Z posedźenja Zwjazkoweho předsydstwa Domowiny: Wólby noweho jednaćela – najprjedy nic

Budyšin, 28.05.2016. Dalše přihoty 18. hłowneje a wólbneje zhromadźizny Domowiny, kotraž budźe dnja 25.03.2017 we Wojerecach, stejachu w srjedźišću dźensnišeho wuradźowanja Zwjazkoweho předsydstwa Domowiny w Budyšinje. Zwjazkowe předsydstwo je schwaliło kluč delegatow: Nimo 28 čłonow zwjazkoweho předsydstwa nominuja župy a nadregionalne towarstwa na 50 čłonow jednoho delegata, znajmjeńša pak pósćele kóžde sobustawske towarstwo dweju delegatow na hłownu zhromadźiznu. Nadregionalne sobustawske towarstwa měli znajmjeńša jednoho delegata z Delnjeje Łužicy nominować. Dale doporuči wone, znajmjeńša štwórćinu delegatow w starobje pod 35 lětami nominować. Zaměr je, zo župy a towarstwa hač do 15. januara 2017 swojich delegatow pomjenuja. Dale wobzamkny zwjazkowe předsydstwo naćisk wólbneho a jednanskeho porjada hłowneje zhromadźizny.

Zwjazkowe předsydstwo wza wotličenje hospodarskeho plana za lěto 2015 a rozprawu rewizijneho wuběrka wo wuslědkach pruwowanja tutoho wotličenje na wědomje. Zdobom schwali wone naćisk financneho plana 2017. Po přizwolenju přez Załožbu za serbski lud so hospodarski plan za 2017 doskónčnje schwali.

Na namjet župy Delnja Łužica wobzamkny zwjazkowe předsydstwo dźensa, próstwu wo čłonstwo Domowiny w euroregionje Sprjewja-Nysa-Bobr stajić a přepoda tutón nadawk zastupowacemu jednaćelej Domowiny Marcusej Końcarjej.

Końcaŕ je zdobom městopředsyda Rady za serbske naležnosće Braniborskeje a rozprawješe dźensa wo prócowanjach wo wuznaće dalšich wsow a městow k serbskemu sydlenskemu rumej. Dotal su w serbskej radźe něhdźe 15 próstwow wo pruwowanje wobzamknyli, z kotrymiž ma so zwěsćić, hač so w tutych městach a gmejnach dosć indicijow serbskosće namakaja, zo bychu wone serbskemu sydlenskemu rumej přisłušeli. Dokelž skónči so 31. meje doba zapodaća tajkich próstwow, zetka so Braniborska serbska rada póndźelu hišće raz na wurjadne posedźenje.

Zwjazkowe předsydstwo wza dźensa rozprawu Rady za serbske naležnosće Sakskeje wo skutkowanju a předewzaćach na wědomje, kotruž poda jeje předsydka, čłonka Zwjazkoweho sejma Marja Michałkowa.

Wone dojedna so na to, dnja 12. awgusta wječor w Budyšinje přewjesć klawsuru, na kotrejž chcedźa wosebje wo pućach dobywanja nowych čłonow Domowiny diskutować. Na klawsuru přeproša so tež sobudźěłaćerjo zarjada Domowiny a RCW.

Do toho bě zwjazkowe předsydstwo w njezjawnym dźělu posedźenja rozsudźiło, zo so doba wupisanja městna jednaćela Domowiny hač do 31. julija 2016 podlěši.

(nowinska zdźělenka třěšneho zwjazka, nadpismo Piwarca)

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: