualnych powědać móhł. – Njedźiwajcy toho, zo je Twój přinošk poprawom zady hranicy ciwilizowaneho diskursa.

      • filozof Says:

        Mam dowěru a rozum, luby Piwarco. Dyrbju so zamołwić, dokelž bě konkretizowanje na přikładźe twojeho přećela ze Syriskeje měšenje runiny jednotliwca a kolektiwa a chětro njezbožowne. Steji-li přede mnu jednotliwc, posudźuju jeho jako jednotliwca.
        W padźe twojeho přećela (jednotliwca) njemóžu ničo rjec, dokelž ja jeho docyła njeznaju. To je na kóždy pad luby čłowjek, hdyž ty jeho tak mócnje zakituješ.

        W padźe kolektiwneje nahladnosće arabskeje Azije a Afriki njemóžeš mje tak lochko přeswědčić, dokelž rěča politiske podawki hinašu rěč. Nabožina resp. hinaše nabožiny wjedu k nabožinskim wójnam. Nabožina je wjace škodow hač dobytkow přinjesła.
        Čłowjek ze swojich zmylkow wočiwidnje njewuknje.
        Nabožina jako dźěl statneho porjada je najwjetša złósć a smjerć za wědomosć a za doprědkarsku mysl kaž to widźimy w arabskich krajach.

      • piwarc Says:

        Wón je pěši (!) z cony IS ćeknył, zastupuje na přirodne wašnje liberalne pozicije w dobrym zmysle a budźe našu swobodu´bóle zakitować hač někotryžkuli domoródny, kotremuž je wona do klina padnyła a hustodosć jenož wuraz wólneho konsuma…
        Sym katolski laicist, to rěka z mojeho wida njesmě cyrkej politisku móc měć. A kóždy fundamentalizm je zahubny, hač pod mjenom Tea-Party, Opus Dei abo šarija. Přiběracy fundamentalizm je po cyłym swěće wulki strach za wotewrjene towaršnosće resp. ludźi, kotřiž chcedźa ju měć.

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: