Archive for the ‘kuriozity’ Category

Wolić hić

24. September 2017

Dźensa móžemy wolić hić. Snadź hladajo na nimale nazymske temperatury nic kaž ludźo z pjera Heinricha Zille. Wuhladach jich wčera w Maxa Liebermannowej wili napřećo swětosławnym Berlinskim přibrjóžnym kupjelam, załoženym před 110 lětami při wonym jězorje z wodu Habole.

Swoje prawo, zjawnje so kupać, je sej ludnosć němskeje stolicy brała, doniż njeje wyšnosć jej kupjele twariła. Potom přesadźachu krok po kroku přećiwo policiji kupansku modu po swojej woli, tež třiróžkate kupanske cholowy. Masy so kupacych mylachu ze swojim harowanjom bohatych susodow (tež Liebermanna), kotřiž so 1912 z protestnym listom wobarachu – podarmo.

Runje ludźo bjez wulkeho zamóženstwa dóstawaja prawo na postajenje swojeho žiwjenja jeničce na tutym puću: z nałožowanjom swojeho prawa. Dźensa směmy tež we Łužicy wšudźe so kupać, kaž nam so chce. A rozsudźić, štó ma kotru móc, ramik našeho wšědneho žiwjenja sobu postajować.

Wubědźowanje wo najrjeńše serbske jutrowne jejko 2017 za dźěći a młodostnych

29. März 2017

WAŽNY POKIW – a připódla, wšako smy wjesoły lud , zabawne widejo k interkulturelnemu njedorozumjenju składnostnje jutrownych jejkow .

 

Wettbewerb2017KinderJugendliche.pdf

Slepo w Zhorjelcu

8. März 2015

W prózdnym wobchodźe wabja w Zhorjelcu wo noweho wobsedźerja – ze Slepjanskim Serbstwom. 🙂 Jenož te črije su kusk, nó haj, přeinowatiwne. 🙂

Łoskoćiwa tema: zakoń wo zhromadźowanju / Kaolin, Serbja, Róžant a statny škit

30. Juli 2014

Za přeńdźenje přećiwo zakonjej wo zhromadźowanju přisłušny decernat Zhorjelskeje direkcije policije přepytuje demonstraciju přećiwo móžnemu wudobywanju kaolina w Róžeńće. K tomu a dotalnym wozjewjenjam ma wjele ludźi wjele prašenjow. Piwarc spyta wotmołwić:

1. Njeje to spodźiwne, zo so woni poł lěta po demonstraciji hakle abo hišće z tym zaběraja?

Ně, to je bohužel hustodosć z wašnjom, hlej prawniske rozestajenja minjene lěta wokoło 13. małeho róžka w sakskej stolicy.

2. Je to docyła poměrne postupowanje policije, so hišće tajkej naležnosći wěnować?

To je jara łoskoćiwa wěcka, wosebje we wuchodnej Sakskej. Mějachmy hižo dosć wušparanjow z nacijemi, kotřiž chcychu njejapcy pochodować, so na prawo „spontaneje demonstracije“ powołajo. To pak njepłaći, hdyž bu dny abo tydźenje do toho k manifestaciji namołwjene. Smy w swobodnym kraju žiwi, tohodla njetrjebaš wo dowolnosć za zhromadźowanje pod hołym njebjom prosyć, ale dyrbiš je jeničce přisłušnemu zarjadej přizjewić. Tak maja woni hišće móžnosć sčasom zakročić abo sej přidatne zawjazki žadać, hdyž njeskutki wočakuja. Prěni princip porjadneho prawniskeho stata je: Samsne prawo kóždemu – to pak rěka: Jeli chcemy, zo so srědki prawa přećiwo njepřećelam demokratije wužiwaja, dyrbimy je sami tohorunja dodźeržeć.

3. Njeje so w Róžeńće prosće něšto so stało, štož dotalnej praksy w Serbach wotpowěduje?

Ně, Chróšćan zběžk na přikład bě kóždy dźeń porjadnje přizjewjeny.

4. Je policija z přeprošenjemi swědkow mudrje jednała?

Ně. Potrjecheny, kiž nima zdaće wo prawniskich wěckach, móhł sej myslić, zo jemu něšto hrozy. Tule pak njeńdźe wo legalnosć abo njelegalnosć wobdźělenja na wonej demonstraciji, ale přepytowanje prašenja, štó je zamołwity w zmysle zakonja wo zhromadźowanju a by dyrbjał zarjadowanje přizjewić. Tohodla tež prepošeni jako wobwinowaći deklarowani njejsu.

5. Budźe na kóncu něchtó zasudźeny?

To jasne njeje. Jeli njeda so naležnosć dokładnje wujasnić, so jednanje zastaji. A ja wočakuju, zo wujasnjenje jim so njeporadźi, wšako su woni samo na woprawdźitych njeskutkach kaž móranja na wjesnych taflach abo wonječesćenje swjatych křižow a božich martrow dotal zwrěšćili.

Za wšě přichodne pady namakaće tule trěbnu cedlku za přizjewjenje:
http://www.landkreis-bautzen.de/download/allgemin/Versammlungen_Anmeldung_und_Merkblatt.pdf

A tule powšitkowne informacije:
http://www.mdr.de/sachsen/demonstrationsrecht100_page-1_zc-43c28d56.html

Dokumentacija stejišća Antje Hermenau:
http://www.l-iz.de/Melder/Melder/2014/07/Antje-Hermenau-Sorben-als-Staatsfeinde-56516.html

Aktualna rozprawa serbskeho rozhłosa MDR wo přepytowanju policije:
http://www.mdr.de/serbski-program/rozhlos/aktualne-prinoski/audio922312.html

Tehdomniša rozprawa MDR wo protestnej akciji:
http://www.mdr.de/sachsen/kaolin-rosenthal102_zc-f1f179a7_zs-9f2fcd56.html

Druhe rozprawy před poł lětom:
http://www.alles-lausitz.de/startseite/kamenz/10511922_Kraftvoller_Protest_gegen_den_Kaolinabbau.html

http://www.katholisch.de/de/katholisch/themen/news/page_news.php?id=28546

http://www.wochenkurier.info/sachsen/staedte-gemeinden/oberlausitz/kamenz/nachrichtendetails/obj/2014/02/21/protest-gegen-kaolinabbau-in-rosenthal-geht-weiter/

W Sakskej su Němcy „paralelna towaršnosć“

12. Juni 2014

Dźensa na dźěle w frakciskim předsydstwje: W dołhej debaće wo dnjowym porjedźe posedźenjow krajneho sejma přichodny tydźeń krótke dorozumjenje wo wobchadźenju z namjetom NPD přećiwo „paralelnym towaršnosćam“. Šibałe přispomnjenje zapósłanče: Njejsu Serbja tež „paralelna towaršnosć“? Moja wotmołwa: Ně, w Sakskej su Němcy „paralelna towaršnosć“ :-), dokelž su Serbja prěni byli, kotřiž su tule stajnje wostali. To je wulke wjeselo zbudźiło, a nichtó njeje znapřećiwił…

Rico & Roman

19. März 2014

Mój šef – frakciski a krajny předsyda sakskeje Lěwicy, Rico Gebhardt – z kónčnej narěču (wurězk) na njedawnym stronskim zjězdźe na Drježdźanskim lětanišću, hdźež bu program za wólby do krajneho sejma wobzamknjeny. Krótko do toho je jeho mandźelska z dźěćimi přichwatała, zo bychu nana wotewzać móhli. Wosebje synk Roman bjerje to jara chutnje :-). Bohužel njeje Piwarc tónle wjeršk hižo wosobinsce dožiwił, přetož měješe dalše winowatosće we Łužicy, ale mój studentski pomocnik je tute krasne widejo (56 sekundow) sčinił …

widejo: Marco Böhme

„Šeršeń“ wo přijeću Serbow w ruskim wulkopósłanstwje w Berlinje

24. November 2013

Wurězk z přinoška na stronach 10-12 lětušeho wudaća časopisa „schadźowanki“ wo wuprawje někotrych Serbow do ruskeho wulkopósłanstwa w Berlinje.
Kontakt: sersennihdynjespi@hotmail.de

Rozprawa wo Berlinskim zarjadowanju w Zhorjelskej nowinje:

http://www.goerlitzer-anzeiger.de/goerlitz/kultur/10134_sorbischer-kulturabend-in-der-russischen-botschaft.html

Antika we Łužicy

29. Oktober 2013

Nimale njeznata pohórnistwowa krajina – něhdyša kaolinowa jama w Kamjenej. Snadź tež nastork šulam we Łužicy, šulerjam wjac wědy hač dotal wo antice, zakładźe našeje ciwilizacije, posrědkować. Bjeze znajomosćow starogrjekskeje filozofije resp. mentality a staroromskeho prawa resp. žiwjenskeho wašnja njewěš, što Europa docyła je.

Swědkojo Jehovy přećiwo Krabatej

11. September 2013

Sobustawojo sektow maja druhdy spodźiwne nahlady: Tak staj so staršej – Swědkaj Jehovy – přećiwo tomu wobarałoj, zo jeju syn zhromadnje ze sobušulerjemi film „Krabat“ w kinje hlada. Zaběranje z filmiskej čornej magiju je jim z nabožnych přičin njeznjesliwe. Tutomu skurilnemu padej ma so dźensa zwjazkowe zarjadniske sudnistwo w Lipsku wěnować – runja skóržbje muslimskeju staršeju, kotrajž nochcetaj, zo so jeju dźowka na płuwanskej wučbje wobdźěla. Tajki fundamentalizm integraciji dźěći do towaršnosće njetyje.

Aktualna rozprawa wo wobsahu dźensnišeho jednanja na sudnistwje w Lipsku:

http://www.wiesbadener-tagblatt.de/nachrichten/politik/hessen/13431071.htm

Krabat je dobył:

http://www.spiegel.de/schulspiegel/bundesverwaltungsgericht-zeugen-jehovas-muessen-krabat-gucken-a-921517.html

Serb a Němc: Dawid a Goliat, nic wopor a skućićel – a wjac humora? Prošu jara!

25. August 2013

Wjace humora – tak rěkaše žadanje w komentarje na titulnej stronje Serbskich Nowin zašły pjatk. Tomu rady přihłosuju, wšako mi w serbskim zjawnym žiwjenju ironija a sebjeironija pobrachujetej. Ale, kaž je pola Piwarca z wašnjom :-), přińdźe nětkole „ale“ …

Wočiwidnje njewobsteji deficit humora Serbow Němcam napřećo, přetož k znatej a připóznatej serbskej hospodliwosći słuša, kaž je w Berlinskim Morgenposće w zwisku z dobrej rozprawu wo rjanym Budyšinje čitać, wupruženje žiwjenskeje radosće:

http://www.morgenpost.de/reise/kleine-fluchten/article119310328/Auf-nach-Bautzen-der-maerchenhaften-Dornroeschenstadt.html

… a tale njeje bjez humora a žorćikow předstajomna. Serbja su tež zwučeni, z njedostatkami w zadźerženju němskeje politiki a němskich susodow na humorne wašnje wobchadźeć, dokelž njemóžeš tysac lět jenož wopor być. Bychu-li Serbja jeničce wopory, njeby Serbstwo hač do dźensnišeho eksistowało. W našim času je jenož hišće někotrych serbskich wědomostnikow / publicistow, kotřiž w kategoriji „němski skućicel / serbski wopor“ mysla.

„Normalny“ Serb ma skerje wobraz wo Dawidźe a Goliaće. Powjetšenje wjesneho mjena „Chrósćicy“ na tafli bě runja akciji „A serbsce?“ klasiski wuraz tajkeho wědomja. Wone njeje ani zasakłe ani depresiwne, ale šibałe a suwerene. Snadź přichodnje serbske medije z wjac humorom wo tym pisaja, wšako je nutřkownoserbski diskurs woprawdźe přechutny.

Tule njech je započatk :-): Smy minjene měsacy horco wo „Witaj“ a „2 plus“ diskutowali a wo tym, hač serbske dźeći na kóncu docyła hišće porjadnje serbsce móža. Nětk běch z bědu němskich ludźi ze susodstwa konfrontowany, kotřiž dlěši puć do zdaleneje pěstowarnje na so bjeru, dokelž maja woni strach, zo dźěćo po pobyće w pěstowarni w Njeswačidle doma hižo němsce njerěči a staršeju njerozumi. – To je prosta realita, ale jara komiska.