Móc wopačnych wobrazow

K tomu:

http://www.jak-se-rekne.cz/arabsky/

Dźensa su wobrazy wšudźe rozsudne, hač w towaršnosći abo w politice. Tak je najnowše – w medijach citowane – wopodstatnjenje kanclerki za njejapke přiwzaće syriskich ćěkancow z Madźarskeje, zo chcyše wona po špatnych wobrazach z Heidenaua w mjezynarodnej zjawnosći rjeńše wobrazy tworić. Te maja wězo tež sćěhi, a tak sćele němske knježerstwo z kontrolemi a policiju na statnych hranicach zaso hinše wobrazy do cyłeho swěta.

Wobrazy pak su swójska realita. Pozdatnje najhubjeńše wobrazy z Madźarskeje běchu poprawom dopokaz za nachwilnje lochšo wužiwajomne puće, wšako běše wjele swójbow z małymi dźěćimi widźeć. Hdyž staj so na přikład Chróšćan syrisko-kurdiskaj koparjej na zapadobalkanskej čarje loni do Němskeje podałoj, njeby to móžno było – mjez druhim kruće kontrolowaceje policije w Serbiskej dla. Tohodla su tehdom tež swójbni nanojo sami ćekli, so nadźijejo, zo móžu po připóznaću azyla žonu a dźěći na mjenje strašnym puću (z lětadłom) za sobu ćahnyć dać.

Po zawrjenju hranicy mjez Madźarskej a Serbiskej pytaja ćěkancy nowe – dale a strašniše – puće do srjedźneje Europy. Hdyž potom zaso prećežko a přestrašne bywa, móžemy nawrót k horjeka mjenowanemu modelej dožwijeć – wězo bjez telko dramatiskich wobrazow…

Serbja so wo aktualne wobrazy wo sebi po cyłym swěće njestaraja. Tohodla wostanu wěčnje jejkamolowace žony w narodnej drasće a pobožni křižerjo. Je to pak woprawdźe „wěrny wobraz“ wo Serbach?