Archive for the ‘Europeada 2012’ Category

Z Pawkom do přichoda: Politiski wječork serbskeje młodźiny we Worklecach

18. Mai 2013

pawk_1

Serbske młodźinske towarstwo Pawk je na „politainment“ we Worklečan korčmje přeprosyło – a wjac hač dwaceći ludźi je přichwatało, samo dypkownje :-). Naša dołholětna legendarna Njeswačanska korčmarka Marlis je hosćenc we Worklecach přewzała a so na zwučene wašnje wo přijomne ramikowe wuměnjenja starała, byrnjež zetkanišćo hišće z twarnišćom było.

Předsydka Diana Pawlikowa je z krótkim přednoškom do temy „legitimowane serbske ludowe zastupnistwo“ zawjedła a na wšelake formy politiskeho wobdźělenja mjeńšinow po cyłej Europje skedźbniła. Jeje konkluzija: „Kóžda forma ma lěpšiny a njelěpšiny a je wotwisna wot wobstejnosćow jednotliwych krajow.“ Towarstwo – to je tež prawniska forma Domowiny – twori rum za artikulowanje zajimow resp. proces wuměny měnjenjow a zmóžnja trěbny minimalny konsens mjez ludźimi.

Madlenka Kowarjec – jedna z třoch impulsowych referentow na spočatku – je so nazornje wjele konkretnym přikładam wěnowała. Je zajimawe zhonić, zo maja Němcy w Madźarskej komunalne samozarjadnistwo a Samojo w Skandinawiskej hranicy statow přesahowacy parlament. Ale „kóžda mjeńšina dyrbi za so hodźacym modelom pytać“. Wažny je lobbyizm w dobrym zmysle – zasadźowanje za čłowjeske prawa. Městopředsydka Domowiny Judith Wałdźic praješe jako tajka lobyyistka připóznatych awtochtonych mjeńšinow w Němskej, zo dźe předwšěm wo zjawnostne dźěło: politikarjow z naležnosćemi mjeńšinow zeznajomjeć.

pawk_2

Domowina ma jako ciwilno-towaršnostna organizacija swoju legitimaciju přez čłonow, dobre kontakty na wšěch runinach a je akceptowany partner knježerstwa. To su runja předsydce tež wjacori druzy rěčnicy tak zwuraznili. Tomu drje njeje Marko Njek ze swojim prowokantnym stejišćom znapřećiwił (hlej deleka widejo z wurězkom), wón pak chcyše na přirodne fakty pokazować, kotrež su na kóncu za blidom tež z konsensom byli, kaž je so w běhu diskusije wukopało: Serb sy, hdyž – ze swojimi dźěćimi a druhimi ludźimi – serbsce rěčiš, a hdyž to zjawnje činiš, je to zdobom tež tajke něšto kaž politiske wuznaće.

Najlěpši projekt lobbyizma za Serbstwo bě Europeada, je předsyda Domowiny Dawid Statnik přeswědčeny. Wón je so tež wjeselił, zo bě za blidom serbskeje młodźiny we Worklecach šěsć čłonow zwjazkoweho předsydstwa. Što pak je Domwina, so prašeše Guido Budar, kiž je po předsydce porěčał a cyły wječork suwerenje a přeco kusk zabawnje moderował: Institucija abo NGO? Woboje, bě wotmołwa Clemensa Škody, referenta Domowiny za kulturne naležnosće a wukraj. Wón je za realizm wabił: Je přeco wjac idejow hač maš ludźi a pjenjezy za zwoprawdźenje.

Měrćin Wałda z iniciatiwneje skupiny za serbski sejmik je – so na naprašowanje podepřewajo – na woteběrace nałožowanje serbšćiny skedźnił a prajił: Towaršnosć trjeba struktury, hewak wróćokoplowanje indiwiduuma njefunguje. Bosćij Pawlik k tomu měnješe, zo smy Serbstwo w swójbje, z přećelemi a w towarstwach žiwi – „mamy hižo struktury“. Tež Marko Njek njewěri do zwiska mjez politiskej strukturu a wožiwjenjom serbskeje rěče: Němski parlament nikoho k němcowanju nuzuje, a serbski parlament njeby ludźi k serbowanje pohnuł.

„Admistratiwna pomoc město centralizma“ bě facit moderatora wo Domowinje k skónčenju jara radźeneho wječorka. Pawk sam so tuchwilu wo wobnowjenje swojeho sobustawstwa stara, wšako su ći, kotřiž su so wjele lět gratu přimali, mjeztym ze załoženjom swójby zaběrani. Najwjetši čas za nowu generaciju 16-18lětnych młodostnych, serbsku młodźinu dale do přichoda wjesć. Někotrych je wčera wječor hižo było – tohodla praji Piwarc: Zastupće nětk!

http://www.pawk.de/kontakt_s.html

Serbja w DVD-boksy šwicarskeje telewizije z dalšimi 12 mjeńšinami Europy předstajeni

14. November 2012

12_Medienmitteilung_Minderheiten in Europa_international

Nowinska zdźělenka z pokiwom na móžnosć skazanja pola sćelaka, kotryž je tež nas Serbow za čas Europeady wopytał.

Dźeń serbskeje jednoty – „Dźeń Serbow“

2. Oktober 2012

Dźeń němskeje jednoty je 3. winowca, dźeń serbskeje jednoty eksaktnje dźesać dnjow po tym: 13.10.1912 bu třěšny zwjazk Łužiskich Serbow we Wojerecach załoženy. Lětuši swjedźeń k stoćinam Domowiny by dobry nastork być móhł, tónle dźeń kóžde lěto jako towaršnostny wjeršk z wotpwědnymi kulturnymi a politiskimi zarjadowanjemi w serbskej protyce pěstować.

Nic prěnjotnje w formje protokolariskeje winowatosće, ale na přikład jako swjedźeń serbskich towarstwow – Dźeń Serbow – runja ludowemu swjedźenju sakskich towarstwow prěni kónc tydźenja požnjenca, kiž so „Dźeń Saksow“ mjenuje. To zhromadnej identiće bóle tyje hač někajke politiske diskusije abo chwalobne kolokwije, kotrež su něšto za małe mjeńšiny, ale nic za „lud“.

K dnjej Serbow bychu hudźba, dźiwadło, kabaret, reje, bjesada atd. słušeli, ale wězo tež kofejpiće, disko, hrajkanišćo, sport, dosć dobrych kapkow a serbskich kulinariskich chłóšćenkow, předstajenje rjemjeslnikow a lajskich skupinow, wobydlerskich iniciatiwow a politiskich zjednoćenstwow, wězo tež skupiny „Serbski sejmik“. Wšo serbske ma na tajkim dnju swje městno.

Organizacija njech Domowina čini. Wona to – hladaj na Europeadu – najlěpje móže.

Njetrjebawše kontakty abo spomóžne styki – Domowina a FUEN přikład za dobru strategiju

7. Juli 2012

Njedawno bě připódla w Serbskich Nowinach čitač, zo njeje Budyski krajny rada ze słužbnej jězbu do Ruskeje wuspěšny był – žane hospodarske kontakty njejsu so za zawody w našim wokrjesu wuwili. To mje njedźiwa, dokelž dyrbi kóždy sebi samomu adekwatnu runinu skutkownosće namakać, a to su za krajneho radu styki do regionow susodnych krajow.

Zo je nětk samo sakski ministerski prezident w Afghanistanje pobył, je nimo kóštow za zaručenje wěstoty lědma něšto přinjesło, wšako staj za wojakow zakitowanski minister a kanclerka přisłušnaj, kotrajž muži zwjazkoweje wobory prawidłownje wopytujetaj. Dyrbimy bórze wjesnjanostam jězbu k wojakam z jich wsow do cyłeho swěta financować?

Hač su demonstratiwne kontakty z ruskim wulkopósłancom Serbam spomóžne, na tym dwěluju. Wón je wotpósłanc systema Putina, kotryž tuchwilu NGO, njeknježerstwowe organizacije, kotrež tež podpěru z wukraja dóstawaja, nuzuje, sebje same „cuzokrajnych agentow“ mjenować. Myslu sej, zo mamy na swěće dosć demokratiskich přećelow …

Serbam přewšu měru spomóžne kontakty pěstuje na přikład Domowina w syći narodnych mjeńšin pod třěchu FUEN. Bjez tutych kontaktow njeby Europeada we Łužicy była. Mje njezajimuje, kotry jednotliwc je pozdatnje w mjenje Serbow někajkemu EU-funkcionarej w Brüsselu list přepodał. Štož přeco trjebamy, to su praktiske mjezynarodne projekty.

Wjeselu so hižo na přichodnu Europeadu!

24. Juni 2012

Serbska chorhojčka hižo na awće njeje, fanowy šawl zaso w kamorje leži, finale Europeady je nimo. Južnotirolske mustwo, wulki faworit, je w Budyskim stadionje přećiwo Gypsyjam z Madźarskeje, kotřiž nochcedźa so Roma mjenować, ale radšo Cyganjo, 3:1 hrało. Potom běch na swjedźenju štyrcećinow mojeho přećela Rapaka w Erfurće, tohodla mam hakle nětk njedźelu wječor poslednju powěsć wo Europeadźe ze serbskeho wida nachwatać.

Sym wćipny, při kotrych składnosćach so přichodnje wonych njesměrnje wjele módro-čerwjeno-běłych chorhojčkow wužiwa, wšako nochce so nowe serbske sebjewědomje jenož dokoławokoło kopanišćow pokazować. Je přewšu měru krasny tydźeń zhomadnje z narodnymi mjeńšinami z cyłeje Europy we Łužicy był. A wjeselu so na třeću Europeadu, kotraž budźe – wšojedne hdźe so wotměje – dobra přiležnosć za wotměnjacy rjany dowol we wukraju.

„Deutschlandfunk“ wo Europeadźe: http://www.dradio.de/dlf/sendungen/sport/1792191/

„Naš Gomez je Pětr Domaška“ – wo finalnym poselstwje na dnju finala Europeady 2012

23. Juni 2012

Sydomlětny hólc z Róžanta je w dźensnišm wudaću Sakskich Nowin nowy standard serbskeho narodneho wědomja na dypk přinjesł: „Naš Gomez je Pětr Domaška.“ Tak su to z nowiny k snědani němscy a serbscy čitarjo na dnju finala Europeady w Budyšinje zhonili. Sakske Nowiny su runja Katolskemu Posołej wo nowym kulće serbskich dźěći informowali, na drasće abo dalšich podkładach awtogramy koparjow wubranki zběrać, kotraž je dawno serbske narodne mustwo.

Na tute wašnje je mały hólc Konstantin Hrjehor finalne poselstwo Europeady 2012 we Łužicy znazornił: Serbja su nětk dorosćeny lud ze samsnym sebjewědomjom kaž Němcy, Polacy abo Francozojo. So wě, zo chce Konstantin, kiž hižo kopańcu hraje, jónu sam z čłonom wubranki być.

Snadź so bórze mudri sponsorojo namakaja, kotřiž nowe serbske narodne sebjewědomje zwičnjeja – z dołhodobnym spěchowanjom serbskeho koparskeho dorosta a aktiwnych dorosćenych hrajerjow. Štož je w Drježdźanach móžno, zo podpěruja zawody koparjow z wosebitym dźěłowym zrěčenjom, zo bychu woni dosć chwile za wšědny trening měli, je tež perspektiwa za serbsku kopańcu. Z mužemi kaž z „našim Gomezom“ móžeš tež wuspěšnje za swoje twory abo posłužby wabić :-).

Europeada 2012: FC krajny sejm – nawodźa mustwow / Dźensa 17 hodź. w Ralbicach

22. Juni 2012

Hrajerjo sakskeho krajneho sejma pod nawodu Markom Šimanom (CDU) hraja dźensa w 17 hodź. w Ralbičanskim stadionje přećiwo nawodam mustwow Europeady, doniž njebudźe tamle połfinale mustwow, kotrejž stej přećiwo Serbam dobyłoj: Roma z Madźarskeje a Korutanscy Słowjency. Móžeće tež mojeho šefa Andréja Hahna dožiwić, frakciskeho předsydu Lěwicy (na foće, naprawo Hamburgčan Uwe Seeler, něhdyši najlěpši srjedźny nadběhowar po cyłym swěće), kiž je najwuspěšniši třělc wrotow krajnosejmskeho mustwa.

PS.: Połčas jenož 25 mjeńšin traješe, a přećiwnik bě njejapcy hinaši, mjenujcy wosebita serbska wubranka zamołwitych za Europeadu, mjez druhim předsyda Domowiny, Dawid Statnik. Serbja su 6:1 dobyli. Mój šef praješe: „Woni běchu přerěznje dwaceći lět młódši hač my“ – a Dawid Statnik: „Njemóžemy ničo za to, zo je serbska politika młódša hač sakska.“ 🙂

Marion Junge, zapósłanča krajneho sejma z Kamjenca, wo tutej hrě w swojim blogu: http://www.marion-junge.de/blog1/?p=6847

Woni su wuběrnje wojowali – bohužel poslednja hra Serbow na Europeadźe 2012 we Łužicy

21. Juni 2012

Serbske narodne mustwo je štwórćfinale docpěło, ale z dźensnišej poražku přećiwo Romam z Madźarskeje (0:1) w Pančan stadionje je bohužel kónc. Škoda, ale chcemy připóznawać: Hrajerjo serbskeje wubranki su wuběrnje wojowali, a nimale 2.000 přihladowarjow je jich sylnje podpěrało. Wša česć wšěm, kotřiž su na wšelake wašnje swoje mocy a čuwy zasadźowali!

Serbja su sej drje na hrajnym polu dosć a nadosć šansow nadźěłali, ale njejsu ani jeničku wužić móhli. Romojo su bjeze zmylka hrali, a sprawnje prajene njejsym po přirunanju hrow Serbow a Romow w Ralbicach do jeju hry w Pančicach z tym ličił, zo ma naše mustwo docyła wuhlady na wuspěch. Tola dźensa smy smjerćnapjatu, haj wusahowacu hru dožiwili, w kotrejž bychu Serbja z kusk zbožom tež dobyć móhli. Ale přiwisnik kopańcy wuknje čas žiwjenja filozofiske principy přez swoje emocionalne dožiwjenja, na přikład: Šansy dyrbiš wužiwać, hewak su wone nimo.

Paul Zimmermann dyrbješe zranjenja dla dočasnje kopanišćo wopušćić. Ćělnje bě tuta hra jara wužadowace, nic jenož stajneje spěšnosće dla. Žołte karty sudnika su foule kwitowali, z kotrymiž su wosebje hrajerjo mustwa z Madźarskeje sčasami přejara agěrowali. Njedźiwajcy toho je wšo dohromady fairna hra była, a přeju Romam wšo dobro za połfinale!

Dźensa w „Sakskich Nowinach“: „Besser gespielt, trotzdem verloren“ (…) „Zwar war die sorbische Fußball-Auswahl (…) die klar bessere Mannschaft. Doch es gelang ihr nicht, diese Überlegenheit auch in Tore umzumünzen. Den Roma aus Ungarn genügte hingegen eine einzige erfolgreiche Aktion in der Anfangsphase des Spiels.“

Ralbičanski stadionowy rěčnik bě kult

21. Juni 2012

Běchmoj składnostnje Europeady dotal dwójce w Ralbicach: póndźelu k hrě serbskeho narodneho mustwa a wutoru, zo bychmoj sej Romow přećiwo słowakskej mjeńšinje z Madźarskeje wobhladać móhłoj. Diskusije wo rěči dla tule dodawk k tomu:

Mějachmoj njedźiwajcy póndźelneje poražki kóždy raz wjele wjesela – tež dźakowano stadionowemu rěčnikej. Kadla za mikrofonom bě kult. Wězo do gramatiki hladać njesměš (kaž tež nic při rěčniku w Radworju), ale jeho stil bě kult. Jara přijomny hłós, lubozny wjesny slang – a němčina njebě priwilegowana, wona je hakle po serbskim teksće přišła a nic korektniša :-).

Tajku rěč nochcu w „Rozhledźe“ ćišćanu widźeć, ale při kopańcy, hdyž k tomu piwo piju – čuju so z tajkim přewodom doma w našej serbskej Łužicy. Potajkim, hólče, čiń prošu dale, mojedla přichodnje kusk korektnišo, ale nic přejara :-).

Serbja jako reprezentanća Łužicy připóznaći – Europeada je najwjetši wuspěch po přewróće

21. Juni 2012

Přeco njeje atmosfera Serbam runjewon přichilena była, hač w Kamjencu abo na wšelakich kopanišćach. Dźakowano Europeadźe a kooperaciji Domowiny ze wšelakimi partnerami je wšo hinak. Štóž tuchwilu internetne strony zapadolužiskeho koparskeho zwjazka čita (http://wf-verband.de/EUROPEADA2012/index.htm), („Die Lausitz ist heute Blau–Rot–Weiß“), widźi hordosć cyłeje organizacije na „našich Serbow“: „Unbedingt muss erwähnt werden, dass neben den gastgebenden Sorben auch unzählige Fußballfreunde aus der gesamten umliegenden Region die Spiele live verfolgen und die Daumen gedrückt haben.“

A dale: „Die „Wubranka“ erobert von Tag zu Tag mehr Herzen für den Fußball und die Idee der EUROPEADA der nationalen Minderheiten Europas. Erwähnenswert an dieser Stelle auch dass alle 38 Begegnungen und die Platzierungsturniere am Donnertag und Freitag ab 10 Uhr auf der Müllerwiese in Bautzen ausschließlich durch Schiedsrichter und Assistenten des Westlausitzer Fußballverbandes geleitet werden. Der WFV zeichnet für die sportliche Durchführung verantwortlich und beweist sich von Tag zu Tag als kompetenter Partner des Veranstalters Domowina.“

Tak su Serbja přez Europeadu cyle samozrozumliwje jako reprezentanća cyłeje Łužicy připóznaći, woni su z wida tutuje najskerje najwjetšeje towaršnostneje masoweje organizacije regiona, WFV, wuraznje „unsere Sorben“, z kotrymiž wšitcy hromadźe přěhraja abo dobudu. Za Serbow pak je Europeada hižo dźensa najwjetši wuspěch po přewróće: Woni su swoje zjawne a akceptowane městno w srjedźišću łužiskeje towaršnosće docpěli, a to bjez podpěry někajkich mjeńšinopolitiskich juristiskich paragrafow, ale přez normalne žiwjenje. A přez kompetencu třěšneho zwjazka Serbow, Němcow we Łužicy jako partnerow zapřahnyć.

DŹENSA W 1830 HODŹ. W PANČICACH: SERBSKE NARODNE MUSTWO PŘEĆIWO ROMAM Z MADŹARSKEJE – ŠTWÓRĆFINALE! MY SO TAMLE WŠITCY WIDŹIMY!