Archive for November 2015

Pólska wójna z ćěkancami

17. November 2015

Ma kóždy lud woprawdźe knježerstwo, kotrež je sej zasłužił? Potom by z Polakami tuchwilu špatnje wupadało. Jich wonkowny minister chce syriskich ćěkancow jako wojakow do Syriskeje do wójny pósłać:

 http://www.focus.de/video/politik/nach-wahlsieg-der-rechtskonservativen-in-polen-neuer-polnischer-aussenminister-fordert-fluechtlingsarmee-fuer-syrien_id_5089874.html

 Tamle pod wliwom wonkownych mocow kaž wot zapadneho swěta z hospodarskich přičin přeco připóznateho radikalnoislamistiskeje Sawdi-Arabskeje, ale tež Irana, Ruskeje, USA a Turkowskeje wojuja tuchwilu a) armeja diktatora Assada, kotrehož tajna policija je masy ludźi moriła, doniž njeda mjeztym cyły města bombardować, b) „islamski stat“, kiž na jara nazorne wašnje ludnosć terorizuja, ale snadź dotal w Syriskej samej z mjenje woporami hač Asad, c) wšelake tohorunja mjenje abo bóle islamistiscy rebelojo, d) kurdiscy wojowarjo, kotřiž maja Assadowemu wójsku a turkowskim atd. bombam wobarać.

 Kotru strategiju ma tónle knjez nětk z wonymi młodymi mužemi nimo přeća, jich do smjerće pósłać? Křesćanska politika … Słowjanska solidarita – z tajkimi ludźimi kaž z tutym ministrom ŽENJE!

 

Serbska murja – we hłowje a w realiće

16. November 2015

„Limes Sorabicus“ https://de.wikipedia.org/wiki/Limes_Sorabicus – hranica mjez Serbami a Němcami – je tysac lět nimo. Ale nětko w lěće 2015 chcedźa někotři, hdyž jich komentary k terorej a ćěkancam čitaš, nowu murju wokoło Serbow twarić (njedźiwajcy toho, zo je dosć strašnych „spancow“ dawno w Europje a zo woni syriski pas jenož za diskreditowanje muslimskich ćěkancow trjebaja). Murju nic přećiwo nošerjam germanizacije wosebje serbsekeje rěče, ale přećiwo ćěkancam, kotřiž su před terorom islamistow ćekli.

serbska_murja

Zarjadniski zwjazk tak a tak „murjuje“, garněrowane wot zjawnje zwuraznjenych „wobmyslenjow“ ludnosće z erta knjeza Domaški (w hamtskim łopješku krajnoradneho zarjada citowanych): „Vermischung der Konfessionen“. By rjenje było, hdyž byšće bóle na swjateho wótca poskali, ale to je wočiwidnje přewjele žadane.

Serbski sakski ministerski prezident warnuje na stronskim zjězdźe křesćanskeje (!) strony před „unkotrolliertem Familiennachzug“, kotremuž dyrbjeli hnydom zadźěwać. Směm tuchwilneho prezidenta zwjazkoweje rady na jara kontrolowane zakonske regule Němskeje w tutym nastupanju dopomnić: Směš mandźelsku a dźěći za sobu „ćahnyć“ dać. Chce katolik Tilich dołhodobnje swójby pačić? Kotry zakład mamy za to w zakładnym zakonju (škit swójby?) a w swjatym pismje? Wšo wšojedne, „wobmyslenja“ wobydlerjow …

Bych nětko wězo jako i-dypk naspomnić móhł: Po mojich praktiskich nazhonjenjach su „sami jěducy mužojo“ najlěpje integrujomni, přetož su bóle njewotwisni wo kulturnych kaznjow swójby. Ale přećiwo młodym muslimskim mužam, kotřiž su so sami na puć podali, su samsne konserwatiwne kruhi hižo měsacy dołho škarali. kotrež chcedźa so nětko wo to starać, zo tež ći, kotřiž samostejacy njejsu, bjeze swójbnych sami wostanu. To je zawěsće genialny přinošk je nutřkownemu měrej w Němskej a psycholgisce na niwowje moderneje doby?! Wšo wšojedne, „wobmyslenja“ wobydlerjow. A štó ma hišće kruty rjap?

Sy ty „Smombie“ – što je twój namjet za słowo lěta serbskeje młodźinskeje rěče?

16. November 2015

http://www.welt.de/kultur/article148804754/Nichts-da-merkeln-Smombie-ist-Jugendwort-des-Jahres.html

 Jury Langenscheidtoweho nakładnistwa je „smombie“ k „němskemu“ słowa lěta młodźinskeje rěče wolił – jako pomjenowanje ludźi, kotřiž jenož hišće na smartfon wudźěraja a při tym na cyły wobswět zabywaja. Jury słowo lěta serbskeje młodźinskeje rěče sy tež –ty! Potajkim pisaj namjety!

Klětu 750.000 euro wjac za serbšćinu w digitalnych medijach – online serbsce wuknyć

13. November 2015

http://www.freiepresse.de/NACHRICHTEN/SACHSEN/Mehr-Geld-fuer-Sorbisch-in-digitalen-Medien-artikel9355567.php

Serbscy a syriscy wupućowarjo – šicofrene posudki a njesprawne měritka

13. November 2015

Tuchwilu je zaso jónu wjele nastawkow wo serbskich wupućowarjach a jich potomnikach na wšelakich kontinentach. W tutym zwisku je w rozprawnistwje wosebje wažne, kak dołho su serbsku rěč zdźerželi, kelkow našich nałožkow dźensa hišće pěstuja, hač styki do stareje domizny wudźeržuja a hač je w nowej domiznje hišće něchtó, kiž hišće serbsce abo znajmjeńša němsce móže.

Tući wupućowarjo běchu po dźensnišich měritkach ludźo, kotřiž su z hospodarskich přičin a wěsteje njespokojnosće z towaršnostnymi poměrami swój kraj wopušćili. Woni wotpowědowachu někak dźensnišim ćěkancam z Kosova, kotrychž Němska wróćo sćele. Serbscy wupućowarjo mějachu zbožo, zo njeje w krajach jich žedźby žadyn zarjad za migraciju jich zaměstnjenju zadźěwał.

Dźensa je wšo hinak: Běda syriskej arabskej žonje, kotraž prěni dźeń w Něsmskej hišće njeje sobu dóstała, zo smě / dyrbi tule tež cuzym mužam ruku dać. A Syričenjo, kotřiž so třeći dźeń hišće kaž přerězny rodźeny Němc njezadźerža, su podhladni, zo nimaja dosć zwólniwosće ke spěšnej integraciji. Porno serbskim wupućowarjam su woni wójnje wućekli. Ale měritka jim napřećo su njesmilne.

ZP wo zaměstnjenju ćěkancow w Serbach, wutworjenju serbskeje rěčneje rady atd.

12. November 2015

NOWINSKA INFORMACIJA

Přeprošenje na posedźenje Zwjazkoweho předsydstwa Domowiny

Přichodne posedźenje Zwjazkoweho předsydstwa Domowiny wotměje so sobotu, dnja 21. nowembra 2015, w 9.30 hodź. na žurli Serbskeho doma w Budyšinje, Póstowe naměsto 2.

Na dnjowym porjedźe steja mjez druhim:

−      plan dźěławosće zwjazkoweho předsydstwa hač do 18. hłowneje zhromadźizny Domowiny 2017,

−      rěčne naprawy a wutworjenje serbskeje rěčneje rady,

−      stejišćo Domowiny k zaměstnjenju ćěkancow w serbskim sydlenskim teritoriju,

−      informacija k zarjadniskej strukturnej reformje 2019 w Braniborskej a

−      informacija wo wuslědkach diskusije k přichodej Serbskeje kulturneje informacije w Budyšinje.

Wšitcy zajimcy su na zjawny dźěl posedźenja wutrobnje přeprošeni. Dnjowy porjad namakaće w přiłoze a za dalše prašenja stejimy Wam rady k dispoziciji.

Přećelnje strowi Was

Borbora Felberowa

nowinska rěčnica Domowiny z. t.

„Sejmik“ a Domaška w paralelnym swěće

12. November 2015

K „Bazowa abo direktna demokratija?“ Měrćina Wałdy w aktualnym Rozhledźe:

Dyrbimy „tradicionalny statny paternalizm (…) do prašenja stajeć“ a jón hnydom za swoju ideju wužić, dokelž ma wón „demokratisce legitimowanu rěčnicu Serbow (n. př. parlament) załožić.“ Potajkim wot horjeka. Komuž tón přećiwk njedosaha, dóstanje hišće to: Na jednym boku „ludowe knježerstwo“ w direktnym zmysle słowa, na druhim boku warnowanje před „tyranstwom wjetšiny“. To wšo na zwučene wašnje awtora přeco z citatami wažnych wosobinow wšelakich dobow.

Wróćo ke realiće zwonka tuteje jara specielneje dialektiki: Měrćin Wałda je zwěsćił, zo „zajim a angažement za serbsku kulturu (…) razantnje woteběra“. Hladajo na bjezkónčnu lisćinu jeničce w prezidiju Domowiny z próstwami kulturnych skupin wo podpěru jich wulkotnemu angažementej so prašam, hdźe je wón žiwy. Snadź w paralelnym uniwersumje předsydy zarjadniskeho zwjazka Při Klóšterskej wodźe.

Měrko Domaška podpěruje sejmik (hlej SN wo jich poslednim posedźenju w Njebjelčicach) a wojuje přećiwo ćěkancam. Wón słuša k awtoram / iniciatoram zjawneho lista wjesnjanostow kanclerce, w kotrymž dźe wo „hereinbrechende Flüchtlingsströme“. To něchtó piše, kotrehož zwjazk pjeć gmejnow hač do dźensnišeho oficielnje ani jeničkeho ćěkanca přiwzał njeje. Tuta surealistiska politika wotpowěduje někak niwowej katechizma sejmikarskeho hibanja w aktualnym Rozhledźe na stronach 9 do 17.

Bobak „identitu“ w Serbach prošu pohrjebać – doba moderneho wuznawanskeho terora je nimo

11. November 2015

Čuješ so poprawom jako Serb, byrnjež so jako Němc narodźił? Tute prašenje runje tak nerwuje kaž přećelnje měnjeny zajim napřećo němskemu staćanej z – pozdatnje widźomnym – migraciskim pozadkom, „zwotkel poprawom přińdźeš?“

Bobak „identita“ je lěto a wjetše brěmjo za socialne žiwjenje. Nichtó tomu wućeknyć njemóže. Młody Syričan dyrbi wězo nastajnosći na prašenje wotmołwjeć: „Sy ty muslim?“ Na to z akcentowanej zdwórliwosću: „Haj.“ Ja to chutnje bjeru a dale nerwuju: „Wěriš do boha?“ Nětkole pak je wón woprawdźe nerwowany: „Ně, wězo nic!“

Tajke po wšěm zdaću paradoksne wotmołwy dóstawaš hdys a hdys tohorunja w rozmołwje z domoródnymi křesćanskimi wěriwymi, kotřiž priwatnje přidawaja, zo čim mjenje wěrja, ćim starši woni su, ale ćim bóle kemšichodźenje jako kulturny (!) stołp zhromadneje serbskeje identity pěstuja a zakituja.

A tak maš němcowacych ludźi, kotřiž sebje samoho „Serba“ mjenuja, derje serbowacych němskeho pochada, kotřiž so njedźiwajcy toho jako Němc čuja porno druhim w samsnej biografiskej konstelaciji, kotrymž je samozrozumliwje, Serb być. Nó a? Je tak a tak wšojedne, što ja wo sebi myslu, rozsudne je, za koho mje druzy ludźo maja.

Ja mam po měnjenju Jurja Ł. obodritsku mentalitu, wuznawam so k połobjanskemu pochadej, njezabudu pólskeju staršeju maćerje, wězo tež nic hanseatiske młode lěta a westfalsku hejatosć nanoweho přiwuznistwa. Njejsym w Hamburgu ženje reflektował, hač sym Němc. Tohodla nětkole njereflektuju, hač sym Serb.

Mi je Chróšćan serbski raz młodostnych sympatiski, kotřiž su po přepytowanjach čěskeho profesora Šatavy samozrozumliwje jako Serbja žiwi, bjez wědomneho wotmjezowanja wot Němcow. „Identita“ je parodk w zwisku z narodnym hibanjom 19. lětstotka, duchowna kolateralna škoda. To potrjechi narodnosć, nabožnosć – a seksualnosć. Zakonsce zakótwjene chłostanje homoseksualnych aktow a nawopak politiske wojowanje wo připóznawanje tutych formow pochadźatej z woneje doby.

Industrializacija je tradicionelne struktury ničiła a jako wurunanje za nětko njepřewidźomny globalny swět ludźom primitiwne katalogizowanje poskićała. Čłowjek, jako podobizna Boha runja swojemu njebjeskemu knjezej – stworićelej powołany, prosće „Ja sym tón, kiž ja sym“ prajić, je w modernje nuzowany, přeco zaso někajke dźělne aspekty eksistency zabsolutizować. Tohodla praju: Witajće k nam do postmoderny, zabudźće modernu, přetož je tež doba stareje industrije scomter starym myslenjom nimo!

W starej modernje je wězo dramatiske prašenje, hač je małki serbskokatolski lud nětko wohroženy (zaso jónu, wšako smy rady wohroženi!) wot přichada syriskich (potajkim: pozdatnje wopačny kraj!), muslimskich (potajkim: pozdatnje wopačna nabožina!) młodych muži (potajkim: pozdatnje wopačny splah! Dokelž je wočiwidnje wo skutkownosći wobrězanych cymplow z tutoho dźěla swěta arsenal kćějatych fantazijow).

Dźiće mi pak preč z pozdatnym wućekom „hybridologija“. To je stoponjowanje njezmysła, transformacija eksistency do „hybridneje“ super (all inclusive)-eksistency. Serbska wjes njebudźe Melting Pot – tuta koncepcija je hižo w Frankfurće nad Mohanom zwrěšćiła. Změjemy nowych susodow. Najskerje tež někotrych přichodnych Serbow, jeli so wot nich wohroženi začuwamy. Dokelz „wohroženy“ njeje atraktiwny, ale objekt sobuželnosće.

Lětuše nazymske impresije w biosferowym rezervaće – nastork k meditaciji

8. November 2015

W Bóšicach knježi – serbski – njeduch Pegidy / hlej dźensniši SZ

7. November 2015

Poselstwo wyšeho měšćanosty CDU – tež Bóšicam:

http://www.spiegel.de/politik/deutschland/rottenburg-buergermeister-stephan-neher-im-interview-ueber-fluechtlinge-a-1061832.html#spRedirectedFrom=www&referrrer=