Archive for Februar 2017

Podpisajće a pomhajće staršim Witaj-dźěći w Braniborskej

28. Februar 2017

https://www.change.org/p/minister-baaske-witaj-muss-bleiben-wir-eltern-k%C3%A4mpfen-den-sorbisch-unterricht-unserer-kinder

Tule je link za wšĕch, kotřiž njejsu w knize wobličow doma, hdźež běži wabjenje angažowanych staršich za protestnu akciju na dobro wučby delnjoserbšćiny. Piwarc podpěruje wězo kampanju we wšěch syćach.

Rewolucija młodych serbskich pragmatikarjow hišće póńdźe

26. Februar 2017

Změna generacijow njeje jenož narunanje nazhonićišich z čerstwišimi, ale zaćah noweje mentality na dźěłowym městnje. Wulki wothłós je přinošk serbskeho rozhłosa wo tutym zjawje w serbskich institucijach žnjał. Generacija měrliweje rewolucije přewostaja młodym syćetwarcam pola narodneho žiwjenja.

Dźakowano Janej Nukej je so tehdom 27-lětny Dawid Statnik z eksemplariskim zastupjerjom noweje generacije stał. Předsyda Domowiny ma w swojim zarjedźe dweju rowjenkow podobneje staroby na runinje referentow: Clemensa Škodu a Petra Brězana. Na čole załožby je Jan Budar Marka Sucheho naslědował, a předsydka załožboweje rady je Zuzan Šenkec, generalna sekretarka FUEN a nimale samsny lětnik kaž Budar.

Městopředsydka Domowiny je z Judith Wałdźic Serbowka generacije pod 40, šefredaktorka Rozhlada Sara Mičkec je samo pod 30. Tule bu zmĕna generacije hižo wot předchadnikow Richarda Bigla a Viktora Zakarja zahajena, kotryž nětkole nawjeduje delnjoserbski wotrjad rěčneho centruma Witaj.

Wšudźe bě přechad w kooperaciji z předchadnikom spomóžny. Jeničce Budar rěči wo „łamku“, štož pak po mojim zaznawanju jenož na tym njezaleži, zo běše dotalny dołholětny direktor mjeztym dawno na wuměnku. Hač budźe nowa generacija w stawiznopiznu mjeńšu rólu hrać akterojo přewróta 1989/90, je hišće wotewrjene prašenje. Dokelž snadź ta woprawdźita nutřkownoserbska rewolucija hišće póńdźe 😊.

Mój tip: Wona njebudźe strukturelna, ale wobsahowa. Mjenje w rozestajenju ze statom a bóle w kreatiwnym wužiwanju načasneje swobody. Ja jako zastupjer babyboomer-generacije a link mjez rewoluciju a pragmatizmom 😉 budu tón proces solidarisce přewodźeć.

Přewrót w serbskej kubłanskej politice – nětko A-rjadownje wutworić!

25. Februar 2017

Přihłosuju dźensnišemu wuprajenju předsydki Serbskeho šulskeho towarstwa (SŠT), Ludmile Budarjoweje, na zjawnym posedźenju zwjazkoweho předsydstwa Domowiny w Serbskim domje w Budyšinje, zo dyrbimy na serbskich šulach „bóle maćernorĕčnych spěchować“ a při tym „nowe akcenty“ sadźić. To rěka za mnje aktualnje a konkretnje, kaž sym při tutej składnosći zwuraznił, přeće staršich we Worklecach za wutworjenjom A-rjadownje spjelnić.

Šefowka serbskeho nadregionalneho fachoweho towarstwa za kubłanje, wězo w zwjazkowym předsydstwje zastupjeneho, chce „wěste korektury“ modela 2plus. Přemało šulerjow postupuje ze skupin 3 a 2 do 1 (byrnjež niwow lěto a dale zniželi), wobsadźenje z dosć pedagogiskim personalom njebĕše ženje zaručene. Ja praju: Přibĕraca toleranca němskich dźěći napřećo serbšćinje nikomu ničo njepomha, hdyž je wobchadna rĕč w mĕšanych rjadownjach tak a tak němčina a hižo nichtó porjadnje serbować njemóže.

Hižo w dźěle za statny eksamen serbskeje wučerki z Chrósćic z lĕta 2009, kotrež sym dźensa naspomnił, steji, so złožujo na tehdomniše prĕnje ewaluacije 2plus, zo su zdźěla maćernorěčne dźěći na kóncu šulskeho lĕta pod režiju 2plus hubjeńšo serbowali hač na spočatku. Tón efekt je metodiski wotpohlad, wšako bu tónle model jónu w zapadźe wunamakany za rĕčnu asimilaciju dźěći z turkowskim migraciskim pozadkom.

Tež na wječorku k temje 2plus w lěće 2013 w Serbskim domje su wobdźělnicy zahubne straty za maćernorěčne dźěći zwěšćili. Njedawno – we wulkim róžku 2017 – smy w prezidiju Domowiny zaso tule problematiku wobjednali. Potajkim je najwjetši čas, nětkole 2plus (faktisce 1minus) zamĕrnje wotwiwać. Knjeni Budarjowa sej wot Domowinskeho zarjada a rěčneho centruma Witaj „narodnu analyzu“ přeje, dokal su so te dźěći z Witaj-pěstowarnjow zhubili, a „strategiski plan“.

Po tym zo je so na dźensnišim posedźenju wukopało, zo porno tomu, štož bu mi lěta dołho ze wšĕch stron napowědane, 2plus tón strategiski plan wočiwidnje njeje (tohodla njejsym njedawno dźěłowemu planej RCW přihłosować móhł, dokelž njeje tamle dokładnje dosć termin za objektiwne přepruwowanje rěčneho niwowa po wobzamknjenju 2plus-šule zakótwjeny), njech kubłanski wuběrk noweje wólbneje periody puć do noweje strategije ruba.

Z nowinskeje informacije po našim wuspěšnym wuradźowanju, z kotrymž je nowy kapitl wuskeje kooperacije mjez SŠT a gremijemi resp. institucijemi třěšneho zwjazka zahajeny:
Přeprošenju předsydy Domowiny Dawida Statnika běchu předsydka Serbskeho šulskeho towarstwa Ludmila Budarjowa a čłonaj jeho předsydstwa Jadwiga Ćižankowa, wjednica Serbskeje zakładneje šule „Šula Ćišinskeho“ Pančicy-Kukow, a René Wjacławk, nawoda Serbskeho gymnazija Budyšin, slědowali. W jara wěcownej rozmołwje poda so rjad namjetow za polěpšenje situacije na polu serbskeho kubłanja w pěstowarnjach a šulach kaž tež za zhromadne dźěło a wothłosowanja aktiwitow, mjez druhim skrućenje kubłanskeho wuběrka.

A tule k (hlej horjeka) pobrachowacej narodnej analyzy:

Dalša tema bě naćisk dźěłowych směrnicow za přichodnej lěće, kiž so tohorunja delegatam hłowneje zhromadźizny z próstwu wo wobzamknjenje předpołoža. Zapisać ma so tam na přikład tutón prěnjotny nadawk, na kotryž běchu so přitomni na započatku posedźenja w rozmołwje ze zastupjerjemi Serbskeho šulskeho towarstwa dorozumili: “Z pomocu Rěčneho centruma Witaj nadźěła so analyza wotchadnikow Witaj-pěstowarnjow a –skupin. Na tutym zakładźe ma so strategiski koncept k docpěću wšěch Witaj-dźěći za dalše serbskorěčne kubłanje nadźěłać.”

Nowe argumenty přećiwo wulkowokrjesam

24. Februar 2017

W Delnjej Łužicy budźe po wotpohledźe planowarjow krajneho knježerstwa přichodnje wokrjes, kiž změje dwójce tak wjele kwadratnych kilometrow kaž zwjazkowy kraj Posaarska. To je tež w Serbach zwadna naležnosć.

Ifo-institut je nětko z wědomostnymi srědkami wuslědźił, zo tajkele reformy ani statnym financam ani hospodarstwu ničo njepřinjesu. Ćim bóle pak su wone demokratiji a žiwej towaršnosći na škodu. Tohodla tule jako serwis bramborskim prócowarjam link k sakskej „Freie Presse“ – pomoc k argumentowanju.

http://www.freiepresse.de/NACHRICHTEN/TOP-THEMA/Sachsens-Kreisreform-hat-wesentliche-Ziele-verfehlt-artikel9842403.php

Serbske podawki w nalětniku 2017

24. Februar 2017

02-23 Bjesada Rakecy.pdf

02-23 Sorb.WebstubeDrebkau – Ostern.pdf

02-23 Terminy m rc.pdf

Knjez Kluge w paralelnym swěće

23. Februar 2017

Njewěm, hač chce iniciatiwna skupina „serbski sejm“ nětkole po puću Reichsbürgerow kročić, kotřiž prosće prawniski stat ignoruja a swoje fiktiwne mócnarstwo tworja. Dźensniši přikład w Serbskich Nowinach posrědkuje tajkile zaćišć.

Knjez Kluge njebjerje serbski zakoń na wědomje a tak čini, hač njeby třěšny zwjazk Serbow eksistował. Zdobom wón z toho wuchadźa, zo ma prawo, sej w listowanju ze zarjadom wšě móžne daty wunuzować. Dokelž je wón „serbski sejm“ 😉.

Nowy dopokaz za to, zo pozdatny deficit legitimacije jeničce we hłowje sejmikarjow wobsteji. Statne zarjady wĕdźa, zo je Domowina legitimowana zastupjerka serbskich zajimow. Zastupće z wašim towarstwom do Domowiny a inwestujće swoje energije do serbskeho cyłka.

To budźe zajimawšo za nas wšĕch hač wospjetowanje tajkich skurilnych storyjow. 😊

Wobdźělće so na wojowanju za přichod delnjoserbskeje wučby w Braniborskej!

23. Februar 2017

Delnjoserbske, hornjoserbske, pólske a němske podłožki – wuběrajće, štož trjebaće, a wužiwajće! Piwarc přeje Wam wšěm wjele wuspěcha!

liscina2hs.pdf

liscina1hs.pdf

liscina2pl.pdf

liscina1pl.pdf

Liscinazpodpismami.pdf

Liscina2.pdf

liscina2ds.pdf

liscina1ds.pdf

Łužiski rozhlad wo protesće Delnich Serbow: Drasty bjez rěče njedosahaja!

22. Februar 2017

http://www.lr-online.de/regionen/cottbus/Angst-um-den-Sorbischunterricht;art1049,5854268

Za rěčne zdobyće kraja serbskeho pochada – k dnjej maćeršćiny

21. Februar 2017

Nihad bydleše jedne lěto w azylowym domje w Skudźicach, doniž njebu jemu kazane, so do domu sewjernosakskeho krajnoradneho zarjada něhdźe w lěsu mjez Wosečom a Torhawu podać. Tohodla smy jemu do zaměstnjenja w Drježdźanach dopomhali. W měsće nad Plesnu njeby wón bydlenčko namakał.

Při awtodróze mjez Lipskom a sakskej stolicu je wjele rjanych městačkow kaž Křemjeń, Lěsnik abo Doblin. So wě, zo móžeš, jeli maš dosć chwile, tež při Łobju ze Saksko-Anhaltskeje hač do čĕskeje hranicy w Sakskej Šwicy kolesować, kaž ja loni w lěću z mandźelskej. Wuchadźišćo běše Dźěwin, a k mjezystacijam słušeše Ryzawa.

Składnostnje mjezynarodneho dnja maćeršćiny 21. małeho róžka runje w swjedźenskim lěće 500 lět reformacije dla nam so nochce zabyć na Běłu Horu. Wše mjena su zu lisćiny na domjacej stronje Hynca Rychtarja wzate, kotruž swojemu čitarstwu k wšědnemu dalewuwiwanju žiweje serbšćiny poručam.

https://sites.google.com/site/hyncowastrona/

Praha – nowy centrum rozmyslowanja wo serbskich medijach

21. Februar 2017

Na titulnej stronje Serbskich Nowin (hlej wurězkaj na wobrazomaj) wo zarjadowanju přećelow Serbow ze zastupjerkomaj młodeje serbskeje publicistiki zhonich, zo je tónle blog jowle mjez młodostnymi wosebje woblubowany. Hač je blog – dźenik – docyła medij abo něšto swojoraznje hinaše, je w kruhach žurnalistow zwadna naležnosć.

Institucije rozsudźa při přeprošenju medijow mjeztym přewažnje pragmatisce: Blogowar z poměrmje wulkej dosažliwosću je ze zastupjerjemi klasiskich medijow poruno stajeny. Hladajo na to, zo ma Piwarc w Serbach z „Bild“-nowinu w Němskej statistisce přirunujomny radius, sym takrjec medij 😉.

Ale žadyn konkurent medijow. Mje wjeseli, hdyž zhoni awtor zběrki Paternoster přez pokiw w blogu wo recensiji w kónctydźenskim wudaću SN, kotruž čitał njeje. W dobje syćowtworjenja chcemy wzajomnosć mjez nowinami a blogami wuzběhować, wšako pohnuwa něštožkuli w nowinje nas k pisanju – a nawopak.

Dotal bohužel Radekej Čermákej konkretne namjety za termin k temje „Serbja w globalnej wjesce – z wida serbskeho blogarja“ sposrědkować njemóžach, dokelž stej podlěšenej kóncaj tydźenja, kotrejž byštej so za wuprawu do Prahi jara hodźałoj, słužbnje skaženej. Ale lětsa něhdy w lěću budźe 😊.