Jedyn serbski wokrjes? Radšo wubědźowanje mjez wokrjesami wo najlěpše spěchowanje!

W zwisku z planowanej wokrjesnej reformu w Braniborskej bě nětkole w nowinje čitać wo móžnym přichodnym „serbskim wokrjesu“ Choćebuzu. W nim by dotalnje wobkrućeny serbski sydlenski rum tutoho zwjazkoweho kraja w jednym wokrjesu takrjec zjednoćeny był. By to nam postup był? (Prošu zabudźće wšě argumenty demografije; před třiceći lětami njemóžeše nichtó dźensnišu zestawu a ličbu ludnosće připowědźić, a dźensa hladajo na njewěste faktory mjez druhim globalneje migracije nichtó njewě, kelko wobydlerjow pola nas za jednu generaciju budźe.)

Ja wosobinsce wulkowokrjesy wotpokazuju. W Sakskej móža ludźo zaso na awće ze znamješkami nimale wšěch něhdyšich 48 wokrjesow po puću być, hačrunjež buchu wone w kročelomaj na dźesać plus tři bjezwokrjesne metropole redukowane. Tule móžnosć nimale wšitcy při přizjewjenju noweho awta wužiwaja, dokelž nječuja so na přikład jako wobydlerjo Budyskeho wulkowokrjesa, ale Kamjenskich (KM), Wojerowskich (HY), Budyskich (BZ) kónčin abo regiona dokoławokoło Biskopic (BIW). Jenož Radebergscy su „diskriminowani“, wšako słušeše jich město k wokrjesej Drježdźanski kraj, tohodla swójske znamješko nimaja.

Ludźo so potajkim z wulkowokrjesom njeidentifikuja. Jeho załoženje bě njezmysł. Pak tworiš sylne regionalne wokrjesy z wotpowědnymi regionalnymi parlamentami po starodawnych kulturnych krajinach resp. na nje nawjazowacych kulturnych rumach, potajkim w Sakskej pjeć. Potom by Hornja Łužica a cyły serbski kraj zjednoćeny był. Tak je tohorunja (regionalna) identifikacija móžna. Pak pěstuješ małe wokrjesy ze sylnej lokalnej identifikaciju. Nětko mamy kumštne wokrjesy, kotrež su pak přewulke pak přemałe a zdobom pačenu Łužicu. Tule na jednym boku Radeberg z Wojerecami njedźiwajcy zhromadneho wokrjesa ničo činić nima, na druhim boku dyrbi Zhorjelski „bananowy wokrjes“ daloko zdalenje wot Drježdźan žiworić. Tohodla: Wokrjes Budyšin w teritorialnej wysokosći Posaarskeje je hoberska zarjadniska potwora, štož hižo na syći wotnožkow krajnoradneho zarjada widźiš.

Braniborske poměry pohódnoćić njemóžu. Ale njewěrju, zo je powjetšenje zarjadniskich rumow na dobro małeho serbskeho ludu. To tola nješkodźi, hdyž maja so zamołwići w třoch wokrjesach ze serbskimi naležnosćemi zaběrać – snadź samo we wěstym wubědźowanju wo najlěpše spěchowanje serbskeju rěče a kultury?

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: