Žani dobri susodźa – zhromadne stejišćo z IS za zadźěwanje susodstwu křesćanow a muslimow?!

„Budźće dobri susodźa“ – to bě namołwa Jana Bělka po swojim multimedialnym koncerće pod hesłom „zynki barbow“ sobotu w Njeswarskej ewangelskej cyrkwi. Wón je – hlej tež připowědź w tutym blogu – (na jara radźene wašnje) zhromadnje z Berlinskim percusionistom Peerom Trieblerom z wobšěrnej zwukowej techniku a projekcijemi swěcy zajimawy meditatiwny wuměłski cyłk tworił. K tomu słušachu tež mólby Bělkoweje dźowki Caroliny Eyckec. Bělk (SERVI) dźakowaše na kóncu Holešowskim azylantam ze wšelakich krajow za jich pomoc při přihotowanjach.

Zo sedźa snadź přichodnje na tutej ławce při pomniku Cyrila a Metoda

Cyril_Metod

křesćenjo a muslimojo hromadźe, je wočiwidnje z wida wjele ludźi horor-scenarij. Měrko Domaška, předsyda zarjadniskeho zwjazka Při Klóšterskej wodźe, je – hlej wčerawši artikl w Serbskich Nowinach – po wuradźowanju nawjedowacych komunalnych politikarjow we wokrjesu z krajnej radu wo zaměstnjenju ćěkancow na strachi w ludnosći pokazał a přispomnił, zo njemóžemy na tym wobstać, jenož křesćanskich ćěkancow přiwzać (štož je potajkim po měnjenju – koho? – problem). Zdobom je wón napřećo rozhłosej na to skedźbnił, zo njeńdźe wo ličby, ale čłowjekow.

Jeho připowědźenje dalšich wuradźowanjow w zarjadniskim zwjazku bě pak bohužel zaso jenož njezawjazowaceho razu. Derje, hdyž nochcedźa pozdatnje křesćanscy ludźo z muslimami hromadźe być, maja bytostnu zhromadnosć z IS („islamiski stat“), za kotrehož wojowarjow je tohorunja jasne, zo zhromadnu towaršnosć muslimow a křesćanow wotpokazuja. To by potom zhromadna nabožno-politiska platforma zarjadniskeho zwjazka a islamskeho stata była: zadźěwanje nabožnej mnohotnosći. To je bjez polemiki prajene, ale w přiwótřenej globalnej situaciji dyrbiš so rozsudźić.

To jej rozeznawa wot ludźi kaž – muslimskeho – syriskeho koparja w Chrósćicach, kiž je před islamistami ćeknył a hač do dźensnišeho wobraz z tortu na smartfonje schował, kotruž su woni – muslimscy konditorojo – za křesćanski kwas sčinili, scomter wšelakmi křesćanskimi znamješkami. Je dowolene na wědomje brać, zo su w jich domiznje muslimojo a křesćenjo lětstotki dołho měrnje hromadźe žiwi byli, doniž njeje so region pod wliwom Saudi-Arabskeje – kotrejž zapadny swět (a Sakska) z hospodarskich přičin politisce hołdujetej, kaž bě hakle tele dny w mudrej analyzy korespondenta w Sakskich Nowinach čitać – nabožnje radikalizował.

Ale snadź ma Alojs ze swojim komentarom k poslednjemu přinoškej prawje: Nětko so najskerje něšto hiba, dokelž hrozy hewak sćazanje sportownjow – to pak je poprawom tež wohańbjace, zo křesćanske hódnoty njeskutkuja, ale jenož statny ćišć. To by moraliska kapitulacija zarjadniskeho zastupnistwa teritorija katolskeho Serbstwa była.

Wo naležnym apelu kraneho radu na komuny, při zaměstnjenju ćěkancow pomhać:

http://www.mdr.de/serbski-program/rozhlos/powesce/powesce2884.html#anchor1

Rozprawa Serbskeho rozhłosa wo zetkanju krajneho rady z wjesnjanostami a měšćanostami:

http://www.mdr.de/serbski-program/rozhlos/aktualne-prinoski/audio1316300.html

Namócne blokady a prawicarske masowe protesty w Freibergu:

http://www.mdr.de/mediathek/fernsehen/a-z/sendung594210_letter-M_zc-6932cf5d_zs-dea15b49.html

5 Antworten to “Žani dobri susodźa – zhromadne stejišćo z IS za zadźěwanje susodstwu křesćanow a muslimow?!”

  1. filozof Says:

    Piwarco, na tutej ławce njebudźe muslimska žona ženje při njeznatych muslimskich abo křesćanskich mužach sedźeć, nic dokelž to křesćenjo njechaja, ale dokelž sej to muslimojo sami přeja. A jeli to čini, potom njeje to prawa wěriwa a wěmy wšitcy, što so w tajkich padach stawa.
    Wjeselu so, zo připóznawaš rólu čertowskeje Saudi-Arabskeje.

    Njerozumju, što je za tebje wohańbjace. Praj mi, štó njepřeprošenych hosći chce?
    Časy CDU su nimo a bohužel stej PEGIDA a AFD dźeń a sylnišej.

    • piwarc Says:

      To je akademiski, nic realistiski wid. W Holešowskim domje za azylantow sym sam dožiwił, kak je starša muslimska žona, kotrejž sym přeco bjez problemow ruku dał (hačrunjež to w jeje prjedawšej domiznje tež z wašnjom njeje), na špundowanju sedźo a kurjo (!) z třiceći lět młódšim „cuzym“ mužom (syriskeho pochada) wječor bjesadowała. Porno twojemu abstraktnemu tukanju tajke žone wědźa, „zo je tule Němska, nic Syriska“ 🙂 . Cyle wothladajo wot toho, zo maš samo tamle „open minded“ ludźi, kaž je mi to syriski lěkar rozkładł, to su – tež muslimscy – ludźo, kotřiž su w Syriskej žiwi runja „zapadnemu swětej“. Hdyž woni k nam přińdu, je tak a tak lědma transormacija trěbna …

  2. nyča Says:

    Dawa tajkich a hinašich muslimow. Sam sym jako młody wukrajnik žno husto dosć z muslimskimi žonami rěčał, bjeztoho zo by něchtó problemy z tym měł. To wězo w Sawdi-Arabskej njebě, ale wottam tež lědma ludźo k nam přińdu.

  3. filozof Says:

    Ně, Piwarco, mój wid je realistiski. Na jednym boku je cyle derje, zo pomhaš, ale na tamnym je to kał a najskerje ma twoja pomoc wjetše njelěpšiny hač lěpšiny. Snano su syriscy ćěkancy „open minded“, kaž prajiš, ale wulki podźěl ćěkancow z Afganistana, Somaliskeje, Eritreje a zdźěla ze Syriskeje słuša do tamneje skupiny. W tutych krajach je kubłanje na jara niskim niwowje. W tutych krajach wulku bědu dawa. A tohodla budźe tutym ludźom HartzIV dosahać. Znamjeńša na spočatku, dokelž je to za nich wjele pjenjez… Čłowjek, kiž njeje wjele pjenjez měł, budźe z HartzIV spokojom a njebudźe so polěpšić chcyć. Z tym njebudźe wón motiwaciju k wuknjenju němčiny měć. Ty njejsy najskerje přinoški wo njemotiwaciji ćěkancow k wuknjenju westeho rjemjesła čitał. Woni njechaja so kubłać dać. Woni hnydom pjenjezy chcedźa. Njechaja za pjekarja, za wodźerja wuknyć, ale chcedźa dźěłać abo chcedźa wulke pjenjezy dóstać (tak kaž je jim to Mutti Merkel slubiła), hačrunjež žane słowčko němsce njemóža. Nichtó njebudźe tutych njemotiwowanych přistajić, dokelž woni němsce njenawuknu. A tež hdyž nawuknu, njebudźe lochko. Naprašowanje rjemjeslnikow pola SN bě jara róžojte. Najskerje je wotmołwa poslednjeho rjemjeslnika woprawdźitej situaciji najbliša. Ja sym sej cyle wěsty, zo to tak budźe. Dopokaz toho su Turkojo w Němskej. W Němskej dawaše hižo do azylantskeje krizy wažny podźěl Turkow, Kurdow atd., kiž němsce njemóže.

    Njelubi so jim jědź, njechaja w składźišću dźěłać. Merkel je bajkojty swět z Němskeje stworiła, hdźež wšudźe po dróhach pjenjezy namakaš, kiž woni bohužel njedóstanu a dokelž su to wulke kopicy přesłapjenych ludźi, dóńdźe k masowej frustraciji, haj samo k wobydlerskej wójnje.

    Wjele tych ludźi njeje ćěkancow, ale migrantow. Prawy ćěkanc, kiž so wo swoje žiwjenje boji, so jako parazit w nowym kraju njezadźerži.

    Někotři Turkojo su hižo 40-50 lět w Němskej žiwi, ale němsce njemóža. Tak budźe tohorunja tutymi ludźimi, znajmjeńša z wjetšinu a dokelž změja woni tak wjele dźěći kaž prjedy, budźe so jich swětonahlad šěrić…

    Tak derje čłowjesku psychologiju, Piwarco, njeznaješ.

    Nyča, haj, dawa tajkich a hinašich muslimow, tajkich a hinašich křesćanow. Problem je jenož, zo njemóžemy jich rozeznawać a ći „hinaši muslimojo“ kamjenuja a machetty wužiwaja. Tajke něšto wot křesćanow a buddhistow w poslednim času widźał njejsym.

    • piwarc Says:

      Sym to wšo čitał, tež wuprajenje sakskeje kultusoweje ministerki: Přichadźacy ludźo, kotřiž su wot 14 lět w swojim žiwjenju zwučeni na dźěło chodźić, maja so ćežko z tym rozumić, zo dyrbja jako dorosćeni hišće wjele lět w kubłanišćach pobywać. Wobhladaš-li sej běrokratiske haćenje na polomaj kubłanja a přistupa do dźěłowych wikow, pytnješ, zo ma Němska hišće hobeerske rezerwy, „připućowanju do socialneho systema“ zadźěwać, kotež poptrjecheni poprawom sami nochcdeźa, wšako njewotpowěduje jich kulturnemu sebjezrozumjenju. Rjemjeslniska komora w Lipsku na přikład poskićuje hižo wot spočatk lěta (!) 30 wukubłanskich městnow za azylantow a njemožeše hač do dźensnišeho ani jeničkeho wučominika přewzać, dokelž njemóžeštej so dźěłowe a socialne ministerstwo w Sakskej na prawniske wuměnjenja dorozumić. 😦

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: