Serbja radšo z Kurdami hač z Danami – murju mjez awtochtonymi a nowymi spotorhać!

Awtochtone mjeńšiny w Europje hižo dawno woteběraja – po ličbje jim přisłušacych ludźi – a allochtone mjeńšiny dale a bóle přiběraja. Móžu so na diskusiju dźěłoweho zjednoćenstwa „etniske mjeńšiny“ Lěwicy před wjac hač dźesać lětami w Budyšinje dopominać. Tehdom pledowaše stary sorabist L. za prawo tych wjac hač sto ludowych skupin na přikład w němskej stolicy, pěstowanje maćeršćiny jich dźěći wot statneho kubłanskeho systema zaručene dóstać. Mam to za iluzoriske. A tutu jara radikalnu poziciju wjetšina přitomnych přewzała njebě.

Najebać to je najwjetši čas za wotewrjenu diskusiju wo móžnej změnje strategiskeho wusměrjenja mjeńšinoweje politiki. Lobby-dźěło za awtochtone mjeńšiny ma pola wjele zwonkastejacych image wojowanja wo statnje podpěrane konserwowanje prastareje tradicije, kotraž je wot načasneho žiwjenja wohrožene. Zastupjerjo allochtonych mjeńšin skutkuja porno tomu doprědkarscy (tež hdyž woni to w jednotliwym padźe wosobinsce docyła njejsu), dokelž posrědkuje migracija wobraz dynamiki a towaršnostneho wuwića. Mnohotnosć wobsadki płaći jako garant za hospodarski wuspěch w globalnym swěće a kulturnu kreatiwitu.

Tohodla pleduju, kaž prajene, za nowe aliancy (z tym wězo dotalne zbytne njejsu!). Kurdojo na přikład jako – runja Serbam – lud bjez swójskeho stata maja nimale we wšěch swojich sydlenskich rumach problem, zo dźěći swoju maćeršćinu pisać njenawuknu. Hišće hórje, je wjele kurdow, kotřiž swoju rěč docyła porjadnje njewobknježa. Z toho móhli zhromadne mjeńšinopolitiske strategije nastać. Tule je snadź přichodnje wjac praktiskeje zhromadnosće na kubłanskim polu móžno hač z Danami w Šleswigsko-Holsteinskej (kotřiž su njedźiwajcy toho jara sympatiscy ludźo), kiž maja swojeho statneho kmótra před wrotami.

Porno zmužitej imigraciskej strategiji kanclerki Merkelec, kotruž aktualne wudaće tydźenika „Čas“ z „radšo přepisane hač přestare“ wopisuje (wobnowjenje stareho křesćanskeho Němcowstwa z młodymi muslimskimi připućowarjemi), přewažuje w Serbach strach před wotcuzbnjenjom. A zo je snadź lochšo, ludźi z připućowacych a rěčnje fleksibelnych etniskich mjeńšin do Serbow integrować hač jednorěčnych Němcow, njeje w našich wěčnje samsnych degenerowanych diskursach předwidźane. To je smjerćškoda, přetož je to najskerje poslednja šansa serbskeho ludu.

Wotewrjenosć wuknyć:

http://www.zeit.de/2015/38/berliner-erzbischof-heiner-koch-interview

Ćěkancy a serbska rěć – komentar Bena Bělka w Serbskim rozhłosu:

http://www.mdr.de/serbski-program/rozhlos/aktualne-prinoski/audio1282066.html

Eine Antwort to “Serbja radšo z Kurdami hač z Danami – murju mjez awtochtonymi a nowymi spotorhać!”

  1. Horjanski Says:

    Na tutych degenerowanych diskursach su drje ći wěčnje wčerawši wina, kiž so jako Słowjenjo čuja. Dokelž je tučasnu Europu dominowacy stat ze Slowjanami přeco hižo wjetše a mjeńše problemy měł, móhło so stać, zo wón tutu wot Piwarca faworizowanu „poslednju šansu serbskeho ludu“ zahoriće chwali a podpěruje. Tak by jedyn tajki mały problem spěšnišo wotbył.

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: