2plus dyrbi so lětsa skónčnje pohrjebać – přispomnjenja składnostnje wšelakich konfliktow

Pospyt krajnoradneho zarjada, serbskich staršich ze zapowědźenjom přewzaća kóštow za šulerski transport – wothladajo wot staršiskeho přinoška – wudrěwać, swoje dźěći nic w Ralbičanskej, ale w Kulowskej šuli přizjewić, njemóže dołholětneho wobkedźbowarja překwapić. Zajim maćernorěčnych dźěći njebu ženje w realnoeksistowacym koncepće 2pluis wobkedźbowany. Tohodla je běrokratam tež wšojedne, zo njeje w Kulowje žaneje so hodźaceje rěčneje skupiny.

Ze žebrjacej politiku wšelakich institucijow dale njepońdźemy. Poražka Chróšćan zběžka lěta 2001, kotryž bě wojowanje wo prawo Serbow, runja druhim małym ludam w Europje, mjeńše rjadownje měć směć, rěkaše: Město toho je politiska wyšnosć z podpěru serbskich pomocnikow hybridny model 2plus wupjekła – měšeńcu Serbow a Njeserbow w wulkich rjadownjach. Wědomostnicy, kotřiž su tón projekt přewodźeli, su so do toho zaměrnje asimilaciji młodostnych z migraciskim pozadkom w zapadoněmskich wulkoměstach wěnowali.

Tohodla dotalne wuslědki ewaluacije 2plus žadyn dźiw njejsu, zo dźe 2plus-kubłanje jeničce na dobro němčiny a zo tónle model škodźi serbowanju na woprawdźe maćernorěčnym niwowje. Potajkim njeje 2plus, kaž bu tule hižo wospjet wobkrućene, žana Serbow spěchowaca, ale Serbow asimilowaca naprawa. Tomu njeda so w systemje 2plus wotpomhać. Štož trjebamy, je cofnjenje 2plus a system małych rjadownjow Serbow a Němcow, kotřiž serbšćinu nawuknu.

Njedźiwajcy toho, kak konkretny wčera w SN wopisany konflikt dźensa wuńdźe, wostanje wužadanje, 2plus po lěta trajacej bjezzmyslnej a njewužitnej debaće lětsa skónčnje pohrjebać. Prašenje šulerskeho transporta – hlej pad maćerje, kotraž je so za serbsku šulu w Chrosćicach město bydlenju blišeje šule w Budyšinje rozsudziła – nas hižo dołho zaběra. Těz prócowanje staršich w Hodźiju wo serbsku wučbu – dopołdnja, nic popołdnju. A nam so njedźiwa, zo 2plus při tym njepomha. So wě, zo je w kóždym konkretnym padźe hinašich wurěčow, čehodla njeńdźe…

Dopominamy so těz na němskorěčnu nabožinu za katolskich Serbow, Team-teaching z dwěmaj Němcomaj atd.

 

Nowinska informacija wokrjesa Budyšin, regionalneje wotnožki Sakskeje kubłanskeje agentury a Domowiny nastupajo narunanje kóštow za transport šulerjow w Budyskim wokrjesu, kiž chodźa na šule, kotrež wuwučuja serbšćinu po koncepće „2plus” resp. jako cuzu rěč

 Dnja 18.08.2015 wotmě so w Budyšinje rozmołwa mjez zastupjerjemi Sakskeho ministerstwa za kultus, Budyskeje regionalneje wotnožki Sakskeje kubłanskeje agentury, wokrjesa Budyšin, Domowiny a Serbskeho šulskeho towarstwa. Přičina za to běchu prašenja, kiž běchu nastupajo transporta šulerjow nastali, kiž chcedźa nimo němčiny tež serbšćinu jako cuzu rěč abo na maćernorěčnym niwowje nawuknyć.

Steffen Domschke wot krajnoradneho zarjada k tomu: „Wokrjes Budyšin njewidźi tu jenož zakonsku trěbnosć, ale tež zawjazk k spjelnjenju našich wustawkow, z kotrymiž chcemy serbsku rěč spěchować. Njehladajo na to pak ma to wšo planujomne a zawjazowace być. Změna wustawkow k šulerskemu transportej a wuwiće šulskeje syće ze serbskimi poskitkami su k nowym prašenjam wjedli. Tohodla mějachmy rozmołwu ze wšěmi potrjechenymi za trěbnu.”

Je-li starši při přizjewjenju swojeho dźěsća próstwu staja, zo chcedźa swojemu dźěsću tež wobdźělenje na wučbje serbšćiny zmóžnić, njewjedźe šulski puć přeco k najblišej šuli. Tu tworja šule z poskitkom serbšćiny wosebitu syć. Njebudźe pak móžno, wšě próstwy staršich zrealizować. Wokrjes jako nošer šulerskeho transporta ma při tym wobkedźbować předpisy nastupajo časoweho wobjima šulskeho puća, trěbnosć wotwažowanja mjez přećom a datymi móžnosćemi kaž tež rjadowanja k šulam, na kotrychž wuwučuje so serbšćina.

Předsyda Domowiny Dawid Statnik praji: “Wokrjes je so tu jara konstruktiwny a zwólniwy k rozmołwje pokazał. Wotpowědne fachowe referaty su nam jich postupowanje wobšěrnje a w detailu předstajili. Sym jara wjesoły, zo sym so dojednali a zo móžachmy wotewrjene prašenja zhromadnje diskutować. Za to so přistajenym krajnoradneho zarjada dźakuju. Tutu transparencu přeju sej tež do přichoda, zo njeby k njedorozumjenjam dóšło.”

Dźensniše ertne dojednanje mjez horjeka mjenowanymi ma hišće w tutym tydźenju pisomnje předležeć, tak zo móže so při wobdźěłanju próstwow wobkedźbować.

 

2 Antworten to “2plus dyrbi so lětsa skónčnje pohrjebać – přispomnjenja składnostnje wšelakich konfliktow”

  1. njewitany Says:

    A WITAJ nyhdom sobu pohrjebamy

    • stara socialistka Says:

      Sym knihu dr. Jany Šołćineje wo WITAJ-projekće (Bilingualer Spracherwerb im WITAJ-Projekt) čitała, ale wotmołwu na najwažniše prašenje namakała njejsym. Rěča jeje „probandowe myški“ serbsce abo nic?
      Z toho štož sym přečitała, rěka, zo nic…

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: