Serbja maja přećeljo wjelka być

Mje jara rudźi, hdyž awtochtoni ludźo-Setbja tak přećiwo swojim awtochtonym zwěrinskim bratram-wjelkam zachadźeja. Wone porno psam dźěći ani njekusaja ani njemorja. Ale ludźo radšo do čerwjenawki wěrja hač zo bychu fakty na wědomje brali.

Po měritkach tež serbskeje hysterije přećiwo wjelkam bychmy nimale wšě psy rizika dla zatřělić dać dyrbjeli. Prašejće so knjeza Kokle: Poprawom kóždy dźeń je něhdźe w Němskej čłowjek z woporom někajkeho psa.

A potom tuta kampanja wowcow dla: Chce něchtó liški wutupić, dokelž su wone wohroženje kóždeho kurjenca? A wina na njeličomnych zakusanych kokošach… Ja chcu pola Salmana w Šešowje pocpule zaměstnić – dyrbju so tež najprjedy wo wobšěrne škitne naprawy starać.

Wjelk so wo strowy lěs stara, kaž hižo stare ruske hesło praji. Zo je dale a wjac črjódow we Łužicy, njetrjechi: Dorost dawno do směra zapada ćaha. Tohodla bych sej přał, zo so my Serbja jako přikład druhim z wjelkom aranžujemy. Njebudźće bojazliwi runja wowcam 😎.

23 Antworten to “Serbja maja přećeljo wjelka być”

  1. Haaraald Says:

    Prašenje 1:
    Kotru konkretnu lěpšinu maja
    a) wobydlerjo Łužicy
    b) Łužica jako kulturna krajina
    c) Serbstwo
    wot zasydlenja a rozšěrjenja wjelka?

    Prašenje 2:
    W kotrym poměrje steja tute lěpšiny ke kwantifikowanym škodam, kiž wjelk nadźěła?
    http://dernewsticker.de/news.php?title=Wolfssch%E4den+nehmen+rasant+zu&id=358964&i=rmnrhd

    • piwarc Says:

      Žanu.To tema njeběše.

      • Haaraald Says:

        Na, ju, luby Piwarco.
        Ty namołwješ, zo měja Serbja być přećeljo wjelka. Ja pak nochcu być přećel něčoho, štož mi jenož škodźi ale žane lěpšiny nima.
        A nimo toho ty sam w třećej sadźe prajiš, zo dyrbja ludźo radšo fakty na wědomje brać. Tuž to činju, resp. so za faktami kiž hišće njeznaju (mjenujcy: kotre konkretne lěpšiny wjelk přinjese) woprašam.
        Potajkim: ju, je cyle jasnje tema.

  2. Pětr Says:

    Pola (wohroženeje abo njewohroženeje) dźiweje (!!) zwěriny wo lěpšinach a njelěpšinach přemyslować abo je spytać naličić, je hotowy kał. Su wohrožene ptaki a insekty, kiž na někajkej čerwjenej lisćinje NABU steja za nas „wažne“? Wězo nic, ale tyja biodiwerziće. Kóždolětne škody přez wudry a kormorany w rybarstwje abo kuny na priwatnych awtach su hoberske, to je wjelk hišće jara zlutniwy rubježnik …

    • Haaraald Says:

      Ně, je runje nawopak: NIC wo lěpšinje a njelěpšinje přemyslować je kał. Dokelž hewak njemóžeš na něšto reagować, dokelž njewěš ka jednać. Kóžde (wědomje) jednanje trjeba najprjede hódnočenje situacije, dokelž hewak njewěš, što činić.

      Nimo toho njeje technisce docyła móžne wo jednej wěcce přemyslować a při tym nic lěpšiny a njelěpšiny wotwažić. To so stanje bjezposrědne a husto njewědomje.
      Tak na přikład samo Wy, kiž Wy prajiće zo je wotwažowanje kał, njemóžeće hinak hač sam wotwažić – hewak njebychće biodiwerzitu a škody na awtach přospomnił. To je hódnočenje a z tym šće wotwažował. Wy šće potajkim, po swójskej definiciji, „kał“ činił.

      Jeli wjelk njepřinjese njelěpšiny, abo jeho lěpšiny njelěpšiny wuwaža je jara witany. Jeli pak přinjese wjacy škody hač wužitka dyrbimy přemyslować kak z nim wobchadźeć, zo móžemy škody miniměrować. A jeli přinjese jenož škody a docyła žane lěpšiny, potom dyrbi třělenje tež jedna opcija wostać.
      Tohodla so prašam za lěpšinami, dokelž poprawom nochcu wjelka wutupić. Ale žěni njedóstanu jasne wotmołwy.

      • piwarc Says:

        Hdyž poskać njechaš, wotmołwu njesłyšiš: respekt před Božej stwórbu (biodiwerzitu). Pěstuješ njekřesćanski utilitarizm. Zakład našeje podjanskeje filozofije je njesebičnosć.

      • Haaraald Says:

        Skónčnje rozmołwa so do jedneho směra wuwiła.
        Potajkim, hdyž će prawje zrozumju (koriguj mje jeli wopak ležu) wobstej twój argument z dweju dźělow:
        1) Wjelk je dobry za bidiwerzitu a 2) biodiwerzita je zasadnje něšto dobre a wažne.

        1) ja zasadnje přihłosuju, tež hdyž sym měnjenja zo by lěpje było, hdyž bychmy dokładnje wědźeli kak a w kotrej měrje wjelk woprawdźe łužisku biodiwerzitu wobwliwuje.
        Ale 2) ja nochcu přihłósować. Biodiwerzita njeje žana absolutna lěpšina samo na sebi. Nichtó sebi njepřeje, zo so pola nas strašne zwěrja, jědojte rostliny abo někajki wutupjeny bacillus kaž wosypicy (Masern) zaso zasydla. Wšitko to je biodiwerzita. Wona njeje sama za sebje dobra ale tež nic hubjena. Wona je neutralna. Jeje hódnota so z toho postaji, kak čłowjek z njej jedna.

        Rjenje zo woliš analogiju Božeje stwórby.
        Samo Swjate pismo mjenujcy pokaza, zo njeje Boža stwórba přeco jenož dobra.
        Had je tež Boža stwórba. A tola je přičina našeho wuhnaća z paradiza – Bóh sam hada za to chłosta a zacpěwa. Abo što je z 10 bědami z kotrymiž Wótč Egyptowsku chłosta? Wone su tež Boža stwórba. A njeje čłowjek tež Boža stwórba? Na jednym boku „króna stwórby“, na tamnym boku najhórše stworjenjo, tak zo Bóh samo raz cyłe čłowjestwo (hač na Noah a swójbu) wutupi.

        Pytaš pak za symbolom perfektnosće w Swjatym pismje storčiš na zahrodu. Zahroda pak njeje dźiwi lěs, ale je hladana. Wona je perfektna balansa mjez chaosom přirody (kiž woznamja rozróst, ale tež strašnu móc ’njeznateho‘) a porjadom čłowjeskeje kultury (kiž woznamja kultiwaciju k swójskemu a powšitkownemu wužitkej, ale tež wutupjenje žiwjenja). Prawa měra mjez ekstremaj je puć k zbóžnosći.

        Potajkim je wažne zo tutu prawu měru namakamy, a to je mój jenički wotmysł na tutej debaće. Moja pozicija k prašenju wjelka je hišće neutralna (chilam pak skěrje ma stronu wobmjezowanja wjelka).
        Strona kritikarjow wjelka je jenička, kiž wobstajnje mjenuje jasne a kwantifikowajomne fakty. Tamna strona „přećelow wjelka“ nima žane konkretne argumenty, ale pokaza jenož na difusne, abstraktne koncepty kaž biodiwersitu. Chcu pak rady argumenty wobejoch bokow přirunać, wotwažować – prawu měru mjez ekstremami namakać! Nažel pak jedyn bok cyle jednorje njeje kmany k tomu konkretne argumenty nastajeć.
        A tohodla stajach spočatne prašenja: wuchadźam z toho zo něšto wěš, štož ja njewěm a chcych kusk za tym „hrjebać“. Nažel hač dotal te samsne njesubstancielne frazy a moralizacije kaž wšudźe druhdźe tež.

        Ale znajmjeńša bě twoja wotmołwa něšto na kotrymž móžemy natwarić. Tež hdyž by lěpje było, hdyž sebi přichodny raz twoje njewěrne a polemiske wumjetowanja za sebje ždźeržiš.

      • piwarc Says:

        Cyle wothladajo wot toho, zo ze starozakonskimi wobrazami docyła k ciwilizaciji njepřińdźeš a načasne, z trawusyčakom kastrěrowane łuki ničo z klasiskej zahrodu w twojim zmyle činić nimaja: Porno twojim hrózbnym přikładam wjelk čłowjekej direktnje nješkodźi, ale plahowarjam wowcow wušparanja wobradźa – runja liški wobsadce kurjencow. A ličba wowcow w Němskej dawno z hospodarskich přičin woteběra – zo je na přikład bohužel dale a mjenje wandrowskich wowčerjow, njeje wina wjelka. Dźiwi wjelk so wo strowši lěs stara, wšako je přewjele sornikow. Dokelž je přewjele hóntwjerjow, kotřiž dźiwinu hižo zaměrnje njereguluja. To wšo je dawno zjawnje znate. Hdyž njepřećeljo wjelka pak fakty na wědomje brać nochcedźa, ale radšo apokalyptisce dramatizuja, hač bychu so wjelki jutře do pěstowarnje zadobyli, rozswětlerstwo hižo njefunguje. Kaž tuchwilu pola druhich towaršnostnych temow tež. Hłowna wěcka, zo mamy za kóždy problem winika, kotrehož dyrbimy potom skóncować. Haj, to je nawrót do časa stareho zakonja, jako njeby Jězus z rowa stanył.

      • Haaraald Says:

        Luby Piwarco, cyle wothladajo wot toho zo je zmylk hódnotu stareho zakonja podhódnočić (njeje připad, zo wopřija Swjate pismo stary a nowy zakoń),
        cyle wothladajo wottoho zo je natwar (a rozpad) ciwilizacije jedyn z centralnych tematow stareho zakonja (štož twoje wuprajenje ad absurdum wjedźe),
        cyle wothladajo wot toho, zo njejsym docyła wo načasnych łukach rěčał (a sprawne prajene tež cyle njezrozumju što z tym rjec chceš):

        Haj, hač dotal wjelk čłowjekej w Němskej njeje direktnje škodźał, znajmjeńša nic w Němskej. A skónčnje raz konkretne lěpšiny wjelka mjenuješ – haleluja. Wězo, by rjenje było, hdyž by je mohł kwantifikować, abo snano samo dokłady za twoje wuprajenja mjenować (wosebje to z tymi hońtwerjemi by rady dokładźene měć chcył). Ale dyrbju tebi rjec: ně, to njeje dawno znate. Ja to k prěnjemu razej słyšu. A ja chcu ći wěrić. Čehodla dyrbimy najprjede tajke retoriske wokopuće kročić, čehodla njejsy mohł to hnydom rjec?

        A theologiski disput budźemy druhi raz dalewjesć, henó?

      • piwarc Says:

        Potom čitaj – Google přeco dale pomha, jenož jedyn z njeličomnych pokiwow: https://chwolf.org/woelfe-kennenlernen/oekosystem/wolf-als-teil-des-oekosystems
        Haj, ale hižo na šuli wuknjech, so dyrbiš stary zakoń přez nawoči noweho zakonja čitać.

      • Haaraald Says:

        Wutrobny dźak za link. Sym sebi přečitał a dyrbju rjec, zo je moje mjenjenje hižo tróšku změniło.
        Nadźijam so pak, zo swój pokiw tež sam wobkedźbuješ a tež za „kontra“-stronu googleweš?

        A ja sym w šuli wuknył, zo je lěpje sebi sam přez swójske slědźenje měnjenje stworić, dokelž tež šula přeco prawje nima.
        A po šuli sym wuknył, zo chceš-li něšto zrozumić dyrbiš „ad fontes“ – k žórłam. Tuž to tež činju, dalokož zamóžu.

      • piwarc Says:

        A tu na stronje Serbskeho rozhłosa aktualnu rozprawu w zarjadowanju w Ralbicach-Róžeńće widźimy, kotraž dopokazuje, zo dotalna strategija škaranja přećiwo wjelkej jenož frustraciju produkuje: https://www.mdr.de/serbski-program/rozhlos/aktualne-prinoski/audio-803862.html

      • Haaraald Says:

        Also, ja tutón rozprawu hinak interpretuju. Jako přičinu frustracije wusłyšu skěrje, zo dyrbja ludźo dale čakać, prjede hač je Brüssel rozsudźił.
        Wot někajkeho „škaranja“ ničo z rozprawy wusłyšał njejsym. Što da z tym měniš?

      • piwarc Says:

        Hdyž ludźom – hłowna wěcka, wšitcy hromadźe přećiwo wjelkej – po hubje rěčo napowědaš, zo nas přirodoškit zajimować njetrjeba, potom tajku frustraciju zawinuješ. Sym dźakowny, zo mamy EU, kiž iracionalnosć, separatizm a sebičnu błudnosć přiwisnikow orbanizacije Europy wobmjezuje.

      • Haaraald Says:

        W tutym nastupanju smój napřečiwneho nastajenja.
        To mje sprawne prajene dźiwa, njejsy raz prajił zo sy libertarny?

      • piwarc Says:

        Haj. Zatřělenje mylaka priwatneho porjada njeje wuraz swobody 😎. Kóždy, kiž so tróšku z naležnosću zaběra, wě, zo třělenje jednoho wjelka na riziku za wowcy ničo njezměni. To je faktisce hibanje za skóncowanje wjelčeje populacije we Łužicy – Radworski wjesnjanosta Baberška, tež wokrjesny politikar, je to jónu cyle jasnje zwuraznił: Wjelk so njehodźi do našeje „kulturneje krajiny“. To je potajkim kulturny bój 😊. A CDU při tym zaso přěhraje, wšako AfD hišće radikalnišo přećiwo wjelkam wustupuje. Ale tute ruinozne wubědźowanje mjez nimaj z połnej paru běži, po tym zo je moderatniši rozumniši Tilich preč. Tón njeby tajkule kekliju kaž Kretschmer činił. Najprjedy dźěše na kóšty ćěkancow, nětk wjelkow – a jutře?

      • Haaraald Says:

        Okay, ja absolutnje njezrozumju što dokładnje sy chcył z tym rjec, abo što ma to z mojim poslednim komentarom činić. Snano je lěpje hdyž raz wosobinsce wo temje rěčimy a nic přez syć. Nic zo so njedorozumimy.

      • piwarc Says:

        To drje ja njerozumju, přetož by jako stawiznar strukturelnje jednotliwy pad přesahowacy myslić dyrbjał, ale kóždy ma em hinaše mustry za analyzowanje swěta. Přeju Ći rjany kónc tydźenja!

  3. Alduin Says:

    Snano je mudrje na argument přirodoškitarjow hladać a jón k wutrobje brać, zeleni mjenujcy často praja, zo su ludźo w prjedawšich časach tež z wjelkom žiwi byli, dokelž su so na njón nastajili. To drje móžemy dźensa tež. A to runje tak kaž woni.
    Ludźo tehdy njejsu wjelki na kóždy pad hač do smjerće honili, ale kóždeho zatřělili, kiž je z lěsa přišoł a stadła nadpadnył. Na da čińće tak a budźće z wjelkom žiwi, kaž ludźo tehdy. Ći, kiž w lěsu wostanu (abo stadła njenapadnu) wostanu žiwi. My doma tež jenož tych liškow zabiwamy, kiž kokošam přińdu. Zbytk njech je w lěsu a druhdźe žiwy. To je za wobě stronje sprawnje.

    • Haaraald Says:

      Problem na tym pak je, zo w přećiwku k prjedawšich časach njeje dźensa wjace samozrozumliwje, zo maš třělbu abo druhu bróń doma. A to je tež derje tak.
      Ale zasadnje sebi myslu zo maće prawje. Najlěpši puć je, so sam na situaciju přiměrić. Ale njeje to poprawom zakazane wjelka zatřělić? Abo sym to wopak informowany?

    • piwarc Says:

      Jeli budźe zaso dosć wulkeho stroweho lěsa, kiž njeje plantaža jehlinowcow, móžemy sej twoje rozrisanje přemyslować. Z tuchwilnej „kulturnej krajinu“ tak a tak čłowjek we Łužicy dołhodobnje – za sta lět – přežiwjeć njemóže. Potajkim sadźće najprjedy lisćowcy, tworće wjac žiweho drjewa, kaž to serbsce tak rjenje rěka, potom móža mojedla naši potomnicy wjelki na polach třěleć 😎.

      • Alduin Says:

        Na da tla mamy našu wotmołwu, kiž připódla samo powšitkowne přirodne problemy rozrisa.
        A třělić ma to potom hajnik po změnjenym zakonju.

  4. piwarc Says:

    W podłožkach dźensnišeho stronskeho zjězda we Wojerecach sym jako wopodstatnjenje podpěry „přirodneho nawróta wjelka“ tekst nadešoł, w kotrymž su poprawom wšě argumenty přećiwo načasnej hysteriji tež w Serbach plawsibelnje zjimane. Tohodla sym tekst jako dokument do nastawka tutoho posta přiwzał (hlej horjeka).

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden /  Ändern )

Google Foto

Du kommentierst mit Deinem Google-Konto. Abmelden /  Ändern )

Twitter-Bild

Du kommentierst mit Deinem Twitter-Konto. Abmelden /  Ändern )

Facebook-Foto

Du kommentierst mit Deinem Facebook-Konto. Abmelden /  Ändern )

Verbinde mit %s


%d Bloggern gefällt das: