Archive for Januar 2017

Radźe starostow – gratulaciju! Přeju sej bórzomny bratrowski brainstorming

31. Januar 2017

Iniciatiwnej skupinje za serbski sejm je so poradźiło, zajimawu zestawu dawno připowědźeneje „rady starostow“ kónc tydźenja we Wojerecach zjawnosći předstajić. Mjez nimi su wosobiny, kotrež sej jara wažu.

Je jara zwjeselace, hdyž ludźo swój wólny čas do angažementa za Serbstwo inwestuja. W tutym zmysle tež chwalbu čłonam tuteje rady starostow! Gratuluju jim k zwólniwosći, złožujo so na swoje bohate nazhonjenja, za nowymi pućemi do přichoda serbskeju rěče a kultury pytać.

Njejsym sej pak wěsty, hač je wšěm pomjenowanym čłonam rady starostow wědome, zo maja nětkole poprawom zaměrnje projekt „serbski parlament“ přihotować. To pak je wšojedne hladajo na to, zo serbski sejm ze wšelakich znatych a w blogu Piwarca dosć wospjetowanych přičin tak a tak ženje njebudźe.

Tohodla by najskerje z wida rozumneje narodneje politiki to najlěpše było, hdyž bychu so wotpósłancy zwjazkoweho předsydstwa a rady starostow bórze zetkali, zo bychu so wotewrjenje wo zakładnych prašenjach zastupnistwa serbskeho ludu wuměnjeć móhli. Bratrowski brainstorming bjez konkretneho cila.

Jeli so w bjesadźe wukopa, zo mamy tola zhromadny konkretny projekt, ćim lěpje! Ja na přikład pytam podpěraćelow za přihotowanje nošerstwa swobodneje serbskeje modeloweje šule – bjez 2plus, ale ze serbskej dušu!

Kórki 84,8 procentow dróše

30. Januar 2017

Inflacija stupa, a po aktualnej zdźělence krajneho zarjada Sakskeje za statistiku je na tym najbóle wina: kórka. Runje produkt, kotrehož nĕmske mjeno je serbskeho pochada, je so w běhu lěta wo 84,8 procentow podróšił!

Ja sej přeju wujasnjenje z Błótow 😉! Abo su to jenož te hinaše, słódke kórki?

Moje prašenje přeradźa, zo ani jednu ani druhu prawidłownje wĕdomje njenakupuju 😊. A hdyž mam ju wuwzaćnje na wulkej lisćinje za nakup stejo, njejsym tule jednotliwu płaćiznu přepruwował, štož bych dyrbjał činić…

Dokal póńdźe zastupnistwo Serbow? Rozmyslowane wot bloga-dwójnika

29. Januar 2017

https://marceldavidbraumann.com/2017/01/29/domowina-denkt-neu-sorben-politik-nimmt-sich-kultur-zum-vorbild/

Stejišćo Domowiny k Radźe starostow iniciatiwneje skupiny za serbski sejm

28. Januar 2017

K powołanju rady starostow iniciatiwneje skupiny za serbski sejm dźensa we Wojerecach http://serbski-sejm.de/hs/aktualne-hs.html je so zwjazkowe předsydstwo Domowiny na swojim posedźenju w Choćebuzu – tohorunja dźensa – wuprajiło (na tafli je wobzamknjenje widźeć):

Serbska uniwersita – prošu hišće wjac 😉

26. Januar 2017

Štó wjac poskićuje? Kubłanski wjeršk sejmikarjow je mjez druhim serbsku uniwersitu w Budyšinje a Choćebuzu přinjesł – znajmjeńša jako ideju 😊.

Dźakowano dźensnišej medijalnej ofensiwje iniciatiwy za serbski sejm zhonja po cyłej Nĕmskej čitarjo wo tajkich a hinašich wizijach. Z powěsću dpa su w online-wudaćach wot Łužiskeho Rozhlada hač Welt prezentne.

Na němskich uniwersitach je lěto a wjac jendźelšćiny w přirodowědomostnych předmjetach – derje, zo da so to bórze ryzy serbsce studować 😉. Jara rjenje by wězo było, hdyž bychu wšitcy přiwisnicy tutoho hibanja wšĕdny dźeń wo wšĕch temach serbowali – Piwarc so po tym ma 😊.

Hewak změnjeny problem kaž dawno na sudnistwje: Tež hdyž Serb přećiwo Serbej skoržeše, njeje sej nichtó zwěrił, prawo nałožować, swoju poziciju serbsce zakitować. Wo prawniskich wěckach serbować je ludźom přećežko.

Dźensa ptači kwas – tež w sakskim krajnym sejmje

25. Januar 2017

Smy wulkomyslni: Tež kolega z Mišna, kiž je so přez nawal powĕsćow w medijach wo dźensnišim ptačim kwasu hóršił, smĕdźeše na słódkosćach podźěl brać. A je so wjeselił. 😊

Rada starostow bjez legitimacije – rewolucionarny praprask sejmikarjow

24. Januar 2017

Sobotu na hrodźe we Wojerecach so wotměwace předstajenje čłonow rady starostow iniciatiwy za serbski sejm je spodźiwna wěcka: Kaž z rozmołwy Noweho Casnika čo. 51/2016 z rěčnikom „sejmikarjow“, Měrćinom Wałdu, wuchadźa, njebudźe tuta rada, předwidźany nošer dalšeho postupowanja do směra serbskeho parlamenta, demokratisce legitimowana.

Iniciatiwa njeje kruh stow podpisarjow zaměra iniciatiwy k wuzwolenju tuteje rady zwołała a tež žadyn druhi bazowy gremij. Město toho dožiwjamy takrjec serbski rewolucionarny praprask, a rólu Boha knjeza – stworićela hraja za kulisami swĕta někotři hornjoserbscy mužojo.

Najebać to sym hižo loni nazymu na konferency Rosy Luxemburgoweje załožby w Choćebuskej uniwersiće wo dobrym regionalnym resp. serbskim žiwjenju napřećo zastupjerjomaj iniciatiwy, Tomašej Čornakej, Njebjelčanskemu wjesnjanosće, a Měrćinej Wałdźe, witał, zo woni ze žebrjenjom wo připóznaće pola třěšneho zwjazka zastawaja, kotryž po jich měnjenju legitimowana njeje, a so sami wo legitimaciju prócuja.

Aktualny wurězk internetneje strony k radźe starostow. Wo wuzwolenju rěčeć je jara chrobła wěcka. 😉 Sym wězo k pokročowanju dialoga zwólniwy, kotryž smy hižo před lětami wjedli (tehdom mjez druhim w lobby-wuběrku Domowiny), wšojedne, štó koho za demokratisce legitimowaneho ma abo nic. 😊

Ptači kwas – žórło womłodźowanja 😊

20. Januar 2017

Mojej staršej a Serbski ludowy ansambl swjećitaj lětsa swój dejmantny kwas. Ptačokwasny program ansambla je potajkim poměrmje moderny nałožk. Wjeselmy so na připowědźeny „best of“ 60 lět.

To najlěpše ze wšĕch časow ansamblowskeho ptačeho kwasa je rjana składnosć za prěnje lětuše serbske kulturne ludowe zhromadźizny. Bjez kultury a bjesady do toho a po tym – a wšo wězo w maćeršćinje – njeje serbski lud žiwy. To je te poprawne žiwjenje.

Kwasna hosćina je hižo lěttysacaj dołho ze znamjenjom za njebjesa. Kwasna nóc płaćeše dołho jako symbol wjerška lubosće. Rejwanje mjez nimaj słuži wjeselu cyłeje towaršnosće a předhrě kwasneho porika.

Porno jednotliwcej wostanje naš kolektiwny ansamblowski kwas tež w dejmantnym stawje zeleny. A z tym njech nam skutkuje kaž žórło womłodźowanja 😊. Kóždemu jednotliwemu a zdobom cyłemu ludej.

Za swobodnu serbsku šulu

17. Januar 2017

Z kubłanskim wjerškom iniciatiwneje skupiny za serbski sejm je wubĕdźowanje wo najbóle daloko sahace kubłanskopolitiske žadanja zahajene. Směm hišće na lisćinu pozdatnje utopiskich idejow prof. Vogta dopomnić. Wone słušeja do zběrki serbskich wizijow.

Napřemoběh mjez sejmikarjemi a Domowinu wo najradikalniše resp. najpisaniše namjety pak njeby nikomu pomhał. Z časa našeje poražki w Chrošćan zběžku před pjatnaće lětami je jasne, zo bychmy tehdomniše přezjedne předstajenje porjadneje serbskeje šule najlěpje w swobodnym nošterstwje (potajkim přewažnje statnje financowane kubłanišćo pod režiju towarstwa atd.) zwoprawdźeć móhli.

K tomu bohužel dóšło njeje, dokelž njeje žana serbska organizacija swoju zwólniwosć k tajkemu strategiskemu projektej wuprajiła – kotyž by tež z wužadanjom statnych serbskich šulow był. So wě, z respektabelnych přičin, štož pak žanomu maćernorěčnemu šulerjej njepomha.

Nochcemy posledni być

15. Januar 2017

Wendlandski šołta, kiž je před dwěsćě lětami jako jedyn z poslednich słowjansce rěčacych Połobjanow lisćinu słowow němskim potomnikam přewostajił, je hnujacy přikład za nošerja so zhubjaceje rěče.

W pozadku wšĕch aktualnych prócowanjow wo zesylnjenje zastupnistwa serbskich zajimow steji strach, zo bychmy móhli posledni być. Klinči jara banalnje a bu hižo tysacy razow wospjetowane, ale wostanje na wšě časy wěrno: Tón z wulkim wotstawkom najefektiwniši srědk za daledawanje rěče je wšědne nałožowanje maćeršćiny z dźěćimi w staršiskim domje.

Hdyž to so njestawa, njemóže to ani najlěpše kubłanje swěta narunać. Pozitiwnje widźiš to pola Berlinskich, Lipšćanskich a Drježdźanskich Serbow z perfektnje serbowacym dorostom, kiž njeje ženje do serbskeje šule chodźił.