Archive for the ‘demonstracija w Berlinje’ Category

Sprawnosć w Serbach sej hinaše rozdźělenje serbskich pjenjez žada

19. Dezember 2009

Dźěłarnistwo ver.di Sakskeje je sej kulojte blido k financowanju serbskeje kultury žadało:
http://www.moz.de/index.php/Moz/Article/category/Kultur/id/308588. Mam wězo zrozumjenje za to, zo so dźěłarnicy wo swojich čłonow w serbskich institucijach, wosebje w SLA a NSLDź staraja. Ale namjetowane kulojte blido je w tuchwilnej situaciji wopačny instrument. Porno zaćišćej, kiž je ver.di sposrědkował, njeje nětk financowanje serbskeje kultury wohrožene, nawopak: Mamy płaćiwe financne zrěčenje zwjazka, Sakskeje a Braniborskeje, za kotrež su Serbja z wulkimaj demonstracijomaj w Budyšinje a Berlinje wojowali a z kotrymž su wšitcy poměrnje spokojom.

Wězo dyrbimy so dale wo wurunanje inflaciskeje raty prócować, ale tuchwilu – w fazy recesije – njeje inflacija z problemom. So wě, zo maja institucije stupace tarify sobudźěłaćerjow wobkedźbować, ale to njejsu nowe, ale dawno znate fakty. Je samozrozumliwa wěcka, zo chcemy my Serbja wjac statneho pjenježneho spěchowanja měć, hižo hladajo na wjele dawkow, kotrež płaćimy – prof. Vogt je, kaž sym hižo w blogu naspomnił, k tomu wšo na dypk přinjesł. Njedźiwajcy toho mamy k wědomju brać, zo chce stat Sakska hač do lěta 2019, doniž solidarny pakt njewuběži, kóžde pjate městno w zjawnej słužbje wottwarić, a zo zwjazk za klětuši etat sto miliardow eurow noweho dołha trjeba. Před tajkim pozadkom njeje runjewon prawdźepodobne, zo so na cyłkownym serbskim etaće wjele změni.

Haj wšak, „hladajo na miliardy eurow k pomocy bankam su porno tomu jeno małe sumy k zawěsćenju serbskeje rěče a kultury trěbne“, ale na tych miliardach njeje Załožba za serbski lud wina – a tež Marko Suchy wosobinsce nic … W aktualnym rozestajenju mjez Załožbu a NSLDź a SLA njeńdźe wo sćěhi pobrachoweho financowanja serbskeje kultury, ale wo sprawne rozdźělenje serbskich pjenjez mjez Serbami! Tomu pak chce ver.di wočiwidnje zadźěwać, přetož potrjechene institucije zapřijeć rěka faktisce: Njech wšo tak wostanje, kaž je. Institucije su žiwe, a projektow budźe hišće mjenje.

Tule dźe eksaktnje wo tutej prašeni: Móža komunalni nošerjo dale dźěl swojeje zamołwitosće za dźiwadło w stolicy Hornjeje Łužicy na serbsku załožbu wotsuwać, kotraž němske měšćanske dźiwadło sobufinancuje město toho zo by so do wjac modernych serbskich kruchow inwestowało? Štóž ma kritiku na tajkim znjewužiwanju serbskich pjenjez za nacionalizm, tomu njemóžeš pomhać. A hladajo na SLA je cyle jasne, zo njeje tuta institucija za serbsku rěč (!!!) a kulturu tajka wažna, zo smě wona dołhodobnje třećinu (!) etata Załožby za serbski lud přetrjebować. Intendant wojuje wo swój status, ale tule njeńdźe wo „pochłostanje“, ale sprawne rozdźělenje.

John F. Kennedy a Lutz Hillmann při Braniborskich wrotach srjedź Berlina!

9. Juni 2008

Sćěhowacy tekst je Połobjanej piwarcej “Łužiski” připósłał:

 

Čłowječe, hdy by mi za šulski čas w předmjeće stawizny štó prajił, zo matej lětoličbje 1963 a 2008 něšto zhromadneho. Bych prajił, w twojich mozach něšto prawje njetukoce. A tola. Dočakach so dnja, zo so sta, štož žane wucho hišće njeje słyšało, žane wóčko nihdy widźało a žadyn nós – hač Kamjenčanski, abo Kukowski – njeje nuchało. Tónle dźeń běše jara horcy dźeń a jězba z Budyšina do Berlina běše smjerć napinaca.

 

Město, stolica Berlin běše to městno, hdźež měješe so dźiw stać, powěsć do swěta pušćić. Hdźe hewak, hač při Braniborskich wrotach. Tam běše na tutym dnju zjawnosć, tam běchu medije z někotrych swětow přichwatali, z wjacorymi pisakami, z wjele mikrofonami a a hišće wjac kamerami.

 

Napjatosć cyłeho podawka běše někak hižo na Awgusta Bebelowym naměsće čuć, tam hdźež so Serbja a jich sympatizanća z Budyšina a z wokolnych wsow, z dwurěčneje Hornjeje, srjedźneje a Delnjeje Łužicy hromadźachu. Hižo tam ležeše, tak rjec: wisaše něšto w lófće. Nimale kóždy to začuwaše, chcył twjerdźić, ale žadyn so k tomu njewupraji, dokelž njewědźeše, što to je, štož tam w lófće ležeše abo wisaše.

 

Nó haj a potom při Braniborskich wrotach po někotrych dobrych rěčnikach z wubranymi słowami zhromadźenemu ludej stupi Lutz Hillmann na jewišćo a po dlěšim času powědanja bjez koncepta, skoro na kóncu přeradźi, zo je sej tež něšto na cedlu napisał … Znajmjeńša muž słowa a jewišća swoje powědanje skónči prajo, „dass vor vielen Jahren der amerikanische Präsident John F. Kennedy an dieser Stelle sagte: ich bin ein Berliner – in Abwandlung dieser Worte möchte ich hier und heute sagen: Ja sym Serb.“

 

Hladajo do mjezwočow a słyšo na přiklesk bych prajił, zo šwarny dźěl publikuma jemu prawje njerozumješe, někotrym samo něšto do nosa zjědźe …  

 

Łužiski

 

JFKennedy je z tutej sadu zakónčił swoju narěč dnja 26. junija 1963 před radnicu w Berlinje-Schönebergu, składnostnje 15. róčnicy  załoženja „Luftbrücke“. Cyła sada: Před dwajtysac lětami běše najhordozniša sada ‚Ja sym Romjan‘. Dźensa, w swěće swobody, rěka hordozna sada ‚Ja sym Berlinjan‘.   

Prěnja serbska demonstracija w němskej stolicy

29. Mai 2008

Po powěsćerni ddp je popołdnju štyrista Serbow, mjez nimi někotři w narodnej drasće, w Berlinje „přećiwo skrótšenju přiražkow“ demonstrowało. Agentura informuje, zo „słowjanska mjeńšina“ w swojich stawiznach prěni raz w němskej stolicy demonstruje. Manifestacija so skónči před Braniborskimi wrotami.