Archive for Juni 2017

Zetkanje prezidija Domowiny ze zastupjerjemi Delnjeje Łužicy

30. Juni 2017

DOKUMENTACIJA

Z wuradźowanja prezidija DOMOWINY

Prezidij so ze župnym předsydstwom schadźowało

Lětnje zetkanje prezidija Domowiny ze zastupjerjemi Delnjeje Łužicy steješe w srjedźišću posedźenja prezidija Domowiny dnja 29.06.2017 w Choćebuzu. Tute wotměła so na zakładźe kooperaciskeho zrěčenja mjez Župu Delnja Łužica a třěšnym zwjazkom.

Pod nawodom předsydy Domowiny Dawida Statnika, wuhódnoćichu přitomni staw zwoprawdźenja kooperaciskeho zrěčenja a bilancowachu zańdźenu skutkowansku dobu. Při tym narěča so mjez druhim tež strukturna změna Łužicy, z kotrejež je wuwidźeć, zo je situacija Serbskeho ludu wusko z hospodarskej situaciju Łužicy zwjazana. Wobdźělnicy běchu sebi přezjedni, zo ma so serbska specifika regiona při dalewuwiću Łužicy jasnje wobkedźbować. Tole a dalše chcedźa w strukturnej konferency wobjednawać. Termin, kaž tež dokładny wobsah so hišće planuja.

Zetkanju přizamkny so regularne posedźenje prezidija Domowiny. Čłonojo wuhódnoćichu mjez druhim mjezynarodny folklorny festiwal “Łužica/Łužyca 2017”, wabjenje za byrgarsku iniciatiwu Minority Safepack a přewjedźenje lětušeho FUEN-seminar słowjanskich mjeńšinow.

Prezidij dźakuje so wšitkim pomocnikam, čestnohamtscy skutkowacym, wuměłcam a kulturnym ćělesam, kotrež su dobremu radźenju festiwala dopomhali. Wosebity dźak słuša wobsedźerjam dworow, kotrež festiwalej wosebity raz spožča. Festiwal njeby so bjez nich w tej měrje radźił.

Tohorunja pozitiwnje wuprajichu so čłonojo prezidija Domowiny wo debaće Sakskeho krajneho sejma k serbskim wobsaham z dnja 22.06.2017 a wo wuslědkach zhromadneho posedźenja krajneju kabinetow krajow Braniborskeje a Sakskeje.

Přichodne regularne posedźenje prezidija wotměwa so 30.08.2017 we Wojerecach.

Dawid Statnik

předsyda Domowiny

Dawid Statnik

předsyda | pśedsedaŕ | Vorsitzender

Wot jutřišeho tule z knihi lěta 😎: Tima Meškankowy swobodny serbski stawiznopis

28. Juni 2017

Wón je jedyn z najswobodnišich, najnjewotwisnišich duchow w Serbach: Timo Meškank. Ani w Budyskim Serbskim instituće ani w Lipšćanskej sorabistice njewidźi Meškank so hodźace wuměnjenja za sebjewědomne serbske slědźenje. Potajkim wozjewi habilitowany wědomostnik „jako priwatnik“, tak mjenowany priwatny docent.

Dźakowano swobodnej syći internet njech Serbja wo jeho tezy, zo su kumštni powołanscy Serbja w njeličomnych generacijach rosćene Serbstwo deformowali a je nimale zruinowali, runje tak diskutuja kaž wo druhich Tima Meškankowych pozicijach. Jeho wuchadźišćo: Serbske stawizny buchu zakładnje falšowane, zo bychu so Serbja swojej poprawnej žiwjenskej kulturje wotcuzbnili.

Lětnja debata je zahajena. Mamy chwile za to – su prózdniny. 😊

Łuh je zaso łuh

28. Juni 2017

Po dźensnišej wulkej lijeńcy je Łuhowski swět zaso w porjadku. Wjerba, kotruž sym w lětušej suchoće tydźenje dołho kóždy wječor z dźesać bowami wody zastarował, steji skónčnje zaso na tule poprawom zwučene přirodne wašnje při wodźe.

Je kusk grotestne, zo so ja njebjesam dźakuju, mjeztym zo dyrbi susod njewjedra dla njejapcy do słužby dobrowólneje wohnjoweje wobory. A nĕtko zaso nade wšěmi słónco swěći. 😊

Přećel Serbow Horst-Dieter Brähmig njebohi

28. Juni 2017

Wjelelětny wyši měšćanosta Wojerec, Horst -Dieter Brähmig, je zemrěł. Wón běše prěni PDS-OB cyłeje Němskeje.
http://m.sz-online.de/sachsen/horst-dieter-braehmig-ist-tot-3715056.html

Křesćanski socialist, kiž je tež w NDR jako funkcionar SED ewangelskej cyrkwi swěrny wostał, bě ludu bliski intelektualc – a přećel Serbow. Sym jako nowinar jeho do wólbow 1994 a po tym štyri razy słužbnje wopytał.

Ženje njezabudu jeho wuprajenje w swojim běrowje we Wojerowskej radnicy srjedź dźewjećdźesatych lět k přichodej wudobywanja brunicy: „Jeje čas je nimo. A to je derje tak. Dokelž nochcemy serbsku kulturnu krajinu dale ničić.“

Wowči dialog 😎

27. Juni 2017

„Praj jemol, je to wjelk?!“
„Hłupa koza, to je tla dwunohač!“

(Přełožk njeje awtorizowany. Štóž na tym dwěluje, njech so na Radworskim gmejnskim zarjedźe wobhoni, wšako je knjez Baberška eksperta za temu wowcy a wjelki.)

„Papa, čakaj!“ – serbske A-dżěći 😊 jako pycha festiwala „Łužica“

26. Juni 2017

Na festiwale chodźi drje čłowjek prěnjotnje programa dla, ale druzy ludźo w připosłucharstwje su tež kedźbnosće hódni. Njeměnju wosebje wupikanych typow, wšako mi so načasny narcizm wostudźi. Nawopak: Sobotu wječor rěkaše kaž kóžde druhe lěto na Chróšćan dworach serbsku normalitu jako masowy zjaw 😊 dožiwjeć.

Na přikład małeho hólca, kiž wótře wołaše: „Papa, čakaj!“ Nan bě so w mjerwjeńcy něšto metrow před synom zhubił, tohodla so małki boješe. Nihdźe a nihdy njeje telko přirodnje serbowacych dźěći kaž na folklornym festiwalu w Chrósćicach. Wón je faktisce wšoserbski zjězd přichoda, dokelž tule so pod lětnim wječornym njebjom nimo druhich zajimcow wulki dźěl serbowacych Serbow zetkawa.

Samozrozumliwe, takrjec instinktiwne serbowanje dźěći je najwjetši a najwažniši wukon kubłanja w narodnym duchu. Sławu wšěm, kotřiž to doma wšědny dźeń wukonjeja. Woni tworja rjap ludu. Tohodla jim słuša maksimalna podpěra kubłanskeje politika Domowiny a stata. Dokelž bjez sylneho kruteho jadra faluja ći, kotrymiž móžeš rěčnych přidružnikow přidružeć.

Nimo lokalneho, regionalneho a krajneho ramika su w dobje globalizowanja tež europske ramikowe wuměnjenja wažne. Tohodla smy w FUEN a podpěrujemy wšě prócowanja wo wjac prawow při nałožowanju tak mjenowanych mjeńšinowych rěčow. Podpisajće prošu europsku wobydlersku iniciatiwu Minority SafePack:

https://ec.europa.eu/citizens-initiative/32/public/index.do

„Łužica 2017“ w Chrósćicach

25. Juni 2017

Tajka wulka tołkańca kaž před dwěmaj lětomaj drje lětsa na XII. mjezynarodnym festiwalu w Chrósćicach njeběše, ale dosć wjesołych hosći, mjez nimi wjele Němcow z wokoliny. Hdyž su mormonojo skupiny American Rhythm Folk Ensemble na kóncu samo hosćićelam serbsce zaspěwali (hlej krótkowidejo z poslednim słowčkom, wjac dočinił njejsym, to je přechětř jako překwapjenje přišło 😊), smy so zahoriće ze „sławu“ podźakowali.

Porno mormonam, kotřiž so programatisce tradicionelnym hódnotam wěnowachu, prezentowaše kolumbiska Grupo Folclórico Uninorte takrjec seks pur (widejo) 😎. Rjenje běše tohorunja wotměna mjez hołkom a tołkom na wulkich dworach a měrniwej atmosferu kaž na Kolic dworje (widejo).

Telko serbskich skupin w programowym zešiwku – to je špihel kulturneje dynamiki ludu: Smjerdźaca, Sprjewjan, Wudwor, Přezpólni, Ćisk, Chróšćanscy muzikanća, Nimsko-serbski ansambel Chóśebuz, Rejowański ansambel Pśijaśelstwo, Ludowa rejowańska kupka Stara lubosć, Słowjanske barwy, SLA, Madstep, Měrćin Weclich, Sorbian Art Trio, Serbska reja.

W Hochozy – na folklornym festiwalu

25. Juni 2017

Runja wjele druhim Hornim Serbam smy sej lětsa mjezynarodny folklorny festiwal tež w Hochozy popřeli. Dźakowano naspomnjenju delnjoserbskeje wsy wosrjedź lěsa sewjernje Choćebuza w knize Jurja Kocha mam dawno duchowny počah k tutej městnosći. A wot pjatkowneho wječora tež dušiny 😊.

Zo móžach so z nimale wšěmi swojimi přećelemi a znatymi z Delnjeje Łužicy zetkać, sym wězo wočakował. Tak a tak bě wjele delnjoserbsce słyšeć, manifestacija žiweje rěče – tež z erta ludźi, kotřiž budu hišće dlěje na zemi hač ja 😉.

Dožiwjachmy dopokaz serbskeho skutkowanja za mjezynarodnosć w „prowincy“. Po našim přichadźe jako prěnich kolumbisku skupinu Grupo Folclórico Uninorte, pozdźišo mjez druhim (hlej widejo) derwišow Art Appreciation Folk Dance Group z Egyptowskeje, kotřiž běchu wjele přihladowarjam z wjerškom tutoho lětnjeho wječora.

Kulinariski program běše bliskeho Picnja dla z rybjacej kołbasu a rybjacymi rězkami tohorunja wusahowacy. Serbske a braniborske chorhojčki (tak wupada a funguje Europa regionow 😎) su nas přewodźeli. Atmosfera na dworach měješe přijomny přitulny wulkoswójbny raz, tohodla je za nas jasne: Za dwě lěće zas! Dźak Domowinskim a lokalnym akteram za tónle přewšu měru radźeny cyłołužiski podawk!

K infrastrukturje hišće přispomnjeni: Piwo so tule wosebje wotputanje pije, přetož je wjele decentralnych nuznikow 😊. Wězo bych sej přał, zo móžeš přichodny raz tež „kołbasu“ skazać a nic jenož – „Bratwurst“.

Transport běše i-dypk: Běchmy w busu turistiski připlack rejowanskeje skupiny Smjerdźaca. Lóštne spontane spěwanje hólcow a holcow je dołhu jězbu kulturnje perfektnje wobrubiło – wosebje na dompuću 😊. Zapłać Bóh!

Serbšćina w krajnym sejmje jara žiwa

22. Juni 2017

Nichtó drje dokładnje njewědźeše, čehodla je runje nětkole sakska koalicija CDU a SPD namjet „Serbsku rěč a kulturu dale konsekwentnje spěchować“

http://edas.landtag.sachsen.de/viewer.aspx?dok_nr=9816&dok_art=Drs&leg_per=6&pos_dok=0&dok_id=undefined

do krajneho sejma zapodała, ale prěni efekt dźensnišeje debaty wo tym bě: Telko serbšćiny na našej plenarnej žurli ženje njeběše. Štyrjo rěčnicy – Alojs Mikławšk a Marko Šiman (wobaj CDU), Hajko Kozel (Lěwica) a Franziska Schubert (Zeleni) su ze serbskim rěčnym wotrězkom wustupowali.

Kusk spodźiwnje běše, zo klučowy projekt spěchowanja serbšćiny w Hornjej Łužicy, předwidźane znowazałoženje serbskeje rěčneje šule, w namjeće ze žanym słowčkom žanu rólu njehraje, byrnjež Budyski serbski zapósłanc Šiman ju minjene měsacy wospjet zjawnje a na dźěłowej runinje tematizował. AfD njeje šansu wužiwała, wo konserwatiwnych wolerjow wabić, ale sej žadała skónčnje zhonić, kelko Serbow docyła hišće je, dokelž je po měnjenju AfD spěchowanje Serbow tak a tak njeefektiwnje.

Srjedu Deutschlandfunk live w Chrósćicach

20. Juni 2017

NOWINSKA INFORMACIJA DOMOWINY

Jutře live-wusyłanje sćelaka Deutschlandfunk z Chrósćic – zajimcy witani

Dźeń do zahajenja XII. mjezynarodneho folklorneho festiwala „Łužica“ wusyła sćelak Deutschlandfunk jutře, 21. junija, wot 10.10 do 11.30 hodź. z farskeho dwora w Chrósćicach swoje live-wusyłanje „Länderzeit“.

Kaž redakcija zdźěli, chcedźa pokazać, kak wobydlerjo we Łužicy swoju kulturu, wuměłstwo a rěč haja a kajku rólu to za jich zwjazanosć ze swojej domiznu hraje. Tutu temu ma redakcija tež za připosłucharjow w druhich zwjazkowych krajach za zajimawu. Nimo toho chcedźa pokazać, kak je móžno, wohroženu rěč zachować a přichodnym generacijam posrědkować a kak maja so etniske mjeńšiny škitać.

Rozmołwni partnerjo budu jutře mjez druhim Chróšćanski farar Měrćin Deleńk, direktorka Budyskeho Serbskeho muzeja Christina Boguszowa, serbscy młodostni Antonija Wjeselic, Pětr Dźisławk a Lukaš Kólca kaž tež předsyda Domowiny Dawid Statnik.

Wšitcy zajimcy su wutrobnje přeprošeni, so jutře jako přihladowarjo live-wusyłanja z Chrósćic wobdźělić.

Borbora Felberowa/Bärbel Felber

nowinska rěčnica/Pressesprecherin,
wosobinska referentka předsydy/pers. Referentin des Vorsitzenden

Domowina z. t./Domowina – Bund Lausitzer Sorben e. V.

Póstowe naměsto 2/Postplatz 2, 02625 Budyšin/Bautzen

felber-pr-domowina; www.domowina.de