Jednotnu serbšćinu za cyłu Łužicu tworić

Korejscy rěčespytnicy chcedźa wotbłyšćowanje pačenja kraja w maćeršćinje přewinyć (hlej wurězk z dźensnišeho ND). Tajki projekt móhli do Łužicy přewzać, wšako je wona tež administratiwnje do sewjerneho a južneho dźěla pačena – a to samo hižo lětstotki dołho.

Tohodla so pod tutymi politiskimi wuměnjenjemi nastatej warianće serbšćiny delnjo- a hornjoserbšćina mjenujetej. Widźimy tuchwilu w něhdyšej Juhosłowjanskej, kak woni z přičin narodneho separatizma nowe „statne rĕče“ wuwiwaja a rozdźěle wunamakaja.

Tež serbski lud, runja němskemu potomnicy nic jenož jednoho kmjena, njech přichodnje swoje regionalne dialekty pěstuje – ale čehodla nic na zakładźe perspektiwisce jedneje serbšćiny? Z nowym narodnym centrumom we Wojerecach, drje w Sakskej ležacych, ale prjedy Choćebuskemu wobwodej přisłušacych.

Tajki linguistiski projekt je atraktiwniši hač někajke wadźeńcy wo jednotliwych pismikach. Potom njezmějemy hižo debaty wo statusu regionalnych wariantow kaž nětkole; slepjanšćina na přikład budźe dospołnje runoprawna z dotalnymaj hornjo- a delnjoserbšćinu.

2 Antworten to “Jednotnu serbšćinu za cyłu Łužicu tworić”

  1. antihybridologowka Says:

    Slepjanski dialekt je nimale na prawdu božu wotešoł. Štó budźe so za tutu nowu Slepjansku rěč zasadźować a štó budźe tutu rěč wužiwać? Hišće 10-20 ludźi rěči tutón dialekt.

    Delnjoserbšćina ma hišće někak 200 maćernorěčnych a něhdźe 500 rěčacych (Powołanscy Serbja a hybridologojo) delnjoserbšćiny jako druhu rěč, kotrymž su jenož dźěłowe městna wažne. Jim je smórže, kak ta delnjoserbšćina wupada. Jich delnjoserbšćina je skomolena němčina ze słowjanskimi słowami, w kotrejž so ani rozdźěl mjez adwerbom a adjektiwom, frazeologija, ani fonetika a morfologija prawje respektuje. Na schadowance před někotrymi lětami njejsym žanoho jeničkeho šulerja widźała, kiž serbsce rěči. Rewitalizacija je zwrěsćiła, za to njeje trjeba, žane studije přewjesć. Prof. Lewaszkiewicz je to derje w swojim přinošku wopisał. Za 20 lět rewitalizaciskeho procesa njejsu so kmanosće pedagogow w DŁ polěpšili, ale pohubjeńšili.

    Nastupajo twoju jednotnu rěč dawa jedyn wulki problem a to je:
    Wojerowski dialekt serbskeje rěče by drje móhł być zakład jednotneje rěče, ale hdźe widźiš nošerjow tutoho dialekta? Ja žanoho njeznaju. To rěka, zo so tutón mortwy dialekt njepřesadźi.

    Ta jenička rěč, kiž móhła so wšudźe přesadźić, je hornjoserbska spisowna rěč. Delnjoserbscy maćernorěčni njebudu so tak a tak spjećować, dokelž su Ü-70.

  2. slawist Says:

    Staw korejšćiny móžeš ze stawom němčiny mjez 1945-1989 přirunać.
    Němčina z BRD a DDR bě ta samsna rěč. Tola stworichu so nowe słowa, kiž zwisowachu z nowym (socialistiskim) towaršnostnym systemom. Ze zjednoćenjom dweju němskeju statow su so tute słowa pozhubili. To samsne płaći za korejšćinu, jenož zo njeje korejšćina zjednoćenje dweju korejskeju statow (hišće) dožiwiła. Potajkim jedna so přewažnje wo rěčne leksikaliske nowostki we wobemaj rěčomaj.
    Delnjo- a hornjoserbšćina njerozeznawatej so jenož leksikalisce, ale tež morfologisce, syntaktisce a fonetisce. W delnjoserbskej rěči dawa zdźěla hinaše deklinaciske mustry, supinum, imperfekt a aorist so zwjetša njewužiwatej, fonetika ma słowjanski přizwuk, słowoslěd je swobodniši a mjenje němski hač tón hornjoserbski a leksika je tež hinaša.

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s


%d Bloggern gefällt das: