Archive for the ‘Wosadnik’ Category

Prošu mjenje politiki!

8. März 2009

Nowiny čitajo chcu zhonić, štož je zajimawe, a wočakuju, zo žadyn „politiski“ filter njeje, kiž by zajimawym rozprawam zadźěwał. Ja mjez druhim njerozmuju, čehodla njeje so cyła – měsacy dołha – diskusija w serbskokatolskim ludźe wo nowym Wosadniku w nowinje wotbłyšćowała, doniž njeje oficielne stejišćo rěčneje komisije dóšło (kotrež bé dawno wotwidźeć) a doniž njeje so čitarka zmužiła, nimale wšě diskutowane łoskoćiwe dypki w dopisu naličić. Tydźeń do toho je nowina drje z wulkim zapozdźenjom prěni krótki artikl wobsahowje Wosadnikej wěnowała, ale z tym přewažnje zaćišć sposrědkowała, zo jenož ći kritizuja, kotřiž njewědźa, wo čo dźe.

 

To pak je jenož jedyn aktualny přikład, kiž mje dopomni na podawki do wulkeje demonstracije w Berlinje. Kruh načolnych Serbow je bjez Domowiny podpismy za serbske naležnosće w němskej zjawnosći zběrał, hačrunjež je poprawom hłowna funkcija třěšneho zwjazka, Serbstwo w zjawnosći politisce zastupować, wězo hromadźe z tak wjele kaž móžno Serbami. Ale žurnalist njech dobry žurnalizm čini, bjez dźiwanje na zajimy ludźi, z kotrymiž abo přećiwo kotrymž chce politiku činić. A farar njech so nabožinje wěnuje a nic politiskemu wojowanju přećiwo Domwinje, čehoždla njesmědźeše nowy Wosadnik w Ludowym nakładnistwje Domowinje wuńć.

 

So wě, zo ma kóždy wosobinske politiske měnjenje a je tež zastupuje a so w diskusijach prócuje, přihłosowanje žnjeć. Ale hdyž chce w małym ludźe telko kralow wulku politiku činić, to jenož k zlemjenju čiłeje zjawneje diskusije – hlej na zhromadźiznu TCM – a efektiwneje dźěławosće na dobro Serbow wjedźe. A ta wboha Domowina potom jenož wjele papjerow, w prastarym stilu popisanych, produkuje, kotrež jeje bjezmócnosć dokumentuja.       

Zanjechany potencial w katolskich Serbach

21. Februar 2009

Rańšim mysličkam, kotrež sym w kupjelach Schlemje, hdźež mějach wčera wječor słužbne wuradźowanje z načolnym lěwicarskim politiskim personalom Sakskeje, w hotelowej stwě sedźo napisał – po štyrjoch hodźinach spara –, chcu nětk po nawróće do Łuha a připołdnišim sparje kusk něšto dodać.

 

Najwažnišo w žiwjenju je wužiwanje potencialow, nic kultiwowanje słabosćow. Zaso móžachmy rozprawu wo našej wohroženej serbskej rěči čitać, ale mi bjezkónčne skiwlenje wo tutej temje na čuwy dźe. Rěčmy wšudźe ze wšěmi Serbami stajnje serbsce, potom maćeršćina wohrožena njeje.

 

Potencial ma něšto z potencu činić. Politika pyta potentneho inwestora, hdyž dźe wo wuwiće hospodarskeho stejnišća, a po katolskich regulach je impotenca zadźěwk kwasej. Bjez libidinoznje pohonjowaneho zapala njeby dźiwadźelnik abo hudźbnik přihladowarjow a připosłucharjow rozpłomjenjeć móhł.

 

Ćim zrudnišo je, hdyž rěkaše na tak a tak grotestnej zhromadźiznje Towarstwa Cyrila a Metoda, kotraž je w aktualnym Katolskim Posole derje dosć dokumentowana, „zo so ze stron sekcije cyrkwinskeje hudźby rozprawa njepoda. Přičina je, zo tuta sekcija po tym, zo je nowy Wosadnik wušoł, wotpočuje.“

 

To drje rěka, po tym zo su duchowni kompetencu lajkow ignorowali a dosć kěrlušow skepsali.    

 

Na prěnjej stronje piše předsyda TCM, tachantski farar Wito Sćapan, zo pak so ze stron powołanych a zdźěłanych ludźi na chětro jěre wašnje Wosadnik wothódnoća, njejsym wočakował“. Haj, to je wězo arcyreakcionarnemu křidłu našeho klerusa jara wobćežne wužadanje, zo je dźensniši dźeń w katolskich Serbach nimale kóždy z zdźěłanym čłowjekom a ma swoje měnjenje. Lochšo by było, hdyž bychu woni hišće nad jednorym, hłupym ludom knježić móhli. Ale te časy su nimo. Tohodla ludźo sobu dóstanu, kaž knjez farar Sćapan taktěruje pisajo, zo so (Wosadnik) nam za 15 eurow na eksemplar poskića“.

 

To njeje wotmołwa na prašenje, kajke wudawki za jedyn eksemplar maće, knježe fararjo, a na kajkim konće dochody leža.

 

Nimo toho njeńdźe kaž prajene wo někajke njedostatki Wosadnika, ale wo Wašu srjedźowěkowsku lubowólnosć, z kotrejž z wěrwiym ludom wobchadźeće. Napjatosće, wo kotrychž pisaće, sće sam naparali. Nowy Wosadnik je dokument zanjechanja duchowneho potenciala katolskich Serbow přez arogancu staroklerikalneho statusoweho myslenja.

 

Štóž so wosrjedź tuchwilneho fiaska wróćo hladajo na wuprajenje powoła „Njeprašejmy so stajnje za nowym Wosadnikom, modlmy so radšo, zo so derje radźi!“, kotrež „pozbudźowaše“, spyta so na cyle zezadkarske wašnje swojej winowatosći wuwinyć a wšo na hłupy lud wotsuwać, kotryž snadź njeje so dosć modlił.   

Mandat měšnikow, kompetenca lajkow

19. Februar 2009

Hladajo na zlemjenje Towarstwa Cyrila a Metoda přez arogantnych a zezadkarskich duchownych, kotřiž wo wažnych naležnosćach ničo prajić nochcedźa, na pačenje katolskich Serbow přez rozkory mjez měšnikami a rozpušćenje konferency katolskich duchownych, a na fiasko z nowym Wosadnik, kiž bu wot duchownych bjez profesionelneho lektorata do zjawnosće pušćeny, po tym zo su woni znajomosće fachowcow, hač su to hudźbnicy abo překupcy, ignorowali. A nětk samo wočakuja, zo mamy my normalni wěriwi hišće na knihu z nawjac zmylkami w jednej knize po druhim swětowym wójnje hordźi być!

 

So wě, zo njejsmy hordźi, wšako su woni wulki dźěl zmylkow z wotpohladom worali. Je wulki čas, sej wuwědomić, kajki mandat maja měšnicy, kajke kompetency lajkojo, wšako je druhi Vatikanski koncil wuznam lajkow na našim modernym swěće wospjet a wuraznje wuzběhnył. Měšnik ma so starać wo swjatu liturgiju, kotraž je wutroba cyrkwje. Jeho nadawk je sakramentalna realna prezenca Chrystusa jako jadro jednoty wosady a našeho podjanskeho luda. Mandźelski seminar pak na přikład čini radšo a lěpje čłowjek, kiž je sam ženjeny a wě, wo čim rěči. A tak to bohudźak tež so stawa.

 

Měšnik nima trjeba, eksperta na hodpodarskim abo zarjadniskim polu być. Wón njeje ani předewzaćel ani hudźbnik. Jemu njepřisteji, samowólnje kěrluše změnić, přetož tule jedna so wo nabožne spěwy luda. Nětk je w katolskich Serbach wulka wadźeńca mjez lajkami wěckow dla, kotrež su duchowni naparali, hačrunjež za to přisłušni njejsu. Z toho móže serbskokatolski lud w zmysle koncila konkluziju sćahnyć, sam rozsudy do ruki wzać, kotrež su tak a tak nadawk lajkow. A jeli bychu so skónčnje wšitcy serbscy duchowni na swoje poprawne nadawki dokoławokoło sakramentalneje jednoty našeho małeho luda koncentrowali, by mjenje mjerzanja a wjac jednoty mjez nami było.  

Lube wjednistwo TCM!

16. Februar 2009

Njebychmoj-li so sobotu w Drježdźanach zhromadnje z dźesać tysac druhimi ludźimi – mjez nimi běstaj tež Jan Nuk a Benedikt Dyrlich ze serbskej chorhoju – na swojoraznym wubědźowanju wobdźeliłoj pod hesłom „Na kajkej stronje je wjac ludźi na dróhach, w ćahu nacijow abo w demonstracijach demokratisce myslacych čłowjekow?“ (město toho, zo by měšćanski zarjad runja Budyskemu wokrjesnemu zarjadej dosć kuraže měl a pochodowanje nacijow zakazał), bychmoj so na přikład na hłownu zhromadźiznu TCM podać móhłoj.

 

To tež njeby ničo pomhało, wšako nochcyše wjednistwo TCM po rozprawnistwje rozhłosa na tuchwilne prašenje wšěch prašenjow w katolskich Serbach wotmołwić: Kak je to z pjenjezami za Wosadnik? Po tym, zo dale ničo wědźeć njesměmy, je wuwzaćnje dowolene, kusk trochować: Jeli trjebaja za kóšty Wosadnika jenož na přikład dwě třećinje płaćizny – to móže tež wjac abo mjenje być, wšako ničo dokładnje njewěmy –, dokelž maja tuńšeho ćišća w Čěskej, darmotneje dźěławosće na projekće wobdźělenych a rozšěrjenja přez fary dla wjele mjenje kóštow hač za normalnu, w Němskej zhotwjenu knihu, a wšě Wosadniki předawaja, bychu woni na kóncu 40.000 eurow wyše měli. (Snadź wotpowěduja kóšty tež eksaktnje płaćiznje, ale čehodla to so njepraji?)

 

TCM je zapisane towarstwo, po zakonju powšitkownosći wužitne a tohodla njesmě sej wone hospodarsce dobytk zasłužić, štož z dawkowym priwilegom za towarstwa zwisuje. Jeli je wjednistwo TCM woprawdźe wozjewjenju zadźěwało, štož financowanje najwjetšeho publicistiskeho projekta minjenych lětdźesatkow w katolskich Serbach nastupa, to wězo automatisce njerěka, zo tamle něšto w porjadku njeje. Ale telko intransparency je podhladne. Snadź so jednoho dnja samo financny zarjad Wosadnikej wěnuje, hdyž to tak dale póńdźe.    

 

Tohodla, lube wjednistwo TCM: Njewěm, štó je Waš poradźowar. Swjaty duch wón wočiwdnje njeje.

Serbske „kmjeny“ – system wulkoswójbow

15. Februar 2009

Njedawno je znaty afriski statnik prajił, zo w krajach čorneho kontinenta demokratija po zapadnym přikładźe z wubědźowanjom mjez politiskimi stronami móžno njeje, dokelž hraja kmjeny najwjetšu rólu w zjawnym žiwjenju a tohodla njeje žanych stron, kotrež njewotwisnje wot kmjenow skutkuja. Po mojim zdaću je Južna Afrika z jeničkim wuwzaćom, ale tamle je wurjadnych poměrow. Hladajo na njefungowacu demokratiju w Serbach a wěčnu wadźeńcu wo wbohu Domowinu a jeje pozdatny centralizm móžemy konstatować, zo mamy takrjec w Serbach runja Africe struktury „kmjenow“.

 

Na prěnjej runinje su to naše wulkoswójby. W ludźe bjez swójskeho stata a wosrjedź kulturnje a rěčnje cuzeje wokoliny, kotryž so lědma jónu zjwanje jako lud pokaza – naše rěče wo „serbskim ludźe“ wotpowěduja tola skerje proklamaciji hač wopisowanju woprawdźiteho połoženja –, přewozmje socialna syć wulkoswójby wjele wjac funkcijow, hač by w suwerenym ludźe z wašnjom było. Němc wostanje Němc, hdyž njeje ničo wot jeho swójby wyše wostało, ale hdźe móže přerězny Serb swoju maćeršćinu prawidłownje nałožować, so intensiwnje ze serbskimi wěckami zaběrać – jeli nic w swójbje? Hač na narodninach, kermuši, hodźoch, jutrach, hač dźe wo zeleny štwórtk abo wšelake druhe wjerški nabožneho žiwjenja – my so tola husćišo hač normalne němske swójby widźimy a tworimy při tutej składnosći tež bjez wotpohlada připódla swój system zhromadneho myslenja wo swěće, takrjec swójbny swětonahlad.

 

Tak ma kóžda serbska wulkoswójba swój wosebity swětonahlad a so wězo – znajmjeńša indirektnje – wot druhich serbskich swójbow z wočiwidnje hinašim swětonahladom wotmjezuje. Tohodla je to tak smjerćwažne, w serbskej bjesadźe, hdyž so wo dotal njeznatym mjenje powěda, hnydom přez prašenja přepytować, hdźe je tónle čłowjek w systemje serbskich wulkoswójbow zakótwjeny. Hdyž so něchtó w zjawnosći k někajkej łoskoćiwej tematice wupraji, so mjenje z jeho argementaciju zaběra hač z jeho wosobinskim motiwom, kiž dyrbi ze swójbnym pochadom zwisować.

 

Systemej wulkoswójbow so serbske towarstwowanje přidruži, to rěka eksponenća wulkoswójbow wojuja jako zastupjerjo towarstwow wo swój podźěl na serbskim pjenježnym horncu resp. na serbskim mócnarskim aparaće. Móžeš sej to wosebje w internecach wobhladać, hdźež so w škiće anonymity wšo praji, štož njeby sej nichtó w čitarskim lisće nowinam napisać zwěrił. Domowina so w tajkich forumach politiki dla njekritizuje, ale dokelž je pozdatnje Nukec abo Cyžec swójba přemócna. Tak móžeš kóžde prašenje w towarstwowym žiwjenju na swójbny aspekt redukować.

 

So wě, zo je tež ludźi, kiž su hinašeho měnjenja hač mainstream jich swójby abo towarstwa. Maja woni pak w Serbach dosć swobody, swoje wotchilace měnjenje tež wozjewić? Na diskusiji wo nowym Wosadniku móžeš rjenje analyzować, kak serbska towaršnosć njefunguje. Měsacy dołho sy kritiske argumenty słyšał, kotrež běchu nětk tež w přinošku Trudle Kuringoweje w SN napisane. Ale ze zjawnej wotewrjenej debatu klacaše. Třeći stołp serbskeje kmjenoweje struktury su mjenujcy poprawom katolscy duchowni. Woni su po tradiciji spušćomna narodna awtorita – byli. Mjeztym zo je wjetšina ewangelskich fararjow z byrgarskej němskej mandźelskej swoju serbsku wosadu zruinowała, je katolska fara jadro serbskeho žiwjenja wostała.

 

Z rozpušćenjom stajneje konferency serbskich duchownych a čujomnym pačenjom serbskokatolskeho duchownstwa je so třěcha najsylnišeho serbskeho miljeja sypnyła. Wyše wostanjetej za kulisami wujowstwo a donošowanje. Je nowy Wosadnik wupłód Nawkec swójby, su kritikarjo za stasi dźěłali, tak so bledźi. Ja sam cyle sprawnje přidam, zo bych, njedźiwajcy wšěch  kritiskich dypkow, nowy Wosadnik akceptował, hdyž bych wědźał, zo su duchowni, kotrychž mam za wosebje rozumnych, na projekće wobdźěleni byli resp. jeli by wulka wjetšina serbskich duchownych po diskusiji wo kontrowersnych prašenjach wotpowědnje rozsudźiła.

 

Čłowjek 21. lětstotka wočakuje transparencu a je zwólniwy, potom tež pragmatisce rozsudy wjetšiny resp. legitimowanych ludźi akceptować. Ale njejsmy hižo poddani, kotřiž su samowólnosći knježkow wustajeni. Tohodla trjebamy nad wšěmi kmjenami porjadne třěšne struktury: Ani Zwjazk serbskich wuměłcow ani Serbske šulske towarstwo njejstej legitimowanej, nad „serbskim ludom“ knježić, ale zwjazkowe předsydstwo Domowiny. A štož serbskokatolske žiwjenje nastupa, je jenož dweju móžnosćow: Pak namakaja duchowni bórze puć do jednanjakmaneje jednoty pak so kaž w němskej katolskej cyrkwi centralny gremij lajkow twori, kotřiž směrnicy serbskokatolskeho žiwjenja sobupostajeja.  

Posledni raz: Nowy Wosadnik – płaćizna

4. Februar 2009

Čehodla płaći jedyn eksemplar noweho Wosadnika pjatnaće eurow – potajkim třiceći hriwnow –, hdyž su wšitcy sobuskutkowacy čestnohamtsce, to rěka darmotnje dźěłali (štož poprawom nimam za prawje, wšako ma cyrkej za tajki wažny projekt pjenjezy wyše měć, za čo cyrkwinski dawk płaćimy?), hdyž bu kniha w Čěskej – tuńšo – ćišćana a je so přez fary bjez kóštow za rozšěrjenje předała? A to w jara wulkim nakładźe na jara małym teritoriju – efektiwnišo njeńdźe! Štóž so kusk z produkciju knihow a časopisow w Němskej wuznaje, móže so jenož płaćiznje Wosadnika dźiwać. Što kupc Wosadnika wšo sobu financuje?

Puć do sekty

4. Februar 2009

Čini wulke lottowe dobyće přijimarja dołhodobnje zbožowneho? Po ameriskej statistice hustodosć nic, ale samo njezbožowneho, štož po mojim měnjenju najskerje z tym zwisuje, zo trjeba čłowjek za porjadnu sebjedefinaciju někajke – tež pjenježne – hranicy, znutřka kotrychž móže swoje byće takrjec koncentrować. Wčera wječor w Choćebuzu pobywši sym na přikład hakle w třećim wobchodźe sakko w mojej wulkosći 94 namakał, tónle wobmjezowany sortiment je mi wubranje jara wolóžił …

 

A běda tomu, kiž njeznaje splažne hranicy a so začuwa jako dwusplažnik – komu ma so tajki čłowjek přiwobroćeć? A kajki wbohi raws je kosmopolit, kiž je pozdatnje wšudźe doma a zdobom woprawdźitu domiznu nima. A w kajkej kulturje je multikulti-kadla zakótwjeny, z kim ma so wón chutnje wuměnjeć, hdyž tři pozdatnje hižo wšo w nim nutřka? Bjez wobmjezowanjow njeje poćahow. A bjez poćahow njeje bytostnych spóznaćow. To su hižo awtorojo stareho zakonja wědźeli, kotřiž su pisali, zo muž žonu spóznaje.

 

Tohodla je tež njezmylnosć bamža něšto strašne, dokelž to poprawom rěka, zo swjaty wótc žanoho druheho njetrjeba. Mało ludźi je sej wědome, zo je tuta njezmyslnosć na jara mało wuprajenjow k jadru wěry wobmjezowana. Encyklika „Humanae vitae“ na přikład, z kotrejž je bamž Pawoł VI. zadźěwanje podjeću z pomocu pile zatamał, je wozjewjenje zajimaweho telogiskeho mènjenja, ale za wěriwych zawjazowace njeje.

 

Bohužel pak stara tradicija wuzběhnjenja wuznama hierarchije w katolskej cyrkwi k tomu wjedźe, zo su duchowni čim bóle samlutcy, ćim wyše steja – chibazo je něchtó tajki towaršliwy typ kaž bamž Jan Pawoł II., kotremuž njeje so tohodla ničo wažneho nimokuliło. Amtěrowacy bamž pak wěri do swojeje inteligency a hnady wysokeho hamta – a wočiwidnje na poměrnje normalnych ludźi njeposka. Sćěhi su katastrofalne. Awtoritarny system bjez transparency je w našim swěće k zwrěšćenju zasudźeny.

 

W zwisku z předstajenjom noweho Wosadnika rěkaše w Katolskim Posole, zo runja Gotteslobej cyrkwinskoprawnisce zakazane je, sobuskutkowacym dźakować, potajkim njesměš dokładnje wozjewić, štó je nětk za što zamołwity. Tón princip njetransparency je dospołnje njeakceptabelny. Ja chcu wědźeć, štó je we Wosadniku čisło strony 666 šmórnył, prawopis wotstronił, melodiju kerluša „Ćicha nóc, swjata nóc“ skepsał atd. Ja nowy Wosadnik njekupju, dokelž zhromadnu wěc z ekstremistami nječinju.

 

Ja sej žadam zjawne wujasnjowanje, hač je to wěrno, zo je so mjeztym připóznaty serbski duchowny napřećo biskopej wot rěče Wosadnika distancował? Ja wobsteju na informaciji, štó je wosobinsce wina na tym, zo njebu naše serbske nakładnistwo do tutoho projekta zapřijate? W Awstrikskej je bamž nětk swjećaceho biskopa přećiwo woli diecezy powołał, kiž steji po měnjenju konserwatiwnych nowin za puć katolskeje cyrkwje do sekty“. Je w Serbach tež ludźi, kotřiž su na tajkim puću. To njeje mój puć.      

 

Jeli katolski měšnik žonu lubuje a so k swojej lubosći wuznawa, njesmě dale duchowny być. Ale štóž je přiwěrkojty abo holocaust prěje, tón je powołany, cyrkej reprezentować?!

Bjez pluralizma žana wěrnosć

10. Januar 2009

Pluralistiska towaršnosć je z hladanišća wjele ludźi jenož něšto takrjec pasiwnje pozitiwne: Dyrbiš spodźiwne abo samo moralisce dwělomne nastajenje druhich znjesć, zo njeby k mjezsobnym namócnym rozestajenjam přišło. W tymle zmysle je naša pluralna towaršnosć jenož wupłód tolerancy. Hinaši wid, kiž tež jenož pasiwnje wusměrjeny je: Moderny indiwidualizm wuzběhuje wuznam wosobinskeho „ja“ a je napřećo druhim tendencielnje bjezčućiwy, njech woni mysla a činja, kaž jim so chce, hłowna wěcka, zo móžu sebje samoho bjez mylenjow zwoprawdźeć.

 

We woprawdźitosći je pluralizm najwažniši srědk čłowjeka, so absolutnej wěrnosći krok po kroku přibližeć, wšako nima žadyn jednotliwc w swojim duchownym, dušinym a ćělnym wobmjezowanju direktny přistup k wěčnej, njewobmjezowanej wěrnosći. Je hódne a sprawne, swójskemu swětonahladej na čas žiwjenja swěrny wostać, ale dyrbiš přeco wobkedźbować, zo njeje žanoho perfektneho systema myslenja abo wěrywuznaća na swěće, w kotrymž so bóh ryzy pokaza.

 

Tež štóž je jako katolik přeswědčeny, zo móže cyrkwinska wučba wjele dobreho k polěpšenju čłowječeje powahi přinošować, ma k wědomju brać, zo so katolska wěra w kóždej dobje a kóždej kulturje nastajnosći dale wuwiwa, objektiwnje w dušepastyrskich wułoženjach dogmow, subjektiwnje w wosobinskej a towaršnostnej přijimliwosći nabožnych wuprajenjow. A tež tak mjenowane dogmy maja swoje stawizny, kotrež dale póńdu. Z kóždej nowej dogmu so dotalna wučba kusk zrelatiwizuje, to rěka ludźo 19. lětstotka su na hinaše wašnje wěrili hač my ludźo 21. lětstotka, a w 23. lětstotku budu zaso hinak wěrić.

 

Njech dobry katolik runja dobremu protestantej swojemu přeswědčenju swěrny wostać. Ale kusk protestantiskeho ducha wobohaća katolika kaž kusk katolskeho začuća protestanta. Pluralizm jenož hladajo na mnohotosć swětonahladnych přistupow do wěrnosće wažny njeje, ale tež w kóždej organizaciji samej. Demokratija je najlěpši wuraz pluralizma; hdźež jedni samowólnje nad druhimi knježa, wěrnosć sama zwrěšći, přetož potom je nuza na přistupje bazy k wěrnosći, a štož wyšnosć prěduje, je přejara wotzběhnjene, zo by móhło wěrno być.   

 

Tohodla je njedemokratisce a wot bazy njelegitimowanje nastaty nowy Wosadnik hladajo na zhromadne přibliženje wěrnosći połnje njeakceptabelnych spodźiwnosćow, kotrymž sym so w blogu wjacekróć wěnował. Wšudźe w Serbach so wo nowym Wosadniku horco diskutuje, jenož nic w serbskich medijach. Wučerjo na přikład njewědźa sej rady, hač woni smědźa přichodnje prawopisne zmylki katolskich šulerjow našmórnyć, hdyž maja so dźěći po wopakpismje Wosadnika.

 

Wěrnosći by pomhało, jeli bychu samospodobni knježa, kotřiž su tónle dokument swojeho pycharstwa wupjekli, prěni nakład noweho Wosadnika hnydom wróćo ćahnyli a do kontainera za staru papjeru ćisnyli.     

Žadosć za wutrajnosću mjasa

9. Januar 2009

Mała kucharka swoje 107. narodniny docpěła njeje. Zo je wona nětk na prawdu božu wotešła, mje runje tak překwapi kaž prjedy smjerć Ernsta Jüngera abo filozofa Gadamera, kotrajž staj wjac hač lětstotk po swěće běhałoj. A hdyž – abo jeli? – ma so jónu Johannes Heesters ze zemskim žiwjenjom rozžohnować, budu so dźiwać. Je ludźi, kotřiž su znamjo našeje nadźije na bjezkónčne žiwjenje – Marja Rachelowa bě jedna tych wosobinow.

 

Porno awtoram noweho Wosadnika nichtó do zrowastanjenja mjasa njewěri, tohodla sej wažimy ludźi, kotrychž mjaso dołho na zemi wutraje, wšako njemóžemy sej ničo intensiwnišeho hač wědomy mjasny lóšt předstajić. A w starobje nam znajmjeńša dobra jědź jako wjeršk dnja wostanje, cyle wothladajo wot wšěch něžnosćow w mjezsobnym wobchadźe, za kotrež swoju kožu trjebamy – jandźel njemóže to dožiwić.

Serbske lěto 2008

31. Dezember 2008

Serbske narodne koparske mustwo je na Euopeadźe narodnych mjeńšich cyły kontinent zahoriło, jara derje hrało a njewočakowane dobre wuslědki docpěło. Prěnja serbska demonstracija w němskej stolicy – sydom lět po tohorunja historiskim Chróšćan zběžku – bě wuspěšna hladajo na financowanje Załožby a je snadź samo k dołhodobnemu zrěčenju wo zaručenju přichoda pjenježneho wuhotowanja Załožby přinošowała. Prěni raz w sakskich stawiznach je so Serb z ministerskim prezidentom stał, a z tym steji prěni raz w ZRN po druhej swětowej wójnje na čole zwjazkoweho kraja přisłušnik etniskeje mjeńšiny.

 

Z nimale třista blogowanymi přinoškami sym so tule na nutřkoserbskej rozmołwje wo temach serbskeho lěta wobdźělił. Blog bu lětsa mjez jutrami a swjatkami załoženy a ma mjeztym swoje swěrne čitarstwo, kotrehož ličba dale stupa. Přeju wšěm zbožowne nowe lěto z lubymi a wuspěch w powołanju a ze swojimi konikami. Směm přeradźić, zo mam nětk štyri diskusrybički, dokelž předawar měnješe, zo dyrbjałoj doskónčne wobsadźenje akwarija hnydom k hodam zestajić, hewak by prěnja starša rybička přewjele stresa w běhu časa měła. Naš kwartet jara derje žerje, wšako mjezsobna zawisć k stajnemu dobremu apetitej dopomha.

 

Lěto 2009 steji pod wliwom swětadalokich turbulencow. Jedyn z mojich młodšich serbskich přećelow, z kotrymiž sej prawidłownje přez majlki listuju, je mi po hodźoch zrudnu powěsć zdźělił, zo budźe wón klětu bjezdźěłny. Nadzijamy so njedźiwajcy hubjeńšich ramikowych wuměnjenjow nowych pućow za našich ludźi a słowjanskeje kreatiwity při zmištrowanju wšěch wonkownych ćežow. Tohodla přeju wosebje wšěm patriotiskim serbskim předewzaćelam tež w zajimje jich přistajenych maksimalny hospodarski wuspěch.

 

Ale to woznamjenja za nas wšěch porno zadźerženju zamołwitych noweho Wosadnika, kiž dadźa we wukraju produkować: Dajmy druhim Serbam najwjetše nadawki, zo bychu sej woni swoje zežiwjenje dale w domiznje zasłužić móhli!