Archive for the ‘lubosć a mandźelstwo’ Category

Hodowne powědančko z pjera Piwarca – jako dar wšěm čitarjam bloga

11. Dezember 2017

Tu je za Was – direktnje přistupna – třeća nowela Piwarca: „Handrij w hodownym chaosu“. 21 stron lektury za finale adwentneho časa, hody abo čas mjez hodami a Třomi kralemi.

W rewolucionarnej nazymje 1989 rodźeny Handrij a jeho přećelka Hanka, kotraž běše tehdom hižo pěstowarske dźěćo, staj nětk z jónkrótnymi wužadanjemi konfrontowanaj. W srjedźišću steji tón raz tema mandźelstwo w dwěmaj generacijomaj – a připódla dźe hišće wo politiski poćah: mjez přiwisnikami serbskeho parlamenta a Domowinu. A skónčnje hraje tež kopańca wjetšu rólu.

Prěnja nowela tutoho rjada „Handrij a jeho rěčna rewolucija“ a druha „Handrij mjez wjelkami“ matej mjez druhim z tym činić, štož w titulu steji. Štóž wšě čita, tón potom wšo wě.

Wjele wjesela při čitanju! (knižka je pdf-dataja Handrij_III, hlej pod titulnym wobrazom)

Handrij_III.pdf

Po wólbach přińdu wjelki – literarne žiwjenje Handrija z pjera Piwarca

28. Oktober 2017

Druhi „mini-roman“ Piwarca w nazymniku wuńdźe. Tajki žanr je přećiwk w sebi a wotpowěduje z tym našemu časej. A štó čita dobrowólnje dlěje hač hodźinku? Wjac za tajku lekturu trjeba njeje. A nic wjac hač 0,99 €.

W druhim kusk tołšim rjedźe porno prěnjemu póńdźe wo wjelki. Hač budźe do toho hižo w realiće prěni Róžeńčan wjelk zatřěleny? Budźemy widźeć. Prěnja knižka, kotraž da so dale tule skazać (po přepokazanju je knižka w běhu jednoho dnja na portalu pod „Meine Texte“ přistupna za download)

http://bestselleridee.de/text_pool_detail.php?id=299#.WeIfyztCRLM

wopisuje puć k swojoraznej wotmołwje – „Handrij a jeho rěčna rewolucija“– na wuslědki wólbow a dalše wobstejnosće we Łužicy.

To je takrjec pospyt live-literatury, literarneje fantazije na pulsu přitomnosće. W srjedźišću steji młody kadla Handrij – wězo scomter swojej přećelku Hanku. Wjele wjesela w serbskej časowej mašinje, kotraž běži najprjedy paralelnje k časej, ale přichodny wotběh je wotewrjeny.

Waše namjety za dalše kročele Handrija w žiwjenju su přeco jara witane, ale hač je přewozmje, njemóžu garantować.

Z lóštnej mudrosću Loriota dialog wo SLA, sejmiku, brunicy, 2plus atd. wjesć

30. November 2013

Po zdźěłanju koaliciskeho zrěčenja CDU a SPD je lědma štó zahorjeny, dokelž so wobě stronje hladajo na wšelake rozdźělne swětonahladne wuchadźišća do „normalneje“ koalicije njehodźitej. Bóle plawsibelny so zdawa zwjazk CDU a FDP, ale runje tuta konstelacija je minjene štyri lěta politisce na kóšty liberalnych zwrěšćiła. Němski humorist Loriot bě – runja wjele wědomostnikam – měnjenja, zo so muž a žona do zhromadneho žiwjenja poprawom njehodźitaj :-), njedźiwajcy toho bě wuspěšnje šěsć lětdźesatkow ženjeny. Płódnosć rozdźělneju polow je wjetša hač fuzija partnerow, kotrajž staj sej tak a tak bliskaj. To płaći za politiske, socialne, kulturne, ewolucionarne, přirodne, globalne a nabožne naležnosće.

Kóždy sam wězo najlěpje wě, kak by móhł swět optimalnje organizować. Pozdatnje bjez kompromisow ryzy „rozumny“. Ale by wón to stoprocentowsce zwoprawdźeć móhł, njeby k runowaze, ale ke katastrofje dóšło. Praktiski načasny přikład: Bychmy prosće dotalne njejenake wobličenje rentow we wuchdoźe a zapadźe Němskeje wotstronili, bychu tuchwilni wuchodni rentnarjo kusk wjac w móšni měli, ale přichodni, kotřiž tak a tak niše dochody na wuměnku wočakuja, hišće mjenje. Tohodla je za wšě generacije sprawne wobličenje z wužadanjom, kotrež móže lědma jedna strona sama zmištrować.

Wobstejnosće su z perspektiwy jednoliwca paradoksneho razu kaž w zwisku ze Serbskim ludowym ansamblom, přetož je połoženje wot wliwow wšelakich akterow wotwisne. Załožbowa rada je cyłkowny etat přikrótšiła, ale dźěłarnistwo je redukowanju ličby dźěłowych městnow zdźěla zadźěwało. Na to reaguje towaršnik ze žadanjom za domowym tarifom, ale to bjez přihłosowanja zastupjerjow přistajenych njeńdźe. Wotmołwa towaršnika je nětk hroženje ze šmórnjenjom cyłeho wobłuka zawoda. Ale hladajo na wosebity tarifowy škit hudźbnikow orchestra ma tež při tym dźěłarnistwo indirektnje w horšći, koho to potrjechi. Kak pod tajkimi wuměnjenjemi „rozumny“ rozsud wupada? Ćežko rjec.

A we wulkej serbskej politice? Domowina a iniciatiwna skupina stej sej lěta dołho na čuwy šłoj, ale wupuć njeje, druhu ignorować. Dokelž zjawnje w samsnym swěće skutkujetej. Potajkim płaći tež tule princip kaž na wšěch horjeka mjenowanych runinach, wot Loriota hač k Gabrielej/Merkel: Runje ći, kotřiž so pozdatnje do zhromadnosće njehodźa, njech dialog wjedu. Jenož tak móže dźěćo w direktnym abo přenjesenym zmysle nastać – štož tež rěka: Zhromadne projekty na dobro małeje abo wjetšeje towaršnosće.

Štóž praji, nětk pak dosaha, tomu je prajene: Tak to činimy tuchwilu tohorunja při brunicy – tamle stejimy w dialogu z přiwisnikami w přećiwnikami pokročowanja jamy Wochozy II, to je samo paradoksny třiróžk. A myslo na njespokojnosć z konkretnymi efektami modela 2plus w kubłanišćach na jednym boku a přeswědčenosću tych, kotřiž su tónle model wupjekli a jón nawjeduja, je tež tule chrobła nowa komunikaciska forma trěbna. Njejsmy hižo w časach čorno-běłych poměrow resp. zymneje wójny a wulkich blokow žiwi. Tomu dyrbimy tež z wotewrjenym wašnjom mjezsobneho wobchadźenja wotpowědować. Štó ma prawje, na kóncu nikoho njezajimuje, dokelž poslednju wěrnosć ma jeničce Bóh tón knjez.

Na Islandskej rendezvous z apom – w Serbach maja so mužojo a žony lochšo

17. April 2013

Štož tule čitamy, na to pokazuje, zo maja so cyle małe ludy kaž Serbja lochšo hač kusk wjetše, kotrež njejsu wulke dosć:

http://www.newsoficeland.com/home/technology/innovation/item/1124-new-app-prevents-icelanders-from-sleeping-with-their-relatives

Wuchadźišćo: “The Icelandic population is very small and all Icelanders are related.” Runja Serbam potajkim, ale “yet, it is big enough so everyone doesn’t know one another” – porno Serbam, hdźež kóždy wě, kotry stopjeń přiwuznosće mjez nim a wšěmi druhimi w małym serbskim swěće wobsteji. „This means that each and every Icelander that is in a relationship, is dating a relative. In most cases those relations are distant. But not always.” Tohodla je prašenje: “But how can they know?”

„Am I sleeping with or dating my cousin?“ an Icelander might ask. The answer is: Of course you are, but how closely exactly are you related? The answer to that can be found in the online database, but people might not always have the opportunity to look that up when they are for example out partying. But now there is a solution.” Pod hesłom „Bump the app before you bump in bed“ móžeš aplikaciju na smartfonje konsultować, prjedy hač so do łoža podataj. Tuteje techniskeje mjezykročele w Serbach trjeba njeje :-).

(Přełožk teksta do přistojneje serbšćiny njeje móžny, tohodla sym to w jendźelskim originalu citował :-))

Spěchowanski čas za Serbstwo – a komunikaciju: Starodostojna kultura trjeba načasnu rěč

9. März 2013

Za tónle přinošk sym sej jednu swojich najlubšich krawatow zwjazał, přetož chcu z nowym biskopom Heinerom Kochom započeć – jeho interview w najnowšim wudaću „Zeit“

http://www.zeit.de/2013/11/Heiner-Koch-Bischof-Dresden

sym runje z wulkim zajimom čitał. Druhe prašenje: „Móžeće hižo něšto słowow saksce abo samo hornjoserbsce?“ Jasna wotmołwa sympatiskeho muža z Porynskeje: „Nu freilich.“

ja

Piwarc w swjedźenskim outfiće k češći našeho noweho porynskeho biskopa 🙂

Mój nimale runolětnik Til Schweiger je před poł lětom w telewiziji na konopeju Thomasa Gottschalka we „Wetten, dass…?“ připowědźił, zo budźe wón z nowym komisarom „Tatort“. Jutře wječor je tak daloko. Jako rodźeny Hamburgčan so wjeselu, zo rěka wusyłanje „Witajće k nam do Hamburga“.

Wjele časa – wažny wokomik

Za nastudowanje filma trjebaš tydźenje abo měsacy, za natwar wobšěrneho słowoskłada wjele lět. A za tajke něšto bytostne kaž identitu? Jedyn wokomik. Sym tehdom jako „Marcel Braumann“ próstwu wo zastup do TCM zapodał, a woni su „Marcela Braumana“ přiwzali, druhi „n“ bě preč. Tak chětř móžeš so ze Serbom stać :-). A kajki ty sy, to ći druzy potom praja. „Katolski Serb Hamburgskeho pochada“ bě definacija na kwasu z erta dźowki swakoweje – z tym bě těz tute prašenje rozrisane.

Inwesticija časa za žiwjensku kulturu

W medijach je w artiklach wo přichodźe Serbow přeco wo spěchowanskich pjenjezach z rěču. Hišće wažniši pak je spěchowanski čas – škoda, zo so tajkile wobrot dotal njewužiwa. Štóž w lajskej dźiwadłowej skupinje abo wjesnym ansamblu sobu hraje, w chórje spěwa, basnje abo blog pisa, kulturne abo sportowe zarjadowanja organizuje atd., tón inwestuje dobry čwak swojeje eksistency do spěchowanja serbskeje žiwjenskeje kultury.

Biskop při kopańcy

Nowy biskop chce sej dosć chwile brać – nic jenož za do opery chodźenje, ale wón budźe tež při kopańcy Dynamo Drježdźany – 1. FC Köln přitomny. A z Kölnskim karnewalom njedźiwajcy noweho zastojnstwa zwjazany wostanje, je wón přilubił. Jeho identita pak so wulce njezměni, dokelž je „Bóh w Drježdźanach a Kólnje samsny.“

Ćeže při přełožowanju wěrnosće do wšědneho dnja

A što je najwjetše wužadanje Serbstwa a katolicizma dźensniši dźeń? Heiner Koch rěči w interviewje wo wocuzbnjenju mjez cyrkwinskej liturgiju a wšědnym žiwjenjom ludźi, štož wón při bjesadźe w swojej najlubšej korčmje spóznawa. Wjele ludźi njeje direktnje njewěriwych, ale nima hižo přistup k zapřijećam nabožiny, na přikład k słowu „hnada“. Potom woni praja: „Nochcemy hnadu měć, ale swoje prawo.“ Cyrkej ma „komunikaciski problem“.

Kak rěčimy wo serbskej kulturje?

Podobne problemy mamy ze słowoskładom narodneho patosa, kotryž jednym wutrobu wohrěwa a druhich wotstorkuje. W Serbach je hižo spomóžny konsens, zo přisłušnosć wšelakim swětonahladam a stronam žanu rólu při zhromadnym pěstowanju serbskeje rěče a kultury njehraje. Ale z kotrymi słowami wo swojej kulturje rěčimy, to dyrbimy w kóždej dobje znowa wunamakować.

Lubosć jako přikład za wšo druhe

To nima ničo z wonječesćenjom starodostojnych tradicijow činić. Muž a žona so dźensa tež hinak namakataj hač před sto lětami. Ale wěra do wulkeje lubosće poražena njeje, nawopak: Wona njeje ženje sylniša była hač w našej dobje, kaž cyły program kinow po cyłym swěće njepřestawajcy pokazuje. Žeńtwa z lubosće je w našich kónčinach mjeztym dawno standard, štož w starych časach hustodosć tak było njeje. Lubosćinska kultura je so pak tež w rěčnym nastupanju zasadnje změniła – a to je tež derje tak :-).

Nětk ptački picować a ptači kwas přihotować / „měšane mandźelstwa“ za ewoluciju Serbstwa

19. Januar 2013

zymske_wjedro

Rano w kuchni z woknom won do wsy hladajo so prašeš, kak móža tamle wonka pod tajkimi wuměnjenjemi ptački žiwe być – dźewjeć stopnjow pod nulu, wšudźe jenož sněh a lód. A hač do ptačeho kwasa je stajne kruty zmjerzk wodnjo a w nocy připowědźeny. Tak je najwjetši čas – wosebje za dźěći –, ptački na zahrodźe porjadnje picować, zo bychu so wone 25. wulkeho róžka ze słódkosćemi dźakować móhli.

Porowanje je – hladaj na „pisane strony“ nowin – tema, kotraž nas wšěch najskerje najbóle zajimuje. K ewoluciji čłowjestwa njeje ničo tak přinošowało kaž rituale dokoławokoło partnerstwa mjez mužom a žonu, kwasa a pytanja za žiwjenskim partnerom resp. towarša za wotrězk žiwjenja. Pospěšenje wuwića towaršnosće bu z wotkoplowanjom lubosće wot prašenja zjednoćenja wobsydstwa ze statokom w susodstwje zahajene. Tak dołho je poprawom jenož hišće „měšanych mandźelstwow“:

Hdyž móže čłowjek partnera swobodnje wolić, leži na kóncu jenož w rědkich padach z někim we łožu, z kotrymž je hižo w pěskowym kašćiku kokał. Holca z druheje wjeski je a bě hustodosć pricipielnje atraktiwniša hač susodka – a z tym so „měšenje“ započina, wšako ma wosebje tež w Serbach kóžda wjeska tradicionelnje něšto rěčnych a kulturnych wosebitosćow, na kotrež dyrbiš so potom w praksy nastajeć. To pak zlě njeje, dokelž sy so porno ekonomisce abo politisce (přez wójny abo druhe katastrofy na přikład) nanuzowanym „měšenjam“ prjedawšich časow dobrowólnje za to rozsudźił a móžeš so nad wužadanjom „hinakosće“ wjeselić.

Tak njejsu „měšane mandźelstwa“ ničo wohrožace abo načasne brěmjo cuzeho wobswěta, ale hižo mjenje abo bóle sto lět z normalitu. Bjez měšenja w běhu generacijow hrozy degeneracija – genetisce a kulturnje. Zo je na dale a wjac kwasach w Serbach partner njeserbskeho pochada wobdźěleny, je tohorunja jara derje, přetož chcemy po přeněmčenju minjeneho lětstotka tola zaso wjac ludźi „přeserbšćować“.

Spěw k ptačemu kwasej

sorben.org wo ptačim kwasu (němsce)

Wječorny a dźěćacy ptači kwas w Serbskim ludowym ansamblu

Bjez wobkedźbowanja wuwićoweho směra njeńdźe: Mysle k lětu z wosebitej ličbu – 2012

1. Januar 2012

Do noweho lěta přišedši sym so z turbulentnym hodownikom rozžohnował: 7.824 wopytow čitarjow na stronach bloga w běhu minjenych 31 dnjow je wuraz horcych diskusijow. Nětk sym na 46. měsac wobstaća serbskeho internetneho dźenika nastajeny, měrniši wulki róžk. Žiwjenjoběh je kaž sinuskřiwka, we wotměnje horje a dele – njemóžeš přeco na samsnym niwowje napjatosće abo rozbudźenosće wostać. To tež za organizm cyłeje towaršnosće płaći, kiž fazy njeměrnosće runja časam wulkich abo małych prózdnin znaje.

Budźe lětsa apokalypsa?

Po wšelakich prastarych protyčkach (Nostradamus, Maya) je lěto 2012 jako apokalyptiske lěto předwidźane, snadź samo za kónc swěta. Nó haj, wothladajo wot toho, zo je hižo lěttysacy dołho wjele njedopjelnjenych tajkich připowědźenjow, nic naposledk přez Swědkow Jehowy, praji samo zwjazkowa kanclerka Merkel: Swět je nakruchi, štož pak zdobom woznamjenja, zo móže nowy, lěpši cyłk nastać. A to je tež jadro wěšćenja Nostradamusa: Budźe něšto cyle nowe.

Digitalne je ćišćane słowo přesćahnyło

Hdyž sym w jutrowniku lěta 2008 jako konik swój priwatny serbski blog zahijił, bě blogowanje hišće komunikacija w kuće, zdalenym wot masowych medijow. Dźensa wědomostnicy trochuja, zo je w Němskej ličba wužiwarjow blogow w syći třiceći procentow cyłeje ludnosće překročiła, štož ličbje stajnych woteběrarjow ćišćanych nowin wotpowěduje. So wě, zo tónle trend, kiž poprawom hišće cyle na spočatku wuwića steji, k radikalnej změnje medijoweho swěta powjedźe. W generaciji ludźi pod pjećatřiceći klasiske nowiny faktisce hižo žanu rólu njehraja.

Lubosćinski roman w trendźe časa

Sym runje nowu knihu „Sćin běłeho ranja“ dočitał, serbsko-pólsku lubosćinsku dramu z pjera w nahraničnych kónčinach bydlaceje pólskeje awtorki, kotraž hłownje spisowaćelka njeje, ale nutřkowna architekta a nimo toho hišće molerka cyrkwinskich wobrazow. Halina Barań je rjany přikład za dalši epochalny trend w postmodernej dobje: Ludźo, kotřiž z nutřkowneje powołanosće połnje horliwosće skutkuja, hustodosć samsny abo wyši niwow hač tak mjenowani profesionalni docpěwaja.

Lajkojo profijam puć pokazuja!

Před wjele lětami sym jónu w Žitawskim dźiwadle pobył (dźensniši niwow pohódnoćić njemóžu, sym pak słyšał, zo je so tamle mjeztym wjele změniło), pozdźišo na Krawčikec žurli w Chrósćicach: Lajska dźiwadłowa skupina je definitiwnje lěpje hač profije w Žitawje hrała. Samsny fenomen sym lěta dołho SLA a wjesne ansamble přirunujo dožiwjał: Spěwarjo a rejwarjo, kotřiž su nam hudźbny program jako pilnje pěstowany konik prezentowali, su bóle esprit měli a začuća přihladowarjow jimali hač zymnje wustupowacy profije.

Tule móžeće „Sćin běłeho ranja“ skazać:
http://www.domowina-verlag.de/hs/titule/511-scin-beleho-ranja

Jenož tak:
http://www.nostradamus-2012.de/weltuntergang_2012.htm

Nowy narodny koncept: Dundać a hrać

27. Oktober 2011

50 procentow mandźelstwa je wliwapołniše wuchadźišćo hač 0,000000014 procenty cyłeho čłowjestwa – a tohodla smy so hižo z matematiskich přičin za žiwjenski model „koncentrowanje na přehladne zbožo“ rozsudźili, kaž je Maja Haderlap w swojej knize „Jandźel zabyća“ tak rjenje zjimała. Najwjetši politiski wliw tak a tak jako konsumenća mamy, tohodla nakupowanje we Łužiskim centeru we Wojerecach poručam.

Nic jenož darmotnych parkowanišćow, poměrnje niskich płaćiznow a přijomneje atmosfery bjez hektiki dla, ale dźensa bě w Sakskich Nowinach wabjenska přiłoha tutoho centera – scomter wulkim serbsko (!)-němskim přinoškom wo załoženju Domowiny. Na wirtuelnym wuchodźowanju přez stolicu Łužiskeje jězoriny móžeće sej hižo center a měšćansku wokolinu wobhladować: http://www.hoyerswerdsche.de/index.php/stadttour.html

Kruty wobstatk „přehladneho zboža“ w žiwjenju wjele muži – a mjeztym tež někotrych žonow – je kopańca. Tohodla je klětuše europske mišterstwo mustwow dwaceći narodnych mjeńšin we Łužicy z wosebitym wjerškom, na kotryž mamy so hižo nětk duchownje nastajić:
http://www.europeada2012.sorben.com/. Kotre mustwa budu na kóncu w kotrym rjedźe na prěnich třoch městnach? Prošu wo tipy, zo bychu serbscy „bookmakerojo“ swoje kwoty za sadźenje postajic móhli :-).

Bohudźak su časy nanuzowaneho partizanstwa nimo, hdyž dyrbjachu přisłušnicy narodnych mjeńšich kaž Słowjency w Korutanskej swoje „přehladne zbožo“ na statokach z partizanskim bojom přećiwo knježacej mašineriji zaničowanja zakitować. Tohodla chcemy nětk narod z dundanjom po měsće, z hraćom a ze zabawu w přehladnych kruhach pěstować. To su tola rjane wuhlady za Serbstwo 21. lětstotka!

A njezabudźće na pobyt ze swojej lubku resp. swojim lubcom w kofejowni ze serbskimi hrónčkami we Wojerowskim Łuziskim centeru – tamle je rjanych kućikow za přitulnu dwajsamosć :-).

Wulka debata wo lubosći a mandźelstwje w sakskej CDU a w katolskich Serbach: Štó je woprawdźe konserwatiwny w dobrym zmysle?

28. Mai 2011

Z horcej diskusiju wo zapowědźenym kmótřistwje tak mjenowaneho dźiwjeho mandźelstwa dla je cyłosakska towaršnostna debata, kotraž so tuchwilu w nowinach mjez liberalnje myslacym generalnym sekretarom sakskeje CDU z Łužicy, Michaelom Kretschmerom, a z konserwatiwnym šefom frakcije CDU w Sakskim krajnym sejmje, Steffenom Flathom z Rudnych horin, wotměwa, swoju analogiju w Serbach namakała. Tohodla njeje dźiw, zo je přinošk wo podawku składnostnje firmowanja w serbskej wosadźe k přirostej čitarstwa bloga wo 85 procentow přirunujo z minjenym tydźenjom wjedł.

Za tym tči eksistencielne prašenje za hierarchiju hódnotow we wšědnym žiwjenju. Steji cyrkwinski a statny „pomocny srědk“ za so radźace zhromadne žiwjenje partnerow resp. staršeju a dźěći – mandźelstwo – nad tutym žiwjenjom samym, abo je čłowjeska kwalita za pohódnoćenje moralki bóle rozsudna. To by konkretnje woznamjenjało: Radšo swěrny a w lubosći wusko spjaty nježenjeny porik, kiž so starosćiwje a rozhladniwje wo swoje dźěći stara, hač mandźelstwo, hdźež jenož wonkowna fasada trjechi, a zady jeje chwile za dźěći nimataj a muž ke druhej chodźi. So wě, zo stej kwas a zmandźelenje z krasnym wurazom bytostneje zhromadnosće, a tohodla so něhdy w žiwjenju wulka wjetšina ludźi hač do dźensnišeho za mandźelstwo rozsudźi.

Na kóncu so prašam, štó je při tutej tematice woprawdźe konserwatiwny w dobrym zmysle, wšako dźe „liberalnje myslacym“ wo zdźerženje a pěstowanje skutkowneje lubosće we wšědnym žiwjenju. Porno nim su woni, kiž sebje samych „konserwatiwnych“ mjenuja, hustodosć jara na wonkowny status za swjate dny wusměrjeni a poměrnje indiferentnje napřećo wšědnej realiće. Tohodla tež klasiska dwumoralka pod „konserwatiwnymi“ wuměnjenjemi: Oficielnje njemandźelske dźěćo je katastrofa, ale zo ma připóznaty muž-mandźelski něhdźě druhdźe tajnje swoju lubku, nó haj, to je em tak.

PS.: Piwarc je kruty přiwisnik swobody měnjenja, tohodla njebych ženje komentar wotpokazał abo šmórnył resp. z wobsahowych přičin zasahnył. Ale prošu wobkedźbujće přeco netiketu, to rěka, žane zrjanjenje wosobow. W tajkich padach dyrbju wotpowědne słowčko won brać.

Wuběrny prědar: Chróšćan farar Clemens Hrjehor

17. Mai 2011

Po tym zo je wěriwy podjanski lud w Serbach wusahowaceho prědarja Dawidowskeho přez jeho přesadźenje do Bohotskeje přisadźił, je wjeselo přeco wosebje wulke, hdyž móžeš prědowanje słyšeć, kotrež Bože poselstwo na nazorne wašnje posrědkuje. Chróšćan farar Clemens Hrjehor je znaty za prědowanski stil, kiž móže z ewangelskimi duchownymi sobu dźeržeć. Protestanća tradicionelnje wulku wažnosć na słowo kładu, štož tež słowoskładej a z tym diferencowanemu nabožnemu msylenju tyje.

Dźensniši dźeń pak je słowo tež w katolskich kruhach dale a wažnišo – dopokaz je přiběracy zajim lajkow na zhromadnym wułožowanju biblije a rosćaca potrjeba, nimo spokojenja emocijow přez zwučene liturgiske rituale tež nastorki za wšědne žiwjenje w dale a njepřewidnišim swěće dóstawać. Při tym su prědarjo kaž Clemens Hrjehor prašani, kotřiž móža poměrnje skrótka, ale ćim pregnantnišo stawiznički wo zakładnych wěrnosćach čłowječeho byća powědać. Tajke něšto smědźachmy na dźaknym nyšporje při swjedźenju slěborneho kwasa sobotu w Chrósćicach dožiwić.

Tamle dźěše w prědowanju wo stajnej transformaciji idejow, kotrež čłowjeka nutřkownje nawjeduja. Tak je to tež z lubosću, kotraž ma jenož wuhlady, čas žiwjenja wobstajnje skutkować móc, hdyž so wona přeco dale wuwiwa. Hódnoty njedadźa so konserwować, ale dyrbja w kóždym žiwjenskim wotrězku nowe formy namakać. To sej wěstu zmužitosć wužada, přetož je kóždy krok z rizikom zwjazany. Na tute wašnje pak wostawa samo mandźelstwo poł lětstotka abo dlěje inspirowacy a zajimawy projekt.