LUD – ludnosć

Štóž smě w Němskej bydlić, słuša k ludnosći. A ći, kotřiž maja němski wupokaz a z tym staćanstwo, su sobustawojo luda. Woni maja prawo, zastupnistwo ludu wolić, kotrež so wězo tež za wšěch wobydlerjow, potajkim ludnosć, zamołwite začuwa.

Serbja su němscy staćenjo a tohodla dźěl „němskeho statneho ludu“ – runja druhim ludźom njeněmskeho pochada a z němskim pasom. So wě, zo smy zdobom serbski lud. Tuta přisłušnosć njeje ani genealogisce (přez serbsku wowku, kaž pola Samow) ani teritorialnje ani ze serbskim wupokazom definowana. Ale – wustawoprawnisce wokrućene – přez wosobinske wuznaće.

Na zakładźe tajkeho wuznaća móžeš drje, kaž w Braniborskej, w direktnych wólbach poradźiwacy gremij – serbsku radu – postajeć. Hdyž pak dźe wo gremije, kotrež maja prawo kaž zakonjedawar, na přikład ludźom pjenjezy přizwolić abo šmórnyć, potom je lědma model předstajomny, při kotrymž do přihotow wólbow dokładnje njewěš, štó je dźěl suwerena.

Njedawno w prózdninskim bydlenčku na třěše platoweho wysokodumu wosrjedź Drježdźan sedźo a na wšě wuznamne twary města hladajo – wot Dwórskeje cyrkwje a cyrkweje našeje knjenje hač k Semperowej operje a krajnemu sejmej – sej rozmyslowach, štó komu štož postaja. Wosebje mi so lubi model bydlenskeho drustwa, ke kotremuž tute bydlenčko słuša.

Kóždy, kiž so za podźěl na drustwje rozsudźi, je cyłe žiwjenje w nim schowany (smě čas žiwjenja w swojim bydlenju wostać) a ma prawo na sobupostajowanje w naležnosćach drustwa. To je kaž w Serbach: Štóz aktiwnje podźěl na serbskim towaršnostnym žiwjenju bjerje, móže so tež na sobupostajowanju serbskich naležnosćow wobdźěleć.

Zo bychu takrjec anonymni Serbja, kotřiž na žanežkuli socialne wašnje w serbskim organizowanym rěčnokulturnym zjawnym žiwjenju prezentni njejsu, wo rozsudźacym gremiju wothłosowali, štož potom ramikowe wuměnjenja aktiwnych Serbow postaja, by ćežko akceptancu namakało. To je klučowy špak w „sejmje“.

Štóž so jeničce ryzy priwatnje k Serbstwu wuznawa, je Serb a słuša k serbskej ludnosći. Serbski lud pak je po mojim měnjenju aktiwny socialny konstrukt, wšako nimamy wupokazy a nochcemy žane měć. A swójski awtonomny region tež nic.

2 Antworten to “LUD – ludnosć”

  1. Sejmikar Says:

    Što ma za tebje „w serbskim organizowanym rěčnokulturnym zjawnym žiwjenju prezentni njejsu“ rěkać? Njeje Serb tón, kiž serbsce z dźěćimi w Mnichowje rěči a so na organizowanym serbskim zjawnym žiwjenju njewobdźěla?

    • piwarc Says:

      So wě 😊. Ale sprěnja je wjele Serbow zwonka Łužicy tež w serbskim žiwjenju organizowanych. A zdruha so će prašam, hač njeje přeco w kóždym systemje ludźi, kotřiž nutřka njejsu, přetož na přikład wolić nochcedźa? Po Twojej logice su wšě parlamenty njewolerjow dla bjez legitimacije. Nimo toho jowle prěni raz słyšu, zo trjebamy we Łužicy kampanju za serbski sejm, dokelž je w Mnichowje njeorganizowany Serb 😉. Připódla prajene su dźensa hižo Serbja zwonka Łužicy w zwjazkowym předsydstwje Domowiny zastupjeni. A nichtó tomu zadźěwać njeby, jeli by někajki serbski cyłk Serba z USA abo Awstralskeje namjetował. Wšo je móžno. Ale wy wojujeće radšo za to njemóžne město realizowanja móžneho 😊.

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: