Archive for Januar 2016

Najnowše wotkryće wo koparkach a koparjach Europeady w južnotirolskich hotelach

31. Januar 2016

Podhlad, zo su organizatorojo serbske koparki za čas lětušeje Europeady w Južnym Tirolu zaměrnje wot muskeho swěta dźělili, je z blida. Serbske žony budu drje w hotelu daloko zdalene wot swojich kolegow-koparjow serbskeje wubranki, ale pod samsnej třěchu kaž danske – muske! – mustwo. Tak je so na kromje zwjazkoweho předsydstwa prajiło.

Derje, kusk wotměny dyrbi być w žiwjenju 🙂 – a danscy koparjo zawěsće kaž nimale wšitcy Danojo znajmjeńša kusk němsce móža, štož komunikaciju ze serbskimi žonami wolóža. Ale snadź móža serbscy fanojo swoje stwy tak skazać, zo bychmy na wšěch městnach wšo pod kontrolu měli. 😉 – To bě nětk Piwarcowy dadawk ke krasnemu ptačokwasnemu programej SLA!

http://www.sz-online.de/nachrichten/sorbische-frauen-elf-erstmals-bei-fussball-em-3314128.html

Narodna situacija a kubłanske prašenja w Delnjej Łužicy / zwjazkowe předsydstwo w Choćebuzu

31. Januar 2016

Nowinska informacija Domowiny

Wot 1. januara 2017 ma so městno jednaćela Domowiny znowa wobsadźić. Městno je so nětkle zjawnje wupisało. Na swojim dźensnišim wuradźowanju w Choćebuzu je Zwjazkowe předsydstwo Domowiny wobzamknyło zestawu namakanskeje komisije. Jej přisłušeja předsyda Domowiny Dawid Statnik, městopředsydka Judith Wałdźic, čłon zwjazkoweho předsydstwa Kito Ela kaž tež tuchwilny jednaćel Bjarnat Cyž a zastupowacy jednaćel Marcus Końcaŕ. Namakanska komisija ma pruwować přizjewjenja, požadarjow słyšeć a zwjazkowemu předsydstwu doporučenje k powołanju noweho jednaćela podać. Wupisanje je mjez druhim na internetnej stronje Domowiny wozjewjene. Požadarjo móža so hač do 15. apryla pola Domowiny w Budyšinje přizjewić.

Zwjazkowe předsydstwo  přihłosowaše wašnju nastajenja operatiwneho plana k přesadźenju nadawkow dźěłowych směrnicow Domowiny. Prezidij dósta nadawk, z pomocu wuběrkow zwjazkoweho předsydstwa a zarjada Domowiny a we wothłosowanju ze župami a sobustawskimi towarstwami plan precizować a jeho zaměrne přesadźenje běžnje přewodźeć a kontrolować.

Dale je zwjazkowe předsydstwo směrnicu za wužiwanje loga a za logo ze słowom „Domowina” schwaliło. Z tym spjelni so jedyn dypk dźěłowych směrnicow, kiž je 17. hłowna zhromadźizna Domowiny loni wobzamknyła. Po doporučenju wuběrka za lobby-dźěło je tutón nadawk grafikarka Iris Brankačkowa přewzała. Logo a logo ze słowom so nětko wšěm župam a towarstwam pod třěchu Domowiny za jich zjawnostne dźěło a pisomnu komunikaciju k dispoziciji staji.

Schwalene buchu tohorunja ćežišćowe nadawki zarjada Domowiny a dźěłowy plan Rěčneho centruma Witaj (RCW) za tute lěto. Kaž wjednica RCW dr. Beata Brězanowa informowaše, organizuja dnja 22. oktobra w Chrósćicach fachowu konferencu k bilingualnej wučbje.

Dale nominowaše zwjazkowe předsydstwo Bjarnata Cyža jako wiceprezidenta FUEN a Dawida Statnika jako čłona dialogneho foruma FUEN. Wobaj wotpowědnu funkciju hižo nětko wukonjetaj. Wólby wotměja so na lětušej hłownej zhromadźiznje Federalistiskeje unije europskich narodnych skupin, hdźež wola nowy prezidij za dobu 2016 do 2019.

W dalšim dźělu wuradźowanja zwjazkoweho předsydstwa slědowachu rozprawy a informacije k narodnej situaciji a ke kubłanskim prašenjam w Delnjej Łužicy. Tak informowaše zastupowacy jednaćel Domowiny Marcus Końcaŕ wo stawje zwěsćenja přisłušnosće dalšich komunow k serbskemu sydlenskemu rumej. Tutón proces běži hišće hač do 31.05.2016 (Serbski zakoń, § 3 a § 13c). Wo dalšich nadawkach Serbskeje rady Braniborskeje informowaše jeje předsyda Torsten Mak. To su kubłanske prašenja, wokrjesna reforma w Braniborskej kaž tež diskusija wo brunicy a času po njej. Braniborski sejm je dał knježerstwu nadawk, w tutej legislaturje plan za zesylnjenje serbskeje rěče nadźěłać.

Dr. Christiana Piniekowa, wjednica Źěłanišća za serbske kubłanske wuwijanje Chóśebuz (ABC), předstaji swoju instituciju a nowy ramikowy plan za serbsku wučbu za šulerjow 1. do 10. lětnika. (Dalše informacije pod: http://bildungsserver.berlin-brandenburg.de/rlp-online/c-faecher/sorbischwendisch/kompetenzentwicklung/)

Měto Nowak z Braniborskeho ministerstwa za wědomosć, slědźenje a kulturu rozłoži přetworjenje kubłanskeje syće na šěršu syć k rewitalizaciji delnjoserbšćiny. Jeje zaměr je zdźerženje, rewitalizacija a dalewuwiće delnjoserbskeje rěče jako druha rěč regiona, wosebje přez natwar a dalewuwiće stajneho kubłanskeho poskitka w delnjoserbskej rěči.

(Borbora Felberowa, nowinska rěčnica třěšneho zwjazka) 

 

2plus nikoho njeintegruje, ani Němca ani ćěkanca – na kóšty serbskeje substancy

29. Januar 2016

Powěsć serbskeho rozhłosa:

http://www.mdr.de/serbski-program/rozhlos/powesce/powesce3014.html#anchor1

Kubłanje: Žane ćěkancy na serbskich šulach

Sakska kubłanska agentura w Budyšinje dotal njeplanuje, zo póńdu dźěći ćěkancow na serbske šule. Wužadanje by přewulke było, němčinu a serbšćinu paralelnje nawuknyć. (…)Tež předsydka Serbskeho šulskeho towarstwa, Ludmila Budarjowa je namjetowała, zo dźěći ćěkancow spočatnje na serbske šule njechodźa.“

Přinošk serbskeho rozhłosa:

http://www.mdr.de/serbski-program/rozhlos/aktualne-prinoski/audio1389776.html

Piwarc k tomu měni:

So wě, zo njemóža „2plus-šule“ dźěći z arabskich krajow rěčnje integrować, wšako njejsu wone ani z němskich šulerjow po wjele lětach wšědny dźeń serbowacych ludźi šcinili. Ale k prěněmčenju serbskich dźěći přinošowali. Přewulke by wužadanje za tak a tak njefungowacy pedagogiski „model“ było.

Bychmy na wšěch stejnišćach „serbske šule“ w poprawnym zmysle słowa měli, by to hinak wupadało. Potom by integracija někotrych dźěći ćěkancow opcija była, ale pod tuchwilnymi kubłanskimi wuměnjenjemi tak a tak nikoho do Serbstwa integrować njemóžeš, pretož dźe cyły „model“ na kóšty serbskeje substancy.

Wobraz: Wučba němčiny w tehdomnišej Piwarcec skupinje w Holešowje

Deutsch_hdy

Serbske podawki w małym róžku – protyčka terminow za februar 2016

28. Januar 2016

01-28 TERMINY februar

 

Mój faworit hladajo na temu je „Pšawa serbskich źeńskich / Von der Freiheit der wendischen Weiber bis zur Insel der glücklichen Witwen“ 26. małeho róžka w Choćebuzu. 🙂

M.W. w K 1 – čitanje + piwo

26. Januar 2016

Měrćin Wjenk čita sobotu, 6. februara (małeho róžka), w Chrósćicach ze swojeje prěnički „Stary dom“. W K1 na Cyrkwinskej horje 1 so čitanje wječor we wosmich započnje. Po tym přizamknje so bjesada při piwje.

Skrótka: Čitanje Měrćina Wjenka / K1, Cyrkwinska hora 1, Chrósćicy / 20 hodź.

Wjenk

PS.: Piwarc by přišoł a wězo piwo pił, jeli njeby jako wuznawacy wódny muž runje tónle dźeń narodniny měł a tohodla we Łuze wostał. Ćim bóle wšěm druhim čitanje z knihi poruča, kotruž Piwarc hišće čita. Tak jednorje to njeje…

 

Pozdatnje jenož hišće 7.000 maćernorěčnych Hornich Serbow – štó sadźi mjenje?

25. Januar 2016

Tuta šokowaca ličba je wuchadźišćo přionoška magacina ze.tt, partnerki wot zeit-online. Z tym dźe napřemoběh rozprawnistwa a prognozow wo najmjenje Serbow, kotrychž narodna eksistenca so pozdatnje nachila, dale.

 http://ze.tt/leipziger-institut-wehrt-sich-gegen-das-aussterben-von-sprachen/

 Serbska studentka:

https://www.youtube.com/watch?v=f9uoSTEo9H8#t=361

To je serbowacy hólc (z Berlin-Kreuzberga) w přinošku:

https://twitter.com/FloProkop

 https://www.instagram.com/FloProkop/

 „Vater“ pak, lubi zett-isća, njerěka „nanej“ („dem Vater“), ale „nan“. A zo jedyn jenički institut w Lipsku spyta, wotemrěću serbšćiny zadźěwać, je chětro zwonka reality. Ale serbske zwuki z Kreuzberga su dosć zarunanja. 🙂

 

Ptači kwas słodźi – wjele wjesela!

25. Januar 2016

Solidarita ze serbskim swinjorězanjom na Njepilic statoku w Rownom

24. Januar 2016

Antje Hermenau, něhdyša frakciska předsydka Zelenych w Sakskim krajnym sejmje, je ataku PETA přećiwo swinjorězanju na Njepilic statoku w Rownom "nabožnu wójnu bjez hnady" mjenowała. Politikarka, kotraž mjeztym w Drježdźanach jako swobodna "strategowka" za angloameriske wiki dźěła, njeje jenička, kotraž postupowanje ekstremistiskich wojowarjow za prawa zwěrjatow kritizuje.

Na Facebooku zwěsća prof. Peter Porsch, emeritowany profesor germanistiki na Lipšćanskej uniwersiće a něhdyši dołholětny předsyda sakskeju frakcije a strony Lěwicy, zo weganojo ze swojim připodobnjenjom formam, mjenam a słodej mjasnych produktow (kołbasa atd.) snadź sami swoju žedźbu za mjasom pokazuja. Wón jich namołwja, jeho a druhich při jědźi na pokoj wostajić.

Druzy tohorunja w zwisku ze serbskim Rowniskim swinjorězanjom tutu poziju runja Porschej w Knize wobličow zastupuja.

Sensacija: Jan Cyž na swojim portretowym koncerće – nic bosy!

23. Januar 2016

So wě, zo sej zwěrił njejsym, serbskeho komponista Jana Cyža z njezwučenymi čornymi črijemi fotografować – to inwestigatiwnym wobrazam Maćija Bulanka w póndźelnišim wudaću SN přewostajam. Ale scomter so hodźacym darom ansambla – to móže sej Piwarc dowolić, po tym zo sym jeho nuzował, so po jara radźenym, wotměnjacym, lóštnym portretowym koncerće hišće wote mnje fotografować dać. Hačrunjež foto do syće póńdźe, Jano – to dyrbi być, wšako chce globalna serbska wjes na Tebi podźěl brać. 🙂

Njejsym sej ženje předstajić móhł, kelko aforistiskeje komiki z huslemi móžno je. Wosebity dźak tež Jana Cyžowym sobu skutkowacym přećelam kaž Malte Hübnerej z Mecklenburgsko-Předpomorskeje, kiž njech je jowle naspomnjeny, přetož je "Fischkopp" kaž ja. Ale tež bjesada po přestawce mjez Jurom Mětškom a Janom Cyžom bě intelektualno-zabawna wěcka. Zapłać Bóh za smjerćrjany wječor na nowej rjanej žurli Serbskeho ludoweho ansambla w Budyšinje! Ach zow, cyle připódla: Nastork k podawkej běchu jeho šěsćdźesaćiny před poł lětom. 🙂

Portretowy koncert bě wuměłski wuraz Jana Cyžoweje specielneje luboznosće, kotrejež dla my wšitcy jeho lubujemy. A wón lubuje nas. 😉

NSLDź: Wonječesćenje swjateho křiža jako worakawstwo pjanych młdoych Serbow

22. Januar 2016

Wusahowacy hrajerski wukon štyrjoch holcow je wčera wječor w Budyskim dźiwadle na hrodźe na serbskej prapremjerje hry „Crux abo zbóžnik pod łožom“ publikum zahorił. Wosebje přeswědčaca bě młodostna dźiwadźelnica Anna-Maria Hadankec jako pobožna, njeskutka-njezboža dla zadwělowana Hańžka. Tež chrobła fikcija awtorki Hanki Jenčec je zajimawa, wšako znaju dosć ludźi, kotřiž sej mysla, zo njetči za kóždym wonječesćenjom swjateho křiža někajki prawicarski cuzy, ale hdys a hdys tež worakawstwo pjanych młodych Serbow samych.

Najebać to so wobsahowje recensiji delnjosakskeje nowiny přizamknu:

Recensija wo němskim originalu 2010 w Hannoveru:

http://www.haz.de/Nachrichten/Kultur/Theater/Anne-Jentschs-Crux-oder-Der-Heiland-unterm-Bett-am-Ballhof-2

Tohodla je za mnje připowědź serbskeje intendantki NSLDź, hru jara wjele serbskim młodostnym pokazać, hroženje. Porno předstajenju w Hannoveru su so wězo pola nas ekstremnych srědkow načasneho režijoweho dźiwadła wzdali. To hižo – bohudźak – z tym zwisuje, zo njemóžeš ze serbskimi holčkami tajkule brutalnu inscenaciju činić kaž z němskimi hólcami. Ale wostanje banalizowanje konsuma drogow, a na kóncu so bjezradny přihladowar praša: Što chce mi tuta hra prajić?

Sym znajmjeńša zbožowny, zo njejsym hólcomaj z druheje kultury tutu hru spřistupnił, wonaj byštaj šokowanaj na tym dwělowałoj, štož staj dotal wo Serbstwje zaznawałoj. So wě, zo móžeš tajke wěcki kaž na wčerawšim jewišću přeco pod hesłom hladać: Tajke něšto tež dawa. Haj, ale potom wočakuju wot dźiwadła, to jenož do kedźnbosće přihladowarstwa nutř njewrjesnyć, ale – prajmy tak – wuměłsce relatiwizować, do wjetšeho ramika stajić. To pak bohužel njeje so stało.

Tohodla je ta hra prosće – po kriterijach FSK při filmach – „socialnje desorientowaca“. To njerěka, zo njesměš to hladać. Sym libertarny člowjek a sym sam njedawno smjerćzajimawy a po němskim FSK (Freiwillige Selbstkontrolle) „socialnje desorientowacy“ film turkowskeho pochada hladał. Ale młodym ludźom poručić „Crux“ njemóžu.

Crux

 

W serbskim rozhłosu:

http://www.mdr.de/serbski-program/rozhlos/aktualne-prinoski/audio1383918.html