Serbowanje njeje wot wučerjow wotwisne

Plan B za dobu pobrachowacych wučerjow, Měrćinje Wjenko,
http://www.rozhlad.de/nastawk_284.html
je Pink Floyd: „We don’t need no education“, woni spěwachu w čas mojeje matury 😎.

Sym dorosćeny serbšćinu bjez wučerja nawuknył. Znaju dosć bjez serbskeje šule w Berlinje abo Lipsku žiwych Serbow, kotřiž dźakowano staršimaj lěpje serbuja hač přerězk młodych Serbow we Łužicy.

Přikład z druheje towaršnostneje sfery: Naš mjeztym we Wojerecach bydlacy Salman, hdźež wón tež na dźěło chodźi, njeje dotal integraciski kurs měł, ale wón lěpje a čilišo nĕmcuje hač druzy młodźi mužojo ze Syriskeje, kotřiž su dźewjeć mĕsacow ze statnej pomocu do směra niwowa B 1 wukli. Potajkim: Pedagogika je nadhódnoćena 😉.

Hladajo na to, zo dotal njebuchu masy ludźi němskeho pochada prezentowane, kotrež 2plus dla wšědny dźeń serbuja, mam za to, dobrych wučerjow na kubłanje tych koncentrować, kotřiž chcedźa serbsce ze zaměrom aktiwneho maćernorĕčneho niwowa wuknyć. Dokelž rewitalizacija bjez žra sylnych nošerjow rĕče njefunguje.

Tohodla móže tónle nastork Měrćina Wjenka w Rozhledźe dobry dojutrowny nastork za zrowastanjenje A-rjadownjow być – njewotwisnje wot pochada šulerjow. Rozsudna je wola, nic pedagogiska technika. Při tym njech su wučerjo z krutej wolu poboku 😊. (So wě, zo zawěsće někotři napřećiwnu konkluziju z wonych jeho linkow sćahnu.)

Prašenje njeje prěnjotnje, kelko šulerjow/wučerjow, ale kajkich. A je wuslědkow mjezynarodnych wědomostnych přepytowanjow, zo je charisma wučerja wažniša hač wšě materielne ramikowe wuměnjenja.

2 Antworten to “Serbowanje njeje wot wučerjow wotwisne”

  1. jan jurij serbomichl Says:

    Čehodla so přeco zaso ličby wo pobrachowacych wučerjach wozjewjeja a štó je zrodźi, njeje jasne. Jasne wšak je, zo kóžde ličenje wědu sugeruje, kiž njeje data. Měrćin Wjeńk piše: „Něhdźe dźesać do pjatnaće Serbow by dyrbjało wob lěto wučerstwo (do-)studować, zo by serbskorěčna wučba na Sakskich šulach tež w přichodnych lětach zaručena była. Tuchwilu pak je jenož poł telko studentow.“ Jeho druha sada je njedospołna, dokelž je tuchwilu jenož poł telko studentow wučerstwa serbšćiny we wšěch studijnych lětnikach. A wospjetowanje prašenja, kotrež poprawom jenož Piwarcej přisteji, mjenujcy „Što je za nas wažniše – rewitalizacija serbšćiny w šěrokosći abo zesylnjenje kubłanja maćernorěčnych dźěći?“ nikomu ničo njepřinjese. Kubłanscy politikarjo a zastojnicy na kubłanskich hamtach su so dawno za 2plus rozsudźili, dokelž po tutym puću njetrjebaja ani fachowje dobrych wučerjow přistajeć ani běžnje rěčacym šulerjam wuswědčenja přepodawać. Hdyž šuler po dwě, tři abo samo dźesać lětach 150 słowow nawuknje a sady kaž „Ja rěkam Hans Meyer a bydlim we Hoyerswerda“ wujakota, tola wšitcy ći, kiž jeho rěčny niwow ewalu(ěr)uja, z radosću wyskaja a maja zlochka swoju mzdu z narysowanjom pjeć diagramow a słowničkom bohateho słowoskłada šulerja zasłuženu. Piwarc ma prawje, zo njeje žana šulska wučba hišće zdokonjała, dobrych rěčnikow serbšćiny wukubłać. Jeho wołanje za A-rjadownjami pak je – jeli sej tole w zwisku z niwowom wučby na šulach přiznajemy – don-quichottowske.

  2. 2plus Says:

    Prašenje „Što je za nas wažniše – rewitalizacija serbšćiny w šěrokosći abo zesylnjenje kubłanja maćernorěčnych dźěći?“ je kontraproduktiwne. Njebych sej wjace tajkich prašenjow wot našich žurnalistow a kubłanskich institucijow přała.
    To rěka, zo chce awtor rewitalizaciju za wučbu maćernorěčnych woprować, ale to njeje žane rozrisanje problema.
    Zo by so serbskorěčna substanca skrućiła, je 2plus tež trěbny a to nic w padźe maćernorěčnych.

    Maćernorěčni trjebaja wučbu w maćeršćinje, z kotrejž bychu swoju stilistiku, gramatiku skrućili a bychu so tež samo z literaturu zaběrali, z kotrejž bychu swoju rěč wjace hódnoćić wukli.

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: