Archive for September 2015

Za „karuselom“ tči nowy wobraz duchowneho

30. September 2015

W Ralbicach su při rozžohnowanju z fararjom Michałom Nawku „přesadźowanski karusel serbskich fararjow“ – mjez Njebjelčicami, Radworjom a Ralbicami – kritizowali. Zo so wjesna skupina CDU zjawnje z nutřkownocyrkwinskim personalnym rozsudom nasadźuje, je něšto wosebite. So wě, zo njeje so dynamiska mentalita – mjeztym bohužel něhdyšeho – biskopa (a nětko Berlinskeho arcybiskopa) porynskeho pochada wšěm wěriwym w Sakskej lubiła. To je znate. Njedźiwajcy toho je Heiner Koch tež w našim biskopstwje jara woblubowany był – štož zawěsće na jeho wotewrjenosći za njewšědne puće zaleži.

Poddanosć prědować je to jedne. Sam tomu poddany być, kiž sej jako legitimowana awtorita wot pobožneho prědarja něšto žada, z čimž tón ličił njeje, je to druhe. A ćešo. Wosady demokratiske cyłki njejsu, a čim dlěje duchowny na městnje wostanje, ćim bóle je wón kaž mały Bóh tón knjez. Chibazo wón tomu sam jara wehementnje zadźěwa. W starych časach słušeše k cyrkwinskej „zawodnej“ filozifiji, wšěch měšnikow – wšojedne, hač wjesneho fararja abo bamža – kaž małeho Bóha knjeza inscenować. Dźensa pak steji na čole globalneje cyrkwje čłowjek, kotryž stary hesło „słužownik wšěch słužownikow“ jako nowy wobraz swojeho zastojnstwa zwoprawdźa.

Štož we wulkim Romje so započina, so w małej serbskej wosadźe wuskutkuje. Tule njeńdźe wo „karusel“, ale wo nowu teologiju.

Čerstwy wětřik ćěkancow tež Serbam tyje

29. September 2015

Marko Martin, kotrehož sej jara wažu (nic naposledk tohodla, dokelž smój před wjele lětami hižo na podobne wašnje pod njekonformistiskimi wuměnjenjemi publikowałoj), pokazuje w mudrym eseju w aktualnym wudaću nowiny „Die Welt“ na čerstwy wětřik, kotryž ćěkancy do Němskeje přinjesu a mjenuje jako lěpšiny mjez druhim sćěhowace dypki:

  • kónc wostudłych, hižo lětdźesatki trajacych wěčnje samsnych larmoyantnych debatow wo poměrje mjez wuchodom a zapadom w Němskej a nawopak;
  • wutłóčenje wšelakich modowych zjawow pozdatneje politiskeje korektnosće;
  • dynamisku budźacu konkurencu za domoródnu młodu „generaciju maybe

http://www.welt.de/print/die_welt/debatte/article146979612/Frischer-Fluechtlingswind.html

Posaarski nutřkowny minister skedźbnja mjeztym na praktiske problemy z wjele – hišće njeintegrowanymi – připućowarjemi w lěhwach azylantow. Mam přeco za wažne, konkretne wěcki wšědneho dnja chutnje brać. Njedźiwajcy někotrych signifikantnych kulturnych spodźiwnosćow we wobchadźenju ze žonami, kotrymž dyrbja wotwuknyć, wopisuje minister wšelake fenomy, kotrež móžeš tež w kwartěrach masoweho turizma z „křesćanskimi“ resp. „zapadnymi“ ludźimi dožiwjeć.

https://www.youtube.com/watch?v=Lb5juByR_y8

Njech je, kaž je, wužijmy tónle čerstwy wětřik ćěkancow za přewinjenje skóstnjenych strukturow serbsko-němskich debatow we Łužicy:

  • hižo žanu sekundu wo mjezsobnych začućach Němcow napřećo Serbam a nawopak njediskutować a njefilozofować – tysac lět to samsne nětk dosaha;
  • ze žiwjenskim časom za přemyslowanje wo pozdatnych serbskich kompleksach mjenjehódnoty hižo njebrojić, štož jenož optimizmej zadźěwa;
  • město kumštneje „dwurěčnosće“ jasne serbske awtochtone zjawne rumy pěstować – z poskitkami za rěčny přistup němskich, syriskich a dalšich migrantow.

Martin cituje Heinricha Heine: „Ein neues Lied, ein besseres Lied, o Freunde, will ich euch dichten.“ To rěka po přikładźe mnohich připućowarjow: Wjac pragmatizma, fleksibility a wole k rozwiću dale a witalnišeho a sebjewědomišeho towaršnostneho žiwjenja. Štož je Martinej wupuć z „längst stagnierendem deutsch-deutschen Dauergespräch“, móžemy na projekt přewinjenja serbskeje a němskeje stagnacije we Łužicy přenjesć.

Naměstnik krajneho rady woteńdźe – přichodnje mjenje problemow ze šulerskim transportom?

25. September 2015

Steffen Domschke njeje jako přećel Serbow znaty – starši mějachu dosć problemow z rozestajenjemi wo kóštach za šulerski transport, hdyž chcychu swoje dźěći na dobru serbsku šulu słać. Nětkole wón woteńdźe:

http://www.sz-online.de/nachrichten/vize-landrat-hoert-auf-3207908.html

 Jeli chce wokrjes skónčnje swojemu imageej jako dwurěčny, wšelakory… atd. (dalše blabla-zapřijeća prošu jara wólnje wudospołnjeć) wotpowědować, dyrbja serbscy starši samostatnje rozsudźić směć, kotra je najbliša so hodźaca serbska šula. Bjez dalšeho nerwowanja, listowanja, wuradźowanja a njetrjebawšich kokanjow.

Serbska awtonomija njeje z blida – abo? Što praji nam herbstwo Jurja Rjenča w krizy EU?

24. September 2015

Wčerawše smjerćzajimawe telewizijne wusyłanje http://www.mdr.de/ahnen/spur-der-ahnen-stalin-tito-und-mein-vater100.html MDR sej wobhladawši – zapłać Bóh Timej Meškankej, Edmundej Pjechej a Benediktej Cyžej za wuslědki slědźenjow –, nětkole wěm, kotry by teritorij serbskeho stata był – 6.242 kwadratnych kilometrow. Hlejće mapu na wonej internetnej stronje.

Tehdom běchu tři scenarije:

a) swójski serbski stat

b) přizamknjenje Čěskosłowakskej

c) awtonomna prowinca Němskeje

Po rozprawje je tehdomniša Domowina zhromadnje z načolnymi funkcionarami SED tutej narodnej emancipaciji zadźěwała. Němcy pak dyrbjachu potom z prěnim serbskim zakonjom a w nim zakótwjenymi prawami Serbow małemu ludej w stawiznach dotal jónkrótne připóznaće dać. To bě takrjec politiska płaćizna za zapřijeće Serbow do wuchodneje Němskeje.

Před lětomaj stejachmy na rozpuću mjez

d) serbskim sejmikom

e) posylnjowanjom třěšneho zwjazka.

A hłowna zhromadźizna Domowiny je so za e) rozsudźiła – a) do c) njeběchu hižo pódla.

Dźensa pak wosrjedź krizy EU a po wostrózbnjacych dožiwjenjach z wotpokazanjom „Minority Safepack iniciatiwy“ europskeje wobydlerskeje iniciatiwy za mjeńšinowe prawa a zaso bjezkónčnej ćahańcy dokoławokoło přichodneho bugeta Załožby za serbski lud wostanje prašenje za najefektiwnišimi srědkami zastupowanja serbskich zajimow dale aktualne. Přeco w krizowych časach – po 1918, 1945 a 1989 – su Serbja nowe opcije narodneho zjawneho žiwjenja wuspytowali. Potajkim je dźensa zaso najwjetši čas.

Jurij Rjenč bu wot swojetskeje tajneje słužby swojeho angažementa za njewotwisne Serbstwo dla přesćěhany. Tema serbskeje awtonomije njeje wothóčkowana. „Serbski sejmik“ sym tohodla wotpokazał, dokelž by wón faktisce němski regionalny parlament ze serbskim razom był, potajkim něšto hybridne. Što pak je prawa načasna konkluzija z Rjenčoweho skutkowanja – snadź horjeka mjenowani stawiznarjo to wědźa.

Abo maja woni prawje, kotřiž twjerdźa, zo su Serbja mjeztym mrějacy lud? Potom wězo njeby nihdźe dosć mocow za kulturne a kubłanske strategije awtonomije było. Abo su Serbja sydomdźesat lět pozdźišo prosće přemało ludźi za tajkule emancipaciju wot wjetšiny? Abo to hižo docyła měć nochcemy, dokelž bychmy so bjez Němcow mjez sobu na čuwy šli? Abo je w dobje tworjenja syćow „awtonomija“ tak a tak wopačny zaměr?

Benedikt Cyž wo temje z Rozhledźe 10/2011

http://www.rozhlad.de/nastawk_135.html

Tajny plan: Serbska republika / A dźensa?

23. September 2015

Dźensa w 21.15 hodź.:

http://www.mdr.de/tv/programm/sendung577826.html

„Bisher ist das Kapitel der Sorbischen Republik ein nahezu weißer Fleck in der europäischen Geschichtsschreibung, dabei wären etwa zwei Prozent Deutschlands abgetrennt worden und zu einem neuen Staat in Europa geworden. Der Reichtum an Braunkohle hätte möglicherweise den Sorbenstaat zu einer zweiten Schweiz werden lassen.“

 Budźemy sej to woměrje wobhladować a widźeć, kotre konkluzije za dźensniši čas sćahnyć móžemy. Snadź dawa so składnostnje tuchwilneje krizy EU něšto za Serbow nachwatać… 🙂

Myto Domowiny Wernerej Thomasej, Reinhardtej Schneiderej, Zali Cyžowej, Měrce Kozelowej a Frycej Wojtej – to su lětuši lawreaća (2015)

22. September 2015

NOWINSKA INFORMACIJA

Domowina spožča wuznamjenjenja

Mytowanski wuběrk Domowiny je nětko wozjewił lětušich lawreatow Myta Domowiny a Čestnych znamješkow Domowiny. Wuznamjenjenja přepodadźa předsyda Domowiny Dawid Statnik a mytowanski wuběrk pjatk, dnja 9. oktobra, 17 hodź. w Budyskim Serbskim domje.

Myto Domowiny 2015 spožča so Wernerej Thomasej a Reinhardtej Schneiderej z Łaza, Zali Cyžowej z Chrósćic, Měrce Kozelowej ze Stróže a Frycej Wojtej z Hochozy.

Čestne znamješko Domowiny 2015 dóstanu: Heidemarie Listowa z Čorneho Chołmca, Hanka Šwejdźina z Miłoćić, Stephanie Bierholdtec ze Slepoho, Klaus Antonius z Trjebina, Janina Krygarjowa z Wuježka, Borbora Kralowa z Budyšina, dr. Fabian Kaulfürst z Pančic-Kukowa, Martina Kalcowa z Choćebuza, Richard Krawc z Barbuka a Jörg Maznik z Choćebuza.

Myto Domowiny w tutej formje bu prěni raz w lěće 1990 spožčene; Čestne znamješko Domowiny přepoda so prěni raz w lěće 1959.

Wustawki Myta Domowiny a porjad k spožčenju Čestneho znamješka Domowiny su wozjewjene pod http://www.domowina.de/hsb/domowina/wuberki/mytowanski-wuberk.

Žurnalisća su na wuznamjenjenske zarjadowanje dnja 9. oktobra w 17 hodź. w Budyšinje wutrobnje přeprošeni. Prosymy pak wo přizjewjenje hač do 6. Oktobra (telefonisce pod čisłom 03591 550-217 abo z abo e-mailku: mo.mueller@sorben.com, wutrobny dźak.

Borbora Felberowa, nowinska rěčnica

Serbske stawizny jako zběrka wobrazow

22. September 2015

stawizny_wobrazy1stawizny_wobrazy2

Što dyrbi dźensniša młodźina móc? Trěć a dypać – tak citowaše njedawno mój něhdyši stary wučer za staćanowědu, štož rěkaše w zapadźe wěda wo zhromadnosći, młodu wučerku hladajo na potrjeby generacije, kotraž je ze smartfonom wotrostła. Dale a wažniše su w tutym swěće wobrazy, a ćim bóle zwjeselace je nětkole předležace zjimanje serbskich stawiznow do 160 wobrazow. 🙂

Słowjanski profil – pasion

21. September 2015

Cyril

Pasion w Chrósćicach dožiwiwši zwěsćam: Tamle su woprawdźe potomnicy Cyrila (na wobrazu) a Metoda na jewišću skutkowali. Z nabožnym duchom a słowjanskim razom. Dobre a přirodne serbske wurěkowanje – štož w powołanskim serbskim wuměłskim wobłuku ze standardom bohužel njeje – je přihladowarjam domiznu posrědkowało. Zapłać Bóh wšěm, kotřiž su (tež) lětsa na tutym wusahowacym projekće wobdźěleni byłi.

pasion

Wuslědki posedźenja zwjazkoweho předsydstwa

20. September 2015

09-19 Z POSEDZENJA ZP Domowiny1

Z 2plus po puću do analfabetizma

19. September 2015

Na cedlce widźiš rěčny "niwow" 6. lětnika serbskeje šule. Jako přirunowanje stronu z němskeje knihi, kotruž w Budyskej kniharni za dźěći wot 10 lět poruča.