Archive for the ‘změna klimy’ Category

Swjaty wótc: Spěšny kónc wudobywanja brunicy! Konkluzije za wěriwych we Łužicy?

18. Juni 2015

Papst_Kohle

(Twitter dźensa)

Prěnja encyklika swjateho stoła wo wobswěće w stawiznach katolskeje cyrkwje:

http://www.berliner-zeitung.de/politik/umwelt-enzyklika-sechs-gruppen–denen-papst-franziskus-auf-die-fuesse-tritt,10808018,30980180.html

Jeho kritika na kritikarjach škita klimy so tež na tajkule poziciju poćahuje:

http://umwelt-panorama.de/news.php?newsid=285549

http://www.faz.net/agenturmeldungen/adhoc/laschet-und-tillich-weiter-gegen-kohle-abgabe-13558005.html

Encyklika „Laudato Si“ němsce:

http://w2.vatican.va/content/francesco/de/encyclicals/documents/papa-francesco_20150524_enciclica-laudato-si.html

Porno tomu chce frakcija CDU w Sakskim krajnym sejmje hišće sto lět brunicu wudobywać:

http://www.cdu-fraktion-sachsen.de/fileadmin/user_upload/content/Pressemitteilungen/150618_Energiepolitik_fuer_Sachsen_CDU-Positionspapier.pdf

BUND z chwalbu za bamža a kritiku za Tilicha:

PM-Papst-Tillich_DG

 

Nowe šwedske knježerstwo chce Vattenfallej wudobywanje brunicy we Łužicy zakazać

2. Oktober 2014

http://www.rbb-online.de/wirtschaft/thema/kohle/welzow/beitraege/vattenfall-schweden-neue-regierung-braunkohle-lausitz-ausstieg.html

Najhórši scenarij za přiwisnikow brunicowych jamow: Nowe knježerstwo Šwedskeje, towaršnika koncerna Vattenfalla, nochce jamy druhim předać, kotřiž bychu je potom dale wjesć móhli, ale so wo to starać, ze zawodohospodarskimi srědkami koncerna we Łužicy wotkryću nowych jamow zadźěwać. Z tym stej jamje Wochozy II a Wjelcej juh II na hrački stajenej. Bohu budź dźak a chwała!

„Bóh je stworił Łužicu a čert je zarył brunicu“; štó je z tym ličił, zo přińdźe wumóženje snadź ze Šwedskeje?

Z powěsćernje dpa: Auch der Sprecher der Lausitzer Bürgerinitiative «Klinger Runde», Thomas Burchardt, sagte: «Es ist eindeutig, dass in Schweden derzeit Klimaschutz vor maximalem Gewinn geht.»

Stejišćo Dawida Statnika, předsydy Domowiny, w MDR: http://www.mdr.de/mdr1-radio-sachsen/audio977016.html

Zelena Liga: http://www.windkraft-journal.de/2014/10/06/schrittweiser-braunkohleausstieg-in-der-lausitz/

Wjesołe hody a strowe nowe lěto Wam přeju – witaj, lěćo lětstotka 2013, tež k nam we Łužicy!

23. Dezember 2012

„1913 – lěćo lětstotka“ rěka nowa kniha, kotraž lěto wopisuje, hdyž je so naša nětčiša doba započinała. Literatura, wuměłstwo a hudźba su swój potencial wuměrjowali. Po dwěmaj swětomaj wójnomaj, po kóncu stareju antagonistiskeju blokow a přechadźe čłowjestwa do bjezkónčneje syće mjezsobnosće so nětk 2013, lěćo lětstotka, scomter kóncom tuteje doby bliža, nic jenož dokelž je Maya-protyka za čas po 2012 zahajenje noweje fazy stawiznow připowědźiła … 🙂 Běrtlk lětstotka po přewróće je najwjetši čas stare kolije a přežite konflikty wopušćić.

wid_hody

Apropos kolije: Rańše slědy dźensa na jutřiše hody bjez sněha pokazaja – w stopach a kolijomaj je hižo kusk wody widźeć, taće ćišći wčerawšu zymu nabok. Ničo njebudźe drje z běłymi hodami, ale přeju Wam wšěm njedźiwajcy toho krasnu hodownu naladu, rjane swjate dny, měrny čas „mjez lětomaj“ a dobry start do stroweho noweho lěta! A taće bě symbol za přewinjenje „zymneje wójny“ (mjeztym tež za změnu klimy, ale to njech tule wulku rólu njehraje, přetož njewěmy, kotry podźěl matej na tym čłowjek a słónco):

Połsta lět po 1913 sym so narodźił, sydomnaće měsacow po twarjenju Berlinskeje murje. Dźensa ani njeje cłownikow mjez Němskej a susodnymi krajemi, a mjez mojim ródnym městom Hamburgom a wuzwolenej domiznu we Łužicy njeje hižo murjow, kałatych grotow a wojakow na stražnicach, ale derje wuhotowanych awtodróhow, na kotrychž móžeš w pjeć hodźinach bjez přestawki z Hamburga do Zhorjelca jězdźić. A EU je lětsa za swój model zhromadnosće ludow bjez hranicow měrowe nobelowe myto dóstała. Na „starym kontinenće“ z – tuchwilu hišće – najstaršej ludnosću na swěće je najkompleksnišich administratiwnych strukturow, z kotrymiž móžeš zasadnje wšě nutřkowne konflikty bjez namocy rozrisać.

Stupace žiwjenske wočakowanje ludźi po cylym swěće ma něšto z ewoluciju činić: Čłowjek trjeba dale a wjac časa, zo by so w dale a kompleksnišim globalizowanym swěće zadomić móhł. 35-lětny wobydler starokamjentneje doby je starc był, rowjenk samsneje staroby w našim času je hišće „młodostny“. A hdyž dźěše lětsa wo nowe wjednistwo Lěwicy, bě w medijach tež rěč wo wuznamje Hamburgskeho politikarja z mjenom Jan van Aken (51), a wón bu předstajeny jako „młody muž“. Nó haj, z mojeho subjektiwneho wida su abrahaminy z dobrej składnosću, so jako dorosćeny začuwać, kiž je nětk poprawnym wužadanjam žiwjenja zrosćeny. Stary być móžeš potom hišće běrtlk lětstotka pozdźišo – abo tež nic …

Čehodla tež klětuše „serbske lěćo lětstotka“ wočakuju? Dokelž maja ludźo wšě „ekstremy“ syte, kotrež su protagonisća wšelakich kulturnych a politiskich prudow sto lět dołho wuspytowali. Jim je tež dosć a nadosć wospjetowanjow starych konfliktow dokoławokoło přeco samsnych temow a to lětdźesatki dołho ze samsnymi eksponentami w zjawnych rozestajenjach. Na proze k nowej dobje steji přesyćenosć – přewjele informacijow, přewjele tworow, přewjele poskitkow a přewjele žwanjow na wšěch kanalach dla. A konkluzija je, jenož to k wědomju brać, što nam dale pomha k połnosći zhromadneho žiwjenja.

Nazymu w Hamorje

1. November 2011

Při małym swójbnym wulěće – wuhlady z puća na „wuchu“: Hoberske mróčele nad Hamorskej milinarnju. W dobje diskusije wo změnje klimy njepřeswědčace wašnje dobywanja energije …

W jadrje wuměłsce tworjeneho „wucha“, noweho elementa krajiny, přińdźeš do „bubončka“: amfiteatra, to rěka twar dźiwadła pod hołym njebjom, hdźež bjez wótřerěčaka perfektnu akustiku dožiwić móžeš.

Tradicija amfiteatrow: http://de.wikipedia.org/wiki/Amphitheater

Wirtuelne a realne ćeže

13. Januar 2009

Štóž ma wjele majloweho wobchada a i-majlowu-adresu, kotraž je něhdźe w interneće napisana, dóstawa dosć poskitkow w zwisku ze splažnym wobchadom, na přikład podlěšenje cympla abo pomocne srědki za skrućenje muskeho stawa. Štóž ma sam dosć wjesela we łožu, móže tajke spammajle ignorować a hnydom hasnyć, doniž njepytnješ – kaž je to njedawno tež redaktorce Budyskeje redakcije Sakskich nowin so stało, kotraž  je potom wo tym rozprawiła –, zo dóstanješ wotpowědny poskitk wot swójskeje (!), wočiwidnje wot druhich falšowaneje, majloweje adresy.

 

Tajke něšto sym nětk tež ja runja wjele druhim ludźom dožiwił, čehoždla dyrbjach swojej adresy pola gmx jako spam registrować dać, zo njebych přichodnje w mojim mjenje wobćežowany był. Porno wirtuelnym ćežam njedadźa so realne tak lochko wotbyć. Ale znajmjeńša porjadna analyza dyrbi być: A po najzymnišej fazy wjedra minjenych sto lět w našich kónčinach so prašam, hač  tola nima čěski prezident Klaus prawje, kiž je w knize twjerdźił, zo njeje žaneje wot čłowjeka wobwliwowaneje změny klimy, ale snadź rozdźělnych aktiwitow słónca.

 

Za tule chrobłu teoriju rěči, zo je w stawiznach zemje hižo cyle bjez čłowjestwa dołhich dobow z lodowcami po wšěch krajach było, ale tohorunja napřećiwne, to rěka časy z polomaj bjez loda. W tutej rubrice „změna klimy“ sym so jónu Klausowej knize wěnował, a dyrbju přidać, zo je wona smjerćaktualna. Snadź je naš jenički problem, zo mamy dale a wjac wědomostnikow, kiž kóždužkuli składnosć wužiwać dyrbja, swoju wičnu hódnotu přez wuhódnoćenje dale a wjac statistikow demonstrować a su tohodla tež „změnu klimy“ jako woblubowany šlager wunamakali.

Vaclav Klaus a změna klimy

19. Mai 2008

Čěskemu prezidentej Vaclavej Klausej je so spožčił sakski zasłužbny rjad. Sym wćipny, hač budu wobswětoškitarjo hišće raz přećiwo njemu protestować, wšako je Klaus njedawno ze swojej knihu wo změnje klimy wulke pohóršenje zbudźił. Kamjeń postorka bě Vaclava Klausowe stejišćo, zo běži cyła diskusija na škodu swobody a je tak a tak přehnata. Z wičnohospodarskeho hladanišća móžes na to wotmołwić, zo bě wulki čas, zo skónčnje něchto w debaće wo klimje znapřećiwjenje mainstreamej porjadnje zwični. To je Klausej wočiwidnje derje so poradźiło.

 

Ale tež z wida diskursiwneho myslenja bě tajka kniha na městnje. So wě, zo je poprawom hišće dosć teorijow wo nastaću parnišćoweho efekta na wikach: pře wjele awtow, pjerdźace howjada … Fakt je, zo je telko wuhlikoweho dioksida w atmosferje kaž ženje do toho w stawiznach čłowjestwa a zo su aktiwity wjac hač šěsć miliardow ludźi po cyłym swěće z přićinu za wustorkowanje tuchwilnej runowaze klimy škódnych maćiznow. Zdobom pokazaja ekstremne přeměnjenja klimy w zańdźenosći na to, zo njeje dołhodobneje runowahi samsneje klimy.

 

Při wšej aktualnej apokalyptiskej hysteriji, kotraž nadeńdźe nimale kóždy wječor městno w telewizijnym programje (kaž prjedy „mrěće lěsa“), njesměmy na to zabyć, zo je čłowjek hižo powjerchowu strukturu zemje dawno změnił – teritorij Němskeje na přikład běše jónu k dźewjećdźesać procentam z lěsom porosćeny, w našej dobje je to jenož hišće třećina –, a tohodla je poprawom jasne, zo naše byće tež atmosferu wobwliwuje. Nimo toho sej dowolu „politisce njekorektne prašenje“, čehodla smědźa wulkanowe wubuchi, Golfowy prud a słónčne aktiwity klimu wobwliwować, ale nic my, ta „króna na stworjenju swěta“ …

 

Jeli je Klaus ze swojej prowokaciju nastork dał, wo tym přemyslować, zo njeje změna klimy tón problem, ale falowaca kompleksnosć debaty w masowych medijach, móhła jeho spodźiwna kniha samo kolektiwnemu rozumej k rozrostej scomter lěpšimi techniskimi rozrisanjemi za wobmjezowanje změny klimy dopomhać.