Je nam Serbam křesćanstwo na škodu? Richard Bigl je wuznawar pohanskeho Słowjanstwa

Składnostnje Dnja Hornjeje Łužicy dźe jutře w 17 hodź. w Budyskim serbskim hosćencu „Culinarium“ wo pohanske Słowjanstwo. Přednošować budźe hłownje Baal Müller,  čěski rěčespytnik a něhdyši šefredaktor „Rozhlada“, Richard Bigl, poda informacije wo hibanju we słowjanskich krajach. Hlej

http://wendisches-heidentum.jimdo.com/aktuelles/

Na prašenja Piwarca je Bigl wotmołwił:

  1. Što je Tebje k zaběranju z pohanskimi Słowjanami pohnuło?

Hižo jako dźěćo zajimowaše mje Słowjanstwo we wšelakorych swojich zjawach: rěč, nałožki, stawizny, a tež duchowna stronka. Běch zahorjeny wot wěropřipowědźerjow Cyrila a Metoda, kotrajž běštaj nam pismo přinjesłoj, a jimaše mje zmužitosć křesćanskeho reformatora Jana Husa, kiž bu za swoje přeswědčenje na šćěpowcu spaleny. Při wysokošulskim studiju slawistiki so pak bliže zeznajomich z tradicijemi předkřesćanskeje wěry. Prěnje wobdźělenje na pohanskim wobrjedźe bě zdobom kónc mojeho ateizma.

2. Bě přichad křesćanstwa z Twojeho wida skerje wumóženje abo kolonizacija?

Namócne misionarstwo je podryło žro słowjanskeje kultury. Měšnikow zamordowachu, swjate haje wurubachu, skóncowawši wobrjadźišća twarjachu na nich znamjenja cuzeho boha. Dołhe lětstotki njesmědźeše so k swojim boham wuznawać. Z druheje strony je křesćanstwo woznamjenjało ciwilizaciski postup.

3. Kotre kubła ma pohanstwo, kotrež su křesćenjo zanjechali?

Za Europjana je pohanstwo znowa aktualne. Ciwilizacija jeho přerostuje, a kult dawnych prjedownikow wobnowja runowahu w přirodźe. Na rozdźěl wot křesćanstwa njestaja wón do jeje srjedźa čłowjeka. Ludźo njejsu zwoprědka ničo hódniši hač zwěrjata a rostliny. Swoju prioritu dyrbja sej zasłužić.

4. Kak widźiš přichod pohanskeho myslenja – budźe dale a atraktiwnišo?

Toho so nadźiju! Přiwšěm wočakuju jenož snadny přirost wuznawarjow. Ródna wěra, kaž słowjanske pohanstwo rěka, njeje mjenujcy nabožina knihi. Nima swojeho swjateho pisma a jelizo haj, potom dźe wo někajki falsifikat. Ničo so ći njepředpisa, ćim wjace sy nuzowany wokolny swět wobkedźbować a wo nim rozmyslować. A kaž so praji: Myslenje boli.

5. Do kotreho boha Ty wěriš?

Tak so monoteista prašej! Jako polyteist drje mam swoju woblubowanu bohowku Mokoš, ale česću tohorunja druhich ródnych bohow. Respekt mam napřećo boham wšěch religijow, dokelž nas, pozemske bytosće, wěčnje přewyšuja. Woni su porjad tutoho swěta załožili a jón zaso wobnowja.

17 Antworten to “Je nam Serbam křesćanstwo na škodu? Richard Bigl je wuznawar pohanskeho Słowjanstwa”

  1. m, wjc Says:

    tež tučich demokratiski stat znjese: http://www.deutschlandfunk.de/rechtsextreme-siedler-voelkische-gesinnung-im-wendland.862.de.html?dram:article_id=328807

  2. filozof Says:

    Nabožina je najwjetše zło na swěće, ale křesćanstwo dźensa tajku móc nima, zo by nam Serbam na škodu było. Snano je křesćanstwo žiwjenje w srjedźowěku mócnje wobwliwowało, ale dźensa nic.
    Tuchwilu widźimy škódne hibanje zelenych a lěwicarjow, kotrež so mi docyła njespodoba. To je propagowanje MULTIKULTI z muslimami. Dźi, Piwarco, prošu k muslimam do Saudiarabiskeje a powědaj tak swobodnje, kaž w Němskej powědaš. Njechaš so na puć do Arabiskeje podać a z Riada abo z Rakki rozprawjeć? Maš nětko dwě ruce, ale kak wjele ći z teju tam zwostanje, njecham nětko rjec. Njejsym prawicar a myslu sej, zo dyrbi so prawicarskem hibanju tež zadźěwać. Islam = neonacizm.
    A ćěkancy z islam(isti)skich statow swoje domjace nabožinske konflikty do Europy importuja. Je wam znate, kajku škodu su muslimojo w Suhlskim domje azylantow sčinili? To je jenož spočatk a budźe hórje. Štóž sej nabožinske wójny přeje, njech muslimam dale pomha, njech jim socialnu pomoc za 20 dźěći dale płaći.

    • m, wjc Says:

      naiwna kuchinska filozofija to; njewěcowne a realitam wučěkacy wuliw. *** piwarc so přikładnje prócuje, čěkańcam wosud woložić. *** mam za njepřistojne, jemu ze saudiarabskim chłostanjom hrozyć. mohł to samo jako njezakońske po němskim prawu widźeć a mam za wulkomyslne, hdyž wobsydnik bloga wotrězk njezhaša.

      • filozof Says:

        Nichtó njeje Piwarcej hrozył.
        Nimo toho bě to jenož měnjenje wo aktualnych temach. A čehodla nic wo woprawdźitosći rěčeć? Njeje Němska (hišće) swobodny stat? A čehodla dyrbjał Piwarc posledni wotrězk hasnyć? Sym Piwarcej jenož pokazał, što so při wopyće Saudiarabiskeje a dalšich islam(isti)skich statow stawa. Ja sym přećiwo brutaliće. A brutalni ludźo z tajkim „kulturnym pozadkom“ do EU ćěkaja. Potajkim bórze tež kamjenjowanje na dróhach EU změjemy.

      • m, wjc Says:

        pjany w interneće https://www.youtube.com/watch?v=coavTGQ_8O8&feature=youtu.be

        dobru orientaciju skiča woleni, kotřiž zamołwitosć njesu (kaž měsćanosta wuerzburga http://www.tagesspiegel.de/politik/offener-brief-eines-oberbuergermeisters-meine-eltern-waren-selbst-fluechtlinge-aus-koenigsberg/12217234-2.html) abo na čěkańcach posledneje wulkeje wójny, kotřiž su so wuchodnje nysy zadomili (hlej serbske nowiny dnja 5.8.15, strona 3)

        p.s. šćuwać w interneće chłostaja w barlinje z 4.800 € abo 120 d jastwa http://www.tagesspiegel.de/medien/hetze-im-internet-34-jaehriger-berliner-zu-4800-euro-strafe-verurteilt/12219076.html

      • filozof Says:

        Wodajće knježe m, wjc, ale přehnawaće a nimo toho njerozumiće, wo čo mi dźe. Ja sym přećiwo šćuwanjam a ja, kaž prajene, ničo přećiwo azylantam nimam. Ja sym prajił, zo je praksa pokazała, zo je islam (jako nabožina, ideologija abo towaršnostny porjadk) negatiwne wuskutki na čłowjeske wuwiće měł. To płaći za křesćanstwo tohorunja, ale křesćanstwo dźensa tajki mócny wliw na towaršnosć njewukonja.

        P.S. A tute njeskutki, kotrež wopisuja w tagesspiegel su prosće nječłowjeske a tym dyrbi so zadźěwać.
        Kaž prajene, je moje měnjenje, zo je nabožina přećiwo doprědkarskej mysli skutkowała a dźens tež skutkuje. Nimam ničo přećiwo jednotliwcam a kóždy čłowjek ma prawo, dostojnje žiwy być a wězo swojeho susoda respektować.

  3. filozof Says:

    A haj, wězo měło so ćěkancam pomhać, nic kóždy ćěkanc je islamist, ale dyrbimy jim pokazać, zo maja woni naše prawidła respektować.

    • omit knakşem z dowola Says:

      Što rěka „naše prawidła“? Prawidła Pegidy, prawidła NPD, prawidła rasistow?

      • filozof Says:

        Ně, wězo nic, ale tajcy kaž ty jenož čornoběłe widźa. Z tobu njebdu dale diskutować.
        Jenož jako přispomnjenje: Naše prawidła rěka: sekularnosć němskeho stata respektować, nabožinu jako nastork za nadběhowanje wobydlerjow a porjadk stata njeznjewužiwać (hlej powěsće wo Suhl).

  4. omit knakşem z dowola Says:

    „Naše prawidła rěka“ pišeš a naličiš něšto, štož takle nihdźe zapisane njeje. Z „naše“ potajkim měniš „moje“ a rěčiš w pluralis majestatis, zo by móc wukonjał a druhich na swoju stronu sćahnył. Němska je demokratiski a socialny zwjazkowy kraj (artikl 20 Zakładneho zakonja). Štóž w Němskej knježacy towaršnostny porjad wohrožuje, wo toho so statne zarjady a jich přistajeni staraja. Ty pak nimaš prawo k tomu. Dale sy pisał: „Islam = neonacizm“. To njetrjechi. Islam je kaž křesćanstwo nabožina. Swoboda nabožiny je njezranliwa (artikl 4 Zakładneho zakonja). Neonacizm pak je swětonahlad, kiž drje njeje programatisce jasnje wuformulowany, ale ma tendencu, demokratiski porjad do prašenja stajeć. Tohodla su demokratiscy nastajeni staćenjo namołwjeni, so z ludźimi, kiž zastupuja neonacistiski swětonahlad, rozestajeć a jich na to skedźbnjeć, zo ze swojim počinanjom zhromadne žiwjenje w demokratiskej towaršnosći wohrožuja. Politisce přesćěhani maja prawo na azyl (artikl 16a Zakładneho zakonja). Pruwowanje, hač ma něchtó prawo na azyl, přewozmu přistajeni stata. Nic pak Ty sam. „Štóž sej nabožinske wójny přeje, njech muslimam dale pomha …“ su Twoje słowa. Ze swojej kuchinskej filozofiju wšitke pomocne skutki – Amnesty International, Cap Anamur, Médecins Sans Frontières atd. – wothódnoćeš a zakładne čłowjeske prawa teptaš. Dostojnosć čłowjeka je njezranliwa (artikl 1 Zakładneho zakonja) za Tebje wočiwidnje njepłaći. Stejiš zwonka demokratiskeje towaršnosće.

    • budyslaw Says:

      Neonacizm demokratiski porjad do prašenja staji, cyle prawje. Islam to samsne cini.

      • filozof Says:

        Cyle prawje, islam njeje jenož nabožina. Islam ma pokiwy a powučenja za kóždy segment towaršnosće. Za žonu, za muža, za swójbu, za zadźerženje w zjawnosći, jědź, piće, zadźerženje na dźěle, kubłanje žony, kubłanje muža atd.
        A kaž Budysław praji, staji islam demokratiski porjad tohorunja do prašenja. (Neo)nacizm je hida přećiwo cuzym a islam(izm) je hida přećiwo njewěriwym (njemuslimam). Moderatni muslimojo so husto wot ekstremistiskich njedistancuja, znajmjeńša je to mój zaćišć. A tohodla je ćežko, rozdźěl mjez jednymi a druhimi činić. Tohodla njewidźu paralele mjez křesćanstwom a islamom.

        A kaž w někotrych šulach w Kölnje widźimy, njepłaći hižo demokratiski stat, wo kotrymž so jowle rěči.
        Tam su wšitke dźěći nuzowane, to jěsć, štož sej starši muslimojo přeja. Demokratija je jěsć, to, štož sej přeješ. Demokratija je FKK, demokratija je swoboda, swoje drasty wubrać, tak kaž sej přeješ, demokratija je, lećeć z wětřikom, bjez toho zo ći něchtó praji, halucinuješ. Demokratija rěka prajić to, štož woprawdźe mysliš a přy tym, njezraniš druheho… To je demokratija. Nic někajke definicije z někajkich knihow.

        W domje azylantow w měsće Suhl njeje demokratiski stat tež płaćił, dokelž je skupina azylantow spytała, swoje měnjenje z agresiju přesadźić.

        Na kóždy pad dyrbi so azylantam pomhać, wosebje tym, kotřiž sej prosće jenož měr a dźěło přeja.

      • m, wjc Says:

        kermani, nošer měroweho myta, wo stawje islama: http://www.domradio.de/themen/islam-und-kirche/2015-08-22/friedenspreistraeger-kermani-beklagt-zustand-des-islams

        rozmołwa z khorchidem, wědowmostnikom k islamej: http://www.ksta.de/politik/interview-mit-islamwissenschaftler-khorchide–berauscht-von-der-eigenen-macht-,15187246,29515374.html

        huber ke kermanijej wo křesćanstwje: http://www.faz.net/aktuell/feuilleton/buecher/navid-kermani-unglaeubiges-staunen-ueber-christentum-13760295.html (hlej tež čitarske listy)

      • filozof Says:

        Knjez m, wjc tute linki, kotrež sćeleće, žane argumenty njejsu. Dźensa křesćanskich ekstremistow nimamy. To, štož powěda tón Khorchid njetrjechi. Ani pola buddistow njeznaju žanych ekstremistow. Tajke něšto kaž kamjenjowanje a chodojtypalenje dźensa pola křesćanow njedawa. Wobhladajće sej potom prošu staw w islamskich krajach…Kaž sym hižo do toho prajił, je nabožina zło. Socializm je z nabožinu wuběrnje wobchadźał.

  5. TaBeja Says:

    Zo tajke něšto kaž pohanske Słowjanstwo dawa, njejsym docyła wědźała. A w kotrych słowjanskich krajach je tuta nabožina take rozšěrjena?

    • Richard Bígl Says:

      Beja, słowjanscy pohani su žiwi najskerje we wšěch słowjanskich krajach. Jich mjezynarodnej organizaciji njepřisłušeja jenož Běłoruska, Makedonska a Bosniska z Hercegowinu.
      Zadźiwana, na Twoju próstwu sym sej cyły nastawk přečitał. Tebi so prawdźepodobnje politiska dźěławost mojeho sobuwěriweho njespodoba. To je w porjadku, ale zamysli so, hač Twoja cyrkej přikazuje swojim čłonam, kak maja politisce jednać. Dwěluju na tym, zo wona něšto tajke čini.

  6. zadźiwana Says:

    Přečitajće sej prošu dokładnje cyły nastawk…
    http://www.wz-newsline.de/lokales/duesseldorf/nur-noch-80-teilnehmer-kamen-zur-duegida-demo-1.1847036

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: